300日浪遊到南極，直到世界盡頭（IV）

比次機會老細

追你環世界同追海賊王冇分別，都係要靠子孫燒結局比我睇。

push

希望下一篇垃圾樓主可以喺兩個禮拜內出到

嘩 , 好浪漫呀
我要追返前幾個 post 先

樓主好醒醒定定

終於再更新，繼續留名支持

你贏曬啦，真係不得之了！！

布宜諾斯艾利斯叫得做南美巴黎，都唔係浪得虛名。成個城市喺十六世紀因為西班牙殖民而開埠，成街都係歐洲建築就唔使講，就算拍埋一齊同歐洲城市比都唔輸蝕。

喺比較潮流嘅Recoleta區，就有一間號稱世上最靚嘅書店Ateneo Grand Splendid。


呢間書店靚得嚟好出名，以前都有段故仔。佢嘅前身係一個劇院。二十世紀初嘅時候，布宜諾斯艾利斯一度係南美嘅主要港口同商貿中心，好多歐洲移民湧入嚟搵機會同生活，將唔少文化藝術嘅嘢帶咗入嚟。呢啲新移民思想上嘅碰撞亦激活咗呢個地方，連今日阿根廷最出名嘅探戈舞都係喺當時嘅文化大匯集嘅環境底下孕育出嚟。


不過好景不常，呢間劇院後來都因為錢銀問題而執笠。喺2000年，就比一個建築師諗到點樣保留呢個劇院嘅建築元素，改裝成一間華麗嘅書局，而不致於要全部拆晒佢


天幕上嘅壁畫，中間嘅大舞台，同每一層側邊嘅貴賓包廂都保留咗，搞到入面嘅書都好似零舍高級。中間嘅舞台就變咗個咖啡室，行到攰真係好難忍到唔喺中間飲杯嘢擺低幾舊


我哋嗰日就行咗出書局出面，因為呢度文青多，遊客都多，自然成街都係好靚嘅Cafe。


飲完嘢喺附近散吓步，行行吓就去到同樣位於Recoleta嘅一間國家美術博物館Museo Nacional de Belles Artes。叫得南美巴黎，作為一個浪漫嘅城市，呢啲嘢當然唔少得。而對我嚟講，呢間博物館最厲害嘅，係佢出面嘅環境。博物館嘅周圍係一片好大嘅公園，大得嚟仲要冇乜人，望度好遠先見到有兩三個肥佬喺度放狗同有一兩個細路喺度跑嚟跑去嗰種。諗吓身邊都係啲藝術修養好高嘅人，行完博物館出嚟坐喺公園曬住太陽，傾吓啲嘅大師畫作，完全感覺到個人係昇華咗。對上一次有稍微近似嘅感覺已經係去完沙田文化博物館，行完出嚟同朋友坐喺牧羊少年Cafe傾下旅行大計，嗰次仲要喺門口排咗一個鐘先入到去


據女神所講，呢間博物館都收藏咗唔少偉大嘅作品，從佢當時振奮嘅神情睇得出係一個勁嘅博物館。因為佢係真文青，應該識好多藝術嘢，所以我連Audio Guide都冇聽了，主要都係靠佢介紹。成間館嘅敗筆就係放咗我入去，可能連張畫係畫出嚟定印出嚟都分唔到


不過就算好似我噉咩都唔識都唔緊要，因為係免費入場，所以唔需要有一絲愧疚。只需要懷住欣賞嘅心覺得佢靚就好滿足。有時喺度諗，如果我生活喺布宜諾斯艾利斯，可能我早就係一個文藝青年。

由學生時期係Lecture睇樓主環遊世界睇到返工扮工終於睇到live了
個po出到你返香港個日應該就係我quit job追夢個日

出咗啦

支持你繼續支持

有睇你個莫斯科之旅

返工睇會更有Feel

希望你追到屬於你嘅夢想

追呢個Post 追左4年
估唔到真係有去到南極果個post
好感動
好好睇

我其實好鐘意「南美巴黎」呢個朵。

除咗歐洲式街頭，除咗博物館，要似巴黎就唔少得遊行示威阿根廷嘅示威文化，早喺踏足呢個國家前就已經見識過。喺利馬機場比一班罷工機師搞到差啲去唔到南極，幾萬蚊嘅船飛都冇得賠當時從航空公司嘅服務已經感受到，呢啲事件係幾咁平常，預鬆少少時間去預防突發事件根本係遊客嘅責任。



