成人初學鋼琴，歡迎加入交流

鋼琴好有機會同人合奏，所以一定要學下跟拍子機。
練熟咗都跟唔到，就要：
1. 斬件，一句句嚟夾，再串返埋。
2. 都唔得，就要分開左右手同拍子機夾，夾到再雙手練。

其實你每個禮拜都想去上堂，或者上堂時間好快過，果個就已經係好老師。

咁我肯定而家呢個老師係，可能係我之前諗得太多，多謝指教

而家多數係用電子琴定傳統琴
傳統琴太大舊 電子琴又驚彈落去個感覺唔同

師兄，傳統琴真係好feel好多，我一定揀傳統琴

初學就電子 肯定咗自己有興趣先再換傳統
信我 見太多 學一陣發覺唔啱嗰啲 電子琴易啲賣返走

對音色冇特定要求嘅話 Roland個手感已經好好

唔駛太擔心學壞手 都係嗰句 成年人有足夠嘅理解能力 行動力 分析力
普遍都係屋企用電子 上堂用傳統 即係好似拓海輪流用86同掃把佬跑秋名山咁 你係一定會對比到個分別出嚟
你個腦係知道有分別 就會識得去調整

睇你喜好啦～
而家啲keyboard都做得好靚架啦
有啲人放工都10點仲去練琴唔怕比人屌臭咩
我啲成人學生都係買keyboard多

同埋都好睇你係為興趣去學定要考級
個個學生我都係問呢句先

想問吓有冇平價推薦？

多謝你答得好仔細

我自己用緊Roland RD-88
大約一萬
初學既玩FP30都唔差，印象中好似6000蚊

Agree, 初學㩒音真係唔太需要追求乜野靚琴

到你真係有興趣，要追求音色個quality嘅時候就真係冇得唔換了

始終鋼琴機械結構先係直接反映你唔同touch嘅聲音
電子琴做得再真都冇得做到咁細緻

香港教琴老師，資歷一般都冇問題。琴行個 D 仲有老細睇住，更加唔使擔心。
反而人夾人仲緊要。有 D 學生想先生迫緊 D ，有 D 唔比想人迫。老師要識得就。
我好欣賞有 D 老師，學生完全冇練琴，可以令佢好開心咁彈 45 分鐘，（可能仲多過佢一個禮拜屋企彈嘅時間加埋。） 上邊都有 CHing 講過，如果你冇練琴，老師就冇嘢可以教你，呢個肯定唔係好老師。
名師一般唔會同你執個 D 技術上嘅問題，你練好先嚟上堂。（李斯特： 我唔係幫人洗底褲架，要洗你屋企洗。 I don't do other people's linen. Wash your linen at home. ）所以香港有 D 富貴人家，小朋友跟名師上堂，仲要另外請個 APA 嘅學生，日日陪佢練琴。

如果你講嘅係數碼鋼琴，彈嘅分别應該就唔大。
電子琴就唔同，佢做唔到大細聲。姐話，你大力彈，細力彈，都係咁聲，只可以較定大細聲。初學可以頂住下，家庭條件好返 D ，可以换數碼琴。
電子琴 1000 都有，數碼鋼琴，最平都 3XXX。
真鋼琴梗係好，呢個人人都知。但香港你想擺個三角琴係屋企，你仲要起个地台隔音，發咗達先有得諗。

