300日浪遊到南極，直到世界盡頭（IV）

冇Update一排仲見到大家留言都好驚喜

啲資料應該Outdate晒出發前記得再查證吓

小冬瓜遊記好睇

依家個人就真係outdate晒

樓主如果當年有去 NZ / AU, 就一個旅程去晒7大洲

好耐冇見小冬瓜絲，近來好嗎

騎劫左做圍爐問候大會
我幾好呀，新婚快樂中 雖然結咗就快一年唔知仲叫唔叫新婚

千奴巴快啲繼續寫，想睇北非了

結果到而家都未去到所以有機會真係要去到最盡

由里斯本到摩洛哥菲斯，兩個鐘機都唔使。轉眼間就到咗非洲大陸。記得後來有次去坦桑尼亞，當地人會話佢哋先係非洲中嘅非洲，而摩洛哥、或者話整個撒哈拉沙漠以北嘅地方，對佢哋嚟講都唔算非洲。其實非洲只係地理上嘅分類，如果用文化嚟分，其實北非屬於阿拉伯文化，喺度嘅人講嘅主要係阿拉伯文，食嘅係阿拉伯菜，信奉嘅亦係阿拉伯世界嘅伊斯蘭教。


二月係摩洛哥嘅冬天，好快就日落，我哋大約下晝四點去到菲斯機場，過埋關，喺機場同啲的士佬拗咗一輪價錢返到住宿，天已經黑晒。我哋住喺菲斯嘅古城區，呢度係遊客嘅集中地，可以見到啲舖頭除咗阿拉伯文之外，有啲都會有英文或者法文。喺歐洲嘅時候，每個大嘅城市都總有一個Old Town，而喺摩洛哥同其他北非國家都係一樣，不過佢哋會叫做Medina。沙地阿拉伯有一個地方都係叫Medina，但嗰個就緊要好多，係繼麥加以外嘅伊斯蘭第二大聖城，據講非教徒隨便走入去係會犯國安，即刻坐監摩洛哥呢個相對嚟講就輕鬆好多，但對遊客Friend唔Friendly就見仁見智


Medina好似迷宮，周圍都係一啲縱橫交錯兩三層高嘅建築。由於佢哋嘅路並唔係打直打橫好規則噉設計，有時喺啲樓同樓之間又會有條小路穿插出嚟，加上當時天色昏暗陰陰沉沉，GPS定位又唔係好準，好容易就行到盪失路。帶我哋返住宿嗰個司機都叫我哋頭一兩次唔好行咁遠，試過有啲遊客戇鳩鳩返極都返唔到屋企


喺出發嚟北非之前，我都有幻想過，到底只係相隔一條小小嘅直布羅陀海峽嘅北非，同對岸嘅西班牙葡萄牙會有幾唔同呢？我諗其中一樣幾需要習慣嘅就係衞生。我哋第一晚就喺附近搵地方食飯，去到一間餐廳嗌咗呢啲餡餅。食落其實OK，亁乾鹹鹹得嚟味道好濃。不過佢哋冇特別賣嘢飲，只係見到餐廳嘅一角擺咗一個大水壺同一隻杯。我見有一枱有個客行咗埋去，喺個大水壺度倒咗啲水落隻杯度，飲完放返低，之後另一枱有個肯定唔識嘅人就用同一隻杯裝水再飲。原來嗰隻杯仔係公家杯嚟我平時都唔係好介意同人Share一隻杯，就算唔係好熟嘅朋友我都冇乜所謂，不過第一次見純陌生人直接share都有少少唔慣，結果都冇用到

入鄉隨俗

北非文化上同黑非洲真係好唔同，我都係鍾意黑非洲多啲至少隨便搵個地方都可以飲酒

召喚樓主

差少少就埋埋個尾啦巴打

摩洛哥都有一般嘅Hostel同酒店，但如果想住啲建築上比較有特色嘅地方，可以揀傳統民宿Riad。Riad通常係一種四方庭院，中間有個泳池或者噴泉，周圍都係啲摩洛哥式嘅馬賽克壁畫。不過呢啲住宿，尤其係出咗名打卡靚嗰啲價錢都會比較貴。


我哋喺菲斯住嘅呢間唔算係標準Riad，至少中間冇泳池。但佢嘅設計都幾有特色，反正要呃我呢啲唔識建築嘅人其實唔難佢份早餐就夠晒摩洛哥風味，都係啲麵包、燒餅，加杯薄荷茶。


