番到瀝源邨之後,楊悅盈叫我喺樓下等一陣;佢番咗上樓。
我挨埋牆邊企,喺書包入面拎咗謝石俊部電話出嚟打開咗佢個Whatsapp。
謝石俊今日有份逼死自己班嘅同學
作為補償,無論係乜嘢事,佢都要盡力幫手 21:39
呢個係謝石俊用楊悅盈電話Send俾自己嘅Whatsapp;就咁望落去,就好似係楊悅盈怪責緊佢咁。
謝石俊的確喺柯志恒煽動大家嗰陣爭少少就變咗第11個死者。我諗番起佢今日幫手搬同學過隔離課室、主動請纓做白老鼠Read Message,甚至開班會嗰陣不停咁發問,似乎都係因為佢都好逼切想完咗呢個遊戲佢。
我望下而家個時間:22:03——係時候要覆。
今日嘅事唔係你嘅錯,要怪就只好怪Admin同埋柯志恒
我哋而家開始一齊努力啦 22:03
其實呢啲鼓勵嘅說話我覺得有啲肉麻…但係嘅然Admin唔俾我哋Hea覆,我就即管咁樣寫。
希望輪到謝石俊Send Message嗰陣,佢會拉番上嚟睇。
大約十幾分鐘之後楊悅盈落番嚟,拎咗一件舊嘅男裝外套俾我。
而家農曆七月,我成身都係乾咗嘅暗紅色血漬,表情仲要(可以想像得到)陰沉中帶點兇狠;佢應該係怕我番屋企嗰陣唔小心嚇死人。
「我阿哥嘅,佢搬咗入大學宿舍之後留低咗好多衫。」楊悅盈見我望住件外套個表情之後,主動同我解釋。
我著起咗件衫,同佢講聲唔該之後諗住走。
「聽日下晝兩點,禾輋邨等。」楊悅盈同我講咗句;我點點頭之後就轉身離開咗。
落番瀝源商場,我去咗便利店買咗袋麵包同枝咖啡;雖然無乜胃口,但係我醒起原來我由下晝開始到而家一滴水都無飲過。
用八達通俾完錢之後,我拎住啲嘢食行樓梯上天台——我諗住喺天台坐下,等到十一二點再慢慢行番屋企。
雖然我父母去咗旅行仲未番,我都唔想而家咁樣番到屋企俾家姐見到:嚇親佢固然唔好,但係我最怕係佢追問我發生咩事;雖然我哋兩個姊弟感情唔係特別好,但係由細到大,我都好少有嘢會瞞住佢。
每行上一級樓梯,我都會諗番起以前我、Billy同允仔三條友喺天台度發生嘅事:放學上嚟問我借功課抄、三個玩互閹、自己試可樂溝萬樂珠、傾下學校有咩女…
上到天台,我轉個角諗住去番我哋平時坐開嗰個位——發現已經有人坐咗喺嗰度。