300日浪遊到南極，直到世界盡頭（IV）

又話唔爛尾既...

今日會出

嗰日送走咗2017年返到房，諗住瞓個靚覺就新一年新開始，即刻就有怪事發生。


突然聽到「呯」一聲，瞓喺床上面嘅我一嘢沉咗落去有一秒以為係咪又地震，爬起身望一望張床，原來係個床架爛咗


上面嗰條木唔知點解斷咗，搞到成個架都下陷，好想都冇乜大礙，純粹比佢嚇一嚇。


以我嘅體重，我都幾肯定唔係我瞓爛佢嘅。應該係上手或者好耐之前已經爛咗，啲人求其擺返正條木扮冇事就算。


好彩呢間二人房有三張床，如果唔係夜媽媽都冇人幫到我調房，隨時新年流流就要瞓地下。搬咗床之後一切順利，喺海拔相對低啲嘅蘇克雷抖咗一陣，女神嘅身體又回復返上Huayna Potosí之前，精神返啲。我都唔想再留喺呢間張床都爛嘅旅館我哋重新上路，坐車去下一站烏尤利（Uyuni），睇睇傳說中嘅天空之鏡


一踏入烏尤利，就代表又重新返到海拔3700米嘅高度。之前都聽過唔少朋友或者網上嘅遊記講，好多人用兩三個星期玩南美洲，時間關係只能直飛烏尤利嘅機場，結果未見到天空之鏡已經高反，全程都好唔舒服，但又唔甘心喺房休息。我哋喺度都放慢腳步，係真係用比平時慢嘅速度去行路，盡量控制好呼吸，以免Huayna Potosí嘅事件重演


周圍散下步嘅同時都睇下啲去天空之鏡嘅團。喺呢度有一個好典型嘅玩法，就係跟三日團，由烏尤利坐車去智利嘅San Pedro de Atacama（即係Toni仔比人食卡嗰度），沿途都會經過天空之鏡。但我哋搵咗啲資料，發現呢個玩法留喺天空之鏡嘅時間會比較短，可能會睇唔晒，所以決定喺去三日團之前另外再報一團。女神一直都想喺天空之鏡着靚衫影靚相，於是我哋就直接Book一個私人嘅二人團，確保唔會比騎喱團友影響到我哋根據埋Toni嘅推介，指定咗導遊，佢哋介紹我哋搵導遊José，話佢影相幾靚同好有心機。另外我哋加長咗團嘅時間，由晏晝最好太陽嘅鐘數玩到日落睇星星，希望一次過望晒唔同時份嘅景色


Book好晒之後，好想介紹吓一間專賣辛辣麵嘅餐廳。可能因為韓國遊客多，烏尤利有間嘢專食芝士辛辣麵，賣到$40一碗。唔知點解離開香港得耐，唔係掛住譚仔，而係掛住唔關事嘅辛辣麵，呢間嘢我哋食咗兩次。食完呢間之後，後來我哋去到阿根廷布宜諾斯艾利斯嘅華人超市先再搵到嚟買，好似都要十幾蚊包

睇完真係好想踏出歐亞版圖去南美

仲有人鏈0__0

之前係宇佐就有遇過咁嘅hostel
男主人同老婆都係日本人
去左新加玻做左五年野之後就去用左三年環遊世界
佢地都有去南極！
有時一齊食飯，有時family day車埋我去玩，又幫手諗下去邊好
距離岩岩所以好舒服

期待天空之鏡

Live，樓主加油，唔好再爛尾了

天空之鏡正名係烏尤利鹽沼（Salar de Uyuni)，係一片大約有十個香港咁大嘅鹽盤，因為橫跨南北一百公里，就算踩行油都要揸足一粒鐘先可以走得出呢片白茫茫咩都冇嘅高原。我哋下晝一點半就喺旅行社門口出發，一路坐車穿越呢片3700米高嘅白色高地。


呢度啲司機同蒙古戈壁嗰啲一樣，都係有神一樣嘅認路能力，如果自己揸車入嚟，應該揸吓揸吓就分唔到東南西北，入咗結界。


我哋就係坐呢架車嚟到呢度。同日同我哋嚟鹽湖嘅團都唔少，只係地方太大，即使係一望無際，但都唔難搵到一啲位係方圓百里都冇其他人喺度。




我哋有無盡嘅時間影相同欣賞呢度景色。因為冇團友，都冇乜嘢需要顧慮，鐘意留幾耐就留幾耐，唯一要注意防曬，無遮無掩嘅高原紫外線比起平地仲要再高啲，就算擦足防曬都未必頂得住


