[live 遊記] 巴爾幹半島點解係歐洲火藥庫？

Day 29 離開阿爾巴尼亞

今日離開阿爾巴尼亞，經原路番黑山，再嚟到海邊既杜布羅夫尼克 Dubrovnik。

本來巴士車飛寫要夜晚十一點先到達，不過唔知係咪司機趕時間，最後竟然天都未黑就嚟到 Dubrovnik，正好比我食完飯有時間喺舊城區周圍行下。

呢幾日喺阿爾巴尼亞來去匆匆，唔算睇咗好多地方。

可能因為大部分時間都喺首都 Tirana 出沒，呢度旅遊業比較發達，我又唔覺物價特別平，或者人民特別淳樸。

而且嚟到阿爾巴尼亞後，我發現原來旅遊業係呢度經濟既重要部分。

咁就解釋到點解呢幾年好似有意無意，會收到唔少有關去阿爾巴尼亞旅遊既資訊。

而且因為係主要收入來源，所以由首都去各大景點既幹道/配套都建設得幾完善，不過就無咗樓上巴打所形容尋幽探秘既感覺。

今次特登兜路入嚟阿爾巴尼亞，唔單止令行程更加緊湊，而且都增加咗交通時間；不過我又唔會覺得唔值得，只係唔算好有驚喜。

不過見到周圍都係遊客，都會戥阿爾巴尼亞人開心，畢竟之前封閉受苦咗咁多年，脫離共產統治後又試過因為市場化過急而令好多市民輸身家，甚至因而頻臨內戰，而家都算係守得雲開見月明呢。


阿爾巴尼亞人好中意揸 Benz，連公共巴士都係 Benz，導遊話可以“保值”


同霍查既 Bunker 講拜拜


又番到嚟黑山首都 Podgorica

行行下山路入咗隧道，一出嚟就係亞得里亞海，嗰下都幾震撼


巴士途中經過 Kotor，可以見到山上面既城堡




Kotor 附近既峽灣；山下既小鎮感覺好渺小


嚟到克羅地亞見到日落


夕陽裡面既 Dubrovnik

Dubrovnik 老城區好熱鬧



老城區基本上係一個大城堡，裡面既窄廊好似迷宮，幾有感覺


終於見識到傳說中 Dubrovnik 既高物價，一枝水都要五歐


最後唔使三十歐落樓，算係超額完成



老城區建築光潔亮麗，修葺如新，感覺有啲似去咗…威尼斯人


周圍有好多貓


碼頭夜景

我睇返我10年前去, 住嘅hostel價位係10歐連稅一晚
成個地方重要冇乜遊客, 少人到連hostel shared dorm都可以一個人霸一間房

係呀
巴爾幹地區交通較差 主要係鐵路網缺乏 有啲地方除咗包車 否則都唔知點去
例如Sarajevo有Day tour去Srebrenica (係塞族共和國嗰邊 當時大屠殺之地) 查過根本冇大巴自己去到

不過最後都冇參加呢個團

天都未黑就到 咪快成個幾鐘?
而家應該9點幾先天黑

講起啲大巴 嗰邊有啲司機駕駛態度一般
試過係克羅地亞搭大巴 個司機又係趕時間咁款 開到鬼咁快 但路況係上落斜兼窄多彎
當時係坐司機位後面嘅位置 見到司機不時雙手離開呔盤

自此之後搭大巴唔敢瞓覺

㩒錯咗負評

而家變成咁整過晒啲嘢 最明顯係啲燈光效果
Split其實都差唔多情況

而家住 airbnb 都唔算貴，都係兩三百蚊一晚（市中心）
不過就多咗好多遊客

發現 daytour 主要都係解決交通問題
想有 guided tour 就唔使太大期望

你講完之後今日留意下司機，果然好中意雙手離開呔盤
真係 ignorance is bliss

打燈打到片場咁
日頭發現仲好啲

上城牆行一圈，重有郊外座山丘 睇到Kotor

Day 30 達爾馬提亞

之前講過今次旅程報得太多 day tour，今日繼續還債，仲要番返黑山，參觀 Perast、Kotor、Budva 三個港口城市。

雖然位處唔同國家，不過呢三個地方同 Dubrovnik 一樣，傳統上都屬於 Dalmatia 達爾馬提亞地區，亦即係克羅地亞向南延伸既一角。

以前睇地圖，會覺得克羅地亞好霸道，封住嗮啲出海口。

而家嚟到先知咁係因為達爾馬提亞地區同內陸既波士尼亞歷史文化都好唔同。



一大朝早出門口，難得舊城無咩人



海邊堡壘


晨曦之中既 Dubrovnik

達爾馬提亞同巴爾幹內陸地區最大既分別，係達爾馬提亞從來無比鄂圖曼帝國佔領過，反而受到意大利/威尼斯影響更深。

之前去過既內陸城市，歷史上無論係屬於鄂圖曼、保加利亞定係塞爾維亞，佢地都係陸權國家，注重搶人搶地，建立中央政權。

不過今日去既港口城市就同希臘城邦比較似，唔需要好多土地，但注重外交關係，確保貿易路線暢通。

佢地既政權亦相對分散，由一班貴族/大商家統治。


嚟到 Kotor 附近既峽灣


小鎮 Perast


最著名係小鎮出面既小島修道院


峽灣既水流平靜，亦適合玩獨木舟

Kotor 其中一道城門


Kotor 歷史比較長，裡面仲有拜占庭時代起既教堂


橫街窄巷


從山腰俯瞰 Kotor



Budva 都係古城，而家變咗度假勝地


海水好藍


告別黑山

可能因為目標相近，所以今日去既城市建構上大同小異，都係位於港口，城市由城牆包圍，裡面有政府、教堂、同埋通常都係橙紅色屋頂既民居。

眾多港口之中， 以Dubrovnik 最為宏偉壯觀，咁係因為歷史上 Dubrovnik 長期處於半獨立狀態，當時叫做拉古薩共和國 Republic of Ragusa。

