300日浪遊到南極，直到世界盡頭（IV）

上一次嚟阿根廷，好似已經係好耐之前嘅事，講緊嘅係收到Last Minute船飛嘅消息，由秘魯Huaraz匆匆忙忙去到Ushuaia嗰一次，明明只係兩個月嘅事，但感覺已經隔咗一個世紀。當時喺Ushuaia，只係諗住點樣安安全全度過三日，唔出任何差錯，對於阿根廷可以話係冇咩印象。


阿根廷算係南美之中比較發達嘅國家，消費比起秘魯同玻利維亞都高好多，穿梭國內嘅長途巴就更加出晒名貴。由San Pedro de Atacama去到Salta，我原本嘅計劃係慢慢坐車去首都布宜諾斯艾利斯，沿途可能搵兩三個城市停低遊覽下。睇完價錢之後發現巴士車飛隨時仲貴過坐內陸機，加上之前已經有提過坐巴士坐到腰骨痛，如果慳唔到錢真係唔想再搭於是一早就果斷買定機票，準備喺Salta留幾日就飛走。


喺Salta冇咩特別計劃要去睇啲咩，反而坐車嚟嘅時候見到智利同阿根廷之間啲山五顏六色，好似喺Cuzco行嘅彩虹山嗰種，有啲驚喜。但架車行得太快就冇影低去到嘅第一晚，揀咗一間喺Airbnb附近嘅餐廳，唔係咩貴價嘢，但都可以開紅酒鋸扒好似好勁噉平時我哋都冇飲開，純粹嚟到阿根廷湊吓熱鬧，唔識飲嘅。




喺呢啲唔算好大嘅城市，即使冇乜計劃，如果有咩出名或者好特別嘅地標，行吓行吓自然會唔覺意去到。第二日喺市內散步，就走咗入呢座Inglesia San Francisco。佢似乎唔係Salta最大嘅教堂，但都冇咩所謂了。


藍色嘅外觀又幾得意



喺Salta，唔單止喺出面食牛扒好抵食，自己去買嚟整嘅價錢都好吸引。出去食咗一兩次之後，都忍唔住買兩塊返房自己煎


感覺到自己再係噉落去會鋸扒鋸到厭，開始留意吓其他食物


除咗牛排，入到阿根廷都會見到周圍都有賣呢隻叫Empanada嘅小食，係中間會包住唔同嘅餡，例如牛肉之類，食幾隻已經好飽。去到布宜諾斯艾利斯之後仍然係隨處可見，有時一出門口買幾粒當早餐食

推

哇終於出，仲以為尾已爛

仲以為又潛水

繼續留名支持
Salta 好有驚喜，幾多一日團可以報，有酒飲有靚景睇有打卡位

呢個餃子好好食嗰陣個waiter講完本身已經唔記得咗叫咩名

凍唔凍啊，著咁少

終於

等咁耐得一篇

嘩, 前幾日開始慢慢睇追到live
睇著千奴巴啲字好似自己都去咗轉旅行咁
同埋覺得如果有機會去南美玩嘅話應該要學下西班牙文先會溝通順暢啲

幾時有文

LMYSA

又想走數

已經爛尾了

又爛尾

樓主渣

垃圾樓主 ， 留名

喺Salta留咗三日就坐飛機走，第二次踏足布宜諾斯艾利斯（Buenos Aires）。我哋早喺兩個幾月前嘅十月尾，就已經路過呢個阿根廷嘅首都，仲懵盛盛留低咗行李喺呢度，搞度差啲冇衫着唔知點上南極船。當時對呢個首都嘅印象，就係轉機同入境好順利，冇好似一般南美洲啲陸路關口一樣因為冇人認識特區護照而遇到阻滯。


我哋喺Buenos Aires住嘅係Airbnb，但間屋就唔係我哋兩個住晒嘅，而係同一個獨居嘅男人嘅一齊Share。呢位阿根廷嘅人兄都好過癮，，佢叫做Esteban，我哋去到一入到屋，佢就同我哋講佢呢排好唔掂，已經用晒手頭上嘅錢，問我哋可唔可以一次過比晒錢先


