300日浪遊到南極，直到世界盡頭（IV）

依加翻唔到hk，打算落墨西哥之後去南美
仲未追哂post
樓主有冇邊個地方特別推薦

巴打繼續出POST呀唔該，兩年無得去旅行，已經唔係好記得旅行既感覺

拿，月中啦

星期三，應承大家

慢慢追
巴打有幾多時間喺南美？馬丘比丘、天空之鏡之類嘅大景點都名符其實，我自己好鐘意厄瓜多爾同秘魯

都要十幾萬一個人

過年啦

等千奴巴今日出新post

希望今晚有新post

而家寫

會有嘅

匆匆走完伊瓜蘇市嘅景點，係時候出發去下一站。其實早喺南極返到阿根廷冇耐，我就已經訂咗機票，由巴西聖保羅坐返葡萄牙。計埋伊瓜蘇呢一日，距離離開南美洲嘅日子，只係得返十四日。巴西係一個非常大嘅國家，唔好話十四日，就算有十四個月都一定玩唔晒。得返咁少日子，都有種唔知點樣安排嘅感覺。

除咗最後一定要由聖保羅離開，同埋想去埋里約嘅基督像打卡，其他嘅日子都未有安排。自從踏足南美洲之後就一直想去亞馬遜雨林探下險，嚟到巴西再唔去就冇機會，於是就決定搵幾日入一入雨林由巴西走入雨林，主要都係經瑪瑙斯（Manaus）。瑪瑙斯係巴西亞馬遜省入面嘅城市，但唔好聽到亞馬遜就以為好荒蕪，呢個城市人口超過一百萬，除咗好近雨林之外，基本上同一座出面嘅大城市係冇分別

由於瑪瑙斯離伊瓜蘇十萬八千里，距離上差唔多等於由香港入拉薩，我哋都唔想直接搭車入去。比較完機票之後，決定先坐車入去巴西利亞玩兩日，再飛入瑪瑙斯釣人魚

不過由伊瓜蘇坐入巴西利亞都唔簡單，我哋一朝早就上巴士，落車嘅時候已經係第二日嘅下晝，足足坐咗廿九個鐘成為咗旅程中最長嘅一次巴士，中間屎忽同膀胱都唔知爆咗幾多次。


至於無啦啦點解要走嚟巴西利亞，其實我都唔知可能只係覺得去一個國家既然唔知去邊不如去吓首都。同埋好少聽人去呢度，不如自己嚟望下


講起巴西，可能最多人認識嘅地方係聖保羅或者里約熱內盧，前者係全南美最大最多人住嘅城市，後者啱啱16年先搞完奧運。而巴西利亞，雖然名義上係巴西嘅首都，但無論人口同知名度都唔算好高。巴西利亞唔係歷史悠久嘅城市，而係近幾十年先至憑空起出嚟嘅新政治中心。市入面好多建築都好似相入面一樣方方正正，啲地同路都係好大好闊，睇地圖隔一兩個街口嘅嘢隨時行一頭半個鐘。或者就係因為地大人少空氣好，短短幾十年都吸引咗過百萬人搬嚟開荒，今日嘅巴西利亞已經變咗巴西第三大嘅城市但相比起里約同聖保羅，呢度都係好舒服。旅行嚟講可能冇乜嘢玩，但感覺到喺度生活，日日散步放狗會幾唔錯


