300日浪遊到南極，直到世界盡頭（IV）

lm

今次一定寫完

比你激勵咗多謝支持

多謝支持

你講得啱，如果冇行到麥徑或者個行路Post冇乜人睇，我都未必會寫返，人生真係好多意外

下一站基多（Quito）。


行完Saturday Market再坐埋車已經夜晚。基多係厄瓜多爾嘅首都，亦係世上最接近赤道嘅首都，基本上冇分冬夏季，一年嘅溫度都差唔多。以為赤道嘅地方會好熱？噉就估錯了。基多海拔2850m，以首都嚟計全世界第二高。因為夠高，天氣屬於陰陰涼，日頭好多時20度咁上下，夜晚就10度左右，一年四季都係噉，舒服到冇得彈。

我哋住嘅Hostel要行樓梯，好快就感受到高海拔嘅影響，行上兩層都有少少喘氣，只可以放慢腳步。街上嘅人普遍行得好慢，但佢哋應該只係因為悠閒。


知道自己地理位置獨特，當地非常識玩，整咗個赤道公園嚟自High而我哋玩咗成半年先由北半球嚟到南半球，呢啲地標嘢又真係中晒我心理。即刻去打卡先


佢叫做Ciudad Mitad del Mundo，意思即係世界中心之城，好撚霸氣。

赤道有咩可以介紹？睇佢個樣都係整個牌寫住赤道，影張相就完但我都係乖乖課金入場。所以話，遊客係幾咁易呃


其實就係一個公園。黃色條線就係赤道，標誌住一邊係北半球一邊係南半球


零係緯度。赤道嘅緯度就係零，南極圈就係66度34分，究竟我係咪真係可以去到呢？開始入到南美洲，我已經Send咗一啲Email比啲有賣Last Minute船飛嘅Agent，叫佢哋有折扣記得覆返我。 當時已經係十月。視乎天氣，最早去南極嘅遊輪一般十月或者十一月開始，所以嗰排我都日日Check Email，但暫時仲未有任何回覆。如果過多一兩星期都冇回音，我哋都係時候直接去出船嘅城市阿根廷Ushuaia睇吓。

話就話有時間等，但萬一去到冇，要等幾個月都唔知點算。阿根廷生活費都唔平，嗰度亦未必有嘢比我玩到咁耐。更何況Last Minute嘅船飛對我嚟講就好似一個都市傳說，只係聽人講過，但身邊冇一個識得嘅人真係買過，都唔知係咪真係存在。如果我開船公司，都唔想減一半價賣比窮撚


如果去唔到，之後該何去何從？

留名先

唔好再爛尾，唔係話俾你老婆聽

留名 睇完po就諗返起2017年我都獨遊左歐洲一個月
亦都好想打遊記 但隔得太耐記憶都好模糊
樓主仲記得咁多細節真係好勁

少咗好多細節啦，開頭真係連一碟飯一張車飛幾多錢嗰啲都可以寫，而家主要都係啲最初有記低嘅心情。

隔咁耐寫返最大嘅感受係旅行時一定要影相，唔好怕煩。就算影得唔靚都好過冇。有相先可以留住嗰刻嘅畫面

Lm
樓主應該係旅遊台入面，因為爛尾而最出名既人

去唔到世界最南，就返嚟世界中心同大媽一齊跳舞補返數，可以嗎？


其實呢個世界中心之城唔止企喺黃線上打卡，都有唔有其他嘢，其中一個館就好似科學館噉，借赤道順便介紹吓其他地理知識。


例如人嘅重量會隨緯度改變。減肥除咗做運動同節食，仲可以搬去赤道地區（厄瓜多爾投資移民港幣30萬，冬暖夏涼，四季如春，有少少儲蓄嘅巴絲打可以諗諗）


科學館隔離有個朱古力館。同哥倫比亞一樣呢度都係盛產朱古力。




除咗朱古力，仲盛產天竺鼠係拎嚟食嘅


同埋靚女著嘅原住民民族服飾

成個世界中心之城可以話係當地將佢哋最想推廣嘅文化嘢擺晒喺入面，作為一個對厄瓜多爾嘅簡介算係做得幾好，好啱我呢啲啱啱嚟到嘅遊客首先參觀。


睇完返歸又再厚雲天陰。無論係Otavalo、基多定之後嘅城市，成個國家幾乎每日都會有一段時間藍天出太陽，去到下晝嘅後半就開始天陰，落一陣雨，然後夜晚停雨變返涼爽。一定唔會曬足全日，而場雨亦一定唔會落足全日。唔怪得以前嘅基多王國同印加王國都先後以呢度做佢哋嘅文化中心。


