[live 遊記] 巴爾幹半島點解係歐洲火藥庫？

大約半小時就可以由湖邊嘅山腳上到去第一個viewpoint
最易嘅路線係先上一個叫"Mala Osojnica"嘅viewpoint,
之後可以揀繼續上去"Velika Osojnica", 呢個係最高嘅viewpoint
或者由Mala Osojnica兜過去另一個viewpoint "Ojstrica", 跟住落山
由"Velika Osojnica"走都係要由沿路返落去
不過要有心理準備, 啲路好斜而且好難行, 如果落雨/落過雨應該會好跣
沿路冇記錯係有指示牌嘅, 畀你參考

感謝

高人出手

歡樂時光過得特別快
睇呢個同其他巴打既歐洲遊記，感覺確實天外有天，人外有人，歐洲有好多地方值得發掘，自己而家都想去探索大城市以外既風景
更加唔使局限亞洲甚至日本
同時好多旅行高手，感謝分享

分享下, 等大家行少啲辛苦冤枉路
期待巴打嘅總結
唔知今次去咗巴爾幹半島咁多地方, 巴打最推薦係邊一度?

喂頂
今日先見到你po原來已經行曬
去過一啲你去過嘅地方 有好多回憶

係呀希望大家都睇得開心
呢個世界真係好大，諗番起其實今次好多國家都剩係去左首都
仲有好多野可以探索

總結仲寫緊，應該聽日出
如果揀一度我會最推薦 Sarajevo 啊，有文化同歷史
同埋人都好 nice

Ching 回憶最深咩地方

後記 為何巴爾幹？

走出機場，一陣濕暖既空氣撲鼻而來，我知我又番咗黎香港。

今次去巴爾幹，去咗十個國家。雖然大部分時間都係去首都，但都算對巴爾幹地區有咗初步印象，了解佢哋既前因後果。

以下就係我對巴爾幹行程既總結。

先此聲明，個總結會有啲長，而且全部都係根據我印象而寫，無經過 fact check，所以請審慎閱讀。


今次旅行最終既行程

何謂巴爾幹？
巴爾幹呢個名黎自橫跨保加利亞既巴爾幹山脈。

以前啲人以為呢道山脈分開中歐同東南歐，巴爾幹地區就慢慢成為東南歐既代名詞，北面係斯洛文尼亞到羅馬尼亞，南邊就係希臘。

不過巴爾幹唔單止係一個地理概念。好多人一講起巴爾幹，就會諗起複雜、混亂、分裂呢啲形容詞。

要解釋點解巴爾幹會比人呢個感覺，就要講少少佢既前世今生。

畢竟喺過去二千年間，唔同帝國/強權都喺巴爾幹留低過自己既痕跡。

就好似畫畫咁，當每人都填上自己既色調，色彩就會變得混雜，唔係咁容易睇得清楚。


巴爾幹山脈，其實只係喺巴爾幹地區中部

羅馬帝國
第一個喺巴爾幹留低色調既，係羅馬帝國。

對羅馬帝國嚟講，巴爾幹半島係連接意大利本土到亞洲既通道，所以佢地喺巴爾幹都起咗唔少軍營同城市，例如今次去過既 Thessaloniki、Plovdiv、Belgrade、Split、Ljubljana 等等地方。

呢啲城市日後都變成區域要地，見證住之後既歷史。

幾百年後羅馬帝國分裂成東西兩邊，大部分巴爾幹地區就歸入東羅馬，亦即係日後既拜占庭帝國。


羅馬帝國喺巴爾幹既省份，到而家都仲係某啲國家既國界

拜占庭
拜占庭帝國係中世紀早期喺巴爾幹既強權。佢哋留低最大既遺產，係宗教同文字。

身為政教合一既國度，拜占庭既國教東正教一直同統治者有密切既關係。而對東正教既信仰同宗教情懷，亦好易轉變成為國族情感。

所以我有啲懷疑俄羅斯或者塞爾維亞人咁熱衷於捍衛自己領土，可能同佢哋既信仰都有啲關係。

除左傳教，東正教教士亦都發明左西里爾文字，日後好多斯拉夫國家都會用到。


塞爾維亞既東正教教堂


西里爾文字，同希臘字母有啲相似

鄂圖曼
喺羅馬同斯拉夫人之後，下一個改變巴爾幹地區既係土耳其人。

鄂圖曼帝國喺中世紀後期由土耳其嚟到歐洲，好快就佔領咗大部分巴爾幹地區。


鄂圖曼帝國全盛時期，差唔多包含成個巴爾幹半島

喺土耳其既影響下，有啲斯拉夫人改信伊斯蘭教。

佢地一開始未必真係好虔誠，純粹因為當時成為穆斯林先可以分到土地，有更多上流既機會。

呢班穆斯林之後散居喺巴爾幹唔同地方，以波士尼亞為中心，成為今日既波士尼克人 Bosniak。

土耳其係巴爾幹留低既遺產除左宗教，仲有好多古色古香既小鎮，同埋今程試過最好食既食物-- 土耳其烤肉 (Cevapi/Gyros)、土耳其甜品 (Baklava)、土耳其咖啡……


