300日浪遊到南極，直到世界盡頭（IV）

過埋Baños內心有個好大嘅掙扎。事綠喺厄瓜多爾啱啱開Post寫遊記，冇耐就有個去咗南美嘅巴打留言，話南美一定唔可以錯過厄瓜多爾嘅加拉帕戈斯群島（Islas Galápagos）。作為第一個被登錄嘅聯合國世界自然遺產，以及啟發達爾文寫成進化論嘅地方，我都知係好值得去。但有兩大原因令我猶疑。第一當然係錢，機票加埋遊客價，每人起碼洗多成皮；第二就係已經好接近十一月，之前都提過再收唔到Agent消息，我哋就要直接去烏斯懷亞（Ushuaia）撲南極船飛。但去埋Galápagos，隨時南極之旅GG。

呢一日終於到咗抉揀嘅時候，去嘅話，就要坐車去瓜亞基爾（Guayaquil）飛，如果唔去，就行另一邊，經昆卡（Cuenca）落秘魯，等自己唔好再諗。

我應承咗女神會去到南極，我哋先出發，我唔想自己講過嘅嘢做唔到。


作為一個說到做到嘅男人，我最後揀咗昆卡。嚟緊嘅行程將會加速一路向南，直到世界盡頭嘅城市。有咩漏咗嘅，最多去完南極返嚟再補返。


或者，下次旅程再去。到時同你去比南極更靚嘅地方。

喺昆卡，見到有啲旅遊單張話有咩七大必去嘅景點。但睇完啲簡介同相，都覺得不甚了了 就隨便散吓步算了。



不知名嘅市集。







瞓得好舒服，唔打擾你哋


返到Hostel，比人用香港話搭訕。南美洲有廣東華人唔算罕見，但喺Hostel就真係少，係一個香港女仔嚟，佢亦係我哋三百幾日入面唯一一個喺Hostel遇到嘅香港人。

樣同名唔講了但經歷我估佢唔介意我講少少嘅佢同我哋一樣都係喺南美長途旅行，但佢比我哋勁好多。我哋兩個人而佢係三人行佢同法國老公帶住bb Florian一路玩一路住Hostel，同我哋傾偈嘅時候仲忙住餵B食嘢。因為佢老公可以網上教法文，所以就算旅行佢哋都有一定收入，不過有時要做嘢就要搵個Wi-Fi好啲嘅地方停低。

我哋就算去得再耐，都有歸期。但佢哋呢種將旅行變成生活持續進行嘅方式真係好犀利。喺度祝你哋旅途一路順風見到Florian係噉撩我哋玩，就覺得呢啲經歷對個細路嘅成長一定好有幫助。我相信佢大咗至少唔會係一個毒撚


臨尾比我哋屎忽撞棍Book到一間當地人都排隊食嘅餐廳，試吓佢哋嘅名菜天竺鼠（Cuy）。係啦，就係喺世界中心之城入面好得意嗰啲天竺鼠仔為咗證明係原隻天竺鼠，上菜嘅時候會係完整嘅。


比大家睇清楚之後先剪開味道有啲似乳鴿，整得唔好嘅話會有啲羶味。呢間係幾好食嘅，但都試過有伏。同天竺鼠們講聲Sorry

正呀 樓主！ 唔好難尾呀今次！

天竺鼠

臨走前入教堂許個願，求天父做十分鐘好人，錫我兩張Last Minute南極船飛


南美洲風景好靚，但Postcard普遍都核突，買唔落手


厄瓜多爾最後一幕，巴士站旁邊嘅廣場大媽舞。有冇人知呢種文化起源係邊度


秘魯GoGoGo。呢班人就係同我哋一齊坐巴士排隊通宵過關嘅遊客，一排就排咗三個鐘


聽好多人話用特區護照過境唔順利，我哋一直都好好彩，係入俄羅斯嗰次麻煩啲，要個中國人幫手翻譯又打晒手指模先入得。喺秘魯，終於要再體驗呢本嘢嘅垃圾一面。又係話我哋中國人要Visa。

講到尾都係抵我哋死，有BNO唔續走去用中國特區護照，就算我哋同關員點講都係冇用，最後佢肯幫我哋問上級，但就要企埋一邊等。一等就等咗半個鐘。成車人都過晒關得返我哋，個司機等到躁，就向個關員發爛渣