食完早餐都係去返Medina。摩洛哥同之前去過嘅土耳其有樣相似，就係一樣成街都係貓貓雖然我對伊斯蘭文化唔算好有好感，但唯獨佢哋對街貓嘅包容度，都會令我對呢啲城市加分。相比起寵物店，我會更加鐘意喺路上見到佢哋自由自在噉生活。


我哋去菲斯同大部份遊客一樣，都係想一堵染布坊嘅風采。但喺Medina嘅舖頭見到呢啲門口寫滿殘體字嘅告示，就知道唔理你係咪中國人，你只要一副東亞人樣出現喺菲斯街頭，就一定係一部移動ATM，所以每一刻都要好戒備。染布坊係畀一堆兩三層高嘅商舖中間包圍。如果想望到工場嘅全景，就要上去呢啲商舖嘅上層。而地下嘅樓梯都會有各間舖頭嘅員工把守。因為遊客太多，而啲歐美客都唔介意畀錢，佢哋都慣咗喺地下收返幾歐先放你上去。


但呢啲所謂嘅「入場費」都係海鮮價，有啲係一兩歐，但癲起上嚟都可以十歐八歐，當然你都可以講價。喺嚟到摩洛哥之前，我哋就聽朋友提過喺呢度講價唔係幾蚊幾蚊噉講，係要劈佢十分之一，頂盡三成。一件賣你一百蚊嘅嘢多數最終十零廿蚊就肯賣比你


我哋都上咗幾間唔同嘅舖頭睇，因為間間嘅方位都唔同，望到嘅角度都有分別。有啲舖頭為咗吸引你入去望佢嘅手信，可能會唔收入場費，有啲就齋睇唔使錢，但影相就要比10Dihram噉樣。亦都有啲，係收完錢發現根本睇唔到


皮革其實係一個悲慘嘅行業，見啲人成個人浸晒落去啲有毒嘅染料度，一做就唔知幾多個鐘，黎生都未必頂得順以前睇過嘅記錄片，講啲孟加拉童工幾歲就比人捉咗去染皮革，玩幾年好快就皮膚病手腳爛晒，真係好慘。摩洛哥呢邊唔知有冇咩職業安全保障佢哋，不過恕我直言呢啲國家都唔敢諗了


玩過重刷輪盤就知，下世投胎做隻貓咪算

我哋特登一早嚟到睇染布坊，因為如果晏咗嚟，啲工人收晒工就冇乜嘢睇。但舖頭啲人仲會繼續同你講未收工，呃你畀完錢上到去就乜都冇，然後佢哋就會扮唔識英文唔知你講乜總之啲摩洛哥人就好古惑，只係嚟咗兩日就已經覺得好攰。到底喺呢度日日講價驚比人呃辛苦啲，定喺南美驚比人搶嘢偷嘢壓力大啲呢


睇完染布坊，去咗古城區嘅外面睇荒廢咗嘅城堡，同埋菲斯嘅景色。


二月嘅摩洛哥都係有啲凍，但我就覺得今日好似特別凍，啲寒氣係喺身體裏面發出嚟嘅。呢度本來空曠得嚟好舒服，但比啲風吹吓吹吓個頭就越嚟越痛，我諗我又病了。旅行咗咁多個月，雖然體力上係應付到，但距離上次喺秘魯嘅Trujillo發燒，只不過係過咗三個幾月。以前喺香港返工，一年最多都係病一次半次，呢個旅程未夠一年已經第四次發燒了。身體好誠實，睇嚟噉樣旅行法對我嚟講真係太Chur。


返到房休息咗陣，出到大堂見到打理住宿嗰個哥哥，講開結婚嘅問題。呢個摩洛哥哥哥知道我哋已經出咗嚟大半年，都幾羨慕我哋搵到噉樣嘅另一半，但佢自己就比較悲觀。佢話喺摩洛哥好難識女仔，因為呢度可以娶四個老婆。我就唔係好明，可以娶四個咪即係男人地位高啲，唔係應該仲易啲搵女朋友咩？原來伊斯蘭嘅教義規定如果你娶足四個，就要將時間同資源都平均分配到每一個老婆身上。但今時今日摩洛哥都係現代化社會，有錢養活自己同另一半已經唔易，仲要養四個老婆，基本上得有錢佬先做到。呢度表面上男人地位係高啲，但其實只限有錢嘅男人。如果個個有錢男人都娶四個女人，窮嘅男人就應該要四個爭一個女人聽佢分析完，摩洛哥簡直係窮撚地獄。見佢仰天長嘆，唯有希望佢一行出Medina就轉角遇到愛


