300日浪遊到南極，直到世界盡頭（IV）

今晚

坐咗廿鳩幾粒鐘車，到咗San Pedro de Atacama。第一件事當然就係搵我哋苦等四日，終於拎得返提款卡可以繼續旅程嘅朋友據佢哋講，最後兩日都無驚無險，先係國家大選佢哋喺Hostel休息，之後嗰日等咗一陣就見到解款車，心情就好似呢度啲仙人掌等到天降甘露一樣。


開心到要下廚煮嘢比我哋食


呢晚我哋直接Book咗間四人房，好似中學生去宿營嚟返個夜話傾偈。明明我哋都只係今年旅行先識，真正見面嘅日子就只係喺伊斯法罕嗰兩日，但就總係有種識咗好耐嘅感覺。呢啲係咪就叫做他鄉遇故知？我夠膽講，如果唔係見返佢哋，而係其他路上識嘅人，例如蒙古沙漠團嗰兩三個美國加拿大人，俄羅斯嗰啲Couchsurfing Host，瑞士嘅Urs同Regula，或者南極船上嗰啲後生仔，我哋都唔會興奮到想一齊瞓，最多都係同遊一個Day Trip就算。旅程中我哋會開心到想同房瞓嘅只有古巴識嗰兩個香港女仔。但Toni同Nicole係澳門人，唔係香港人。以前我一向都以為自己好似大多數連登仔一樣對澳門人冇乜好感，但我係咪不自覺地將澳門人都當咗自己友？因為大家都係講廣東話？如果路上識到識廣東話嘅廣州人，我係咪都會覺得好親切呢？究竟香港人呢個身份認同重要啲，定係講廣東話嘅人呢個身份認同重要啲？我睇唔透。當時係2017年，經歷咗19年之後再問呢個問題，答案又有冇唔同呢？


拎返提款卡之後，佢哋兩個都話唔想再留喺呢個地方，所以過埋呢日就會走。而我哋兩個啱啱先到，唔打算太快離開，即係話我哋一齊玩一日就會再次分開。雖然今次重逢都幾難得，但大家都係旅人，對緣分都有種心領神會，我相信時機嚟到我哋就會再見。即使心入面都有少少想一齊玩多兩日，但都無謂強留



佢哋喺阿他加馬嘅最後一日，亦係第一日可以放鬆心情去玩，揀咗一個叫月亮谷（Valle De La Luna）嘅地方。



月亮谷會有咁得意嘅地貌，係因為阿他加馬沙漠係世上最乾罕嘅沙漠，比起之前去嘅戈壁更加乾。有啲部份嘅地質乾到好似火星地表一樣，乾到被美國太空總署用嚟測試一啲探測火星嘅儀器。



一齊玩嘅好處就係可以輕鬆互影合照



接咗個秘密任務去勘探火星地表


到咗火星了 真係想像唔到點喺呢種氣候底下坐喺部ATM機隔離等足全日，唔怪得即刻想走


出口真係寫住Valle de Marte（火星谷），咁快由月亮去到火星，再行會唔會去埋冥王星

shit, 揩到負評粒制，Sorry
點解連登咁on9冇得轉返㩒正評

為咗用盡喺San Pedro de Atacama嘅一日，我哋由月亮谷返嚟之後，馬上報埋夜晚嘅觀月團。因為氣候關係，呢度一帶嘅天空好清，只要揸車去一個遠離城鎮嘅地方，就可以避開晒城市嘅光，係好適合睇星同月亮嘅地方。


就係呢個阿叔車咗我哋去一個周圍乜嘢都冇，得一間屋仔嘅地方。當然因為附近冇街燈，環境都幾詭秘，你想像係拍戲藏屍嗰啲位就啱，唔怪得佢個樣咁撚變態但唔好誤會，佢嘅真正身份係一個研究生，呢度就係佢平時睇星嘅地方好多部望遠鏡已經一早放晒喺出面，我哋要做嘅嘢好簡單，就係隊個頭埋支天文望遠鏡到，郁吓支鏡直到見到月亮為止。


較啱位就可以直接用手機對住個望遠鏡影到月亮今晚嘅活動就完了過程好似有啲無聊，不過我自己以前冇用過呢啲咁勁嘅望遠鏡，都算係特別嘅體驗。如果讀書嗰時玩過啲咩天文學會，可能就覺得不外如是。但我諗呢邊嘅天空應該都真係清啲嘅


玩完望遠鏡，就返入去吹下水，開支酒，或者唔飲酒就飲杯咖啡食吓朱古力都得。原來叔叔本身唔係住呢頭，純粹貪呢度個天夠清，為咗追逐佢嘅觀星夢先遠道而嚟，結果比佢喺度殺出一條財路。有理想又搵到食嘅人生真係好正，唔知喺肺炎下佢嘅生意仲做唔做得住呢


