300日浪遊到南極，直到世界盡頭（IV）

其實Nasca Line成個秘魯都有，Nasca同Ica多d，好多地方都有得睇，唔洗搭飛機

分享下我係Paracas度join 船tour 去Islas Ballestas既經歷。個島就係所謂既雀屎島，以前華人賣豬仔過黎剷雀屎就係呢度，有興趣可以google下。上面有企鵝海狗，隻船揸到好埋隔條海狗兩三米果種


途中就有一幅Nasca line睇


如果想睇更多地畫可以去Ica或者Nasca搵團，好多都可以就咁去某d位或者某d塔咁望落黎就睇到，搭飛機係其中一個option


小弟當時窮，秘魯買電話又貴，影相質素差，多多包涵

原來喺Nasca可以就噉睇到，如果嗰時知道就好啦唯有下次再嚟
多謝分享！

Ica又係好想去，嗰時有朋友講到沙漠入面有個綠州好鬼靚，又有滑沙嗰啲嘢玩，應該同蒙古有得比。秘魯真係好值得去完再去。

個綠洲叫Huacachina，都靚靚地，除左滑沙仲有d沙漠飛車。個沙漠日落又係好有feel，天地都係一片暗紅色，最尾開始黑好蒼涼驚驚地咁驚遲左天黑搵唔到路離開沙漠

下次黎秘魯記得去Paracas->Ica->Nasca, 然後番返上去Iquitos食蟲入Amazon跟團搵野生海豚鱷魚樹獺


唔好問我點解Amazon條河有海豚，我都唔知

下次有機會一於試吓呢條線，點解唔早幾年話我知呢

熱水鎮最後一夜，想搵啲相對冇咁遊客嘅餐廳，見到呢間嘢。



走上一樓，望落有啲似香港啲街市嘅熟食中心，都係分開好多檔任你揀幫襯邊間。


個熟食中心睇嚟主要比當地人食嘅，環顧全場都冇幾多個遊客，我哋兩個衣着咁奇怪嘅人就引嚟咗大家嘅打量。見間間個餐牌都差唔多，就是旦坐低咗，都係食嗰啲南美飯


下層就賣吓生果同啲小食雜貨。


第二朝瞓到自然醒，離開熱水鎮。嚟之前以為熱水鎮只係一個遊客味濃毫無特色嘅地方，抱住咩期望都冇嘅心態，嚟到發現冇錯佢真係遊客味極濃，但嗰種比山包圍住，長時間有霧氣喺周圍繚繞住嘅環境，仍然比到我驚喜。如果要用一個詞語去形容，我會話係仙氣。


約定咗三點喺Hidroelectrica開車，喺鎮上面等到十二點幾就開始慢慢行出去。


無驚無險去到等巴士嘅地方，同馬丘比丘山上面一樣人山人海。一模一樣嘅車泊到周圍都係。


由於每架車都係各自嘅旅行社派過嚟，我哋一定要搵返自己買飛嗰間嚟上車但佢哋冇一個統一嘅系統，唯一嘅辦法就係行埋去個司機度逐架逐架問。啲司機就揸住自己架車張乘客名單同你對名，有名先有得上。去到開車前嗰幾分鐘，啲司機就老豆搵仔噉嗌出嗰啲仲未上車嘅人名，但啲名通常都來自唔同國藉，加埋佢哋啲西班牙文口音根本唔知佢讀乜鳩，真係嗌咗自己都唔知

睇Machu Picchu 呢幾篇真係好似自己再去多次一樣
當年我都係揀呢個方法來回Cusco 同 Aguacaliente，唔同既係我上Machu Picchu 時係來回行山，唔搭穿梭巴，覺得完全唔抵，個日我諗係成世人係行得最多既一日
留名繼續支持

返到Cuzco都未捨得走住，作為秘魯遊客咁集中嘅一個城市，淨係睇完馬丘比丘就走好似有啲可惜。呢一日我哋就打聽吓仲有冇其他嘢玩。



喺秘魯成日都飲到鮮榨果汁，真係好抵飲。



入到旅行社睇完啲相，諗住揀多兩個團嚟緊參加，一個係睇相見到同之前Laguna 69差唔多咁靚嘅Humatay Lake，一個係五顏六色嘅彩虹山。但女神就話唔想行咁多山，傾完之後發現我哋呢二百幾日都冇乜點分開過，其實都好誇張既然係噉不如就趁機分開一下，我自己一個去彩虹山，女神睇完湖就留喺市內me time吓。


睇返之前Laguna 69啲相就知我對Humatay Lake嘅期望幾咁高。一樣都係倒塔咁早就出發，不過今次只係需要行大約行一個鐘就上到4200m嘅高度。雖然一落車嗰吓天氣唔係太好，但根據之前馬丘比丘嘅經驗我相信雲霧好快會散去