影影吓，個導遊就拎咗隻恐龍公仔出嚟，叫我哋影呢啲錯位相。終於知道點解個個嚟到烏尤利都會同恐龍合照，原來係旅行團嘅指定項目嚟


仲有呢個必定出現嘅Pringles薯片桶



呆望住呢度嘅景一兩個鐘都唔會厭，只係覺得靚得好誇張。不過我哋嚟呢度係因為聽過「天空之鏡」呢個名，叫得做鏡，平如鏡嘅水面就唔少得，但係咁乾嘅地方又邊度有水呢？我哋嚟之前都搵過啲資料，烏尤利鹽沼有分旱季同雨季，基本上四至十一月係比較乾，我哋去嘅時候係一月，屬於係最多雨嘅月份，只要搵到一啲最近落過雨嘅地區，就會見到有水。


個司機車住我哋四圍噉兜，直到見到地下有水為止。聽過有啲人講，即係係旱季，只要搵到個司機肯幫手搵，始終會見到天空之鏡，不過就未必個個團都咁有心機。如果好想睇到，去嘅時候真係要問清楚。我哋呢個導遊係朋友好評介紹嘅，所以我都好有信心。冇幾耐就開始隱約見到地下倒映咗天空出嚟


揀定咗停車位置，導遊又拎咗佢預備好嘅道具出嚟


今次叫我哋企上張櫈度影相其實係驚我哋喺度留得耐會企到攰，等我哋等陣有得坐吓。我哋將會喺度一路留到天黑，睇埋日落先返歸。


個景咁靚就留幾耐都願意


冇炒車，將我哋安全帶到景點又有耐性幫我哋慢慢影相嘅導遊José


其實現場仲有好多其他團，不過隔得夠疏，無損呢度嘅震撼。


簡直係絕色。


坐等太陽落山。



開始入黑，原本曬住太陽暖笠笠嘅鹽湖都出現寒意。日頭嘅天空之鏡可以有成二十度，屬於溫暖，但太陽一收，氣溫就急降，不論季節嘅夜晚都會降到十度以下，有時仲會低到負數。


不過無論冷暖，我哋都會好似過去呢九個月一樣，一齊經歷每一日。同你一齊嚟睇嘅天空之鏡， 真係好靚。


美好嘅2018，就好似永恆之花一樣，喺我嘅記憶之中永不散去。只係當時唔知道，原來18年決定嚟呢場旅行，係幾咁幸運。如果當時冇出發，下次再有呢個機會，都唔知要等到幾時。3年半後嘅今日，希望大家無論生活上有咩諗法，都可以及時行動，免於後悔。我相信一切冥冥之中自有主宰。

祝你成功

之前係宇佐就有遇過咁嘅hostel
男主人同老婆都係日本人
去左新加玻做左五年野之後就去用左三年環遊世界
佢地都有去南極！
有時一齊食飯，有時family day車埋我去玩，又幫手諗下去邊好
距離岩岩所以好舒服

去三年直情有四海為家嘅感覺，唔知佢哋返屋企嗰刻心情係點

我自己就好鐘意

冇爛喎

絕景

私人團幾錢？

好撚正，主要司機幫你影？

Live!

話說，「擁有四個名字的城市」係第5個別名...

夜晚嘅天空之鏡，好靚。但到咗月出終要離開嘅時候，我哋並冇太唔捨得。因為第二日我哋又會再去多次


我哋報鹽湖私家團嘅時候，都順便報埋之後嘅三日團，由Uyuni玩到智利嘅San Pedro de Atacama。如果可以嘅話，其實我係想坐去阿根廷，因為San Pedro之前已經去咗一次。但啲團嘅路線係固定咗，而中間亦全部都係荒山野嶺，冇得喺中途擺低我哋，所以只能去到智利再自己搭車。



三日團嘅第一日，會先去鄰近Uyuni嘅小鎮Colchani，所有團都會喺呢度嘅廢棄路軌停低打卡，跟手參觀吓呢度嘅鹽田博物館。


烏尤利羊駝就好似奈良鹿一樣，每日喺度等人餵。唔知武漢肺炎之後佢哋會唔會冇晒嘢食會唔會好似啲鹿噉衝晒去城市踩場？



自從個團開始咗，一直都有種講唔出嘅違和感。起初以為只係我哋兩個對啲廢棄火車軌冇乜特別感覺，又或者係旅行耐咗攰攰哋而冇乜興致。直到見到呢個博物館，終於知嗰度不安喺邊度嚟。我哋都不約而同諗起同一樣嘢，諗起中國內蒙古個希拉穆仁草原同庫布其沙漠（未聽過或者唔記得咗嘅可以睇返第一個Post最開頭嗰段）