屌你老母你阻撚住我開車

關員見到司機咁好火，馬上加速處理，最終放行。凌晨時份，我哋都冇咩反應，但求上返車繼續瞓覺。


到咗秘魯Trujillo已經係第二日嘅下午。同幾個韓國人夾的士去市中心，拿拿聲食飯再瞓過。


坐咗十幾個鐘車真係好撚攰，要食返餐好。即係食中餐 真係唔想又薯條撈飯但究竟咩係飛機場（Aeropuerto）


佢寫就寫Sopa Wantan，即係雲吞湯。但南美嘅中式雲吞係冇餡嘅，得雲吞皮 問返早過我哋去到南美嘅澳門朋友先知，原來飛機場係指一半飯一半麵，都唔知乜鳩嘢嚟

撞正佢哋呢幾日人口普查，好多人都放假，市面好靜。正好比啱啱喺厄瓜多爾趕完行程嘅我哋抖抖。唔知係咪知道有得抖，我就即刻病，近半年嚟已經第三次發燒感覺唔算太嚴重，我就冇睇醫生了，費事少少時又要打針雖然要趕路，但無可奈何之下都係喺呢度抖返三日再算。

大家多啲嚟鞭策我

我諗返點解會病，懷疑係坐得太多長途車。旅行咗咁耐，坐長途車已經變咗家常便飯，我以為我已經好習慣。但南美唔同歐洲，歐洲嘅長途車長極都係六七個鐘，就算為咗慳一晚房錢而搭通宵車，去到瞓一朝有時都精神返。而南美六七個鐘算係短途，二三十個鐘都係平常事。將歐遊嘅心態套用落南美，終於頂唔順爆煲。

既然病咗，又冇嘢玩，呢幾日都係飲飲食食養病。


當時冇嘢好做到喺度研究，究竟Gallina同Pollo有咩分別Google Translate話兩種都係雞，但呢個雞味杯麵就叫Gallina，而啲餐廳好多雞飯都係寫Pollo。原來Gallina係老黃油雞，啲味濃啲，通常整湯用，而Pollo就係嫩雞，啲肉滑啲。搞清楚起碼中少啲伏


上天係欣賞勤力嘅人。夜晚即刻見到有Pollo嘅餐廳。同時亦都有其他我哋唔知嘅菜色。見到啲騎呢嘢，女神一般都比較有好奇心，會試未食過嘅菜。但如果真係難食，佢就會比晒我食所以我反而會叫啲穩陣嘅，起碼唔會兩碟屎。

呢度我淨係識Pollo，同埋Arroz a la Cubana，即係之前講過唔知點解可以輸出國際嗰碟古巴香蕉白飯我係一定唔會嗌嘅。女神就揀咗未試過嘅Hígado Encebollado。


原來係膶，食咗兩啖就棄了佢寧願默默地用辣椒汁送飯。好彩仲有兩杯楊桃汁，大大杯鮮榨果汁係南美嘅樂趣


嘢飲都可以獵奇。講汽水最難飲都係古巴，沒有之一。其他地方都可以放心噉試，但唔好買太大支。呢度嘅印加可樂正正常常，同玉泉忌廉差唔多，唔知邊個抄邊個呢？

秘魯分三大區域，西部嘅海岸區、中部嘅安第斯山脈區同埋東部嘅亞馬遜雨林區。Trujillo係西部海邊城市，唔少得食吓海鮮。


Cebiche就係醃海鮮。2017年10月嘅Peruvian Sol對港幣係1：2.4，四五十蚊嘅海鮮會係點呢？



我哋叫咗兩碟，魚肉，貝類乜嘢都有，份量好足


撥開仲有成隻蟹喺底，蟹肉都好新鮮 一個字，抵！

使使吓之前喺巴士站唱嘅秘魯紙都就快用晒，但喺Trujillo㩒錢好麻煩，皆因銀聯官網所講嘅秘魯通行係假嘅，銀聯根本就冇撚用。但就算係Plus卡，都唔係部部ATM得，搵到得嘅又有限額。唯有慳住嚟用。