第二朝喺Hostel出面同Toni仔研究埋點搭車走，大家又再次分道揚鑣。我哋嚟緊旅行嘅方向相反，佢哋啱啱由玻利維亞過嚟，會向南行經聖地牙哥飛去復活節島，我哋就會向北入返秘魯，睇埋馬丘比丘再過去玻利維亞，玩返之前因為直去南極而未睇嘅嘢。


可能歐洲移民比較多，智利飲食文化都係偏歐美，壽司就唔好食架啦，Burger啲扒就經常爆晒肉汁好滿足


成個城鎮好細，好快行完。但鐘意貓嘅人就有福了，連貓BB都可以周街見到


成隻抱起亦得


散步嘅時候發現到有樣好嘢叫Viagra Mapuche ，佢唔係普通偉哥，而係一種地道嘅壯陽藥。秘魯瑪卡就聽得多，呢隻智利嘢真係第一次見，Google都查唔到中文有咩譯名。見佢聲稱有提升性慾同食咗射得更加Fresh嘅功效。如果有日老咗唔係好掂，真係要返嚟呢度整返劑試試。有冇巴打試過話我知係咪有效

我都成日㩒錯其實有得改有咩唔好呢

老閪都買啲壯陽嘢試下等阿嫂開心下呀嘛！
我覺得無得改正負評係想capture大家第一反應

又追到live

由智利入返秘魯，諗住喺Arequipa落一落腳，就會去傳說一樣嘅Cusco睇馬丘比丘，點知一停就停咗好多日。


搭車沿路經過嘅都係沙漠，穿過咗乾旱嘅阿加他馬沙漠，喺黃昏時份到咗秘魯嘅Arequipa，首先去Hostel擺低啲嘢。



Hostel可以幫我哋叫車去好多地方，我哋今晚嘅目標只得一個，就係食返去南極之前食過，一直念念不忘嘅秘魯壽司而Arequipa就真係有我哋喺Lima食過好好食嗰間連鎖店Edo嘅分店，我哋就決定唔可以錯過。嗰間Edo位於一個叫做Arequipa Centre嘅商場入面，距離Hostel一個鐘路程左右，我哋搭咗Hostel出面嘅巴士，出發去食大餐


商場唔知搞緊咩活動，好Q多人，但我企咗一陣都聽唔明做緊咩。等吓等吓就輪到我哋入去食。啲壽司依舊冇令我哋失望，抵食，好味，勁滿足。

出返嚟之後，我哋本應搭車返Hostel。但當時又想慳錢，加上食得太飽，就選擇咗行一個鐘當散步慢慢返去，呢個決定成為咗旅途上最大嘅錯誤

因為只係落一落街食飯，我哋都冇帶背囊。平時我嘅重要物品會放晒喺一個貼身嘅腰包，會裝啲應急嘅現金、信用卡同護照。而手機就放咗喺外套一個有拉鍊嘅袋入面。嗰晚唔記得係女神件衫冇衫袋定點，總之就將佢部手機擺咗喺我件外套個衫袋入面。我拉埋拉鍊其實都好安全，加上已經喺南美玩咗好幾個月，上次喺智利條仆街埋身搶都搶我唔到，我全程都好有自信，唔覺有咩問題。但行到返房，諗住拎返晒啲嘢出嚟，先發現其中一邊衫袋拉鍊打開咗，入面空空如也即刻心底一沉，究竟發生咗咩事

我將其他衫袋同所有可以擺嘢嘅空間都反晒出嚟，都係搵唔到女神部手機，唯有宣佈真係唔見咗了可能性有兩個，一係沿途真係有高手趁我冇留意嘅時候貼身打開拉錬偷走咗手機，一係就根本我放入衫袋時唔記得拉埋拉錬，然後行行下跌咗出嚟。

我哋抱住最後一絲希望沿住行返嚟嗰條路行返去壽司店，希望真係沿途跌咗有機會執得返，又喺中途經過嘅舖頭問啲職員有冇執到手機。但都係冇消息一來一路又行多咗兩個鐘，搞到成十一二點都係得個桔。搭咗成日車，又行咗幾個鐘路，本身都好攰，仲要唔見咗最重要嘅手機，女神嘅心情好低落，想喊又喊唔出。除咗係錢嘅問題，最擔心嘅係呢七個月以嚟用手機影嘅，代表住我哋回憶嘅相會冇晒。而我最唔開心嘅係，決定行路都嘅係我，部機亦係由我保管，可以話所有嘅罪都係喺我身上。即使對方冇明言，但自己都會喺度諗，點解只係保管好部電話咁小嘅事，都可以咁廢做唔到？仲要夜媽媽喺秘魯有車唔搭，走去為咗慳十蚊八蚊行一個鐘，點解咁撚戇鳩？