喺布宜諾斯艾利斯嘅街頭，留咗三日就已經見到好大隊嘅遊行隊伍喺度揮旗叫口號。以我嘅三腳貓西班牙文自然唔係好知佢哋嗌緊啲咩。只見佢哋遊行得都幾歡樂，仲有好多小販推住車仔沿途賣嘢飲賣嘢食。十足19年上半年或者之前啲香港遊行，大家都唔擔心出嚟講兩句會有咩後果。冇人會因為噉就從而參與恐怖活動，從而顛覆政權，從而冇咗份工、坐監流亡，或者比人扑頭中彈，終身殘障。

返到去問返屋主Esteban，佢話佢都唔知今日個遊行係邊個搞，淨係笑笑口話成日都有㗎啦我問佢會唔會覺得成日都有示威好麻煩，佢淨係反問點會噉諗。佢話雖然今次我唔知咩事冇份出去，但可能下次就輪到我。如果嘈吓都唔比，仲成世界嘅？講多兩句佢已經話趕住出門，原來佢今日又約咗朋友，仲問我哋得唔得閒，有興趣可以跟埋一齊去。

呢一晚我哋都冇咩節目，既然有機會識吓人，就跟埋去了。原來佢個朋友係外國人嚟，係一個嚟咗布宜諾斯艾利斯嘅美國人。據我所知佢係一個網頁設計師，做嘅工作都係遙距，貪阿根廷生活平過美國得嚟又好玩，所以嚟咗呢度。個美國人住咗喺市內一間專係比呢啲外國嘅Digital Nomad租嚟住嘅古宅入面。棟嘢好大有唔少空間，屋主有時會借個場出嚟比人搞啲活動開吓班，而今日我哋去到就撞啱搞緊一個Tango Class

嚟咗阿根廷幾日，一直都想搵啲機會睇吓Tango，竟然就噉樣誤打誤撞就睇到，仲唔單止有得睇，個老師仲話可一齊嚟學


不過我哋真係冇諗過會突然之間有得跳Tango，一嚟到見到大家都盛裝出席，自己就著住著咗大半年嘅迪卡儂頹T，成個謝師宴毒撚噉企喺度柒到想當場行返出去唔知個Tango老師係咪以為係某啲鄉下嘅民族服裝，並冇介意我嘅衣著品味，叫我哋唔好走留低一齊跳一開始咗跳，佢就收起咗友善嘅笑容，轉變為嚴肅嘅神情，好專業噉教我哋一啲基本嘅步法。


原來跳Tango，係要好嚴肅。Tango係一種起源於阿根廷嘅二人舞蹈，中文譯得好靚，叫做探戈。上一篇都有提到探戈喺因為唔同地方嘅移民嚟到呢度生活做成文化碰撞而出現嘅一件產物。探戈舞蹈最初係一班由非洲賣過嚟嘅奴隸開始跳起，當時中下階層嘅人為咗互相撫慰生活上失意嘅落寞心靈，慢慢喺一啲小酒吧度跳吓跳吓就流傳開來。除咗酒吧，妓院都係探戈舞常見嘅地方，可以話係屬於唔太受主流社會接受嘅一種次文化，亦有一啲講法話探戈舞本身係好多偷情嘅人嘅秘密舞蹈。種種原因加埋，跳探戈嘅時候要保持警覺，神情肅穆，唔可以笑，好多舞步需要左右擰頭，東張西望，以防比人發現。早期嘅探戈男人甚至要戴住短刀嚟跳，今日雖然唔使佩刀，但都保留咗嗰種跳舞時嘅陽剛力度。

喺呢個幾鐘頭嘅Tango初體驗入面，我自然都學唔到啲咩，但總算接觸過呢種阿根廷國粹，算係不枉此行。學老師話齋，跳嘅時候最重要係你嘅靈魂。只要你嘅靈魂在，先可以做到隨心起舞，對方先能夠從你嘅舞步感應到你嘅靈魂，達到二人合一嘅境界。雖然我跳到不倫不類，但按照呢個定義，我哋呢個旅程，早就係一場專屬於我哋二人，跳咗二百幾日嘅馬拉松探戈。早就跳到連鞋都爛埋

鄉下嘅民族服裝 有畫面

樓主番黎啦

如果布宜諾斯艾利斯呢個「南美巴黎」咁靚，我諗「南美瑞士」都唔會令人失望。喺南美洲嘅東南部，有一個國家叫做烏拉圭，有着南美洲嘅瑞士嘅稱號。我哋喺歐洲嘅時候，都好幸運有機會喺瑞士過一日，但總係覺得唔夠。聽到烏拉圭有個咁勁嘅朵，就自然唔可以錯過。


