【無定向甜甜地】一百個斷尾故(2)

[Story 30－機動戰士]

放咗工拎住個公事包，一個人食餐便飯...

“遠く離れてるほどに 近くに感じてる”電話就響起Reason鈴聲...

『喂？係...聽朝一定交到俾你...係係...好Bye...』又係大佬打嚟催...

食完飯又一個人喺街行...聽到有遊戲機聲...

好不自覺咁跟住啲聲音行...越行越近...越行越近...就行到嚟一間機舖門前。

其實平時放工都會經過，都唔多為意...但今晚有啲心血來朝，想入去睇睇...

推門入去，行幾步...

有唔少遊戲都未見過...

呢隻係...街霸？第幾代喇？

嗰隻係...拳王？又出到第幾代喇？

有鼓機同結他機喎...仲有冇熟悉嘅歌呢？

我淨係記得“彈爆你粒Lin～我嘅～”...

頭D同灣岸啲畫面都好似靚咗好多...

不過咁新又咁靚，都唔係好多人玩...

而家仲使唔使擺低一蚊跟機？

再行多兩步，就見到有...

『高達？』

四部四部咁對住放...都有八部...

新嘅？呢度係咁寫。

都唔知出到第幾代喇～啲名改嚟改去都差唔多～鬼認得咩～

不過既然都入到嚟...又冇乜人打...

我就走去唱錢，然後坐低入錢...

唔知有啲咩機呢？

新嗰啲我都唔識㗎啦～最新就更加唔好講啦～

然後都係...揀返我最鍾意用嘅...紅渣！

從未接觸過新高達Game嘅我，用紅渣可以打到幾多關？

我諗呢層都唔使擔心咁多～因為好快...就有兩個𡃁仔望咗我一眼...然後就坐喺對面...

我部紅渣先啱啱落地...個畫面就閃住紅光...不明機體接近...

呢種情況...令我諗返起細個嘅時候...

「阿渣阿渣～」波蕾拉拉我件衫，望入去機舖裡面，「晏晝真係多魚啲㗎喎！」

『都話咗㗎啦～』望住成班人圍住四部高達，『唔好咁大聲～入去唱錢先～入去唱錢先～』

我同波蕾入去唱咗十蚊姐，就走去放低一蚊跟機。

幾個望一望我哋，好似唔多順超～

我同波蕾就唔理咁多啦～只要佢哋唔識我哋就得喇～

我哋嘅眼光都好準，俾我哋跟嘅嗰兩個好快就輸咗要起身。

然後我同波蕾一坐低，本來我諗住打返自己用開嘅名“@.@”...但怕俾人認到都係隨便改咗“二等兵”算～

當然波蕾就唔用返自己“波蕾”個名啦～直接隨機算～

然後我又好順手咁揀返我嘅專用機...紅渣！

波蕾帶住微笑細細聲講：「想打死人咩...」

『一時手快...咁你揸咩機吖？』我望住波蕾揀...

「龜霸？」後面有個𡃁仔半帶恥笑，「呢部唔係運兵機嚟咋咩？」

「係唔係運兵機...」波蕾帶住微笑擰轉頭，「打過咪知囉～」

「女機師仲要揸垃圾機...」

後面成班𡃁仔都唔睇好我哋，紛紛喺我哋機面放低一蚊！

戰鬥一開始...波蕾就大嗌：「大機我嘅！」

OK～你打大機，我就打細機～

以我同波蕾嘅實力...

「嘩！痴線㗎！死喇我！」

根本就唔使好認真～

「喂你大機都搞唔掂隻龜霸？咩料吖？」

輕輕鬆鬆咁玩～

「你嚟試吓吖！痴線㗎！」

隨隨便便都連贏十幾廿鋪～

「痴線真係三倍速！甩晒Lock捉唔到落地㗎喎！」

本來跟我哋機嘅，都去晒對面同我哋對打～

「痴線係唔係人類嚟㗎？新人類呀！！！」

我哋兩個就每日兩蚊打成日～

打到啲人冇晒錢咁離開...