我哋本身都一次過Book咗三晚，聽到佢噉講好似伏伏哋，人在旅途成日都覺得有人想昆我哋但細心一諗自己都冇乜嘢可以比人呃，加上先比錢後入住係好正常嘅要求，所以我哋都係一筆過比晒。收到現金之後屋企個樣即刻從容咗好多，原來佢今晚約咗朋友飲酒，如果收唔到房錢佢就冇得去玩仲話下次帶埋我哋去玩。以前聽人講南美洲啲人普遍都今朝有酒有朝醉，嚟咗咁耐今日真係最感受到佢哋呢種生活嘅態度。


Buenos Aires喺原文西班牙文入面就係好空氣嘅意思，空氣算唔算好清新我都唔敢講，不過真係日日都係萬里無雲嘅藍天，就算唔係好空氣都一定係好天氣。Buenos Aires有一個外號，叫做南美巴黎，我諗係想講呢度好浪漫。同時呢度都唔少華人住，早期嘅華人會稱呼呢度做「布市」，相對於秘魯華人鐘意開餐廳，布市嘅華人就更加鐘意喺度開超市。第一日嚟度我哋就已經見到唔止一間華人超市。因為我哋嗰時都屎忽痕，有時去到一啲地方都忍唔住諗如果移民喺度生活會係點，特別係撞到啲廣東華人都好鐘意問佢哋覺得生活同廣東比有咩好有咩唔好。啲老闆就總係鐘意同我哋講啲阿根廷人做嘢好懶，一個禮拜出一次糧都成日要借糧，借完出去溝女唔夠兩日又冇晒，但仲要成日請病假我哋終於明白Esteban可能係常態，睇嚟喺呢度返工儲錢先係唔正常


對於呢個阿根廷嘅首都，唔知大家有咩印象呢？睇過一啲香港人甚至台灣人嘅遊記，好多時都會提起《春光乍洩》，因為王家衞先至嚟朝聖。我雖然唔係嚟朝聖，但都不得不講係幾有味道，嗰晚返到房都同女神開咗套戲嚟應一應景。但講到朝聖，我都不得不提另一套喺呢度拍嘅日本電影《世界から猫が消えたなら》（如果這世界貓消失了）。我係去完Buenos Aires之後先至欣賞到呢套戲，一見到螢幕出現La Boca呢個地標都即刻哇咗出嚟。


我諗南美洲喺香港，乃至整個東亞嘅旅人心中都有一個位置。好似一提起南美洲，就有種冒險、旅行嘅味道。喺呢部將日本小說拍成嘅電影故事入面，阿根廷就成為咗主角同一個周遊列國嘅冒險者相遇嘅最佳舞台。尤其係好似La Boca呢啲一入到就五彩繽紛，好似入咗一個樂園一樣嘅遊客區。


La Boca係一個港口，17世紀嘅時候就好似歐洲人為咗搵錢，移民嚟到阿根廷。啱啱嚟到嘅時候都冇錢，只能夠搭啲鐵皮屋喺呢度聚居，據講後來啲鐵皮屋油吓油吓，就變咗呢個彩色小鎮了。直至今日，歐洲移民仍然佔阿根廷最大部份嘅人口，其中意大利裔係最多，佔咗六成。


雖然呢度變咗做遊客區，但唔少遊記甚至當地人都提醒我哋，淨係留喺Caminito嘅遊客街就好，唔好走出呢個區。因為呢頭其實喺Buenos Aires嘅貧民區嚟，搶錢呢啲時有發生。曾經喺智利奶過嘢嘅我自然唔敢放鬆，乖乖留喺安全嘅地方


其實呢度比我嘅感覺同Valparaiso有啲相似，都係一樣周圍都有塗鴉，都係咁靚，有一樣嘅街頭美。而呢度感覺更好嘅地方係我冇比人搶嘢，成個地方都好似友善啲，可以玩得放鬆一啲

如果識西班牙文再去玩一定可以睇到更多。不過就算唔識都已經好好玩了

有了

會繼續

冇爛

仲寫緊㗎

出咗啦