就喺我哋決定去烏拉圭嘅呢一日，發生咗一件不幸嘅事。一直陪住我哋走咗咁多個月嘅MacBook線隨住每日執背囊捲嚟捲去，終於扭斷咗部電腦從此叉唔到電，亦大幅減慢咗當時呢個Post嘅連載速度如果唔係當日一斷，可能呢部遊記早就完成咗


我哋同Esteban講將會去烏拉圭玩一個禮拜，佢都有少少失望，因為佢又收少幾日房租但知道我哋之後會返嚟繼續住佢嗰度，就好開心，仲話可以隨便擺啲行李喺度，最緊要比定錢就得經過咗呢幾日嘅相處，我哋都好放心。反正遲早都要比，如果早幾日比係幫到你，又真係冇所謂。講真邊有人想謀你財但又會比埋條鎖匙你住佢屋企

我哋出發嘅時候，Esteban仲未起身，敲咗兩次房門都聽唔到，唯有開門睇吓叫唔叫我得醒佢。點知一開就見到佢褲都冇着喺度裸睡連Jer Jer仔都一覧無遺，嚇到我即刻閂返門當睇唔到（冇圖）。呢一幕成為我旅程中深刻嘅回憶。諗住臨走前好好哋交收，最終唯有擺低鎖匙喺枱面就走了。


由布宜諾斯艾利斯去烏拉圭非常之方便，只要坐個零鐘嘅渡輪，就去到烏拉圭嘅小鎮Colonia del Sacramento，就好似香港去澳門噉。呢個地方我都搵唔到正式少少嘅香港譯名，台灣有人用音譯科洛尼亞，有人譯做薩拉門多移民鎮。


成個小鎮係一個UNESCO嘅世界遺產，聞名於佢將葡萄牙同西班牙嘅殖民色彩都保留咗落嚟。十七世紀嘅時候，葡萄牙人喺呢度起要塞，隔海對望西班牙佔領嘅阿根廷。經歷咗西班牙同葡萄牙兩大帝國嘅爭奪，到後來由葡萄牙獨立出嚟嘅巴西又加入戰團，短短二百年間就經歷咗超過十次主權移交。


呢啲藍藍白白嘅瓷磚（Azulejo）就係葡萄牙人留低嘅憑證。


今日嘅Colonia del Sacramento已經成為咗遊客聖地，到處都係啲小餐廳同咖啡室，配埋常年嘅好天氣確係一個幾悠閑嘅地方。因為太過方便嘅關係，呢度最主要嘅遊客群自然就係阿根廷人，就算係外國遊客，亦都絕大部份係重點去阿根廷玩順便去埋呢邊到此一遊。烏拉圭為咗吸引多啲人嚟旅遊，就立咗條例，免咗所有外國人簽信用卡嘅增值稅，講緊係22%，不論食飯定住宿，連普通餐廳或者麥當勞都有得減


收據上嗰個Descuento Ley 17934，就係根據17934呢條法例免嘅稅0.22/1.22＝0.18，免22%稅等於全單82折。但一定要碌海外信用卡先有。我哋都係食咗幾餐先發現有呢樣嘢，有一兩次仲戇鳩鳩比咗現金蝕咗不過烏拉圭算係南美洲物價最貴嘅地方，就算有咗免稅，都仍然好貴。2018年嘅時候我感覺比阿根廷更加高，冇得再好似係秘魯玻利維亞嗰陣噉唔睇價錢消費。阿根廷嘅經濟狀況惡劣出晒名，年通脹郁吓都四五十個Percent，有啲喺阿根廷長玩嘅遊記甚至有提過入境同出境嗰時條街嘅物價已經好唔同。我哋去阿根廷嘅時候港幣兌Peso係1:2.2，但今日已經變咗1:12可能就係呢個原因令佢哋覺得儲錢嗰個都戇鳩相比起嚟烏拉圭已經算係好穩定。



可惜呢個免稅政策據講已經暫停咗，不過烏拉圭披索呢幾年亦都大幅貶值，唔知而家再去會變成點呢？

行晒整個Colonia del Sacramento，大約等於由屯門市中心去到屯門碼頭咁上下路程，以一個鎮嚟講算係幾細。加上舖頭嘅密度好低，行半個下晝已經睇得七七八八。我哋冇打算喺Colonia留宿，取而代之嘅係係Colonia同首都Montevideo之間嘅另一個小鎮Valdense訂咗一晚住宿。搭巴士就可以輕鬆去到。


