【卡西進軍豪門！？】《誤上了黑幫老大的情婦，我只好躲在中環的職場胡混》- 第七季：紫式篇

聽過這番感覺猶如連續坐了數遍過山車的對話之後，我的思緒陷入一片繚亂之中，我苦苦想了一會後，才勉強歸納出以下幾個問題的核心：

一，「玫瑰會」從「拔道」地底掘出來的黃金，我一向以為是給三姨太收藏在「承香」的地庫之中，原來這完全是一場誤會，那為甚麼我們會在地下酒窖的暗格門前，拾得印著「聖庫」的半條金磚呢？

二，那神秘人說過對我的一舉一動都瞭如指掌，直到最近才沒有了我的消息，想必是因為我已化身成為朱建東，而促使我搬進「紫式苑」亦似乎是他的意思，那麼，我彷彿從來都在他的布局下走著，這是否代表我身邊一直都有他的線眼？

三，如果真的是這樣，我還有甚麼人可以相信？

四，如今，所有的黃金都已經被三姨太做了手腳，那是否仍按「黑衣女皇」所說的計劃，送到「希菲托斯」的手上呢？而「希菲托斯」究竟是何方神聖？加上「希菲托斯」肯定只是「網名」而已，要在哪裡才可以把這個「希菲托斯」找出來完全是沒有頭緒，看來我要再找回那批金現在已經是不可能了，而究竟那神秘人吩咐三姨太做了甚麼手腳，可足以在「騎士圓桌會議」之時便將「黑衣女皇」的整個大計都騎劫過來呢？

五，亦是我最擔心的，就是哈爾仔的處境非常危險，因為如果他真的乖乖按照「黑衣女皇」的劇本出席那個「騎士圓桌會議」，他很可能會為此掉了性命！

最擔心哈爾仔

雖然哈爾仔或許已不把我當作朋友，但既然我已知道有如此凶險的陷阱等待著他，我怎也不能夠就手旁觀了！

所以，就算這刻的我像是在迷霧當中，我已可以肯定一件事，就是這個「騎士圓桌會議」，我是非去不可的。

因為，我要把哈爾仔營救出來！

（待續）

卡西連師傅都唔記得，剩係記得食女。

信我，我開頭都真係想寫下甜故自high下架咋

點知變左搞基故...

第二百六十八話　茫茫酒海裡的三枝酒

雖然從那神秘人的口中得悉我身邊很可能有他布下的線眼，但亦無阻我把這項驚人消息帶返「梅屋」跟我戰友們商討的決心，因為，既然神秘人不知道這刻的我正在扮演著朱建東，所以，我就可以假定，所有知道這個偷天計劃的人都會是安全。

況且，如要逼我選擇不相信男男和 Siri，我甘願給她們出賣好了。

朱建東的生日派對過後，我找了個機會「微服」回到「梅屋」，召集屋內的人圍在客廳，便一口氣將我在「貞觀」所偷聽得到的都說了出來，之後，男男、Siri 和 Rionna 都陷入一片沉寂，過了好一會，首先開腔的是 Siri，她長長呼了一口氣，道：「以為『君子黨』同『玫瑰會』已經夠晒秘密架啦，點知而家仲整多個好似咁神通廣大嘅神秘人出嚟，仲話連『白衣皇后』都係幫緊佢賣命，件事真係比起想像之中更要複雜得多呀！」

Rionna 好奇地問：「卡西，咁你諗住點呀？」

我苦笑道：「嗰個『騎士圓桌會議』，我去就去硬架啦，總之就以朱建東個『騎士』身分埋枱開會，有嘢就講有屁就放，萬一真係發生起啲咩事上嚟嘅話，咪攬住哈爾仔走囉，到時都係執生架咋！」

「哈爾仔佢咁對你，你都仲咁幫佢？」Siri 又問。

「其．．．．其實佢都無乜對我點啫．．．．之．．．．之前喺『薔薇莊』嗰陣佢都有不顧一切咁保護我離開啦。」我莞爾一笑，再反問：「家下到我知佢會有危險，唔通唔幫返佢拖咩？」

