300日浪遊到南極,直到世界盡頭(IV)

1001 回覆
1025 Like 44 Dislike
2021-06-26 21:08:01

之後一日我哋經Copacabana去到的的喀喀湖入面嘅太陽島(Isla Del Sol)同月亮島(Isla de la Luna)。太陽島係湖入面最大嘅島嶼,因為島上面冇路冇交通,如果要由北到南睇一次,一般都要兩日甚至更多,唔少人會揀喺島上面露營或者訂島上面嘅住宿,而月亮島就係隔離一個相對細啲嘅島仔。


兩個島都係同印加文化有關,雖然嚟咗南美一段時間,但坦白講對印加文化認識好淺,亦都唔算好有興趣,於是都唔特別喺呢兩個島上面過夜,用一日時間望一望就算,主要都會睇睇細少少嘅月亮島。月亮島喺印加神話入面,係月亮升起嘅地方。


落船行幾步就見到一座遺跡,只知道當時導遊介紹話係處女廟(Temple of the Virgins),唔知係佢冇講定我冇聽,究竟起嚟為乜同埋供奉啲咩就不得而知了。網上關於呢座廟嘅資訊都冇乜,Lonely Planet話係Tiwanaku文明嘅遺跡(一個比印加更早出現嘅文明),但亦都有啲講法話係印加文明嘅遺跡嚟。我自己就冇深究落去了


島上面係有少少人住,呢啲草泥馬係有人養,唔可以切嚟食



既然對佢啲遺跡歷史一頭霧水,唯有周圍行吓,簡單啲欣賞吓自然之美。上完呢條梯,又可以用另一個角度望吓個湖。


呢個湖都孕育咗唔少文明,時至今日,都仲有人住喺呢啲僻到唔僻嘅地方生活,講緊係連電都冇,只靠耕田、捉魚,用佢哋嘅方法為生。


雖然唔可以直接比較,但嚟到呢度不其然會諗起圖博。大家都係有源遠流長嘅傳統文化,都係與世隔絕嘅高山地區。偏僻嘅地理理應有利保護原本嘅文明冇咁容易被外來文明同化,但圖博文化就好可惜慢慢消失,越嚟越似中國其他嘅城市,失去咗原有嘅特色。玻利維亞似乎冇乜資源去發展呢度,反而令佢能夠以一個特別嘅地方噉繼續存在。



下晝就去太陽島到此一遊。太陽島面積比較大,住嘅人亦都多好多,一啲十年前到嘅舊資料估計大約有八百個家庭喺島上面生活,今時今日就唔太肯定了。佢哋主要聚居喺兩條比較大嘅村,北村叫Challapampa,南村叫Yumani。時間有限,我哋淨係去到Yumani。



關於的的喀喀湖(Titicaca)個名嘅由來,仲未有一個確切嘅講法。其中一個估計係喺原住民語言艾馬拉語(Aymara)入面,Titiqaqa係指一塊神聖嘅石頭,而呢舊石頭正正座落喺太陽島上面。可以見到太陽島喺呢班住民心中嘅重要地位。


行咗半日都要食啲嘢,本想搵啲呢度嘅地道食物。但隨住遊客增多,Yumani嘅餐廳而家主要賣啲不倫不類嘅意粉同飯。特別係個意粉,一睇個顏色就知有啲問題食完之後我哋就靜靜哋坐吓,冇再特別搵啲遺跡嚟睇。


唔知係咪由細到大都冇乜接觸拉丁美洲嘅古文明,總係好似同呢度格格不入,以致好多故仔聽完都冇再深究,繼而慢慢忘記。希望第日有機會可以同其他人解釋香港發生過嘅往事時,可以講得好啲,令到聽到嘅人唔會因為感覺離佢太遠,就冇咗興趣,至少唔好令人聽完冇耐就唔記得晒
2021-06-26 21:08:51
食飯先有機會睇電話,做死人咩
2021-06-26 21:09:22
睇得咁快,點寫得切

多謝支持
2021-06-26 21:15:03
新工返左幾日就搞到咁,中左大伏
見到呢啲島嶼村仔好嚮往佢地既生活,唔洗話要賺大錢,但生活得夠寫意
2021-06-26 21:16:21
佢哋可能好嚮往城市嘅生活隔離飯香
2021-06-26 21:19:04
真,要親身經歷先知係咪想像中既咁
2021-06-26 21:24:55
冇錯,希望你都可以喺返工中搵到樂趣
2021-06-26 21:46:57
呢份應該做唔到,辭職只係時間問題,放假都諗返工野非常嚴重
2021-06-27 11:08:26
個蛋餅飯幾吸引
2021-06-27 11:11:40
日日過依d生活就勁撚悶架啦,有時去依類某d景點 行完 就等時間過夠鐘走,都幾頹廢下
要做到兩者之間既平衡真係好難
好似有時會幻想養下動物 養下野自給自足,但當依樣野日日重複過/做 就變左工作咁 好悶
2021-06-29 21:05:13
人生最開心嘅事之一就係辭職,巴打支持你
2021-06-29 21:05:32
唔係呀,好難食呀
2021-06-29 22:14:51

