[live 遊記] 巴爾幹半島點解係歐洲火藥庫？

好"大"喜功

其實Kiev同Lviv唔少外國領導人都去過 又未至於非常唔安全
唔影響人之下 同夠膽真係想去

我疫情前去，當日係walk in 白撞
關於人民宮，Top Gear 都拍過
https://www.youtube.com/watch?v=3-tgeaOpIWQ

Kiev 都算大後方
巴打如果去記得寫遊記

尋日導遊都有介紹
佢話都係要睇 top gear 先知裡面咩構造

Day 16 吸血鬼城堡

尋日行完布加勒斯特，今日 join 咗個 day tour，遊覽外西凡尼亞 Transyvania。

傳統上羅馬尼亞可以分為三個地區，其中布加勒斯特呢區屬於南邊，比較受鄂圖曼帝國影響。

隔住座山既外西凡尼亞就比較近匈牙利，所以就近歐洲文化多少少。

但係由於外西凡尼亞屬於帝國邊陲，所以就保留咗更多獨立性，例如今日去既中世紀小鎮 Brasov，鎮裡面最大既教堂就屬於基督新教，用德文講道。


外西凡尼亞山脈連綿，係當地人既滑雪勝地


今日首先去咗 Peles Castle，係當時國王既夏宮



中世紀小鎮 Brasov


小鎮最大既教堂，外牆因為經過大火而變黑，個名就直接叫做 Black Church



教堂裡面都幾大，睇介紹話因為 Brasov 位處邊陲，所以特登起咗大啲既教堂宣揚國威，屬於半個大白象工程


Brasov 同 Plovdiv 一樣，大街都變咗餐廳/商店購物區

不過今日 day tour 既重點唔係外西凡尼亞，而係布蘭城堡 Bran Castle。

城堡本身係一座中世紀堡壘，無咩特別；不過百幾年前就有個作家以佢為藍本，創作咗吸血殭屍 Dracula，自此城堡一炮成名，成為遊客去羅馬尼亞必訪既地方，吸血鬼亦都成為羅馬尼亞最出名既象徵。

今日嚟到城堡，城堡主人都好識做，喺介紹完正史之後，留咗幾間房特別介紹羅馬尼亞既民間傳說，同埋吸血鬼既來源，等一心獵奇既遊客可以心滿意足離開。

不過小小一個城堡竟然收百幾蚊入場費，我睇住遊客源源不絕咁排隊上去，心諗，真不愧係吸血鬼城堡呢。


布蘭城堡，外形唔算特別靚，不過就具備防衛用途；反而最出名既新天鵝堡就係裝飾用途居多


唔知係咪有吸血鬼，所以要起座十字架鎮住個場


個 banner 設計得幾好




城堡入面都幾趣緻；聽講 Halloween 會有特別活動，唔知會唔會變鬼屋


羅馬尼亞民間傳說展覽


個吸血鬼幾似盛志文


有關吸血鬼既影視節目



返到布加勒斯特，咁啱遇上羅馬尼亞喺歐國盃贏波，好熱鬧

就咁睇羅馬尼亞真係要擺係下次去歐洲嘅頭三

Braşov呢個名真係好懷念

因為當年匈牙利王請條頓騎士團嚟呢度抵禦蒙古人，而呢班人最後就喺度定居落嚟，起咗呢個城

嚟緊呢次去唔到唔順路兼唔夠時間
其實本身都想去烏克蘭 多歷史睇

個城堡好卡通加上展覽啲圖 覺得趣怪唔係恐怖

啱啱玩完呢個
巴打今日呢個應該識答

https://lihkg.com/thread/3633941/page/18

羅馬尼亞幾好去啊
如果可以自駕遊更好

無錯，見到條頓騎士團都覺得好特別
巴打懷念 Brasov 啲咩

其實個城堡好有潛質變恐怖啲
不過而家走老少咸宜路線
唔知 halloween 會唔會刺激啲

係呀，保加利亞同羅馬尼亞都係用自己貨幣
而且陸路仲未入申根區

冇去過，但

咁真係要去下

雖然有卡 但個人傾向用現金 就要換嚟換去
或者到時㩒 每個國家用淨一堆神沙

我而家就係成手神沙
仲要喺塞爾維亞既 exchange 只收歐羅美金
我而家啲保加利亞/羅馬尼亞貨幣無著落

Day 17 羅馬尼亞印象

今日離開羅馬尼亞，啟程去塞爾維亞。

本來兩地有直通火車抵達，但係好似最近啲司機講唔掂數，結果就要先搭火車去邊境，自己搵辦法過關，喺邊境火車站再買飛搭去塞爾維亞首都貝爾格勒 Belgrade。

今次旅程時間比較緊迫，所以最後都係決定搭飛機。搭飛機當然好方便，個半鐘就到，不過沿途都係平原農田，就無咩野睇。


今朝有啲時間，先食個靚早餐；前面係羅馬尼亞傳統小食，用麵餅包住餡料


Air Serbia 既螺旋槳飛機



沿途景色


塞爾維亞不愧係中國既老朋友，連路牌都有中文

今次去羅馬尼亞雖然時間短，但我既印象都幾好。

一方面羅馬尼亞既城市都幾靚，而且仲有唔少 cafe 書店，對我嚟講大大加分。

另一方面羅馬尼亞人比我既感覺幾自得其樂，比保加利亞人友善開心。

今次去得好少地方，下次如果有時間，可以自駕去多啲外西凡尼亞既小鎮，去下黑海邊既多瑙河三角洲，或者參加佢地既音樂節，應該都會幾精彩 。


羅馬尼亞傳統食物-- 前面叫 sarmale，係用酸椰菜包住肉醬；後面叫 polanta，係用粟米磨碎再整成一舊，有啲似非洲既 ugali，不過好食好多


另一道傳統菜色係油炸豬肉同香腸，幾 heavy


更 heavy 既係呢道甜品 papanasi，裡面係油炸麵包；出面係 jam 同乳酪/酸忌廉。食第一啖好好味，不過跟住就越食越滯 。不過一生人都值得最少食一次

Greece 最正都係freddo espresso
尤其是依家夏天咁熱
西歐中歐好多國家都冇好嘅凍啡

塞狗國連英鎊都唔收?人民幣竟然又唔收

啲神沙會用膠袋仔儲起 走嗰陣係機場入咗佢 (有啲機場有神沙捐款箱)
如果好肯定自己會返兜有下次 會保留紙幣同大額啲嘅硬幣下次用

不過前年去我留咗啲克羅地亞幣下次用 折合成千蚊港幣 點之接近年尾睇新聞 話來年轉用歐元 銀行得6個月寬限期換走舊錢
咁我試下去carosell睇下有冇人短期要去克羅地亞換我啲錢 (出個低少少價益佢) 結果有人肯換 冇浪費