300日浪遊到南極，直到世界盡頭（IV）

通常啲船飛早兩年就已經開始賣，但去到最後嗰一兩個星期如果有飛未賣完，佢就會大減價廢事吉咗啲船位，到時就可以用六七成甚至一半嘅價錢買到，缺點就係未必一定會有

希望再過5個月有機會寫完

大家嘅鞭策我都有見到

咁係咪要去北歐/greenland果邊捕住見到有就仆過去？

sorry 未追晒post

伊瓜蘇國家公園嘅主角，除咗瀑布之外，都唔少得南美浣熊。


南美浣熊係一種活躍喺美洲森林地區嘅動物。伊瓜蘇一帶嘅地方原本就係佢哋屋企，園區周圍都可以搵到佢哋嘅踪影


但講到最容易發現佢哋嘅地方，一定係車站附近嗰個小食亭Fast Food Cataratas。


佢哋唔單止周圍巡邏，睇吓有咩嘢食係咁啱冇人看管就即刻去搶，仲會爬埋上枱，完全唔驚遊客成個氣氛同金山郊野公園嗰個小巴站係一模一樣，不過南美浣熊好似得意少少



喺小食亭解決咗午餐之後，我哋走返入去瀑布群。成個伊瓜蘇大約有275個大大小小嘅瀑布，其中按範圍計算有八成都係喺阿根廷呢邊，一路行都可以睇到唔同高低形態不一嘅瀑布以前以為瀑布就係從高至低有啲水流落嚟，最多就係條水柱粗啲、側邊啲水彈得勁啲，點諗到啲水可以萬馬奔騰噉樣噴法噴足一萬年。


聽講喺呢頭好容易見到彩虹，嚟之前睇其他人影嘅相都幾有期待。以我當時喺厄瓜多爾日日都見到七色彩虹嘅運氣，諗住都會影到唔少。但唔知係咪當日陽光唔夠，即使水氣充足，但都只係喺呢條橋下勉強影到全日嘅唯一一次。不過仍然無損呢度啲魅力




最記得企喺呢個位嘅時候，唔使兩秒成個人就會即刻濕晒，亦係嗰一吓就確定呢個伊瓜蘇瀑布係南美不可不去嘅景點之一。二百幾日以嚟密集式去咗咁多地方，就算名氣再大有時都難免覺得不外如是。但呢度，加埋馬丘比丘同烏尤利鹽湖，都係我心中可以問鼎南美三大名不虛傳嘅絕美之境，如果去漏咗一個簡直係抱撼終生。


如果係鐘意影動物嘅人，呢度都有唔少好似呢啲啄木鳥嘅驚喜


伊瓜蘇瀑布有五大路線，睇完比較刺激嘅魔鬼咽喉同遠啲嘅藍線（Paseo Superior），就沿住相對短啲嘅黃線（Paseo Inferior）出返火車站。


呢條線路經嘅瀑布都比較溫和，接近返我入嚟之前對瀑布嘅認知。


嚟到呢度已經喺園區逗留咗大半日，雖然仲未行完，快艇都冇坐到，但都已經有啲攰了。今日天氣唔算太好，間中都有落吓雨，同埋一行近啲痴撚線瀑布就自動就濕晒身，無論身同腳都噏咗成日就算未睇完都覺得夠皮返歸


「雖然兜兜轉轉走了很多冤枉路，我終於來到伊瓜蘇，我覺得好難過，因為我始終覺得企係呢個瀑布下面應該係兩個人。」如果我好似《春光乍洩》黎耀輝噉一個人嚟到瀑布，我諗我都會好傷感，因為咁靚嘅景色唔應該一個人欣賞。離開嘅時候，我覺得能夠兩個人嚟呢度真係好幸運。

仲記得喺入嚟之前，我哋仲掙扎緊睇巴西定阿根廷嘅瀑布。而出去嘅時候，我哋都不約而同認為，根本就唔係睇邊一個嘅問題，而係如果時間許可，係兩邊都要睇晒。於是，我哋決定休息一晚就過境巴西，睇吓兩邊嘅瀑布到底有咩唔同

大部份船都係阿根廷最南部嘅Ushuaia出發，應該要去阿根廷或者南美捕住
你慢慢追，我應該有寫的

好正

由半個月一篇變大半個月
遲下變月經

繼續呀

阿根廷伊瓜蘇港（Puerto Iguazu）嘅對面就係巴西嘅伊瓜蘇市（Foz do Iguaçu）。巴西嘅伊瓜蘇相比起阿根廷，算係一個規模比較大嘅城市，一入到去，見到同其他大城市無異嘅巴士系統就睇得出。講起伊瓜蘇，大家都會知道呢度就係睇伊瓜蘇瀑布嘅地方，但原來巴西嘅伊瓜蘇市側邊曾經有一個比起伊瓜蘇更加大，流量更癲嘅瓜伊拉瀑布（Saltos del Guaíra)可惜嘅係呢個瀑布已經唔再存在。自從六十年代巴拉圭政府同巴西政府決定聯手喺度起個大水壩，就注定咗呢個瀑布嘅沒落。今日嘅呢個水壩就成為咗一個建築史上嘅奇蹟。