離開咗太陽島月亮島,繼續穿越玻利維亞,嚟到拉巴斯。


去到拉巴斯已經夜深,當時我對呢個城市感覺一般。由Copacabana坐車去拉巴斯,一路上雖然算唔上路況好好,但總算冇咩阻礙,一入到拉巴斯車站附近,交通擠塞到不得了,塞喺個巴士站足足成個鐘都落唔到車。落車冇耐已經天黑。喺我哋住宿地址嘅樓下,有個醉酒佬揸住個酒樽企喺門口自言自語。啱啱嚟到仲要夜媽媽,唔係好想招惹怪人,於是我哋企到遠一遠噉觀察住先,等咗幾個字佢自己行開我哋先至上樓攞房。拉巴斯個名La Paz喺西班牙文係指和平,但我喺度嘅第一印象就好唔和平


好鬼攰嘅情況之下只係喺附近搵下嘢食就結束呢一日,太夜都冇咩選擇,揀咗一間都有幾個當地人幫襯嘅攤檔,賣相唔是太好,但總算夠份量得嚟又唔太乾。我哋住嘅地方係喺一條叫做Avenida Buenos Aires嘅大街旁邊。之所以對呢條街印象咁深,第一當然因為個名易記,同阿根廷首都同名,另外最緊要係當晚好震撼噉見到條街嘅路牌,係用殘體字屎眼咁大隻寫出嚟


(Source:Google Map)
當時忘記咗影低,又或者係試過被人偷,唔敢再夜晚喺條街拎部機出嚟影。張概念圖係我用Google Map沿住條路睇咗好耐Street View搵返出嚟嘅以我所知拉巴斯華人唔多,人數應該不足以要用多一種語文去遷就佢哋,我喺呢度嘅其他地方從冇見到有中文,究竟點解零零舍舍呢個路牌會有殘體字呢?

今日嘅玻利維亞經濟上好依賴中國,中國貨喺2020年佔咗總入口嘅22%,國家嚟計排名第一,當中應該好多係華為屌米唔知係咪因為噉而要加中文。作為遊客只係想講殘體字真係好樣衰
2021-06-29 22:57:18
等冇咁忙就開始搵工
2021-06-29 22:59:04
第一眼望個飯有啲似爛屎
2021-06-30 11:53:11
喺拉巴斯閒逛咗兩三日,適應吓呢座三千六百幾米嘅城市嘅高度之餘,亦都搵吓旅遊公司帶我去行山。雖然由哥倫比亞一路到今日,喺高山地區已經留咗四個月,但呢座城比起之前嘅更加高,一行斜路更加感覺到個壓力。正當我自己都仲猶疑緊可唔可以挑戰到6000米高山嘅時候,女神竟然話要一齊試吓


Huayna Potosí嘅行山團通常三日兩夜,話就話係6000米嘅山頭之中最易行嘅一座,但都要用到冰斧冰爪,技術上已經唔係普通行山咁簡單。我相信只係因為呢度啲人搵錢第一,先唔介意帶啲冇攀冰經驗嘅遊客去試,總之你肯比錢就話之你。你問我個人,我估自己成功登頂嘅機會都係得三四成,但想睇下自己可以堅持到咩地步。我由一開始都係諗住一個人去,如果加埋女神,得罪講句,我諗成功嘅機會係零


雖然覺得唔會成功,但我冇拒絕到女神,相反我都幾鼓勵佢。我覺得挑戰係一種勇氣嚟,平時女神聽到行山都灑手拎頭,唔係怕出汗就怕多蟲,未出發嚟旅行之前喺香港應該行唔到10km。但呢大半年嚟一路走來,由戈壁沙漠行到馬丘比丘,辛苦得嚟始終堅持。好似熱水鎮嗰啲火車軌噉,有好多路段為咗慳少少錢就行幾個鐘,其實真係唔輕鬆。雖然唔知佢係因為啲咩而想一齊去爬山,係唔想自己一個留喺拉巴斯,想陪我,定真係想上到最頂睇下前所未見嘅風景?我唔知道,但我唔想淨係為咗自己登頂嘅機會減低而勸退你。我覺得個旅行係我哋一齊去嘅,如果你冇主動唔去,我就應該所有活動都同你一齊經歷而且⋯⋯我自己都好唔鐘意未試過就話唔得。話唔定會得呢,係咪先?