我哋初初嚟到，都係喺住宿附近閒逛一下。新城市嘅好處就係會有新商場，一般嘅衣食住行好容易搵到，我哋又再脫離唔到南美壽司嘅誘惑，不過呢度嘅壽司就冇咩睇頭

終於追返哂樓主d南極post
估唔到仲未寫完
好期待埃及睇金字塔啊～

終於有文

終於有文
估唔到會去巴西利亞，呢度係咪可以睇現代建築？除此之外都唔知做咩好了

廿九個鐘是咪因為旅費唔夠要搭巴士

係得現代建築新城市冇歷史

廿九個鐘是咪因為旅費唔夠要搭巴士

慳得一蚊得一蚊

作為一個新城市，嚟呢度玩主要都係睇佢嘅城市設計同埋特色建築。


巴西利亞嘅設計，有人話係一架飛機。睇地圖都見到佢寫住北翼（Asa Norte/North Wing）同南翼（Asa Sul/South Wing），但唔知點解一個用英文一個用葡文當年為咗好好規劃呢座新嘅首都，舉辦咗一個城市規劃嘅比賽，由國家級嘅設計師一齊去諗究竟應該點樣設計。最後由Lúcio Costa嬴咗冠軍。呢位設計師話佢嘅靈感係來自十字架，原先打算設計成一條橫軸同一條縱軸，但為咗更加切合呢度嘅地形同用途，先將打橫嘅部份變成弧形，形成最終嘅模樣。對於個設計媲美飛機嘅講法，Lúcio Costa就唔同意，佢始終覺得佢嘅作品係一隻蝴蝶多過一架飛機。但最後成個行政區域又叫做Plano Piloto de Brasília（機師計劃區），成件事好混亂。總之呢個設計就令到整個巴西利亞都列入咗UNESCO嘅文化遺產項目

喺成個設計入面，政府大樓同立法院之類嘅重要建築都喺晒中間條軸心度，用航拍就可以睇到晒佢成個面貌。但我冇航拍機，就影唔到了之後幾十年，搬入去巴西利亞住嘅人越嚟越多，遠超一開始嘅預算，令到飛機側邊嘅地區越擴越大。不過中心地區嘅規劃就似乎冇受太大影響，我去嘅時候仍然覺得整個都心區係好闊好舒服，一啲大城市嘅擠逼感都冇。從市容可以睇得出，呢度係巴西精英嘅聚居地。基本上只有稍為有錢嘅人先有能力搬嚟呢度當年聽講根據一啲13/14年嘅舊紀錄，巴西利亞嘅人均GDP係南美城市第一但最近有冇改變就唔肯定了。


從遊客嘅角度睇，巴西利亞冇山冇海冇歷史，可以話只得一啲特色建築。但都有一啲可以令人留低深刻嘅印象。呢座Santuário São João Bosco教堂，外面只係平平無奇嘅一個白色長方形，入到去竟然有種驚為天人嘅感覺。


Dom Bosco係一個意大利嘅牧師。點解一座巴西嘅教堂會以呢個意大利人嚟命名呢？原來呢條耶撚唔係神父咁簡單，似乎真係有啲神力。早喺一八八幾年嘅時候，Bosco就話自己發夢夢到遲啲喺巴西嘅內陸會出現一座好有米嘅烏托邦。可能因為比佢噏中咗，後來巴西利亞嘅人都當Bosco係守護神噉拜，城市入面唔少嘢都用佢嚟做名，呢座教堂都唔例外。


整個教堂嘅窗都係用藍同紫嘅顏色砌成，一致嘅色調喺沉鬱之中又有啲神聖。


冇特別信仰嘅我哋都比呢座教堂震懾咗，有啲唔捨得走。但當我哋知道原來夜晚嘅時候教堂中間盞燈係會著，我哋就決定晏少少再嚟多次，睇吓會唔會有驚喜。


同一個景點特登去睇兩次，可能係因為呢度冇咩嘢好做但同時我諗我都真係幾鐘意呢座教堂。以教堂嚟講，如果梵蒂岡嘅聖彼德大教堂排第一，基多同巴西利亞呢兩座就係我旅程入面嘅三甲不枉我坐咗廿幾個鐘車入嚟呢度。


雖然我哋冇喺呢度行禮，但可能天主見到我哋嚟咗兩次，都暗中保佑我哋嘅旅程同旅程之後相處順利希望再有機會旅行嘅時候，大家都可以嚟到呢度，許下心中嘅願望，得到上天嘅祝福。

就快寫到了

哇原來仲寫緊

我哋喺巴西利亞呢兩日，用Airbnb book咗一間酒店嚟住，個價錢係比起直接去酒店book平咗一截，我哋都唔知點解。第二朝，負責同我哋預約嗰個Host就話同我哋一齊食早餐。