最後一晚，試吓街頭小食。


揀咗呢檔有啲當地人幫襯吓嘅，睇落好似啲糭噉，食落就唔知係咩嚟

南美洲嘅好多資訊都係Toni同Nicole話比我哋聽嘅，佢哋總係早我哋少少去到我哋想去嘅地方，啲資料比起旅遊網站更加新鮮。喺佢哋嘅介紹之下，我哋經Trujillo去山區城市Huaraz，同一時間佢哋就去緊Machu Picchu，亦都分享咗相對抵嘅方法比我哋


過咗幾日，燒已退好返好多，我哋都再度起程，要快啲追到佢哋先得

委內瑞拉咁恐怖

真係唔知，但我睇過啲早過我幾年去嘅南美遊記，14/15年都有人去過，當時經濟都已經幾有問題，啲銀紙黑市價同官方匯價差一百倍之類⋯⋯搶劫之類嘅就全南美都要小心，至少見佢哋生命係安全。

所以可能只係我唔夠膽

啱啱先講完要搭少啲長途巴士，轉過頭又去咗坐八個鐘 Huaraz係我哋第一個住嘅高過3000米嘅城市。


參考咗朋友意見，報咗個Laguna 69嘅行山團。Laguna係湖嘅意思，69號湖聽個名就有啲頹，但畢竟都係海拔4600m嘅高山湖，我哋估應該都唔錯。出發當日，司機清晨五點已經係樓下等我哋


個團都幾多人報，坐滿咗一架旅遊大巴。鬼咩，朝早五點已經起行，預行六個鐘，計埋來回車程玩到夜晚七點先返歸，包埋接送都係35 Peruvian Soles一個，HKD90都唔使。正式開始行山之前，會先車我哋去補給一下，比未食早餐嘅人買啲嘢食。最重要係飲返杯Coca Tea，減低高山反應。


未開始行已經有啲湖景。


淨係呢度感覺已值回票價Huaraz一帶有成四百幾個高山湖，相傳有人求其將啲湖順次序比冧把，咁啱排到69就叫Laguna 69，而唔係有人喺度玩69


向住雪山嘅方向進發。


開始咗冇幾耐已經唔見咗導遊。團友太多，導遊負責喺前面帶路，我哋呢啲速度慢嘅就一個跟一個噉喺後面行。


唔捨得行得太快，怕會錯過靚景。


如果Baños嘅瀑布叫做氣勢磅磗，呢個就叫做小鳥依人，夾埋座雪山簡直如詩如畫。唔怪得啲古人鐘意對住山水淫詩作對，我望返啲相都覺得思如泉湧如果我喺秘魯長大，我應該會係一個詩人。


就算做唔到人，都可以做隻秘魯牛。西貢啲牛牛好多烏蠅嬲，呢度好似冇


牛牛都搵到自己嘅天堂。天大地大，又有冇香港人容身之所？


行咗兩三個鐘，我哋嘅速度越嚟越慢，大隊早就唔知去咗邊。記得有段路係S型噉上嘅，每轉一個彎，女神已經大啖大啖喘氣，唔抖唔得，而我都唔係好好多。我哋身後仲有個台灣女仔，佢一個人嚟參加呢個團，望落比我哋更加唔掂。


呢個湖係第幾號湖呢？


行山最緊要唔好頹。如果你覺得辛苦，請你同自己講聲轉角就到。


台灣女仔問我仲要行幾耐。 我話前面就到。其實我撚知咩？我同你都係第一次嚟之嘛。可惜嘅係，佢話就算前面真係終點都冇用，因為我已經唔得了，頭好暈，對唔住我陪唔到你哋繼續，我要喺呢度折返喇


可是你錯了。


二十分鐘之後，終於到咗。如果你堅持多陣，呢張相就可以多一個人。


同導遊闊別四個鐘後，終於見返佢。第一句就同我哋講，好啦都留咗好耐，係時候落山啦 ¡Vamos, chicos!


我平時好斯文，但一上到嚟就即刻要走，真係唔得要屌你老母


落山嘅時候，我覺得頭好痛，食埋止痛藥都仲有啲暈，反而女神比起上山時仲精神咗，要調返轉頭鼓勵我落山，真係好勁。明明每次，你都係比我話好易好易噉水咗上嚟，但到頭嚟係我冇咗你就做唔到。

返到巴士，我哋同台灣女仔講返真係就到，但佢都冇後悔。因為人唔會知幾時到極限。知所進退都係旅行嘅哲學，人冇事先做到世界冠軍。反而我哋兩個上到車，個腦就即刻熄機，好似兩個都發燒。到底係因為太辛苦而再病，定係喺Trujillo根本未好返，再傳染埋比女神，我唔知道。