當晚大家嘅精神狀態都跌落旅程嘅谷底，感覺到係一場會令旅程終結嘅暴風雨。雖然事後諗返都唔係咩好大件事，但當時嘅氣氛就係噉樣。如果一次疏忽就KO咗我嘅旅程，我真係好唔甘心，甚至呢世都會耿耿於懷。

再食就勁得滯啦過多廿年有緣就返去試吓

其實用左幾多錢

成件事好熟悉，小弟都試過好多次萬惡的秘魯賊
不過如果夠膽的話可以去當地既賊仔巿場，有機會搵得返自己部電話




然後行返去發現唔見左銀包

繼續G持

繼續留名支持，好明白你當時感受

第二朝瞓醒都仲係唔認命，又沿住尋晚條路再行過，諗住條街光啲再搵一次，當然都係搵唔到痛定思痛之後，唯有接受電話已經唔見咗呢個事實。


我哋去咗一個專門處理遊客失竊嘅遊客警署報案，見到門口寫明為遊客而設已經覺得有啲鳩。一個地方要幾多遊客比人偷嘢先會有遊客警署


落完口供之後，警察姐姐叫我哋冇問題就喺張口供紙上面簽個名，都記錄得幾詳細，連我哋喺香港住邊、老豆老母叫咩名都寫晒落去口供紙當然用西班牙文寫，我雖然隱約見到啲Key Words係寫住iPhone 7 Plus，同埋啲街名，斷估都冇搞錯，但始終要簽名作實，都唔想亂嚟。陣間萬一個偷電話賊係自己友，佢寫到我喺條街度送部手機比佢，我咪冇仇報？

做得警察英文都唔會好，秘魯都唔例外。警察姐姐用Google Translate翻譯一次比我哋睇，睇完冇問題就簽咗了。呢個時候我望到佢哋近幾個月以嚟嘅失竊文件好整齊咁按月份擺咗喺側邊，原來單係呢個十一月，本File就已經幾吋厚。我哋就問個女警呢啲事係咪成日發生，同埋搵得返部機嘅機會有幾多。佢話每日都有好多單，我哋嚟之前先有個歐洲人啱啱報完案走咗。佢成個袋冇咗，入面有GoPro仲有幾千蚊美金現金，警察仲話我哋只係一部電話算少啦佢都好坦白噉話基本上都搵唔返，佢自己就好似冇見過成功個案其實我嚟之前都冇期望，但都真心想問佢哋坐喺度有咩用


上面利馬巴個留言講嘅嘢我哋當時都有諗過，所以就走去問個女警，知唔知有冇邊度有機會買得返部機，唔介意可以講聲我哋聽。但個女警就打咗呢段嘢比我哋，估計係想講因為冇人開到部iPhone嘅鎖，偷咗都用唔到，所以冇人會走去嗰啲賊仔市場買賣，叫我哋唔好諗了。唔知係個個警察都智商低定咁睇低啲小偷，我就唔信佢哋唔拎部機去賣，亦唔信冇人識得破解


問唔到都冇辦法，揸住張口供紙影埋張相就收工。我哋出發之前都搵過啲旅遊保，但冇一間肯保我哋去超過半年，就算肯買兩份半年嘅旅遊保險都要中間返一返香港，由香港再出發先計數，於是最終只係買咗啲全球通用嘅醫療保險就算。今次唔見咗電話自然就冇得賠。報警都只係貪佢唔使錢比啲嘢佢做

發生咗啲咁不幸嘅事，我哋即刻離開傷心地，轉過另一間住宿，唔想再留喺嗰個區。喺Airbnb堆Super Host度揀咗間望落四四正正嘅。


去到果然唔錯間屋唔係我哋住晒，本來都有一對兄妹同佢啲屋企人住喺度，但佢哋唔係成日喺屋企，感覺非常之闊落。撇除住宿要比錢，佢哋都真係當我哋朋友一樣，有時會同我哋一齊食飯，得閒時會同我哋出去玩吓，又成日同我哋傾偈，比起Airbnb更加有Couchsurfing嘅感覺。

安頓咗落嚟又回歸返嚴肅嘅討論。女神坦言已經冇晒旅行嘅心情，佢最想去嘅南極已經去咗，最重要嘅手機連埋影落嘅相唔見晒，連搵朋友訴苦都要借我部機，極唔方便。解決埋Apple Pay嗰堆問題之後，淨低嘅就只係想完結。但我自己就接受唔到連馬丘比丘都未見到就返歸，下次再嚟南美洲真係唔知要幾多年後。見到女神連行遠少少食個飯嘅動力都冇，就好似每次M到最痛嗰一日一樣，但呢個違失iPhone嘅病就等於日日都嚟M，相信只有買過部新機先解決到。