只可惜冇一個地方可以永遠都咁輝煌。

唔出名所以呢句說話唔成立

成日都心思思想行山，難得呢頭周圍都係高山就唔想錯過喺Hostel得知有團可以去到Cotopaxi國家公園，近距離睇5897m高嘅火山，唔使講都知一定好靚。但見佢包車去Otavalo睇市集都收幾百蚊一個，食水幾深，唯有自己諗辦法去。


坐咗個零鐘向南行嘅巴士，都係一兩蚊美金坐到總站先發現原來過咗龍，要搭返轉頭第二次睇住Google Map喺中途落車，原來喺公路中間落先啱。不遠處又真係有個牌寫住國家公園嘅入口。


由呢度行入去公園入口都要成粒鐘。我哋眼望望咗一陣，好快就有人話車我哋入去，價錢果然平過Hostel好多


原來佢哋都係開Hostel嘅，不過佢哋間Hostel就喺呢度，就算玩夜咗可以Book一晚住埋。循例都要登記下資料，以防喺山入面有咩事都有個紀錄。


登記緊嗰時撚下草泥馬


過埋呢個位就正式入園。


司機同我哋簡單介紹吓，入到去之後會有個停車位，之後就行上去，去到4800m有個位就冇得再上，喺嗰度休息下，睇下景就落返嚟。如果要攻頂就要Join啲有Guide嘅團，要用攀雪山嘅工具同唔止行一日。


出發


一落車，天氣唔係幾好司機就話No problema，你哋自己上去我一開始仲戇鳩鳩以為個司機係兼埋導遊會同我哋上去，原來自己諗多咗。不過佢就話條路好簡單，唔使人帶嘅。


唔嚟都嚟咗，又試吓行囉。


行行吓就見唔到自己架車。


取而代之嘅係彩虹。我當時先知道，原來彩虹係可以喺自己腳下面


變幻莫測嘅天氣，另一個角度就變咗陰天


好Q斜


山頂驚鴻一瞥。開始行到有啲攰了。



路程唔長，但一路落住雨，又濕又凍，連影相隻手指都好痛


濕撚晒


唔撚驚


係咪到啦係咩嚟呢？



原來係一間餐廳嚟。
咩人咁型棍會喺4864米嘅山上面開餐廳普渡眾生一句講晒，如果100蚊一杯熱飲買定唔買？

幾年前已經有睇你嘅post。

樓主好睇嘅地方係細節位交代得好好，資訊十足，感受表達恰到好處。

可惜間中棄文，樓主實在令人又愛又恨。

而家冇得去旅行，惟有靠你啲文喇。

2個字
精彩

lm

湯5蚊，熱朱古力2蚊。Té de coca就唔係普通茶，而係安第斯山脈一帶（厄瓜多爾、秘魯、玻利維亞同智利嘅山區）都好常見嘅古柯茶。當地人好鐘意用佢嚟舒服高山反應嘅不適，所以成日會沖比遊客飲，見唔少揸長途車嘅當地司機都會一路咬住啲Coca Leave一路揸車，喺啲山到轉時會冇咁容易頭暈。而呢啲Coca其實係同可卡因同類嘅成份嚟，所以有啲國家會當毒品處理，如果要帶出境就要Check清楚先。

不過一般沖茶飲嘅份量好低，多數飲完都冇咩感覺，唔使聽到可卡因就擔心


當時已經凍到成身震，呢個價錢唔使諗，即刻狗衝仲記得喺呢間屋仔門口有個外國人啱啱行到上嚟，我哋想請佢幫我哋影張合照，佢就話Sorry我隻手痛到郁唔到，今舖真係幫唔到你哋


我哋兩個都冇唔舒服，今次就冇叫到茶，之後亦有好多機會飲。揀咗熱朱古力行高山有熱飲真係好爽，後來有次行Kilimanjaro導遊都係喺山頂沖熱薑茶，有次行富士山就狂㩒山頂部售賣機嘅罐裝熱粟米湯