拉古薩係個好興旺既商業城邦國家，透過兩邊落注，而且作為鄂圖曼帝國既藩屬，佢地掌握由亞得里亞海到巴爾幹內陸既貿易，全盛時期甚至同威尼斯有得揮，係去到大航海時代先慢慢衰落。

今日完咗 day tour 後喺 Dubrovnik 周圍行，舊城區裡面雖然遊客多過本地人，好多建築又係喺城邦衰落加地震後重建，但係仍然想象到當年拉古薩既繁華盛世，係幾咁吸引人嚟經商定居。



Dubrovnik 既教堂，望落去同羅馬既教堂有啲似，不過又有自己風格


老城區散步


唔知點解見到呢個獅子噴泉特別感動，因為幾百年前免費、不枯竭既泉水好代表到一個地方既文明程度


夜晚既舊城區，仍然熱鬧

兩三百蚊唔貴啦 「加幅」亦唔算多
係巴打post頭提過 廿年前住兩百

不過其他嘢變唔少

講起Dubrovnik同Venice
有本書介紹下 表面上唔係好關事
入面有幾多篇幅講兩地如果預防黑死病傳入 (而作者亦去親身視察遺跡)
用「傳染病角度」去睇返兩地嘅歷史 都幾得意

今日去博物館都有講，Dubrovnik 係首先採用隔離措施既地方

Day 31 無聲消逝

今朝一早雷聲隆隆，無幾耐窗邊開始撇雨。

我本來迷迷糊糊，仲諗住今日無咩行程，可以乘機瞓耐啲。

點知突然醒起尋晚晾咗衫！我急急腳衝落樓收衫，但係已經太遲。

下晝停雨後出番舊城，行下博物館，補充尋日未了解既細節。

尋日講到 Dubrovnik 以前係一個共和國，同威尼斯齊名。

當時 Dubrovnik 峙住有鄂圖曼帝國撐腰，壟斷地中海通往巴爾幹內陸既貿易，用一個城市既力量同威尼斯抗衡。

當年 Dubrovnik 更出名行為先進，首先採用隔離手段對抗疫症，而且城市對自由非常重視，喺六百年前已經廢除奴隸制度，當時連美洲都未發現。


一朝早橫風橫雨



入到博物館，當年 Dubrovnik 既裝置設計都幾特別，上邊係鐘樓敲鐘既銅人


總督既書檯


Dubrovnik 既文獻保存得幾好，可以睇到中世紀歐洲既書信


匈牙利國王承認 Dubrovnik 獨立地位既詔書


Dubrovnik 向鄂圖曼蘇丹獻金既收據


Dubrovnik 政府宣佈既隔離令

雖然同威尼斯人係死敵，但係 Dubrovnik 既政治體系同威尼斯好似，都係由貴族/商人組成既議會統治。

總督只係名義上既元首，任期更只有一個月。

兩國爭鬥咗幾百年，但最後都係因為一啲不可抗而因素而衰落。

當時歐洲進入大航海時代，葡萄牙同西班牙人先後發現非洲同美洲航路，透過壟斷地中海貿易既兩國亦因此大受打擊，被迫退出歷史舞台，咁啱而家又成為旅遊勝地。

今日嚟到博物館，裡面展覽咗好多 Dubrovnik 既名人，但係我一個都唔識。

諗諗下，如果唔係因為 Dubrovnik 呢個地方咁靚，又會有幾多人記得當年既共和國？

喺人類歷史之中，又有幾多曾經有頭有面既地方被時間湮沒，留低只有塵土同傳說……


1800 年代各國船隻旗幟圖


竟然有中國，不過就唔係清朝旗。我強烈懷疑右邊係華南海盜“五色幫”既旗


去旁邊堡壘，俯瞰 Dubrovnik 全貌


又見到彩虹


舊城區一角，左邊既係總督府


教堂裡面玻璃窗投射彩色倒影，好夢幻


Dubrovnik 既城牆保存得幾好，可以走上去睇下城市景色


中央大街


懸崖峭壁


喺城牆落嚟，買咗個外賣去碼頭睇日落。我一路聽住“似水流年”，一路睇住啲船喺夕陽裡面蕩下蕩下，此情此景，只差一枝煙……

嗰本書都有講到 搞到幾想去呢兩城遊覽
不過唔知幾時了

天氣好 啲相更靚

物價仲貴過奧地利

我會鐘意威尼斯多啲，文化更豐富

今日天色晴朗，早知遲一日晾衫