「冇喇？」波蕾望住個門口。

『打走晒啦～不過唔怕啦～聽日再嚟過～』

「好吖好吖～晏晝真係好多魚吖～」

第二日，我哋又嚟打魚～

但有啲人一見到我哋兩個，就拎起啲一蚊。

我同波蕾一坐低，就聽到後面有人講...

「喂喂...佢哋兩個好勁㗎！」

「有幾勁吖？揸埋啲垃圾機～等我一陣秒殺佢哋啦！」

「唔係吖！就係垃圾機都好勁吖！」

「喂唔係吖！我尋晚路過睇睇...原來佢哋兩個係夜晚駐場嗰班嚟㗎！！！」

「唔撚係吖化？」

「係吖係吖！個榜咪有班人好高分！長期霸住成個板嘅！佢哋兩個咪係第一名嘅@.@同波蕾囉！！！」

我同波蕾對望一眼...

仆街喇呢次...俾人認出添...

在場嘅人都知我哋嘅真正身份之後...打完一鋪就走...成班都走晒！

第二日我同波蕾都係晏晝落嚟...班人一見到我哋就連打緊嗰鋪都唔打埋佢！立即起身棄機逃走！

冇晒人...有人入嚟見到我同波蕾打緊，都立即轉身走人！

使唔使吖...好似見鬼咁...

咁我同波蕾就只好等到夜晚...班Friend出現...

Terry唱完錢行到埋嚟：「喂你兩個做咩冇嚟心機咁嘅？早兩日仲好爽皮咁㗎～」

「唉唔好提...」波蕾擰擰頭，「晏晝啲魚俾我哋嚇走晒...」

「哦～～～」三伍都唱完錢，坐低入錢，「原來呢兩日晏晝嚟打魚！你兩個都衰喇～」

『大佬...我哋自己人打嚟打去好燒錢㗎...咪諗住喺晏晝賺返啲囉...點知唔夠三日就俾人認出...』

「算罷啦你兩個～」Terry都入好錢，「入錢啦～」

波蕾有返幹勁：「輸唔切吖？」

『唉...入喇入喇...阿龍佢哋呢？』

「佢哋邊有咁早到吖？打住等啦～」

『係咯係咯～結他嗰邊啲人未嚟，阿龍都冇咁早出現啦～』

「正確嚟講係結他個𡃁妹仔未出現阿龍都唔會出現～大機我嘅！」

就係咁，我哋就又要繼續私片～

打到凌晨兩點，機舖閂門，我哋成班人又走去食宵夜～

差唔多晚晚都係咁～唔使做嘅日子每晚都會喺機舖集結～打機～𥄫女～互串對方～

直到有一晚...機舖最後一晚...

波蕾見結他嗰班人喺機舖門口影完相：「喂我哋都影返張相啦！」

『好吖好吖～阿龍～去叫𡃁妹仔幫我哋揸機啦～』

「我？」

「係吖！你吖！最後機會喇～」

我哋成班高達友就喺機舖門口影返張大合照～

望住我部紅渣被擊落...爆炸...

我起身...同時拎個銀包出嚟...

「哈...阿叔...一個人就唔好用埋啲垃圾機啦～」

「哈哈哈～」

望住銀包裡面張舊照片...

老喇...老喇...

如果有波蕾喺度嘅話...會唔會有得贏呢？

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Story 31－刺激快感]

「終於搞掂晒喇～」澤暖伸個懶腰～

『辛苦晒你喇～又要你同我一齊OT到咁夜～』我拍拍澤暖膊頭～

已經將[Story 30－機動戰士] Upload上Penana

宅暖

剛剛去完高達元宇宙

今篇好有回憶
好有畫面

又出場喇

正唔正先

我都係充滿住回憶咁打呢篇文

其實砸亂先係主角