「我本身唔係一個迷信嘅人,所以本來都唔係咁諗,但係自從老爺出咗事之後,有啲開始群佢嘅家庭成員漸漸畀佢搞到染上惡習,佢仲耐唔耐喺自己屋企搞一個 by invitation only 名為『Cooking Party』嘅聚會,我肯定呢個 Party 裡面一定有好多唔見得光嘅嘢發生,所以你話老爺佢搞成咁關唔關佢事?我覺得絕對關囉!」王禹伊越說越激動,胸口的一雙「E 奶」在急促的起伏著,看得我也要吞一吞口水,之後又聽見她道:「之前朱家各人就算唔係好親密,但係都叫做正正常常,生活循規蹈矩,係七姨太嚟咗就搞到『紫式苑』烏煙瘴氣,再任得佢亂嚟,朱家實畀佢搞到名譽掃地,三姨太為咗頂住成個『東皇朝』已經周身唔得閒仲點理得到屋企啲嘢咁多,如果喺咁嘅環境我都仲唔出手嘅話,我又點算得係朱家大少奶呢?」
「我當然同意『酒樽陣』背後一定係收埋咗一啲好重大嘅秘密,而我哋要破呢個『酒樽陣』亦都係事在必行嘅事,之不過喺未發現到其他突破性嘅資料之前,盲目地繼續執住呢一點除咗只係轉牛角尖,仲好可能會忽略咗成幅 Big Picture 添。」男男俯首思考了一會,再道:「就好似『盲人摸象』咁,就算我哋係盲嘅都好,我哋都唔可以淨係摸死隻象嘅某一個位,明唔明白呀?」