Siri 點點頭，想了半晌，又道：「另一點估唔到嘅係，原來啲黃金根本就唔係收埋喺『承香』度，咁即係話我哋嘅調查方向一開始就已經係錯咗。」

就算沒有人說要怪罪於我，但我自知我是第一個一口咬定黃金在「承香」的人，到此地步証實了原來與事實不符，我不禁感到一陣無地自容，便握緊拳頭「啪」一聲打在自己的掌心洩氣，道：「唉，衰咗要認，呢鋪的確係我 fake 晒大家，sorry．．．．」

「Sor 咩 ry 啫。」男男拍一拍我的肩膊，道：「我咪講過查案好比『盲人摸象』咁，成件事嘅真相就由好多好多睇起嚟唔拉更嘅嘢一環扣一環咁組成，所以我哋至要學識『大膽假設』嘛，就好似你今次如果唔係咁大膽做咗呢個假設，我哋又點會咁快就膽粗粗咁闖入『承香』．．．．」

一臉百思不得其解的 Siri 忽然插嘴，道：「咪係囉，我哋就係入到去『承香』，搵到個地下酒窖，仲喺一道暗格門前兜口兜面咁執到印住『聖庫』標誌嘅金磚，竟然咁都會有錯嘅？」

男男聳一聳肩，續道：「我其實想講，話兩者完全無關係而家仲言之尚早，我諗我哋點都要入一入嗰個暗格度𥄫下先好做結論，咁至符合『大膽假設』嘅下一句『小心求証』架嘛！」

我歎了一口氣，道：「最衰可以破解到『承香』個『酒樽陣』嘅沐綾畀朱家班牛鬼蛇神趕走咗啦，我叫孫管家發散晒啲人去搵又未搵到！」

這時，男男「吱」的俏皮地笑了一聲，道：「承沐綾離開咗『紫式苑』之後就同咗佢隨從彌姨姨去環遊世界，佢哋兩個馬不停蹄又居無定所，孫管家派嘅人當然無咁易搵得到啦。」男男臉上露出神氣之色，再道：「不過我叫得做田偵探，就梗係可以將一般搵唔到嘅人好快咁搵出嚟，如果唔係『田力偵探社』一早就執咗啦！」

男男的說話簡直是令我喜出望外，連忙追問：「你咁講法，即係已經搵到沐綾喇？」

男男一邊望錶，一邊道：「呢個時候，承沐綾應該已經搬咗返嚟添啦，我仲叫咗佢務必要嚟『梅屋』一聚．．．．」話未說完，外面就傳來幾下「叮噹」的門鈴響聲，反應敏捷的 Siri 便一個箭步撲出去應門，來者果然是沐綾和彌姨姨，接著當她們踏進客廳一看見我這個朱建東，臉蛋即時變色。

男男看見她們當了機的模樣，便發出幾下清脆的笑聲，再道：「唔駛咁驚，喺你哋面前嘅根本就唔係朱建東，不過都係全靠佢，你哋至返得入嚟『紫式苑』咋！」

彌姨姨遞起抖震的指尖，指著我道：「唔．．．．唔係吓嘛？呢．．．．呢個明明係姑爺嚟喎！」

我咳了兩下，笑道：「我都因為救過你哋個小小姐而入過『弘徽』，同你又講過咁多嘢，你應該都認得我把聲啩？」

我不知道她們實際上有多久沒跟朱建東說話，但沐綾一聽已認出這把聲線肯定不是屬於自己的丈夫，便睜大雙眼瞪著我，叫道：「你係卡西！？」

我「嗯」的一聲點點頭。

「真．．．．真係難以置信呀！」彌姨姨驚道。

推。

然後，我便將我要扮成朱建東，才能推翻執行家法的裁決之計劃簡短地說了一遍。

「哈，我都覺得有古怪架啦，我呢頭被逐出家門，嗰頭就有位叫田偵探嘅人搵到嚟，話本來處於彌留嘅朱建東忽然醒返，仲點名邀請我返嚟添，原來係你哋喺度搞鬼！哈哈哈！」沐綾狂笑了好一陣子，隨後靜下來，又疑惑地問：「不過，你哋勞師動眾整咗場大龍鳯出嚟，要我可以返入『紫式苑』，唔會單單只係為咗滿足你哋對『承香』個寶藏傳說嘅好奇心之啩？」

聰敏的沐綾只聽到整件事情的一小部分，當然察覺得到有不合理的地方，我望一望男男，她亦點一點頭，表示相信沐綾和彌姨姨是可靠的，既然已得到男男的 Endorsement，我便放心地把我們混入來「紫式苑」的真正目的，和三姨太的秘密身分都說了出來。

