300日浪遊到南極，直到世界盡頭（IV）

一定會有嘅我記得有啲我都有寫出嚟，有次激動啲喺雅典分開咗行。你可以追返Post

笑死

巴打買飛既文係邊一部份 定我KEEP左

買船飛？係咪講#93

11月1日，上船日。


係時候暫別Ushuaia入去碼頭，都有個簡單嘅出境程序，算係離開咗阿根廷，進入唔屬於全球任何國家嘅地方。其實喺二十世紀初，好多國家都爭相喺南極大陸霸地盤，其中英國、阿根廷同智利仲有好多聲稱擁有嘅領土係互相重疊嘅。因為怕會擦槍走火，先傾咗個南極公約出嚟，自此之後大家就唔准再爭。


下晝又變返陰天，但已經無阻我哋上船



呢架就係我哋嘅坐駕M/V Ushuaia。架船一共可以裝90人，去南極嚟講100人以下屬於細船，100-200人嘅算大船，而裝200人以上嗰啲就唔比人落船嘅，可以唔計至於點解用100人嚟做分界？原來根據規矩，去到南極大陸之後每次只可以登陸100人，即係話大船就每次要分兩批人落船，細船就冇呢個煩惱。



上到去之後，先知道仲有廿幾人因為Book咗Aerolinear Argentina嗰班罷工機而仲未嚟到 平時一定逾時不候，但今次因為人數太多，佔咗成架船三分之一，加上唔少都係買咗貴房嘅有錢客嚟，所以船長話會破例等埋佢哋。呢班仲未嚟嘅人全部都係30號去到機場先知中伏，結果要搭1號嘅機最後一刻趕到。呢刻覺得當時有Check E-mail知道冇咗班機嘅自己係幾咁英明。我完全明白你哋驚上唔到船嘅感受


等人嘅時候我哋就攞咗房先。旅行咗咁耐，呢次住宿真係最豪華啦


USD500嘅獨立廁所


因為係細船，冇乜設施，走廊亦都幾窄。有一個唔係好慣嘅地方，就係因為安全理由，所有房都冇門鎖，要確保有咩危難嘅時候隨時可以走到。 唔慣還唔慣，我哋都係非常放心。反正我哋實係條船最窮嗰個，要偷嘢都冇人會揀我哋間房


唔知有冇人會因為班機而嚟唔到呢

我會mark point form,旅行完再詳細寫

又得，總之要搵辦法令自己記得

係 thank

由一追起

每日嘅日程都會喺壁報版度貼出嚟。想知嗰日會去邊，就自己出嚟望吓。第一日主要都係做吓簡介，而架船就會沿住Ushuaia以南嘅Beagle Channel駛出南美洲。



等吓等吓，最後一批乘客終於上到船，有人喺上船嘅一刻忍唔住喊咗出嚟

齊咗人就開始介紹嘅環節。成架船最終有88個乘客，同Max嘅90人比少咗兩個，聽講就唔關班飛機事，應該真係有兩張飛賣唔出。齊人冇幾耐，我哋就聽到有人喺船上面鬧交，有條友一個人上船，分好房之後發現要同唔識嘅人Share之後就發晒癲，話冇可能比咗咁多錢都唔係Private Room，堅持職員係搞錯咗。仲凶啲職員話自己好撚有錢，買起咗南極都得，叫啲職員唔好得罪佢事實係買嘅時候寫得清清楚楚，根本唔係發惡就得。不過如果架架船都有呢啲大帝，一開工就十幾日冇得收工，打呢返工都咪話壓力唔大。


Source：官網 https://antarpply.com/en/ratesandavailability
其實真係有單人房，不過條友似乎就買錯咗了啱啱上去官網睇，今年年尾同出年嘅飛都有得賣，唔知到時武漢肺炎咩環境但點解仲係賣到要入Waiting List嘅呢，除咗阿根廷人仲有咩人去得到

我哋嗰張就係Standard Twin Plus嚟。


Source：官網 https://antarpply.com/en/the-ushuaia/deck-plan-and-cabins
原來呢架船原本係科研用嘅，所以設備上唔會太豪華，基本上除咗有個公共空間用嚟做吓介紹宣布吓嘢，同埋有個飯廳，就乜都冇了。而且因為規模細，比起大船都會更加搖擺。 船員叫大家做定心理準備，同時派晒暈浪藥比大家，叫大家無論幾有自信都食咗先講，免得後悔。我哋聽咗好多預告，知道聽日開始會進入德雷克海峽（Pasaje de Drake），係以好撚大浪著名，自然唔敢輕敵


講講吓，終於正式出發

之後都係試吓啲裝備，睇吓啲雪靴啱唔啱Size，同埋教吓大家着救生衣，遇到緊急情況喺邊度集合嗰啲應變事項。


左邊呢個細路夠晒威，十歲就坐上咗去南極嘅船上船係有年齡限制，冇記錯至少都要十歲，即係佢一夠秤就去南極，佢老豆老母一定好有錢講起啲乘客，如果用國藉嚟分，88人入面有一半都係美國人嚟，澳洲紐西蘭都有十幾廿個，英法德分別各有幾個。亞洲人好少，十歲細路一家三口係馬來西亞裔嘅澳州人，有對菲律賓出世嘅夫婦都係澳洲籍。真正亞洲國籍嘅隨咗我哋兩個香港人，就冇了。而中國人竟然一個都冇聽人講，啲中國人通常都報大嘅郵輪，同埋好多時一大團噉報。唔怪之得完全見唔到


如果用年紀嚟分，88人入面主要係退休人士，佔咗大半。第二大嘅群組就係我哋呢種年紀，都係返咗幾年工有少少儲蓄就出嚟去長途旅行，唔係買Last Minute飛就係買三人房最平嗰啲嘅飛。三四十歲嘅人唔多，睇嚟真係好少有上班族可以請到咁長假過嚟呢度玩