科索沃 Prizren，一個典型既土耳其小鎮


Cepavi


土耳其甜品

但土耳其人亦曾留低痛苦既痕跡。

喺鄂圖曼治下，信東正教既斯拉夫人變成二等公民，叛亂者被大肆屠殺，最優秀既年輕人被搶走加入土耳其軍隊（血稅）。

東正教徒仇恨既種子，亦都透過信仰同民間傳統繼承落去，直至鄂圖曼帝國衰落，巴爾幹人重新崛起……

我發覺我寫得太長了，聽日繼續，講番巴爾幹近代既故事

呢樣真係冇留意 信奉東正教為主嘅地方 先會用西里爾字母

係呀，兩個係 package 黎
以前啲人用得仲多，係近代以黎先轉番拉丁字母

呢隻教會斯拉夫文嘅西里爾字母好古老

至少第三四行大部分都冇再用

嚟到尾聲

想同樓主分享一首歌

https://youtu.be/6gar6MONCKs

之所以成就今日嘅巴爾幹，往往就係歷史間嘅一念一動改變咗所有

師兄咁厲害，咁都認到
我都係 random 喺網上搵幅圖

首歌咁特別
好似末代拜占庭皇帝變咗個傳說人物，啲人相信佢會好似耶穌咁再番黎
唔知希臘人會喺咩場合唱呢首歌

歐洲火藥庫

時間嚟到近代，鄂圖曼帝國衰落，巴爾幹半島再次成為群雄爭逐既戰場。

當時北部有奧匈帝國，佢哋同土耳其係世仇，本來已經以巴爾幹北部既克羅地亞地區作為同土耳其對抗既緩衝；但係而家土耳其衰落，佢地就想繼續擴大領土，首先吞併波士尼亞。

巴爾幹東方係俄羅斯帝國，自命為所有東正教徒同斯拉夫人既共主，亦都對黑海既出海口虎視眈眈。

巴爾幹西方係意大利，想控制海岸線同阿爾巴尼亞；南方就有英國，希望控制希臘同地中海，確保貿易暢順。

加上巴爾幹本土既民族主義覺醒，一時間希臘、羅馬尼亞、塞爾維亞紛紛獨立，半島上面戰火不斷，大戰一觸即發-- 亦喺呢個時候，巴爾幹開始有歐洲火藥庫呢個名稱。


好有歷史教科書味道既示意圖


維基上簡潔既勢力關係圖。可惜搵唔到張圖係眾帝國虎視眈眈咁望住巴爾幹

大對決

終於一次刺殺，掀起第一次世界大戰。

大戰之中各帝國煙消雲散，巴爾幹既人民第一次全部獨立。

但好似世界局勢一樣，當時既亂局根本未解決。

有啲民族仍然覺得被壓迫，而且各種思想浪潮蠢蠢欲動-- 納粹、共產、保皇、民族主義⋯⋯

終於喺第二次世界大戰之中，各勢力再嚟一次大對決，巴爾幹上以共產主義/俄羅斯既勝利結束。

二戰之後，成個東歐，包括巴爾幹地區都成為蘇聯既勢力範圍，大部分國家唔係比蘇聯吞併，就係成為蘇聯既衛星國。


好多人都歸咎奧匈王子被刺殺引起世界大戰。但必須指出，其實當時奧匈王室成員曾經多次被刺殺，但唯有嗰次引發國際戰爭。好多矛盾已經潛伏咗好耐，只係等緊幾時爆


二戰之後既歐洲。今次總結擺咗好多地圖，希望大家唔好介意

南斯拉夫

當大家以為勝負已分，巴爾幹地區自此被鐵幕包圍既時候，由鐵托領導既南斯拉夫公然同蘇聯決裂，令局勢再起暗湧。

喺鐵托既鐵腕統治下，民族主義被壓制，鐵托提倡 brotherhood and unity，嘗試將各民族喺一個國家既名義下統一，亦希望南斯拉夫可以喺冷戰既格局下左右逢源，搵到自己既道路。

當時物質生活雖然唔算富裕，但南斯拉夫的確係地區大國，連蘇聯都要避忌三分。

直到而家，好多老一輩既南斯拉夫人都會懷念以前既日子。

除咗因為工作同房屋都已經被安排好，亦都因為南斯拉夫喺當時的確“站起來”，受到國際間既重視。

但係以一人之力，終究無辦法扭轉民族認同。

喺鐵托死後，民族主義再次抬頭，加上蘇聯解體，權力既真空令各民族再次為左爭取生存空間而戰，而今次波士尼亞就成為內戰既磨心……


鐵托


喺鐵托喪禮上，東西政要齊集，係當時難得一見既場面


南斯拉夫內戰；昔日既鄰居轉眼成為敵人

問題根源
睇番過去歷史，我會覺得巴爾幹有兩個特點。

第一係呢度既人好容易走向極端，郁啲就用刺殺、種族清洗呢啲方法嘗試解決問題，令到仇恨越來越深。

另一方面，由於勢力分散，巴爾幹亦都好容易受到外力影響，成為大國競逐既賽場。

展望將來
喺冷戰結束之後，美國獨大，巴爾幹國家反而有啲安寧日子，紛紛以加入歐盟為目標。

但係而家世界進入多元格局，巴爾幹又再次成為外國既棋盤-- 其中克羅地亞、羅馬尼亞、希臘親歐美，塞爾維亞親俄，而中東勢力，亦都開始喺波士尼亞同阿爾巴尼亞插旗。

展望未來，巴爾幹半島雖然未必會又一次掀起世界大戰，但肯定會再起亂局，直至最後有強權壓制為止。