行緊嘅時候都難免失望，至少睇唔到沿途四圍嘅山景。


今次好快就上到頂，不過濃霧冇散不特止，仲越高越濃，搞到乜撚嘢都睇唔到憑啲湖色隱約睇得出個湖全盛時期真係幾靚。之前睇相，見到湖後面係有一堆雪山背景，本應靚到仆街，但而家真係睇唔出。但與其話今次唔好彩，不如話之前睇到靚景嘅地方太幸運。大自然就係噉，唔係話次次都包生仔


正當大家都喺冇嘢好影嘅情況下極力搵位自拍打卡，導遊突然之間教主上身，叫大家一定要對大自然心存敬畏！佢舉起咗三塊Coca Leaves，同我哋介紹山區嘅人點樣祈福。原來Coca Leaves除咗可以用嚟食、用嚟沖茶，亦都係一種近乎宗教嘅圖騰。三塊葉分別代表住安第斯宇宙觀入面嘅三個世界，每個世界都有一種靈性嘅動物去代表，一路介紹嘅時候就好似唸緊咒語噉。


所謂嘅三個世界就係天上、地底同人間，分別由神鷹、蛇同埋美洲獅代表，而三個世界嘅當地叫法係Hanaq Pacha、Uju Pacha 同埋Kay Pacha。佢一路念念有詞，一路叫我哋跟佢一齊向住山嘅方向舉起啲葉，拜完幾個方位之後就可以許個願，叫山神賜你好運。



許願前首先要將拜完嘅Coca Leaves摺埋放低，然後喺上面起一座小小嘅石塔。我簡簡單單噉祈求啲霧喺我落山前散去，但最終並無實現


既然冇嘢睇就落返山鳥


搭車走人嘅時候天氣就開始變好，或者山神真係聽到我嘅願望，但特登玩鳩我

係可以行上去，體力足夠就OK

我自己都一路打一路回味緊

有起我底都知，小弟都算半個行山撚。出咗嚟旅行反而行得少過喺香港，有時都會有啲唔自在，一見到啲可以行嘅山就想衝過去。但女神就屬於唔同類型嘅人，雖然佢都已經陪我行咗好多但有時都會唔想行，或者間中腳痛好攰諸如此類。

庫斯科附近有座彩虹山，因為山頂五顏六色好似彩虹一樣，吸引咗好多遊客。呢座山海拔超過五千米，長年冰封，近年因為融雪先被發現有噉樣嘅顏色，而變咗新嘅旅遊景點。喺原住民嘅語言Quechua入面，座山本名叫Winikunka（西文拼：Vinicunca），意思都係指彩虹。


今次呢座山，女神一見到旅行社啲相，就話Filter好重，去到未必太靚，決定唔玩，叫我自己去玩其實我行山都唔係淨係為靚景，有時只係單純享受嗰個同自己對話嘅感覺，有啲似做內觀嗰種心態。同埋我從來未試過上過5000米，所以都想睇下係咩感覺。出發之前睇過人哋嘅介紹，原來呢座山曾經比日本嘅遊客評為體會到地獄嘅感覺：ペルーの絶景「レインボーマウンテン」で味わった地獄。講到噉更加激發到我想去體驗一吓


同大部份嘅秘魯團一樣，都係凌晨出發，搭兩三個鐘車天光之後去到目的地。據導遊所講，落車點嘅海拔大約4800米，行三百米左右去到5100到頂，來回一次就大約10公里。當時我連行山錶都未買，係之後去完坦桑尼亞先心思思想買一隻喺香港玩，所以我都搵唔返條路線出嚟


一開始首先要決定一樣嘢，就係揀就噉行上去定係騎馬上。喺山腳已經有好多原住民準備晒啲馬拉你上去，比少少錢就得。我係專程嚟行山嘅，所以就冇要到，但都有唔少人乘機玩吓騎馬。


嚟嘅時候坐滿晒成架旅遊巴，呢團都有成幾十人，導遊就得一個，仲要有一半去咗騎馬，基本上導遊係睇唔晒每一個人嘅，好快就變咗自由活動佢話條路得一條，行得快嘅跟住其他團行就得，佢就會殿後睇吓有冇人唔舒服搞唔掂。


行咗幾分鐘已經唔見晒啲團友，應該有唔少人要行下停下抖大氣，始終四千幾米係有啲高。但我可能喺Arequipa同Cuzco算耐，都已經適應咗，就覺得同喺市內行街差唔多。開頭仲有個瑞典嚟嘅哥哥同我傾偈，話啱啱先喺自己國家當完兵，但行行吓都話想抖抖。我就反而覺得有啲凍，唔想停低，最後就自己一個繼續上了。