最平係 YAMAHA P145B，3XXX，P-225 5XXX 。CASIO 4XXX。全部便携式，唔包腳架。擺邊度彈都得。彈完可以棟起，唔 nga 地方。

搵教琴老師通常係邊到搵比較好？
想跟老師學，但係市面太多完全唔知揀

可以琴行學下先。

fb大把，唔同地區都有，師兄一齊加油，努力

fb都大把，free既都有，唔好買新，蝕得好勁

基本上撞手神，冇話琴行就一定差，Studio就一定好

教得好唔好就自己feel，咁大個人自己feel到學唔學到野，講到底都係人夾人

反而樓主你真心要諗諗你而家個老師係唔係真係啱自己，真心唔係開勁多歌就叫好老師

好老師識開歌開練習，都要識tune每個學生個進度
唔係個個都一練就上手，可以開幾廿樣野一齊做，個個都神童咩

我睇你啲留言你日練3粒鐘練到隻狗咁都仲要未練曬啲功課
講真日練三個鐘你係真係有料，我返琴行都冇偷到一日三粒鐘練琴咁撚痴線

我估計你而家個情況有幾個可能性：
1. 你可能太貪心，乜都想要快練起，所以你老師聽到你想要乜就乜都開比你，反正一個星期一堂，你自己諗6日點樣練起比佢聽

2. 你老師可能未能夠準確評估到你嘅能力，或者練習時間reach到啲乜野練習成果 根本就比得太多太雜，冇乜針對性咁比練習/歌你練，唔係話佢而家比嘅練習冇用，但未必係你呢一刻最需要建立嘅能力

3. 可能係你唔識練琴，又或者係你老師冇教你點練琴，所以你3個鐘嘅練琴時間係唔effective的

唔知你會唔會犯我教果啲小朋友嘅常犯錯誤啦，例如一彈錯就由頭彈過，永遠都唔抽彈錯果個「接駁位」出嚟練，一抽出嚟就話唔識睇，要前幾個bar開始/由頭開始etc.
又或者你太大段一齊練，所以練勁耐先練到少少野。我覺得要練得快其實係要每個分句練，甚至係一兩個bar為一組咁好，好似火車車卡咁練好一卡跟到拍子，再練另一卡，再連埋前後兩卡

所以你諗諗啦，咁大個人，教得好唔好，夾唔夾，自己知架啦

好多謝師兄咁語重心長咁解釋俾我聽，其實我唔明點為之學唔學到嘢，夾唔夾又係咩？呢個要請你指教吓🙏🏻

所以我之前都想請教吓，呢度啲師兄師姐，點為之一個好老師

其實我從來都冇要求過要練啲乜嘢，亦都有試過同老師講太多嘢練，練唔切，我開頭學琴嘅時候，都係諗住每日練一個鐘就OK，但係因為太多嘢要練，所以自己先不斷加時間落去，但係而家已經係極限啦，因為再練個人都已經集中唔到，到上堂覆琴覆得唔好，老師知道我盡咗力練琴，都唔會黑面黑得太緊要😂

師兄，你講得好好呀，關於針對性嗰方面，以我自己知道，自己睇譜慢，手指弱，個人唔識放鬆，淨係呢幾樣嘢，老師都冇乜幫我針對性去練，暫時呢三樣嘢，其實我都幾迫切要去練㗎，偏偏老師又冇乜點講，所以我多數都係上yt睇，跟住自己再試，

關於練琴果方面，老師又真係比較少講，除非見我兩堂都搞唔掂，咁就可能會叫我試吓第二啲方法咁囉，
而家練琴已經好過初頭好多，可能上得YouTube睇得多啲老師教點練琴，開頭真係日日三個鐘練hanon，練足一個禮拜都練唔好，時間又嘥咗，其他嘢又冇練到

不過都好多謝師兄講出我嘅問題，多謝晒你

好勤力

全職練琴

講點練我角度嚟講其實係老師責任嚟

你有某啲要求，講完出來但老師又冇幫你針對性解決，唔幫你解決又冇話你知點解佢會唔幫你解決你呢啲問題

然後你仲要eager到自己睇片學

不如你自己考慮下啦，我唔做打爛人飯碗嘅事

不過師兄，講開又講，老師實際上又真係好似冇乜解決過我啲問題，我係度諗，會唔會因為我係成人，唔係小朋友，所以應該自己去解決

其實呢個問題我都好想係度問架，其他成人學琴係咪都好似我咁，我叫呢啲做半自學😂