呢一晚有啲發燒，胃口唔係太好。我哋搵咗一間望到好似好食啲嘅餐廳提升食慾，結果真係唔錯。摩洛哥有一個出名嘅菜色叫Tagine，係用陶鍋去悶煮嘅薯仔同牛肉羊肉，鍋入面啲汁香料味好重，唔怕鹹可以當湯噉飲幾啖，幾開胃。本身我口淡淡，食呢啲濃味嘢反而啱啱好。不過食完口乾就要狂飲水

巴打終於返來
繼續留名支持，趁住個勢埋埋尾吧

有冇眼花？
竟然有文？

支持樓主

lm

睇完染布房同喺Medina盪失路亂咁行咗兩日之後，都係時候離開菲斯。


摩洛哥嘅城市同城市之間移動算方便，只要去最大嗰個巴士站買啱車飛上車就得。巴士嘅距離都冇南美嗰啲咁長，好多時六至八個鐘已經可以落車。我哋第二站就先向北行，去到另一個旅遊重鎮舍夫利萬（Chefchaouen）。


嚟咗摩洛哥兩日，感覺都係比啲陰陰沉沉啲舊城窄巷包圍。直至出咗菲斯，喺巴士上面，先發現路過嘅地方都可以綠草如茵。摩洛哥嘅中北部有一串好長嘅阿特拉斯山脈，一路穿越阿爾及利亞延申到突尼西亞，所以一路上都唔難見到遠處連綿不絕嘅山峰。越接近地中海嘅北部，都係適合植物生長嘅土地，唔入城市嘅話直情會有南歐嘅感覺。而遠離地中海嘅南部，就係一片荒蕪嘅撒哈拉沙漠。



去到嘅第一晚已經感受到舍夫利萬同菲斯嘅少少分別。雖然食嘅嘢大同小異，都係Tagine同埋啲麵包，但可能呢邊近海啲，會有多少少海產食。其實我仲係病病地，本身都有諗過喺菲斯抖多兩日，但嗰邊冇咩好玩，而且四圍都好陰暗，連住宿嗰間房都係，再住落去感覺會越嚟越唔精神，所以先決定無論如何都走。坐完程巴士之後，發燒好似仲嚴重咗。嚟到見到啲嘢食好似多咗少少選擇，希望喺度休息會舒服少少。


我好快就返咗房瞓覺。唔抖由自可，一瞓低即刻嚟料，好似係話咗比個身體聽可以休息吓，所以癥狀就即刻發晒出嚟。呢一晚個頭好重好重，明明個頭好熱，但個身就非常之凍。雖然摩洛哥冬天本身係凍，但其實都有攝氏幾度。我嗰晚好似冚極被都唔夠暖噉，將間房可以拎嘅毛氈都冚晒喺個身度，仲問Reception額外拎多幾張被，足足冚咗七張好厚嘅毛氈被上身。不斷出汗又不斷發冷，明知佢啲被應該千年唔洗都照用成晚都好唔舒服，飲勁多水同去勁多廁所，偏偏我哋間房連獨立廁所都冇，要走落三層先有得去廁所同沖涼。喺女神嘅照顧之下，先好唔容易捱過咗。


點都好，自己病總好過對方病。瞓醒第二朝已經好返一半。出到外面行一行，馬上感受到舍夫利萬嘅節日氣氛。二月份嘅摩洛哥有咩特別呢？眾所周知，摩洛哥自古以嚟都係中國嘅一部份，住喺度嘅阿拉伯人都係黃皮膚黑頭髮，自然都要過中國人嘅節日。


呢日係年廿七，仲有幾日就農曆新年。以為嚟到摩洛哥就可以避開三姑六婆問你幾時結婚生仔，就真係太天真要知道做生意嘅中國人真係滿佈全世界，呢度都有啲中餐館會提一提你就快過年


門口唔少人好熱情噉拉你入去食飯，仲話大家都係中國人，入嚟打個折頭比你聽到呢啲嘢即刻閘住，本來大病初癒都有少少想食中餐，但聽到佢哋噉講就唔係好想去，扮唔識聽就入咗另一間賣當地菜嘅餐廳。結果都係食返嗰啲嘢。


一路上都感覺到呢度旅遊業好旺，除咗中餐，歐洲餐廳都一大堆，亦有好多賣紀念品嘅舖。平時對呢啲遊客嘢會冇咩好感，但病緊嘅時候會覺得唔錯，代表想搵人講英文幫手，或者搵啲啱口味嘅嘢食都唔會太難。一於喺呢度抖返兩三日就啱。

Support

有文

終於有得睇更新！遲啲可能你生埋嗰B 都未完！趁audit 淡季，快寫完。😄😅🤫