300日浪遊到南極，直到世界盡頭（IV）

仲記唔記得D細節架

以為樓主放棄咗

出現了
又可以繼續追

早喺由南極落船返到阿根廷，仲睇緊莫蘭奴冰川嘅時候，我哋就訂好咗離開南美洲嘅機票，由巴西聖保羅飛去摩洛哥嘅菲斯（Fez）。當時千揀萬揀，喺眾多好貴嘅機票當中揀咗TAP Portugal。呢張機票計埋稅都成千五蚊Brazilian Reals，以當時匯率計成三千七港幣一個人，幾乎係船飛以外全程最肉痛嘅一刻。不過啱啱再睇，原來以今日匯率計係二千二，短短幾年啲南美銀紙貶值真係貶得好誇張。

如果唔係巴西飛邊度都咁貴，其實本來好想飛去南非嗰邊，再慢慢由南向北噉走返上去，至低限度都要睇埋津巴布韋嗰條Victoria Falls，同埋用吓傳說中億億聲嘅津巴布韋幣。但嗰啲機票全部都過萬，計落同之後由香港再飛去都冇乜分別，就冇夾硬一次過去埋了。只係冇諗到後來嘅香港已經唔再係國際城市，唔會再有咁多機比你去旅行。再過多一排，莫講話旅行，仲出到境可以都要感謝共產黨（好多人呢一排已經失去咗呢個權利）。如果再揀多一次，真係寧願貴少少玩埋，好過下次再去已經唔知幾多歲

由聖保羅去菲斯要喺葡萄牙里斯本（Lisbon）要轉一次機。呢程機票雖然略貴，但有一個好處，就係TAP Portugal可以喺轉機嘅地方停留幾日，唔使加錢。我哋兩個都冇去葡萄牙，一知道有得中間停低就Plan咗個葡萄牙嘅五日迷你Trip。女神仲點名話一定要去埋波圖（Porto）。Ryanair嘅里斯本波圖來回機票，兩個人夾埋都係40歐，仲平過搭巴士。嗰時就喺度諗，如果有一日去到歐洲住，一定要瘋狂喺東西歐去旅行。


好耐冇搭過長途機，瞓醒落機已經嚟到大西洋嘅另一端。喺Hostel擺低咗啲嘢之後，我哋就去第一站，女神指定嘅葡撻店睇Hostel啲地圖，一見到Old Town就確定自己到咗歐洲。里斯本係一座沿住太加斯河（Rio Tejo）建造嘅城市，喺河邊有條好似港島叮叮噉樣嘅電車軌。由Hostel行出去不遠處就有電車站，一路西行就去到貝倫區（Belém）。


囡囡鐘意嘅就唔駛問都知係正嘢，未入去就知道間葡撻店幾受歡迎據聞呢間Pastéis de Belém係葡撻界嘅冧把溫，事實上我喺葡萄牙食過嘅葡撻入面，呢間的確係最好食唔怪得佢由1837年開到今日成二百年都仲響度，兩次世界大戰都無阻葡萄牙人食撻。



呢度除咗係一間普通嘅餐廳同外賣店，同時亦係一個開放式廠房，旅客係可以隔住玻璃睇住啲員工炮製葡撻。葡撻原文係Pastéis de Nata，意思係Cream做嘅糕點。只要喺啲餐廳門口見到寫住Nata，基本上都可以搵到葡撻食。


鐘意喺度食又得，拎走一路行一路食又得。如果堂食嘅話，可以再加啲肉桂粉落去，嫌唔夠甜都可以再落糖。當地人比較鐘意食葡撻時再加杯咖啡，但我哋搭完飛機想夜晚瞓好啲就冇飲了。

呢間葡撻老店唔止歷史悠久同好食，位置都不得了。由舖頭行出去，隔幾步就係啲舊皇宮同博物館。當時係二月頭，天氣仲係比較凍，不過正午時間喺日光浴底下算係涼中帶暖。



行兩步就見到呢座修道院（Mosteiro dos Jerónimos）。呢啲咁靚嘅嘢，係世界文化遺產就好基本。相傳呢座修道院入面嘅修女發明咗全世界第一個葡撻，可以話冇呢座嘢就冇今日嘅KFC