入境巴西之後，我哋先去Hostel放低背囊。因為時間太早，仲未比到房我哋抖抖，Hostel個哥哥就極力推薦我哋去睇伊泰普水壩（Barragem de Itaipu），仲話睇水壩緊要過睇瀑布。當時我哋已經買好咗由聖保羅飛去葡萄牙里斯本嘅機票，留喺巴西嘅日子非常之緊拙，只係預留咗一日喺呢度。一心嚟到呢度睇瀑布，如果要放棄就好唔甘心，但聽到哥哥噉講又唔捨得過門而不入。問清楚啲交通之後，我哋決定衝一衝，朝早睇水壩晏晝睇瀑布，如果有時間黃昏再加多一個活動


伊泰普水壩今日係世上發電量第二大嘅水壩，只係輸比長江三峽，不過就唔知會唔會變形移位六十年代嘅巴西同巴拉圭為咗解決能源嘅問題，合力起咗呢個水力發電廠，並按照當時嘅協議分配電力，不過觀光嘅部份就似乎比巴西壟斷咗。巴拉圭作為台灣僅餘嘅少數邦交國，都冇辦法將台灣寫入呢個參觀遊客嘅來源地入面買飛嘅時候會循例問吓你邊度嚟，我就填咗香港。當時都已經有三千幾個香港人嚟睇過，但旅遊台竟然一個Post都搵唔到，證明連登仔從來都只係少數（如有歡迎指正）



正式入去參觀之前，要先睇佢啲介紹短片，講吓呢個發電廠有幾勁，由1966年兩國簽約，71年開始起，到84年正式啟用，去到近10年機組越嚟越多，先至將水壩嘅功能發揮到最大。伊泰普水壩生產嘅電由巴拉圭同巴西兩個國家平分，其中巴拉圭全國每年嘅總用電量有八成都係來自水壩，非常誇張，有淨嘅電源仲可以賣返比巴西，而巴西全國亦都有接近兩成嘅電源係由水壩出嚟。但太過依賴都有問題，曾經都有發生過事故導致巴拉圭全國短暫停電。而且為咗起呢個水壩，除咗當年成個瓜伊拉瀑布搞到冇咗之外，住喺呢頭嘅成萬個居民都被迫搬走。如果以今日嘅保育標準嚟計，起定唔起，應該都會係一個好大爭議嘅題目。


伊泰普水壩嘅Logo，左邊紅藍代表巴拉圭，右邊黃綠代表巴西。


成個水壩之旅主要可以分做兩個部份，首先係坐車去觀景台遠觀，之後就會由觀光巴士帶住大家圍繞水壩轉一個圈。



排水道最尾由斜落改為微微向前，就係為咗減一減低向下嘅衝力，但都仍然係好似水炮一樣咁激昂，唔怪得以前嘅瓜伊拉瀑布咁犀利。當年嘅瓜伊拉瀑布係旅遊熱點，喺瀑布有可能會消亡嘅消息傳出之後，海量嘅遊客就湧嚟見瀑布嘅最後一面，講緊係七八十年代旅遊業完全冇今日咁發達嘅年代其中有一條可以睇到瀑布全景嘅橋仲因為太多人而冧咗，幾十人跌落瀑布死埋


觀光車入面全程都有葡文廣播。喺西班牙語系嘅國家玩咗五個幾月，由早晨都唔識講去到叫做勉強可以嗌吓嘢食搭吓車講吓價，唔經唔覺就喺伊瓜蘇港度過咗最後一日，正式嚟到用葡萄牙文嘅國家。成日都話西文同葡文好似，不過只限讀寫，喺巴西識西班牙文睇下告示的確可以估到七八成，但聽葡文，就一啲用都冇


巴士會載住我哋穿越大壩。由於大壩閘住嘅河就係巴西同巴拉圭嘅交界，穿過大壩就代表我哋將會踏足巴拉圭。根據官方資料，用香港嘅特區護照去巴拉圭係要簽證。但呢架巴士中途唔會停低落客，所以似乎係豁免咗，可以比我心理上進入咗巴拉圭嘅境內


喺水壩對面嘅巴拉圭望返轉頭。



因為冇簽證，我哋都只能坐返伊瓜蘇市，原地解散。一整個朝早嘅水壩之旅完滿結束。有時間嘅話聽講係可以入埋控制中心參觀，但我哋始終都係心繫瀑布，去完阿根廷嗰邊知道有機會要行足成日，都有啲擔心去到園區未行晒就夠鐘比人趕返出嚟

終於有文，原來個水壩係咁既樣
好失策，個時唔知做乜，巴西個邊揀左留兩晚，阿根廷個邊留三晚，早知阿根廷個時搵日去睇返個水壩

期待里斯本，繼續留名支持

留兩晚應該夠時間睇

竟然有更新

你睇咗幾耐

瀑布

有病毒wor

我以前就係睇下睇下誤入歧途

靚到痴孖根

有咩病毒

唔係live呀，幾年前啦

巴打諗住去邊度玩