【無定向甜甜地】一百個斷尾故(2)

[Story 36－削髮斷愛]

一早喺Salon裡面，執執自己啲搵食工具。

而且都有幾個客嚟咗，其他師傅都開緊工。

然後...

“叮～叮～”大門一打開，阿芝就慌慌失失咁走入嚟。

我就喺老闆娘未走去鬧阿芝之前，一手就箍住阿芝條頸！捉佢入休息室！

『喂你又遲到喎...』我翹埋對手，『呢個月第幾次吖？』

「呃...我呢幾日多功課做...又要溫書...尋晚夜咗瞓...」阿芝尷尷尬尬咁...

『扮咩吖？明顯係你尋晚掛住砌模型啦！』唔好話我睇死你...

「嘻...」阿芝伸伸脷，「俾你發現咗添...」

『唉都估到你...即係雖然話你返Part Time姐...加上難請人...老闆娘就一定唔會炒你...但俾佢鬧都唔係咁好受啦～』老闆娘鬧起人上嚟，好難聽...

對住我哋呢啲師傅又好～對住好似阿芝呢啲Jun又好～老闆娘都一視同仁～

「知道...」阿芝唔好意思咁點點頭...

『唉...食早餐先啦～啱啱買㗎～』

「唔該晒～」

『唉男仔玩模型就話姐...你女仔都咁迷模型嘅？』

「模型冇分男女㗎嘛！唔係因為買模型同工具，我都唔會咁努力返Part Time啦！」

『咁你就唔好遲到啦...扣錢㗎...』

「係係...知道...喂你有冇興趣玩模型姐？」

『冇吖...』

「喂一齊研究啦～」

『冇吖...食早餐啦你...』

「邊食邊傾都得㗎姐～」

其實好似我哋呢啲大型Salon仲有冇得做？

呃...我哋呢算OK囉...

大家都知㗎啦...呢十年八年都係啲三十蚊單剪當道...

再唔係就係Barber喇～

不過好彩，我哋都有唔少熟客～

「喂阿Roy～」老闆娘嗌一嗌我，「有客搵你。」

『係～喂好耐冇見～長咗好多喎～』

而且大部分都係啲女顧客～

『唔係氹你㗎～真㗎～你同當年第一次嚟嗰陣都冇變～都係學生妹咁～』

有唔少都已經幫襯咗七八年～

「我今年廿八喇...第一次嚟嗰陣我都廿一啦...都唔學生妹啦...」

由我中學畢業一出嚟...

『我就係第一次見你嗰陣以為你係學生妹囉～』

由做Jun開始...

「嗱...你把口吖...」

然後做到師父...

『你唔信問吓佢喇～』我指一指阿芝～

「係吖係吖～」阿芝點晒頭，「我仲諗會唔會係同校～」

「你哋吹水啦～」

吹水...或者做我哋呢行，把剪唔係最重要...把口先係最重要...

『喂你老公係唔係好鍾意Asuka㗎？』

幫啲客剪，起碼都會剪成個鐘...

「唔係囉～」

把口唔吹得，啲客又點會再返嚟？

『我見你咁似Asuka，以為你老公係Asuka啲Fans～不過就算唔係，你老公都實愛死你啦～咁靚女～』

除咗吹得，仲要有啲口花～

不過口花還口花，我又從來都唔會對啲客有咩非分之想！

客始終都係客！我只係想留住佢哋姐...

除咗話留住啲舊客，當然最好就有返啲新客啦。

『有冇約開邊位師傳？』一講就咁啱有個少女入咗嚟。

以我嘅經驗，呢個少女都係十六七左右...

「冇...」少女擰擰頭...

再睇佢好似苦口苦面咁...好似好唔開心咁喎...

『咁等我介紹返，我阿係阿Roy～洗剪？仲有冇其他想做？』

「冇...」

『OK～阿芝～幫我洗個頭先～』

「係！」阿芝走過嚟，「請呢邊～」

阿芝幫個新客洗完頭之後，坐好吹吹佢把長長秀髮：『想點剪呢？』

「剪短晒佢...」少女完全唔留戀咁...

我就一路幫佢剪...剪...慢慢咁剪...

望住鏡中嘅少女...依依不捨咁...又依依不捨咁...

最後我都冇幫佢剪到好短...

『你把秀髮咁靚...』我喺阿芝手中接過塊鏡，幫少女照照後面，『要剪短晒就好嘥嘅～而家咁樣啦～好好睇㗎～』

少女點點頭...又點點頭～好似好滿意之餘...又好彩冇一時衝動剪晒把秀髮～

『呢張係我卡片...』我遞張卡片俾少女，『鍾意嘅話...下次搵返我吖～有咩唔開心都可以Message我傾嘅～』

少女接過我手上張卡片諗一諗，點點頭。

望住少女嘅背影離開Salon...

究竟佢會唔會再嚟呢？又因咩事想剪短晒把秀髮呢？我估...

“Elle：Roy？我啲同學都話我個髮型剪得好好睇 多謝你”

原來少女係叫Elle～

“係吖呢 唔使多謝啦 最緊要幫到你”

又估唔到佢真係會Message我。

“Elle：我啲同學都想搵你剪喎 OK嘛？”

又估唔到仲多咗啲新客添～

“當然OK啦”

而且除咗公事，我哋都仲有傾其他嘢...

“Elle：都忙㗎 多功課㗎 仲要溫書呢”

會傾吓佢啲學業...

“Elle：嗰陣係因為...啱啱同男朋友分手”

仲會傾感情事...

然後Elle又會搵我幫佢修修把秀髮～

『喂你上次都未講因咩事同男朋友分手喎～』

仲可以好自然咁傾～

「因為吖...佢...偷食...」

『吓？你咁靚女佢都偷食？！』

「係吖...仲要係俾我撞破...」

『撞破咁激？』

「係吖...有日諗住上佢Studio俾驚喜佢...點知就見到佢同個Model搞緊...」

『Studio？』

再傾落去先知，原來Elle個Ex係個攝影師...仲要大過佢差唔多十年！

我仲以為啲學生妹唔會鍾意啲咁大個...

同阿芝喺休息室裡面食早餐...

「嗯？」阿芝啜住個麵，「差唔多大十年吖？我又冇諗過喎...」

『係咯係咯...大成十年...而家啲學生妹應該唔會鍾意啦...咁老...』又點解Elle之前會同個咁大個嘅男人一齊？

「咁又唔一定嘅...」阿芝諗一諗，「我個好姊妹都鍾意咗個大哥哥...」

『真㗎？』阿芝個好姊妹...應該仲細過Elle喎！

「真㗎～雖然都唔知大幾多...」阿芝又諗一諗，「但起碼都十年八年...」

『竟然...』咁講法...學生妹鍾意大哥哥都好正常姐？

「喂做咩吖？」阿芝冷眼打量住我，「你唔好對我有意思吖...」

『痴線邊個話對你有意思姐？』我係對Elle有意思咋嘛！

「係就最好啦～」阿芝放下心頭大石，「我就唔會鍾意大哥哥喇...」

咁講法...我係唔係都有機會...

『有冇約開邊位師傳？』

傅呀

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Story 37－嘗試轉變]

悶悶不樂咁做嘢...悶悶不樂咁做嘢...

本來要交設計圖...但完全冇心機做...[/size=4]

已經將[Story 36－削髮斷愛] Upload上Penana

謝校對

原來有新icon

條仔咁快俾人撞破