修道院隔離嘅考古博物館。雖然喺南美都見唔少呢啲西葡建築，但嚟到宗主國嘅政治中心，氣派係唔一樣。插支國旗喺中間就好似話比大家知，呢度就係現代文明嘅起點。


貝倫塔

親身嚟到呢座炮台面前，諗返起當日仲未出發去呢趟旅行嘅時候，其實我並唔係想去南極。17年第一篇嘅時候我就寫咗，話叫女神揀一個地方去旅行，我哋一齊去，從此就有咗呢個世界盡頭之旅。但其實喺再早一兩年，當時連女神都未認識，我就已經同自己講，想去一次長途旅行。嗰陣我係睇丹尼爾嗰啲撚屌而諗住踩單車去歐洲，仲戇鳩鳩噉連路線都畫好埋，諗住擇日出發。嗰條路線嘅終點就係貝倫塔。後來識咗女神，擺低咗單車旅行嘅夢，竟然又用呢一個形式兜兜轉轉嚟到呢度。

呢座貝倫塔同好多名勝古跡一樣，嚟到之後都會覺得「就係噉喇？」。不外乎都係一堆石屎石頭，打完卡就冇咩好講。但對我嚟講，佢就好似話比我聽，你嘅單車旅行並唔係冇出發到，只係換咗方式，由一個人變咗兩個人。假如當初我喺識到女神之前就出發咗，可能我都會得到好多，但就一定冇咗嗰幾個月嘅南美回憶。如果比我揀多一次，我會揀好似而家噉樣

五百年前，貝倫塔紀念Vasco da Gama經南非好望角去到印度再返返轉頭，航程超過環繞世界一週。今日兜咗半個地球嚟到呢度，終於稍為明白，點解人類總係想起咁多呢啲塔，去留一個紀念。

等咗你好耐

依幾年嘅領悟係去旅行嗰陣想玩想做嘅嘢如果負擔得到嘅話一定要去馬
因為都唔知道仲有冇下次

行完貝倫區就係返Hostel嘅途中搵嘢食。本身唔係想影呢對緊火嘅情侶去嘅時候都冇留意佢叫咩名，純粹搭車路過見到好似幾有型就入咗去。呢個Food Court原來係Time Out集團開嘅第一個美食廣場。Time Out係一間總部喺英國嘅雜誌社，特別在於佢喺香港都有出過雜誌，介紹吓啲食玩買旅遊嘢噉，主要係針對啲外國人，所以似乎港島嘅地方先會易啲見到呢本嘢，但近呢兩年好似都冇乜見過，有冇巴絲打知佢仲有冇出睇佢官網，見佢仲寫得出咩防疫措拖開始放寬，大家嚟香港玩可以點樣準備之類，畀美國升咗做Level4旅遊警示就隻字不提，睇完走過嚟嗰啲真係自求多福果然雜誌真係唔係越多城市出版就越巴閉。


總之當時Time Out就睇中咗里斯本Cais do Sodré呢頭，喺2014年開咗佢全球第一檔美食廣場。本來呢個區唔算旅遊熱點，但有咗呢檔嘢之後就開始多咗好多遊客嚟呢邊，帶旺埋附近嘅街。到咗19年之後仲喺美國同加拿大好幾個城市開埋分店，仲諗住23年開去倫敦。當時偶然經過嘅一間嘢，竟然係一個國際大Project，好似仲喺啲咩飲食服務界嘅奧斯卡都攞埋獎。


但就唔係每次搵嘢食都會遇到好嘢。第二朝我哋喺住宿附近搵咗間舖，諗住食返個遊客味冇咁重嘅地道葡撻，點知中晒伏。個撻望落已經有啲頹，一咬落去擺咗成朝都唔整返熱，凍冰冰嘅原來俾遊客食嘅唔一定差，至少人多嘅舖頭啲撻會Keep住新鮮出爐，好似前一日貝倫區間總店噉熱辣辣。後來我哋都喺其他地方食多咗一兩次，普遍都唔係太好食。最主要嘅問題係當地人好似唔介意凍食啲撻，所以都冇話特登整返熱佢。結論係咁多間拉勻嚟計KFC真係整得幾好（利申非打手）。


食完去機場搭一個鐘機去波圖

靠睇返啲Notes同啲相，盡量
但不得不承認，人真係好容易遺忘

我冇

多謝支持

生左小朋友未

請大假打文啦

之前好似有個巴打話Bachelor追到Master

講得好啱早知去夠兩年

樓豬真係要快手啲，你再唔打另外位巴打可能要結婚先睇到結局

樓主出現了

訓唔著入嚟睇下竟然有update!