正所謂用錢解決到嘅問題就唔係問題。只要買到新機，用更高嘅像素重新影低嚟緊更正嘅回憶，我相信當日笑容滿面嘅女神一定會返嚟我身邊可惜買iPhone喺秘魯都唔係必然，屋主（睇佢間屋都知佢喺Arequipa算係有米）同我哋講，佢哋唔會喺呢度買iPhone，因為稅務問題，呢度嘅價錢係離晒譜。當時最新嘅iPhone 8 Plus喺香港好似賣緊七八千蚊，而秘魯同款機計返可以去到萬四五港幣。秘魯人就算用iPhone，好多都係去美國玩嗰時順便帶返嚟。一般平民大多數都係用Huawei

其實我對呢個價錢都冇咩感覺。我知係貴，但多咗個筆咪當係用嚟挽救呢個旅程。如果比多幾千蚊就可以去埋玻利維亞同巴西，我認為非常值得，大不了咪返到香港OT再OT

但女神就唔係噉諗。佢覺得唔值就係唔值。仲話如果我夠膽買，就同我分手。真係買又死唔買又死，我應該如何是好

最後埋單都大約要十五萬一個人

成件事好熟悉，小弟都試過好多次萬惡的秘魯賊
不過如果夠膽的話可以去當地既賊仔巿場，有機會搵得返自己部電話




然後行返去發現唔見左銀包

真，嗰時都有諗過，但最後都係唔敢去了

真係好慘，去得太耐好容易鬆懈

Valparaíso好靚...心郁想去

一齊生活咗咁耐，對對方了解自然好深。雖然女神話買貴iPhone就會分手，但以我嘅判斷，買咗一定會好開心，我相信我先係正確為咗唔比佢有拒絕嘅機會，我要等待時機。因為偷偷地買係好難，二百幾日以嚟我哋九成時間都痴埋一齊，真係得去廁所嘅時間先會短暫分開吓，突然消失成個鐘去Apple Store嘅難度係非常高。

為咗拖延時間，我就遊說女神喺度報個西班牙文嘅短期課程，休息吓順便學吓嘢，上完堂都真係唔想再留先返香港


喺秘魯學西文係好平，印象中每個鐘係30蚊港幣學費左右，平到對個老師唔住。而且為咗吸引遊客，彈性好大，你想上學幾耐都得。一兩日嘅堂淨係學下日常對答嘅又有，一兩個月嘅學下生字文法亦又得。我一報就報咗兩個星期，一方面想多啲機會可以買返部機，另一方面由古巴開始就一路都想學


課室係喺戶外，有太陽得嚟唔會好熱，噉樣上堂真係好鬼精神。我哋報咗啲每朝三個鐘嘅密集班，一個老師對我哋兩個人。人少加上個老師英文唔算太好，真係用盡辦法都聽唔明先會加少少英文輔助，變相迫你用西文，有好多練習口語嘅機會。


每日朝早上完堂，晏晝出街就實習，自己覺得都進步得幾快。雖然有排都未去到流利運用嘅程度，但都學得好滿足了。

由學校行返屋企嗰條路，會經過一間Apple嘅Authorized Seller有一朝見女神心情好似靚啲，就把握機會去睇，諗住只要買撚咗佢，我嘅馬丘比丘之旅就會返嚟埋到櫃枱，女神口裡說不，身體卻很誠實，尷尬地指住部8 Plus話256GB都唔錯

我霸氣地叫職員拎部256GB出嚟，點知佢Check完話冇貨見到女神嘅表情由天堂直插谷底，幽幽地自言自語：都話唔喺度買架啦

我諗女神都好失望，但佢應該冇諗過我比佢更加失望，甚至有啲想喊出嚟。我含住眼淚噉問個職員知唔知幾時會有，佢應該嚇親，冇諗過男人老狗買唔到iPhone會喺舖頭喊出嚟我問佢可唔可以比錢訂咗先，佢都唔敢收我，淨係叫我過幾日再嚟望吓。

我好擔心下次未必咁容易可以再入嚟舖頭，萬一西文課程完咗都未買到，可能旅程就到此為止了。趁住女神係度發緊吽哣，我諗到一條妙計，或者可以起死回生

是咪去附近d手機店搵下有冇d賊仔貨呢

追左好耐，南極真係好靚
唔見咗電話真係心情會好差樓主快啲打埋之後點

咁跟住你哋會唔會去復活島？

真係發生左
係海外嘅香港人要緊記，要記住自己身份

sor 樓主，追追下你 post 有感而發
仲要係今時今日，俾你 2017 預言中左⋯

去完返嚟會唔會連自己嗰部都唔見埋