休息夠咗就落返去。雖然停咗雨易行好多，但落斜好跣，仆咗一次街


回望餐廳山屋同雪山山頂。


上返車飄移一輪就喺附近影吓相，睇吓景，呢個Cotopaxi半日遊就正式結束。

冇棄文 多謝你一直支持

錫錫

去完赤道，睇完雪山，返到基多市中心四圍行吓。


同哥倫比亞大同小異嘅街頭。都係西葡式建築同塗鴉。


南美洲都係天主教嘅天下，今次呢個教堂入得。


媲美伊朗Shiraz嘅粉紅清真寺，我個人非常鐘意


去完之後先知，原來玻璃窗嘅底部有寫住啲花嘅名，係唔同種類嘅百合同蘭花嚟，象徵住呢個國家入面有四千幾種蘭花。其中嘅白花修女蘭就係厄瓜多爾國花


唔止裡面靚，教堂入面仲有通道可以行。



原來係觀景台嚟。


腰馬合一


我都唔執輸，上去望望先。畏高嘅就下面等了


Basílica del Voto Nacional， 國家誓言聖殿。城市建築甚少比到我「必去」嘅感覺。但呢個教堂算一個如果點都要形容吓，可以幻想吓東京鐵塔比你行出去唔使隔住玻璃噉睇東京全景



對面見到嘅係麵包山El Panecillo，即係啱啱嚟到基多住宿對出望到嗰個夜景。上面豎立咗西班牙藝術家用七千塊鋁片造出嚟嘅女神像，據講個像係啟示錄嘅光明婦人嚟。我就唔係好熟聖經，唔知呢個人係代表啲咩，都冇特登走去睇了

樓主同老婆好鐘意擺情侶舖士合照，好得意

你哋都有好多

安第斯山脈一帶嘅國家飲食文化都幾接近，主要都係食雞、薯仔薯條同白飯，因為幾個國家都有長長嘅海岸線，海產都唔少，好多地方都會將啲魚生切碎用檸檬汁去醃，再加啲洋蔥檻欖等嘅配料一齊食，叫做Ceviche。唔同國家嘅Ceviche口味會有分別，多數都好好食 湯都幾常見，個人認為總括嚟講好食過中東同東歐好多。


如果食中餐就要撞吓手神，或者睇吓佢本地化得嚴唔嚴重。嚴重嘅會中式炒飯撈薯條，再加啲亂鳩噉落嘅茄汁。




離開基多向南走，去到中部城鎮Baños de Agua Santa，亦係進入厄瓜多爾亞馬遜雨林嘅入口。Baños嘅西班牙文意思係廁所／浴室，Agua係水，Santa係神聖，夾埋一齊應該係指聖水浴。呢度一帶以多瀑布出名，成個城鎮沐浴喺神聖嘅瀑布之下，係一個好名嚟。但因為太長，好多時簡稱Baños，即係廁所，就變咗柒名了
中文好似就噉音譯巴尼奧斯

暫時未有入雨林嘅打算，睇吓佢啲瀑布先。雖然呢度唔算出名，但以前淨係睇過梧桐寨嗰條，只要勁過佢我就收貨架啦。


揀咗呢個——Pailon del Diablo - Grieta al Cielo，Google Translate都唔知咩叫Pailon，另外嗰幾隻字好似係解惡魔瀑布，勁到天堂都裂


都要行一段路。但通常越偏僻會越靚嘅。


未見瀑布先見小彩虹


遠觀還好


近觀水柱巨炮



沖涼。


落去望吓。


雙彩虹

Baños呢度一帶有超過六十個瀑布，我哋揀呢個只因佢個名叫惡魔好似猛料啲因為預咗遲啲會去睇南美第一嘅伊瓜蘇瀑布，都唔心急喺呢度睇，今次就少少哋睇住一個先。去完呢度反而對伊瓜蘇更加有期待

終於捨得寫啦咩

睇完瀑布之後我哋都承認比預期靚，低估咗呢個地方。本來只係預咗喺度玩一日。踏入旅程中段，冇一開始咁好精力，好多時一日一個活動已經夠皮。但見呢個瀑布都幾靚就決定進取啲，睇完即刻去多一站


兩三點打後又上演厄瓜多爾日常，天陰厚雲，轉頭必定落雨。


嚟呢度係做咩呢？有人喺山上面搭咗間樹屋，整兩個韆鞦比人玩。成件事都係劏遊客嘅節奏，但衰鬼個景又好似幾靚。同上次哥倫比亞個You are not at the top of the world啱啱相反，呢個韆鞦就自稱Swing at the end of the world。但點解係End呢？好似勉強咗啲


不過玩吓無妨。


落咗陣雨，景色一般。呢個韆鞦吹大咗，但我唔介意嘅，冇可能次次都超出預期。


正當諗住冇乜驚喜不如返歸嘅時候，望一望對面，竟然又再比我見到雙彩虹，今舖仲要加啲耶穌光每日都會落雨，落完接近黃昏就出太陽，一年四季都係噉，又冇高樓大廈煞風景，厄瓜多爾根本就係彩虹之國。忍唔住又鐘意咗呢個只係嚟咗幾日嘅國家。


玩多幾日先走得唔得？

一直都寫緊喎