[live 遊記] 巴爾幹半島點解係歐洲火藥庫？

巴打打算係邊度過去阿爾巴尼亞?

竟然仲有紅軍紀念像
鐵幕拆除後 唔少地方都推倒呢類紀念碑 (除咗俄羅斯)

保加利亞, 羅馬尼亞兩國好似今年初先入到神根區,
不過暫時得海空兩路實行, 陸路都重係有邊境檢查

應該係 Kotor 過去 Shkoder 再報 day trip

係呀，所以一陣間應該都要過境
不過又唔蓋章好唔抵

Day trip唔駛煩交通
覺得東南歐最煩就係諗交通

係呀
暫時既計劃係一日首都+一日 day trip

留名繼續支持
以前試過包車，一日由羅馬尼亞Bucharest坐到去保加利亞Sofia，中間經過小鎮Veliko Tarnovo 同一個叫Prohodna 既岩洞，有兩個天井，好似對眼咁
睇下幫唔幫到巴打你諗行程

巴打去到羅馬尼亞未 安好嗎?

安好呀
謝關心


周圍行緊

似乎係書店?裝修幾靚

係呀,當地啲建築都幾靚

我最後坐巴士呀，所以就睇唔到岩洞了
不過都多謝巴打既提點

Day 14 保加利亞印象

今日係喺保加利亞既最後一日。

說來慚愧，其實我嚟保加利亞之前，對呢個國家近乎零印象。

唯一諗起既保加利亞人，係哈利波特裡面妙麗既前男友喀浪。

嚟到 Plovdiv，呢度啲人果然同電影裡面既喀浪一樣身形高大，而且好多都剪平頭裝 。

同保加利亞人相處，我會覺得佢地都幾友善，友善得嚟都好有性格。

我剛剛到埗唔記得唱錢，上到巴士攞住歐羅，巴士個大叔會大喝一聲，然後搣張飛掟比我。

我參加本地團，有團友傾計比較大聲，導遊又會喝停佢地，話佢地阻住佢講野。

不過有一點我感覺唔係幾好，就係保加利亞人好容易會覺得人地唔啱。

我民宿個熱水器壞咗，房東雖然即時上門整，但言談間又會覺得之前都無事，所以今次係你 “bad luck”。

我今朝去餐廳問有無早餐食，個店主又係即刻入咗去整，之後我想點餐時先眉頭一皺，話我做咩唔講清楚。

雖然唔想造成刻板印象，不過呢啲經歷會令我覺得，保加利亞人好易比人誤會。

然後又會諗起喺近代咁多場戰爭，保加利亞幾乎次次都企錯邊，結果比人圍剿，唔知有無關係呢？


因為誤會而出現既保加利亞英式早餐


行到差不多，去番我最中意既民俗博物館外面坐下


臨行前食多個沙律。Plovdiv 有啲地方都幾 touristy，眼前既沙律擺盤咁靚，價錢自然都唔平


去巴士站途中經過公園，感覺幾舒服

下晝四點坐巴士去羅馬尼亞，然後發現原來巴士既終點係基輔，難怪會凌晨一點先去到首都布加勒斯特。

我由 Plovdiv 去番 Sofia，當時座位都鬆動，有空間可以伸下腳；點知喺 Sofia 出發既時候竟然全車滿座。

然後我地就一路向北，跨越巴爾幹山脈，越過多瑙河，終於凌晨兩點嚟到布加勒斯特。


Plovdiv 去 Sofia 途中景色



穿過巴爾幹山脈

Day 15 布加勒斯特

今次行程唔算 plan 得好好，喺羅馬尼亞只有兩日半，今日就把握時間遊覽首都布加勒斯特 Bucharest。

相比之前去既地方個個都幾千年歷史，布加勒斯特既歷史相對短啲，“只有”五百年。

不過喺近代布加勒斯特都發生咗好多事。

首先喺一百年前，當時羅馬尼亞國王酷愛法國文化，所以喺布加勒斯特起咗好多法式建築，甚至令呢度有“東方小巴黎”既美譽。


大街上面既法式建築


大學圖書館；前面既雕像係羅馬尼亞國王卡羅爾一世



雅典娜劇院，有好多人喺度影婚紗照



星期日有彌撒，好多民眾喺教堂前面排隊等候；而直播緊既，係大主教喺度…整餅？


當地好靚既書店

二戰後共產黨上台，羅馬尼亞亦成為東歐陣營既一部分。

相比其他蘇聯衛星國，羅馬尼亞既獨立性比較強，喺布拉格之春發生時當時既統治者壽西斯古甚至公然違背老大哥蘇聯，向民眾發話，認為人民有選擇既自由，唔肯向捷克出兵。

當時壽西斯古得到群眾擁戴，西方欣賞，借到大筆外債，壽西斯古因而大起建設，羅馬尼亞一時欣欣向榮。



今日參觀既共產博物館好得意，所有展品都可以攞起嚟睇/試

不過好景不常，十年後壽西斯古希望擺脫外債，全力出口國內產品，反而令到國內用品供應不足，連基本既油鹽糧食都要配給，搞到民不聊生。加上壽西斯古又學北韓大搞個人崇拜，民眾對佢越來越不滿。

終於喺柏林圍墻倒塌無耐，壽西斯古又係企喺當年宣佈拒絕出兵布拉格既同一個露台演說；不過今次民怨沸騰，壽西斯古既演說竟然多次被打斷，最後軍隊倒戈，壽西斯古竟然要轉身搭直升機逃走，直至幾日後被人捉到槍斃。

今日係星期日，當年壽西斯古演說對住既廣場係行人專用區，有人擺檔，有人賣藝，亦有小朋友喺度跑嚟跑去。

我望住眼前安和樂利既景象，諗起三十年前腥風血雨，不禁有啲戚戚然。


當年壽西斯古就係喺呢個露台演說，被人愛戴，被人唾罵



壽西斯古另一個傑作人民宮，係世界第二大政府建築，裡面有千幾間房，大部分都係空置

布加勒斯特其實比想像中多野睇
人民宮係可以入去參觀，巴打可以walk in 碰下運氣，另外佢有個官邸，而家都變埋博物館
定係巴打下一日已經去其他城市？Brasov定其他地方？

巴士終點係基輔 原來陸路交通仍有巴士去到

呢座嘢係超級大白象睇過記錄片 入面大到癡線 記得仲借過嚟拍戲
啲獨裁者最鍾意起埋啲咁嘅嘢

人民宮可以 walk in 嗎？我聽講話一定要打電話預約

係呀今日 join day tour 去 brasov

見到有啲心動去睇下 haha