每日有文睇好感動

係 今次打得好快
追唔切
好勁

病加上舟車勞頓之後行個海拔咁高嘅山
簡值係玩命

今次仲唔洗底

咁同女友去就唔好博啦

委內瑞拉曾經都係南美好繁榮嘅國家，希望佢哋有一日可以走出黑暗

靚嘅風景係留比堅毅嘅人

返到房後一直瘟瘟燉燉，頭赤赤瞓唔着，瞓喺床上面碌電話。突然之間，比我見到一封令我嚇到彈起身嘅E-mail。


日盼夜盼，終於盼到之前留低咗聯絡嘅南極船飛代理覆返我。我哋嘅南極之旅終於見到曙光


原來Last Minute嘅船飛唔係都市傳說，係真係有嘅！而且仲唔止一個選擇。明明我哋兩個本來都病到痴痴呆呆，突然迴光反照，好興奮噉睇緊應該報邊個

喺出發前我都有個預算，諗住就算撲到飛，都要四五萬一個人，而家見啲offer比想像中更平，港幣三字頭就有交易，真係已射thx似乎首選都係USD4200嘅十日團，次選就係USD4700要埋個獨立廁所。其實19日嗰個去埋福克蘭群島嘅都非常吸引，不過每人平多USD2300都夠我哋喺南美洲玩多兩三個月，如果坐多9日船同三個月南美比，又好似後者開心啲。衡量過晒都係十日嘅基本團已經好滿足。

既然揀好咗，我哋就即刻回覆報名，代理亦都秒回，佢話4200嗰個已經比人訂咗有冇搞錯，我哋一睇到即刻覆都冇不禁懷疑係咪啲氹人快啲比錢報貴團嘅戰術嚟不過4700嗰個都仲係好抵，既然呢個仲有，我哋就即刻碌卡比錢了

日頭睇完咁靚嘅高山湖，夜晚就買到去南極嘅平飛，一切真係順利到有啲唔真實。我望一望日期，今日係10月25日，11月1日開船。換言之，我哋有七日時間由Huaraz移動到阿根廷嘅登船之地烏斯懷亞。

我諗，應該唔難

10月26日。

比較過價錢同時間之後，決定先坐一程巴士落首都利馬（Lima），然後經阿根廷首都轉機，飛去烏斯懷亞。驚住遲咗冇位，即時訂埋10月30日嘅機票，去到抖一日上船，時間啱啱好。得兩間航空公司有呢條線，一係搭LATAM，一係就Aerolíneas Argentinas。由於買得太趕，平啲嘅AA都要六千蚊港紙，但冇其他方法，焗住硬食。有諗過搭巴士，但計過數就算我肯不眠不休噉搭，都冇啱嘅班次比我一站一站噉駁落去。

於是今日又搭咗八個鐘巴士真係坐到好攰


又係落車就食，食完就瞓。


又係食中餐，我係咪已經變咗嗰啲去旅行一定要食中餐嘅廢老？

10月27日。

話說喺Otavalo開始打遊記冇幾耐，就喺Cuenca自己戇鳩一嘢倒咗杯水落部MacBook到。即時抹返乾諗住冇事，但自此舊電就叉唔到，一定要插住火牛先可以用。捱到利馬，總算到咗一個大城市。決定搵間Apple Store屌屌佢點知上網一Check，原來咁大個秘魯係冇嘅得間叫iShop嘅Retail Authorizer。不過反正得閒，都照去問吓，睇吓秘魯人壞咗機點樣解決。

上咗架的士直接去間iShop。開車前講好咗價15 Soles，我拎定錢出嚟，點知一甩手就跌咗落張爛梳化入面嗰啲棉度，要拆咗佢張櫈先拎得返出嚟。好彩嘅係拆出嚟嘅時候應該上手留低嘅錢都比我哋執到，同埋個司機都唔介意我拆佢張櫈唔好彩就係搞完一輪之後隻手成陣鼻屎味