Valdense作為一個中間點，雖然有遊客嘅住宿，但嚟玩嘅人極少。就好似上水同元朗都好多人，但甚至有外來人會去古洞。我哋落車嘅時候，巴士站啲人都會Chinos Chinos（西班牙文：中國人）噉撩我哋講嘢，呢種感覺喺南美都好耐冇試過了。


一路搭車嚟嘅時候，都覺得呢頭好荒蕪。除咗呢間旅館之外，附近係咩都冇，唔揸車都唔使旨意出到外面，令我諗返起哥倫比亞北部嗰啲Hostel。相比起哥倫比亞嗰種住滿長途旅人，個個圍埋一齊喺Common Area交換旅行心得嘅熱鬧，呢度就係一種各自休息互不打擾嘅寧靜。


喺呢啲咁Hea嘅地方，最啱就係上吓網睇吓書等食飯。嚟咗烏拉圭一日，第一印象都係舒服同安靜，雖然去嘅都係啲遠離都市嘅鄉鎮，但都感覺到呢度同瑞士嘅富裕扯唔上關係， 斷估首都都唔會周街都係名錶同埋媲美瑞士嘅銀行。到底呢個「南美瑞士」嘅稱號係點樣嚟？



原來「南美瑞士」主要係講緊政治上嘅烏拉圭。今時今日嘅烏拉圭採用瑞士式嘅憲政體制，即係以一個按選舉票數比例產生嘅聯邦委員會嚟集體行政，權力喺委員會入面透過成員之間互相制約，理論上可以防止個人獨大而專政。當然呢種政制都有唔少失敗而走向極權嘅例子，譬如蘇聯同中國名義上都係有個類似嘅會，但實際上都係戇鳩。烏拉圭就屬於呢種體制中做得比較成功嘅國家，民主指數比得上歐洲唔少地方，政府清廉亦係南美中數一數二

另一方面，烏拉圭同瑞士一樣，亦係奉行中立嘅政策，係南美洲嘅中立國。呢個就要從佢哋立國嘅起因開始講起。烏拉圭人喺獨立之前幾乎冇自己嘅民族概念，有別於好多民族國家因為民族意識高漲而立國，可以話佢哋係先建國再建立民族。喺十九世紀獨立成國之前，住喺烏拉圭嘅人都係周旋於阿根廷同巴西兩大強國之間，是旦歸屬一邊。就算係今日被譽為烏拉圭民族英雄嘅Artigas，當年對西班牙殖民軍發動戰爭都只係想尋求高度自治，而唔係要將烏拉圭從阿根廷分裂出去。嬴咗之後佢就將烏拉圭聯同阿根廷嘅一啲地方組成聯邦政府，不過之後又比葡萄牙入侵，最後成個烏拉圭又歸入巴西。Artigas就走佬去埋巴拉圭。

後來大家發現無論歸入阿根廷定巴西，結局都只係引嚟另一邊嘅唔忿氣，打嚟打去，永無止境。烏拉圭人開始去諗，或者拋開阿根廷同巴西人嘅身份認同，佢哋先會有真正嘅和平。當時嘅英國咁啱想喺南美打開一個自由貿易嘅地方，就差隻腳埋嚟。英國人唔在乎地方嘅主權屬於邊個，最緊要比佢做生意，而且國家越細就越容易維持自由開放，於是開始調停阿根廷同巴西之間嘅爭奪，喺烏拉圭設立緩衝區。烏拉圭人亦開始支持親英嘅「烏獨派」，選擇咗放棄加入阿根廷或者巴西去實現南美大國夢，寧願做一個對世界開放市場嘅小國，對阿根廷同巴西保持「中立」，唔再話自己係屬於邊一邊。建國之後烏拉圭人呢個概念先慢慢建立起嚟。雖然後來烏拉圭都經歷過一段多次軍事政變嘅黑暗時期，不過呢啲都係後話了。




讀吓讀吓，晚餐都差唔多準備好。美食將我嘅思緒由書本帶返嚟現實。唔知係咪睇完南美瑞士嘅嘢，呢餐令我諗起喺瑞士巴塞爾Urs同Regula嗰一餐，一樣都係喺靜好嘅環境下食住新鮮食材煮成嘅盛宴。似乎對我嚟講，呢個先係烏拉圭稱得上南美瑞士嘅真正原因。呢一晚少咗城市嘅繁囂同嘈雜，換嚟風吹蟲鳴。喺涼爽嘅晚風吹拂下，今夜似乎比平日瞓得更加安穩。

個景好正？幾錢晚？

呢間300蚊鬆啲