【無定向甜甜地】一百個斷尾故(2)

上回講到澤暖初出茅廬就去到間大公司跟住個女上司做嘢～
女上司穎璇又好好人㗎喎！會帶住班細做嘢～
不過穎璇姐幾歲呢？睇佢都係大澤暖幾年姐～
不過澤暖就唔問咁多喇～女人係年齡嘅秘密～
澤暖從來都冇話咩姐唔姐控，不過而家見到穎璇就知自己係喇～
澤暖諗住問問好友阿恆意見～
阿恆又唔係有好多經驗？點解咁多人問佢意見㗎啦？
阿恆就話做返自己啦～
澤暖果然係問錯人～不過阿恆又講得幾啱喎～
澤暖做返自己～又同穎璇OT咗好幾晚～直到有一晚～又同穎璇OT～
澤暖見穎璇都有啲攰，就叫佢瞌瞌先～
澤暖努力咁做～一做就做咗成個鐘～
穎璇瞓醒之後...
『啲嘢搞掂晒喇～』澤暖俾穎璇睇睇部電腦。
「嗯...嗯嗯...真係搞掂晒！好彩有你咋！」穎璇拍拍澤暖膊頭！
『係我叫你瞌吓㗎嘛～你就放心交俾我啦～』
「嗯～你真係令我好放心呢～」
『咁...走得？一齊？』
「呃...你走先啦～我仲有嘢要整整...」
『仲有嘢要整？唔係整晒喇咩？』
「仲有少少手尾啦～準備聽日要做嘅嘢㗎嘛～」
『咁我幫埋你先？』
「嗰啲你幫我唔到㗎喇～返去先啦～」
『咁...好啦～你都唔好咁夜喇～』
「嗯～聽日見～」
『聽日見～』
著返件有穎璇香味嘅外套，拎埋個袋就離開公司。
企喺巴士站等巴士...
『仲諗住今晚可以送穎璇返屋企添...咦我部電話...哎吖叉電唔記得拎返！』
澤暖就行返去公司...喺大堂咁啱就見到穎璇...翹住Calvin行出𨋢？
澤暖立即閃埋一邊！偷偷望！
點會...係隔籬Team嘅Calvin...又話唔識隔籬Team嘅人？
澤暖就偷偷跟喺佢哋身後...見佢哋好似好親密咁...穎璇對Calvin好親熱咁...
然後就跟到佢哋去...停車場...望住穎璇上咗Calvin架...寶鹿？！
下個故事又會係點呢？



準備出文