排咗一陣，再擊退埋個打尖阿叔終於到我。個職員聽完個情況就話冇得整

「冇架喎，你去美國整啦。」「你擺低部機都得，我哋都係幫你寄返美國整完再寄返嚟，但個價錢仲貴過買部新。」唔撚係掛

我再問佢嚟緊會去阿根廷同智利，你估有冇得整。佢話佢都唔知，淨係話呢啲國家先進啲應該有機會嘅。睇佢個樣都係Hea答我，但問多兩個同事都係冇分別，唯有收自己皮。

雖然稍有失望，但今晚仲有一樣嘢令我哋好期待。唔經唔覺，我哋已經好耐冇食過日本菜。噉同南美洲有咩關係？原來秘魯同日本嘅Fusion菜係好出名

從前有個秘魯人讀完書之後去咗大阪旅行，輾轉喺唔同嘅壽司店打工，返到家鄉之後喺秘魯嘅Sheraton將壽司融入當地，帶起咗Nikkei（呢種秘魯日菜喺秘魯嘅叫法）嘅潮流。佢開嘅Maido餐廳仲攞埋南美第一嘅殊榮，近年就過檔去咗澳門嘅MGM。Maido貴到hihi，我哋退而求其次揀咗口碑唔錯嘅Edo Sushi。


呢間都排長龍入到嚟，循例都問吓我哋係日本人定係千奴（Chinos＝中國人）。喺南美洲聽千奴聽到好撚煩，都話係香港人咯啱啱開Post嗰時應該就係聽到嬲先改咗呢個名


香港人最鐘意食壽司，我哋都唔例外，真係好撚好食喺南美食咗咁耐薯條撈雞同啲咩飛機場濕鳩中餐，終於都可以食返餐好 Ceviche其實都唔錯，但都係熟悉嘅日本菜更開心。


佢哋會將一啲當地嘅醬汁同材料加落去，例如牛油果就好常見，亦有啲好似Tabasco但又唔係真係Tabasco嘅特制醬汁。搞笑得嚟仲好好食，可以話玩得好出色


反而熱食就鹹咗啲，冇乜驚喜。

我哋已經決定咗離開利馬之前起碼要食多一餐先走

10月28日。

呢幾日都有Keep住Check吓E-mail睇吓會唔會有咩新消息。點知真係有喎。


航空公司尋日通知我哋，30號班機因為機師罷工，已經取消咗我竟然今日先睇到，真係比佢嚇撚死。如果因為噉而上唔到船咪仆街，兩張船飛連埋機票八萬幾銀即刻打佢上面寫嘅電話去問吓點算，但打咗幾次都冇人聽。


時日無多，我哋即刻出發去機場問清問楚。

我Check過晒Lima去Buenos Aires嘅AA機，每日只得一班，我哋一係就睇下有冇得改今晚或者聽晚嘅機，一係就另外比錢買住LATAM先，再睇下有冇得退返錢。點知，去到機場AA個櫃位都冇職員喺度

原來因為呢間航空公司喺利馬機場一日得一班機嘅關係，只有起飛前三個鐘先會有人返工，其餘時間只可以打電話。我哋嘗試去打，但都唔成功。明明寫住服務時間9-5機場嘅職員都表示幫唔到我哋，一定要等佢哋返嚟先得。

今次真係大獲了，唔通一場罷工就毀滅我嘅南極之旅

其實都仲一個辦法，就係買過另一張南極船飛但一直以嚟為咗慳一百幾十，唔知捱咗幾多程通宵巴士，坐廁所，瞓車站，放棄咗Galapagos，如果噉樣突然使多十皮嘢，我不如一開始買定飛好好計劃旅程，真係好唔甘心。點解會咁啱買中咗呢班仆街機，而啲機師又揀中呢日罷工？點解？

見到你打應該唔難都知有d伏

Sopa Wantan係雲吞，水煮果隻。Wantan Camnu就係錦卥雲吞，即是炸雲吞皮加酸醋汁。BTW welcome to Lima

ps.真係食唔慣當地野食就去Chifa食Lomo Salada, 即是中式牛柳秘魯落地生根版

見到你打應該唔難都知有d伏

Sopa Wantan係雲吞，水煮果隻。Wantan Camnu就係錦卥雲吞，即是炸雲吞皮加酸醋汁。BTW welcome to Lima

ps.真係食唔慣當地野食就去Chifa食Lomo Salada, 即是中式牛柳秘魯落地生根版

都係亂鳩噉嗌，睇吓會叫咗啲咩出嚟
巴打住喺利馬？可惜冇機會留多幾日慢慢行吓