竟然有update，開心

無呀，我無打針，出左去都返唔到香港
而家天冷就去行下山，天熱就去沙灘玩下水曬下太陽咁。反正這香港已不是我的地頭，就當我在外地旅遊

你有人養

上年年頭一路live 左樓主個麥徑全走 一路追番1-3 攪到全日響公司冇做過野 估唔到而家見番第4集都重未完到

喺波圖嘅兩日，大部份時間都喺自由廣場（Praça da Liberdade）附近一帶。


波圖同里斯本一樣，都係一座沿河建城嘅城市。由自由廣場向河嘅另一邊望去，一定會見到呢座市政府建築（Câmara Municipal do Porto）。


市政府嘅附近就有唔少呢啲瓷磚畫外牆嘅教堂或者修道院。呢座卡爾莫教堂（Igreja do Carmo）就係當中比較有名氣嘅一座。記得之前寫到烏拉圭嘅Colonia有提到，見到呢啲藍藍白白嘅瓷磚畫，就知道嗰個地方同葡萄牙實有歷史關聯，你見連澳門政府都未敢將街上呢種風格嘅路牌換走，就知佢嘅價值。呢種瓷磚畫葡文叫Azulejo，雖然今時今日一見到就會知係葡式設計，但其實佢嘅起源係阿拉伯文化。喺十三世紀嘅時候，阿拉伯人唔知係參考定抄襲拜占庭馬賽克風格，就流行咗一種用唔同顏色嘅格仔磚去砌圖案嘅藝術。呢種藝術首先喺摩洛哥同埃及興起，叫做الزليج (al-zillīj)，意思係指精緻嘅石頭。後來傳入西班牙嘅西維爾，再由葡萄牙嘅國王引入，經過幾百年嘅演變，先成為咗今日喺全世界唔同地方都見到嘅瓷磚畫。


波圖會受歡迎，多多少少都因為呢度周圍都有瓷磚畫睇，連火車站都唔例外。


自由廣場隔離嘅聖本篤（São Bento）車站，就用呢種瓷磚鋪滿每一幅牆，據講瓷磚數量超過兩萬塊，上面畫嘅都係一啲葡萄牙歷史上嘅光輝時刻，例如打嬴穆斯林軍隊光復葡國之類。通往月台嘅通道上面嗰塊板，仲用緊傳統嘅機械式翻牌去顯示班次，而唔係用電子螢幕。配搭埋啲瓷磚畫，成個車站嘅歷史感更加強烈。


我哋成個晏晝都係喺附近行嚟行去，都冇需要坐火車。參觀完呢個國寶級嘅火車站行返出去，不知不覺就到咗黃昏。


波圖嘅晚霞幾靚。離開接近海平面嘅河邊，會發現其實波圖係一個地勢上有啲起伏嘅城市。唔少道路同建築都係起喺斜坡上面，加上穿梭橫街窄巷嘅巴士電車，望落其實有啲港島味


離開嘅時候，正諗住今晚食乜好之際，見到有間麥當勞喺火車站附近。旅行時我哋間唔中都會食吓呢啲香港有嘅嘢，有時係想搵返啲熟悉嘅味道，有時係想慳吓錢。但呢間並唔係一間普通嘅老麥，而係一個景點。


由牆上嘅玻璃畫到天花嘅吊燈，都令人有錯覺以為去咗啲咩修道院，直到見到Counter嘅餐牌同啲人食緊嘅嘢，先回返神嚟發現佢真係一間麥當勞。其實佢個門口都已經幾特別，有隻大鷹嘅雕像騎喺個招牌上面，不過唔記得咗影低。有人話佢係世上最華麗嘅老麥，我喺路上呢一年又好似真係冇見過一間特別過佢嘅，係都唔奇。


喺南美洲都甚少好夜仲喺條街度，但返到歐洲唔知係咪戒心細咗，總係覺得周圍五光十色唔捨得瞓，唔覺唔覺又玩到好夜，慶幸嘅係之後都冇再發生之前南美嗰啲不幸事件

結婚睇咪幾好，慢慢寫

多謝繼續支持