300日浪遊到南極，直到世界盡頭（IV）

但唔沖涼總係瞓得唔好，頭又痕周身唔舒服

除咗巴黎仲諗住去邊？雖然唔樂觀但祝你順利

我都回憶返晒嚟

又記錯 ，2024先係奧運，到時應該辭職去玩半年 至 一年 應該都係東歐+南美

不過有d地方睇得多遊記真係好易冇新鮮感，特別大城市

原來係因為你所以全世界都無得去旅行

媽咪麵咩

第二日一早出發，就開始離開鹽沼。白色嘅鹽田開始褪去，但呢條由尋日嘅火車墳場一直延伸嘅鐵軌，就好似我對旅程嘅記憶一樣咁長，從未消失。上一篇喺Colchani都唔記得講，呢條鐵路喺十九世紀末，係玻利維亞人用嚟運送礦物嘅。當時嘅玻利維亞除咗今日嘅領土，仲包括海邊城市Antofagasta。呢啲咁高海拔嘅痴線火車就載住喺Uyuni附近礦場掘到嘅金同銀送去港口。

阿他卡馬沙漠因為氣候嘅關係，盛產雀屎同硝酸鉀礦。做咩冇啦啦講雀屎呢？原來當時嘅歐洲工業革命冇耐，好多農地等緊肥料去耕，有科學家發現呢頭嘅雀屎有好豐富嘅養份做肥料，而令到啲雀屎變咗搶手貨。最終為咗爭奪呢片沙漠嘅控制權仲打埋仗，玻利維亞打輸咗，將成個海邊讓咗比智利，從此變咗內陸國家。隨住啲礦物運唔到出海，加上後來成個礦業都衰落埋，鐵路亦都慢慢沒落，啲火車駛到嚟就有入冇出，由得佢哋擺喺度幾十年生晒銹


唔知係咪關乎一個國家嘅興衰，堆火車睇落似乎更有味道。隨住架車一路向南，我哋都終於離開呢片全世界最大嘅鹽田。呢個時候醒起個一路上都冇見到地上有水嘅地方，亦即係話呢個三日團真係睇唔到天空之鏡。我哋都不約而同噉慶幸早兩日另外搵咗個團，先冇錯過到呢個鹽湖嘅最靚一面。



第二日嘅行程以玻利維亞同智利邊境附近嘅湖做主角。呢個Laguna Capina住滿咗一種叫James' Flamingo嘅紅鶴，基本上淨係喺安第斯山脈一帶嘅高山地區先搵得到，雖然未至於有滅絕危機，但都有保育需要，因為據聞有人係會偷佢哋啲蛋拎出去賣，令到佢哋嘅數量越嚟越少



食完晏時間尚早，我哋冇喺呢間號稱有Wi-Fi嘅「酒店」停低，繼續向下一個以七彩顏色著名嘅湖進發。


啲顏色都係因為湖入面有海藻而出現，同之前喺伊朗設拉子見到嘅粉紅色湖有異曲同工之妙。但連埋藍天同成個景一齊睇，呢邊可以話係靚十倍，最重要係冇咗當時嗰陣大煞風景嘅臭味。


呢日嘅住宿同樣都係簡陋嘅山屋，而且比起前一晚好似更加凍。瞓到半夜連張被都唔夠暖直情凍到醒咗。天都未光我哋就飲住用三合一咖啡粉沖嘅頹啡，準備出發去最後一日嘅行程。可能因為前兩日睇完嗰啲廢棄路軌，食緊早餐嘅時候同呢幾個當地嘅團友傾傾下就傾到玻利維亞同智利嘅關係，而佢哋全部都憎智利憎到仆街。佢哋都將今日玻利維亞嘅貧困局面歸究於比智利搶走咗成個海港，啲智利人又囂張，講嘢口音又難聽，諸如此類。我對於南美國家之間嘅因怨冇乜認識，只能支吾而對，唯有間中分享返兩句香港嘅情況比佢哋聽。佢哋聽完都係好似我噉比唔到咩反應，始終呢個世界咁多問題，身為外人又關心得幾多

好靚

終於live

第三日出發冇幾耐，天空由黑轉光，我哋就係日出嘅地方停低落嚟。呢個地方正正就叫做Sol de Mañana（明日太陽），專為比大家睇住太陽出嚟而設。之所以有呢個名，係因為呢度同時係一個有活躍火山活動嘅地熱噴泉，噴出嚟嘅蒸氣係斜陽嘅映照下特別靚



靚景講真好多地方都有，但我覺得呢度最正嘅地方，係靚得嚟一切都好原始好野生，唔會有任何嘅圍欄阻住你行近。即使係沸騰嘅蒸氣隔離都任你行，總之一切安全自己負責。



啲地熱就係噉樣喺啲沙泥度湧出嚟，因為底下有大量嘅琉璜，所以係現場係瀰漫住陣陣異味


成個地熱區都係位於玻利維亞最南部嘅國家保護區Reserva Nacional de Fauna Andina Eduardo Avaroa，亦代表出咗呢度都會離開玻利維亞，再次入到智利。