我哋去咗一間酒店附近嘅自助餐，由中式點心到西式意粉、海鮮、甜品乜嘢都有，同酒店嘅自助餐冇分別。傾偈嘅內容不外乎都係旅程去過啲咩地方，玩咗幾耐，對方就講吓巴西利亞嘅生活噉。出咗嚟咁多個月，都習慣咗時時刻刻同啲唔識嘅人寒暄，就算係好似我呢啲平時唔識講嘢嘅毒撚，都可以比較輕鬆噉打開話題。反正只要一講起旅程，就自然會有好多內容，唔怕靜咗。呢個技能一直到返咗香港先慢慢消失。因為當旅程結束，同我傾偈嘅，就唔再係旅途上嘅人，而係每日為生活頻撲嘅人。老闆只會關心你點樣幫公司搵錢，放工得唔得閒OT，而唔係你之前去咗邊度旅行。就好似喺度出Post，被問最多嘅問題，就係總共駛咗幾錢。



但人生就係噉樣，唔能夠淨係停留喺一件以前發生嘅事度。除咗間唔中上嚟出Post回味吓，平時已經絕少會提起呢次旅行。與其日日話當年，不如活在當下，睇下嚟緊仲可以做啲咩玩啲咩。


食完早餐，我哋去咗另外一座更加出名嘅教堂。通常提起巴西利亞嘅教堂，啲人都會以為我哋講大都會大教堂。呢座教堂嘅外觀好特別，靚唔靚就見仁見智。但可以肯定嘅係，佢都係出自大師嘅手筆。


Oscar Niemeyer係Lúcio Costa嘅朋友，亦係呢座教堂嘅建築師。而且唔單止呢座教堂，巴西利亞好多重要嘅建築，包括總統府同最高法院都係由佢設計。呢一位建築大師除咗喺巴西勁，喺外國一樣有其他作品。原來佢仲有另外一個身份，就係一名共產黨員 不過就唔係中國共產黨，而喺巴西共產黨。Oscar對共產主義有一份執着，令到佢嘅設計都好受佢嘅信念影響。佢曾經幫法國共產黨設計過總部，亦都雕過一座反美紀念碑，送畀古巴嘅卡斯特羅做大壽禮物


雖然對共產主義冇咩好感，但呢座教堂裏裏外外都係藝術。教堂外部獨特嘅形狀係由十六條雙曲線混凝土柱搭出嚟，再用十六塊玻璃鋼駁埋一齊。



要走入教堂內部，就要先行過一條地下通道。通道入面有一個關於教堂嘅展覽，葡法兩語噉介紹教堂嘅歷史同建築特色。如果不幸兩種文都唔識，就唔好意思，物競天擇，你係唔會睇唔明


走過咗昏暗嘅地道一上到去，就會感受到有光喺天幕嘅玻璃度透入嚟，有種神聖嘅感覺。雖然本身唔覺得呢個教堂特別靚，但神光照射加上正中央鋼索吊住嘅幾個天使雕像，效果出奇地唔錯。相比起尋日嘅Bosco教堂，呢座遊客比較多，兩座教堂可以話係各有特色。


呢一日我哋都係喺首都嘅機身區度行。教堂嘅隔離就係國家博物館，好自然就行咗入去。當時嘅博物館做緊一個巴西策展家Tereza de Arruda嘅當代藝術展。佢哋條Team TA Art Projects基本上會不停喺世界各地度做展覽，不論德國、古巴甚至中國都有佢哋嘅足跡。


對於藝術認識唔深，坦白講睇完出返嚟已經忘記咗八成，更加唔好講幾年後嘅今日但有人話巴西利亞嘅博物館並唔係睇其中某一兩個，因為呢座城市本身就係一座博物館。遊走喺呢堆特別嘅建築中間嘅草地同公園，就好似睇緊一個又一個嘅展覽一樣。


譬如呢個位於機身最前嘅國會大樓，一左一右分別係參議院同眾議院。有人比喻為一對筷子同兩個碗。右手邊向天嘅碗係眾議院，代表開放同接受民意，而左邊唔係好影到嗰個其實係反轉咗冚住嘅碗，係參議院嚟，代表機密。


睇完呢堆古靈精怪嘅建築物，巴西利亞都已經玩得八八九九。夜晚我哋去到巴西利亞嘅機場，由巴西中部飛去西北部嘅瑪瑙斯。去咁遠嘅地方而又唔使坐長途巴，就係長途旅行入面令人感恩嘅事