距離出發仲有少少日子,我叫女神諗多兩日,唔使心急。點解要擇日?因為想留喺城市過埋個平安嘅平安夜。拉巴斯有好多呢啲市集,其實就係所有類型嘅店舖都開晒出嚟,街市又有,賣衫賣鞋賣電器又有,衞生情況非常惡劣但講到最騎呢,都要提吓女巫市場。拉巴斯有一條街,以前係啲傳統巫醫、算命佬、風水師嘅聚集地,村民有咩健康或者生活上嘅奇難雜症都會行好遠山路嚟呢度搵啲大師幫幫手。特別係呢度嘅原住民艾馬拉族好迷信利用女性先做到嘅巫術,所以呢度又有女巫市場(Mercado de las brujas)嘅稱號。


隨住時代嘅轉變,女巫市場都變得商業化,都係賣紀念品為主可能為咗保持特色,佢哋會賣啲騎喱嘢,諸如草泥馬嘅胎盤、青蛙乾屍之類,話可以用嚟祈福。成條街氣氛有啲詭異,有睇哈利波特嘅可能會諗起嗰條斜角巷據講仲可以搵到啲巫師偷偷哋施巫術,但因為已經立晒法禁止,應該要識人先有辦法搵到。


受到女巫嘅感召,女神都係決定出發,一齊爬山。睇得出佢都忐忑不安,但都仍然想試,我係相當欣賞嘅。呢晚我哋就喺度過埋平安夜,慶祝聖誕,入咗間肆正啲餐廳食好啲,點知啲肉都係一陣味噉古靈精怪


食完飯出嚟,已經好多人走咗去廣場過節。玻利維亞係天主教國家,聖誕氣氛濃厚,雖然冇咩好奢華嘅裝飾,但係凍冰冰嘅山城配搭平日一貫由每一間屋亮出嚟嘅微弱燈火,為呢座破落嘅城市隱隱帶嚟一份祥和。如果耶穌出世嘅伯利恆都唔係奢華嘅城市,噉呢度應該比起好多大都會都嚟得更加聖誕
2021-06-30 14:01:56
樓主好玩唔玩 玩屎
2021-06-30 18:30:22
睇左幾日終於追哂
好佩服同妒忌 可以有合適既對象可以去體驗世界
2021-07-01 10:41:09
唔係屎嚟唔知係啲咩肉攪爛咗
2021-07-01 10:42:02
呢啲濕鳩故都咁有心機追晒,多謝你
2021-07-01 13:54:59

比較咗好幾間公司,最後揀定咗呢間All Transport,主要見佢價錢平得嚟都算解釋得清楚,呢個決定有冇錯就留比大家判斷喺聖誕節嘅正日,我哋呢個三日兩夜嘅行山團就正式出發。


先上咗旅行社嘅倉庫攞齊啲要用嘅裝備,包括行山杖、攀冰用嘅冰斧冰爪、頭盔、頭燈、手套之類,試啱啲Size冇問題就比埋啲尾數。




拉巴斯本身已經係喺山上面,但呢座城市同時比更高嘅山包圍。喺城入面一抬頭,就可以望到6400米高嘅Illimani,繞過啲彎彎曲曲嘅山路,就嚟到Huayna Potosi嘅Basecamp。


Basecamp海拔4900米,一落車,已經感覺到周圍環境唔同晒,變咗鳥不生蛋嘅荒涼山野。喺呢個又凍又乾嘅山頭,一啲動物嘅痕跡都搵唔到。


呢度只得幾間山屋,同埋一個冇人清理嘅公廁。我哋今晚就會喺呢間屋仔入面度過了。



入面又比想像中整齊,仲有電已經算係噉。閂埋咗門亦都冇出面咁凍, 間房都正正常常,最緊要啲被夠暖唔會凍親就得。三日兩夜嘅行程,第一日會係熱身,會先喺附近行個圈,同搵一個近近哋嘅冰川練習下啲用具,熟習吓點樣用冰斧攀冰同埋用冰爪喺冰上面行,順便適應吓4900米嘅高度。


去練習之前就食啲嘢先,如無意外呢幾日都係食呢啲嘢。味道都唔會話好好,但熱量足夠,有飯有肉有生果。講真拉巴斯城市入面啲嘢都唔係太好食,個落差唔係好大


食飽抖一陣,導遊就幫我哋著好晒啲要用嘅裝備。因為到時攀冰要吊啲繩,所以要戴好呢啲扣住條繩嘅帶。喺咁高嘅地方真係寸步難移,搞掂晒之後已經冇咗一半嘅力。究竟係咪真係可以完成今日嘅練習呢?


終於開始Huayna Potosi嘅旅途。行去冰川預計要用個零鐘,之後要行返原路返嚟。一開始導遊都同我哋一齊一路傾偈一路行,但行行吓就開始嫌我哋有啲慢,成日一條友衝咗上去迫我哋追

開始咗十零分鐘,女神體力已經急速下䧏。雖然我出發前係有預計登唔到頂,但問題似乎比我想像中更早發生。行咗冇幾耐,女神已經要坐埋一邊抖抖。喺高原地方行吓停吓問題唔大,但停嘅次數越嚟越密,就似乎唔太妥當。導遊都有問我哋係咪OK,同埋叫我哋飲多啲水,但就唔建議我哋成日停低,寧願好慢噉行都好過斷吓斷吓。呢個道理我都明白,只係我都冇咩可以做到。我只能暗暗希望行多一陣行順咗情況會好轉
2021-07-01 16:07:14
sad,睇字都辛苦
2021-07-01 21:40:03
岩岩由第一個post追到而家,支持樓主今次唔好爛尾
2021-07-01 23:18:45
龍蝦湯個餐食左幾錢
2021-07-02 00:52:47
最近先開始睇 追到live
過咗咁多年啲感受都寫得咁深刻
樓主加油
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