自從入咗南美洲，唔知係地球轉得慢咗定真係我哋節奏慢咗，時間總係無聲無色就流逝。記得喺旅行嘅早段，就算係逗留得比較耐嘅國家，好似伊朗、希臘之旅，即使分別去咗好多個唔同嘅城市同地方，都總係十日左右就會出境，繼續去下一站。但由哥倫比亞開始，有時好似咩都冇做，兩三個星期眨吓眼就過。比人偷一偷電話，就喺秘魯留咗一個月。嚟到玻利維亞，行咗一座未出發就完結嘅山，睇完鹽湖，原來已經過咗十八日。



世界太大，想去嘅地方太多。就算再旅行多十年，我都冇辧法睇得完。三日團嚟到尾聲，都係喺沙漠之中影下相。記得剛剛出發冇幾耐喺戈壁沙漠人生第一次見到世界嘅壯闊，大半年後雖然未至於睇到麻木，但的確冇再好似當日咁震撼。不變嘅係每次都忍唔住哼哼「踏上這無盡旅途」，然後暗暗慶幸出走多好。


冇諗到年半後濕鳩霉聞都唔再搖滾，枉我當時仲當咗無盡係神曲噉日聽夜聽。


最後喺Laguna Verde影埋呢張唯一嘅合照，好快就到咗邊境。玻利維亞同智利嘅邊境好荒蕪，只有一間極簡陋嘅屋仔比關員喺入面吸印仔。


除咗遊客，都冇乜可能有人會用呢個關口過境。其實成個沙漠都係冇掩雞籠，唔知有冇玻利維亞人會偷渡去智利生活？送咗我哋去排隊之後，司機就車咗淨低嗰幾個玻利維亞人返Uyuni，原來佢哋係唔會過境。一如佢哋所講咁唔鐘意智利，自然都唔會想踏足呢個國家而我哋就搭呢度嘅旅遊巴，返到熟悉嘅San Pedro de Atacama。


由荒野去到人間，我哋都只想食返餐好同埋沖個暖水涼，結果又去返上次食過嘅一間Burger餐廳。即使去咗咁耐旅行，心態上都擺脫唔到對一啲熟悉嘅嘢嘅依賴，一去到想放鬆嘅時刻就不期然會重覆食一啲食過嘅嘢


終於唔使再喺高原上面捱凍，呢日嘅下晝喺和煦嘅陽光底下瞓晏晝，瞓得份外香甜。之後，我哋會走入阿根廷嘅Salta。

推

睇到啲景真係好舒壓

快D完 唔好爛尾

working holiday把撚，搵錢先再去啦

反而唔想樓主咁快寫完 但唔好爛尾please

樓主講睇靚景會冇一開始咁震撼exactly就係我一路都冇去長旅行嘅原因
你去完之後覺得咁樣一次過去勁耐定斬件去過癮啲，唔計你同女神會有段好難忘回憶呢樣？

終於live左
樓豬既遊記唔係普通既遊記
有d野去遊行時都幾值得反思
未試過去長途旅行
不過樓豬篇遊記令我諗番起08果年去四川做inter, 住左2個月
之後坐火車去拉薩係西藏玩左2星期
有機會真係想試下去1個2個月南美
不過都冇乜可能, 依家仲要湊多個女
去旅行真係要趁後生時去
唔想樓豬咁快寫完呀
寫到可以去得番旅行先停啦
呢2年係香港真係又苦又悶

最近先鼓起勇氣追你同小乾巴既遊記
以前都去好多旅行 一個人又有 最多都係兩個人
岩岩返工就已經決定做夠三年就比自己一個去呢個大旅行
去到儲夠錢辭職就撞武肺
依家去唔到就轉左plan去同係澳洲既男朋友做住野同居下 咁就過左一年咁滯 仲有三兩年就三十歲 想定落黎買層樓養隻狗 但做左啲野又冇可能再去大既旅行
所以成日都覺得自己有個限期咁
完全唔敢搵旅行既野遊記又唔敢睇
因為覺得自己好似冇可能再自己一個做到

最後lockdown冇野做睇下自己想去既地方
係度諗會唔會我都會說到男朋友跟我一齊去一個一年既adventure呢
佢冇我對旅行咁有憧憬既之前都有講過如果唔做野成年佢覺得好唔secure 但佢同時又覺得生命中差咁啲野
我依家得閒就拎樓主啲文字呀相呀得閒就比佢睇
希望說到佢啦

千奴巴你真係寫得好高質

唔好意思，又停咗幾日，預計後日出Post

真係有決心寫完

都係會揀一次過去勁耐

去到後期係會有審美疲勞，但成個經歷夾埋一齊睇仍然係無法取代。完咗呢次長旅行之後，我哋都去咗幾次十日八日嘅短旅行，好似以色列約旦、高加索、行富士山之類都有。呢啲短嘅旅行獨立去睇都有各自難忘嘅地方，但喺自己心中排第一嘅永遠係呢次直到世界盡頭。當中好多嘅經歷同感受同去過嘅地方未必有關，係因為時間足夠長先有當時嘅體會

對自己冇咁快寫完幾有信心希望滿足到你

去過西藏玩咁耐都好難忘呀，我未去過西藏

多謝支持祝你可以如願，但有好多嘢似乎好難控制。疫情、唔同地方嘅入境政策⋯⋯嚟緊真係唔知旅遊業甚至呢個世界會變成點但就算去唔成，相信你去澳洲呢一年本身就已經係一個Adventure