呢個仲唔係希拉穆仁嗰個鵰像


激似庫布其嗰個九唔搭八嘅濕鳩入口


雖然都係喺沙漠中間有啲不明所以嘅建築，不過同中國團始終有好大分別，就係呢度唔會亂咁收錢。就算冇興趣都只需靜靜企埋一邊享受下藍天同日光，而唔使同導遊嘈交。


離開Colchani之後，導遊就帶我哋向西走，穿越呢片我哋尋日先流連咗全日嘅鹽沼。我哋成團都係得6個人，除咗我哋兩個之外，另外4個都係玻利維亞嘅當地人，純粹放假約埋出嚟去個三日兩夜短旅行噉。一諗起呢個世界有啲地方求其放幾日假就可以睇天空之鏡，一年睇幾十次睇到厭都得，就覺得好痴線不過或者佢哋都會羨慕我哋香港咁多海灘，隨時隨地出西貢已經望到個太平洋



所有團都喺晒同一個位停低，雖然大家出發時間有唔同，但嚟到呢個位嘅鐘數都差唔多，成百部車喺無邊無際嘅鹽沼泊埋一齊都幾壯觀。導遊將預先預備好嘅食物拎出嚟比我哋開餐，佢亦都終於可以休息一吓



坦白講一定唔好食架啦。喺簡陋嘅環境下都只能講盡咗力



曾經都唔係好明何解大家咁執着於要喺一片荒蕪之中掛起自己國家嘅國旗然後同佢影張相，明明支旗好快就吹甩吹爛。呢幾日睇奧運先發現，當一切得來不易，就會好想將當下嘅感動同榮耀獻比自己嘅國家。雖然坐車嚟到呢度未必係咩創舉，但可能已經係呢度嘅人一個屬於佢自己嘅小小夢想。但願有一日我都可以掛上自己嘅國旗，等佢喺世人眼中隨風起舞。


食完飯我哋架車駛離咗主車群，導遊哥哥拎咗呢隻恐龍出嚟。唔使講都知又到咗打卡時間


呢隻恐龍仔同尋日嗰隻唔同，究竟Uyuni嘅旅行團收埋咗幾多款唔同嘅公仔？


黃雀在後

今日我哋冇刻意去影好多相，只係配合大家影咗幾張團體相之後，就坐埋一邊安靜噉欣賞呢個嚮往咗好耐，嚟到覺得真係名不虛傳嘅地方。如果馬丘比丘係人類嘅七大建築奇跡，烏尤利鹽沼就係大自然留落嚟嘅七大自然奇觀，根本只應天上有。

三日團嘅第一日下半場嚟到仙人掌島Isla Incahuasi，從個名推測可能係以前印加人住過嘅地方。呢個仙人掌島位於Colchani以西大約七十公里，架車震吓震吓噉怒奔走幾個鐘就到咗。話就話係一個島，但佢並唔係平時見開比海包圍嘅嗰種島，而係喺方圓萬里嘅鹽田之中寧寧舍舍有一塊地突咗出嚟，冇比鹽覆蓋，取而代之嘅係生滿咗仙人掌。



喺仙人掌島上面望返落去，就可以見到雪白嘅鹽沼。其實呢個島本應該火山嘅山頂嚟，講緊四萬年前成座山連埋個頂都埋藏喺海底下面，因為板塊嘅擠壓導致個頂由海底探頭出嚟，所以喺呢度可以搵到一啲珊瑚化石之類嘅嘢


呢個島話細唔細，淨係圍住佢行一圈都行成粒鐘。


未等到日落，導遊就叫我哋影完好走。我哋都睇得七七八八，冇乜所謂。不過有啲奇怪做咩咁急呢？佢話啲住宿地方要爭，手快有手慢冇


喺鹽沼嘅南部有一堆搭建好嘅住宿，係比我哋呢啲三日團嘅人去瞓嘅，基本上每個團都係瞓嗰啲屋。其實我覺得有啲疑惑，冇理由會唔夠地方住，如果有人要露宿冇理由到今日先出事不過喺呢啲地方咩都有可能發生，同佢拗都冇用，早啲搵到地方落腳安心啲都好


第一日嘅旅程嚟到呢度完結。我哋喺一間大家Share嘅住宿前面停低咗。自從發現咗兩人房同多人房嘅床位價錢差唔遠之後，我哋都少咗好多同人Share房Share廁所。偏偏喺呢個三千幾米嘅高原，一個太陽一收咗氣溫就降得好急嘅環境，要同人Share一啲冇熱水嘅浴室，忽然有啲唔係好慣，成晚都喺度掙扎凍水涼究竟沖唔沖好。


當大家都瞓晒，冇晒燈，一切回歸黑暗之後，聽住出面嘅風聲，慶幸嘅係仲可以有瓦遮頭。

1650Boliviano（HKD:BOB大約1:1）
我都有腳架，有時司機影，有時自己影

好正

一晚半晚冇熱水我就一定揀唔沖沙漠熱到仆街都係咁話

冇野做又重睇巴打既遊記一次,順手MARK定 可能2023年出發 順手睇奧運

回憶返晒來，繼續留名支持
你Uyuni 個篇有句感受好深，我都慶幸幾年前有出發去個好長好遠既旅行

留名

留名先