唔驚唔覺已經突破咗5000米，當刻有種成就解鎖嘅感覺景色就真係正如女神所言，啲相後製過度吹大咗。而且人太多，我就廢時搵位自拍，求其到此一遊就算。


拿拿林上埋最後一段，如果同其他行山嘅經歷比較，甚至可以話幾輕鬆。但我嘅手指就真係有地獄嘅感覺，一除低手套想影吓相就比啲山風吹到好痛


望向周圍嘅山，都幾壯觀，但同Humantay Lake一樣，永恆大霧。喺山上面留咗一陣，一路影下相等霧散，一路睇吓導遊同其他團友上到嚟未，等咗幾個字都未等到，頂唔順啲寒風，唯有落山先


落到咁上下先見到導遊帶住最慢嗰批人上緊去，好似死吓死吓噉，我就同佢哋講聲我返上車等了。行完呢轉之後，萌生咗一個念頭。之前聽過玻利維亞有一座山，係比冇乜攀山經驗嘅人登6000米入門，叫Huayna Potosi。如果登到頂應該會係呢個旅程唔輸比南極嘅一次經歷。唔知自己會唔會做得到呢？

期待

依個真係冇咩興趣

邊個冇興趣

彩虹山

我都係為咗行吓山咋

由Cuzco出發，直去秘魯同玻利維亞嘅邊境。兩個國家以的的喀喀湖（Lago Titicaca）為界，呢個湖出名在於佢係有船通航而世上海拔最高嘅湖泊，位於海拔3800米，亦係全南美最大嘅淡水湖。喺秘魯可以去Puno睇，而喺玻利維亞就可以去Copacabana。


我哋喺秘魯前前後後都超過一個月，已經急不及待想去吓其他國家。由Cuzco坐夜巴到咗Puno，第二朝完全冇停留就直接搭車過境。預先做好咗簽證，過境過程都順利。


Copacabana係一個人口只得六千嘅小鎮，但就有好多遊客對呢度趨之若鶩，除咗為咗一睹呢個面積八千平方公里，有超過七個香港咁大嘅高山湖之外，亦係為咗經呢度通往Isla Del Sol（太陽島）。喺印加宗教嘅傳說入面，佢哋嘅太陽神就係喺太陽島出世，所以喺當地被譽為聖島。


而對我哋嚟講，玻利維亞嘅第一印象就係平。喺鎮上打聽咗一陣啲住宿嘅價錢，用80蚊港幣租咗一晚雙人房，雖然熱水供應唔係好穩，不過呢啲價錢都要將就下。物價低得嚟人又少，以長途旅行嚟講，呢度係一個靜靜哋休息嘅好地方。




食物上同秘魯都有啲唔同，呢啲魚乾喺秘魯好似冇見過，但呢度就有好多檔。


Cobacabana後面有一座三百米高嘅小山，係睇湖嘅觀景台。但本身呢個小鎮已經超過3800米，再上埋個山頂就4100，雖然只係好短嘅路程，都絕對唔可以睇小。我哋見嚟到之後都冇咩唔舒服，抖咗陣等冇咁曬就出發了


上咗少少，回頭驚鴻一瞥。


之前睇人介紹完全冇人話過難行，但我就覺得有啲癲，冇明顯嘅路之餘，要手腳並用噉爬，好多位仲連企嘅落腳點都搵唔到，隨時叉錯腳跌鬼咗落山。我跟住Maps.me嗰啲濕鳩路線嚟搵路，行行吓仲去咗啲冇線嘅中間位，不禁懷疑自己行錯咗路


啱啱先講完唔可以睇小呢座山，轉頭就中咗伏。好彩望住個頂亂咁爬都始終會到。上到去就見到有啲肥佬輕鬆由另一條路上嚟



真係唔錯


山頂有個露天嘅教堂，相對城裏面嘅教堂冇咁華麗，但話唔定可以更加接近上帝？據講喺呢度睇日落先至最靚，但我哋冇帶到電筒上嚟，加上啱啱上山條路行到有啲陰影，唔係好想摸黑行返落去，唯有飲恨放棄。唯有希望喺第二度可以睇到更加靚嘅

返工大壓力到癲，睇樓主po可以暫時放鬆下

靚呀！

好post好國留名

Galapagos同南極係bucket list頭兩位
樓主有緣再去埋吧

返工真係好辛苦

自己睇返都覺得正

Galapagos同南極係bucket list頭兩位
樓主有緣再去埋吧

有緣再去，但揸住本中國護照就嚟邊度都唔使去

返工忙到食飯先得閒睇電話，壓力又大搞到瞓得唔好

你用咗幾年寫 我用咗幾日睇 追到live

樓豬好幽默好正 繼續寫埋落去呀