同船上嘅人寒暄咗一輪，更覺自己今次旅程真係好難得。真係要好好珍惜當下每一刻。


同一時間，亦知道呢刻有唔少人同我哋一樣，都係喺世上流緊浪，享受緊生活


冇幾耐之後就到咗晚飯時間。上船前我哋只係知道要睇雪睇冰睇企鵝，冇特別諗食嘢嘅問題。但好快我哋就發現，原來船上嘅每日三餐，都係我哋好期待嘅時刻。


每日嘅晚餐都係Full Set，有晒頭盤主菜甜品，餐餐唔同，味道亦都非常之好。畢竟喺呢一日之前，每餐我哋都係諗住點樣可以食平啲，間中先會好似之前喺利馬食壽司噉放肆一次。呢十日簡直係旅程中食得最好嘅日子 如果你係素食者，或者某啲宗教人士，總之有咩特別要求，餐單都會為你而改。當自己大爺就得


不過船員都特別提醒我哋，聽日進入咗德雷克海峽之後，就會暫停供應湯類嘅嘢，因為會瀉晒落哋。又提大家好多人暈船浪就會冇晒胃口，記得好好享受呢一餐到底啱啱喺秘魯先病完，又比啲機票行李輪姦完嘅我哋會唔會頂唔順呢

第一次追po 好正

終於出發

最後條友點解決？

最慘係原本編咗同佢同房嗰個男人比佢屌，勁無辜，無啦啦比人鬧鳩完佢都唔想同條仆街同房。但位就係得咁多，結果搵晒啲單丁報團嘅男人出嚟調咗一輪就算了 始終都要對多十日，大家都尷尷尬尬費事講太多

終於寫到南極

上船頭兩日都係橫越阿根廷同南極洲之間嗰一千公里嘅海峽。雖然冇得落船，但船公司都安排好咗節目，比有興趣嘅人自由參加。兩日嘅日程都係一樣，朝早八點自己埋位食自助早餐，食完抖一陣十點會有堂上，內容包括地理、動物、環境等等，上完堂冇幾耐十二點就食午餐，食完睇吓紀錄片，睇完有四點半下午茶，五點再上堂，最後七點食夜晚。兩日都係食瞓上堂嘅養豬生活


但正如前一日船員嘅提示，穿越德雷克海峽嘅時候好大浪，啲浪嘅高度可以去到幾米，架船時時刻刻都係左搖右擺，好似坐緊一架搖足兩日嘅海盜船。好彩我哋兩個食咗暈船藥，又旅行咗咁耐，搭長途車當食生菜，爛船都有三根釘，算係冇乜影響記得前一晚船醫強烈建議大家食定藥嘅時候，有班阿婆話自己從來唔會暈浪，唔需要食，結果就兩日冇見過佢哋


但就算行到出嚟，喺船上面都要扶穩，見過有阿婆呯一聲撻咗落地



第一堂嘅Lecture就係講企鵝種類唔知係咪人老咗集中力就下跌，好多人就算嚟到都係瞓覺我哋有時都飯氣攻心，但既然都喺架船到，我哋都盡量出席。我諗我都有八九成出席率


有時就睇吓紀錄片。


有啲時候會直接閂咗度門唔比出去，以防有意外。當去到冇咁大浪稍為安全嘅地方，就會開放返甲板部分，比大家抖吓氣，出去影吓相吹吓風。呢兩日外面嘅溫度介乎-5至5度之間，但風好大，體感溫度就更加低。一般出去幾分鐘都夠皮。


亦都唔介意開放埋個駕駛室比大家參觀。如果有動物出沒，船長就會用廣播話比大家聽，等大家睇吓捕唔捕捉到 但通常都係彈出水面一兩吓就消失咗

多謝支持

好彩去到

寫咗四年終於寫到

我喺樓主開第一個post嗰陣因為南極兩個字吸引咗入去睇
點知等撚咗樓主4年先有得睇南極

寫咗4年
我用4日 Live咗
期待新文

終於到戲肉

第三日嘅下午，架船開始駛入布蘭斯菲爾德海峽（Bransfield Strait）。

即係呢度，代表我哋就快可以見到南極洲嘅大陸

嚟到呢度，架船已經過咗最大浪嘅德雷克海峽，冇再搖得太勁。要嘔嘅人都已經將所有黃膽水都嘔晒出嚟，係時候重新做人。


食個甜品就開始今日嘅briefing，呢次係強制參加嘅，因為會提及聽日登陸南極嘅注意事項。


大堂亦都由朝早得小貓三四隻重新迫爆，證明真係好多人暈得太勁出唔到嚟。 有人嘔到七彩，直情連飯都出唔到嚟食，真係唔知佢哋點樣捱過呢兩日


聽日到咗南極大陸之後架船就會停低，如果天氣良好，會安排我哋坐艇仔出去登陸為左保持呢片最後淨土唔受污染，離開架船之前要消毒，要確保冇一啲種子之類嘅生物帶去南極上面。出到去之後亦有啲規則要遵守，例如見到企鵝要同佢哋保持五米距離，一定唔可以掂到佢哋等等。


越嚟越接近南極，開始見到冰山


之後就喺航向南極嘅夕陽。


喺船上面睇日落，係每日嘅賞心樂事。有人話見度個夕陽發出綠光我哋就睇唔到。係真係有呢個現象，定係旅程太夢幻而出現嘅幻覺？


我淨係知我要衝向船頭，好好欣賞呢片汪洋。嗰一刻我喺度諗，我會唔會係地球上最接近南極嘅人？

終於明白啲作家嘔心瀝血寫書嘅感受