當我將要說的都說完之後，沐綾和彌姨姨都不約而同俯首靜默了好一會，良久，沐綾才搖頭歎道：「由古至今都講紅顏係禍水，估唔到原來呢個世上竟然有一個強大得咁可怕叫『玫瑰會』嘅秘密組織，專透過婚姻關係嚟奪取男方嘅財富同埋權力，朱建東佢咁濕鹹，又娶咗咁鬼多老婆，佢中招惹咗朵『玫瑰』返嚟真係夠晒合情合理！」

福伯好耐都無出場

「嗰個三太太，平時就扮晒點樣忠貞正直、點樣為守住檔家族產業而勞心勞力，原來佢除咗係『玫瑰會』嘅『白衣皇后』嚟，喺外面仲收埋咗個男人添，佢自己已經咁其身不正，竟．．．．竟然為咗達到目的，不擇手段咁用《淫戒》嚟將我哋小姐踢出『紫式苑』，佢嘅所作所為，我．．．．我真係想作嘔呀！」彌姨姨越說越激動，胸脯急促起伏令頂著的兩包「大米」好像隨時都會破衣而出似的。

我真係想作嘔呀


個腦浮現咗阿sa出嚟

沐綾輕輕掃著彌姨姨的背部以緩和她的情緒，卻用帶有怨恨的語氣，道：「我雖然對佢無乜好感，但係佢入門以嚟，我都係隱居喺『弘徽』咩嘢都唔理，亦無過問佢呢個所謂嘅當家做啲乜，係因為我以為佢都對朱建東同埋頭家尚算真心，而家已經知道佢真正嘅來歴同來意，我作為『紫式苑』入面體內流住承誌源血脈嘅人，我就一定唔可以再䄂手旁觀架喇。」沐綾向著我們踏前一步，認真地道：「既然我哋擁有共同嘅敵人，以後有咩要我做，請隨便開聲啦！」

「好！」我大力地點了頭一下，再道：「咁就事不宜遲，我哋嗱嗱臨落去『承香』個酒窖度，到時就有勞你幫手打開道暗門啦。」

我說罷，眾人臉上均浮現出既緊張、又雀躍的神情，唯獨 Rionna 則一邊摸著肚皮，一邊皺起眉頭，歎道：「唉，件事好似變得越嚟越刺激咁，最衰我陀住個 B 啦，如果唔係我一定要跟埋你哋一齊去呀。」

我仲以為彌姨姨係掛眼鏡影卡西同沐綾做愛既黑手嚟

換過簡便的夜行裝束後，我、男男和 Siri 就跟沐綾和彌姨姨一同向著「承香」進發，因有過之前的經驗，加上隊伍中又多了屋主代表的陪同，大家的心情顯然比起上次實在是輕鬆得多，不費多少功夫，已重臨那個規模大得令人吃驚的地下酒窖，可是這次我不但一點也沒有給它嚇倒，嘴角還忍不住揚起胸有成竹的微笑，因為我知道，沐綾她很快就可以把眼前酒窖中埋藏的謎底解開。

但沐綾走了一圈後，竟露出一個猶如以前從沒有來過這裡的驚訝神情，還嘖嘖稱奇地吐了一句：「嘩，呢度都真係好大喎！」

沐綾此言一出，我心即時涼了一截，嘴角的笑容略帶僵硬，問：「你唔係想話畀我聽，你已經唔記得咗打開道暗門嘅方法吓話．．．．」

「哎吔，你唔好咁心急啦，始終都事隔咗咁耐，呢度大大話話都放咗成幾萬枝酒咁多，就算段記憶點樣深刻都無可能一落到嚟就即刻記得返啩？」男男打斷我的說話，再對著沐綾，循循善誘地道：「承二小姐，你不如慢慢諗真啲，睇下會唔會諗到啲咩？」

推。

沐綾托著腮兒苦苦思索了一會之後，突然「呀」的叫了一聲，再嚷道：「我好似記得啲嘢喇！」

「點呀點呀？係咩呀？」我急急追問。

「我記得當年我跟蹤爸爸落到嚟呢度，佢喺其中一行嘅其中一格度拎咗一枝酒出嚟，然後就走去第二度去拎第二枝，如是者總共就拎咗三枝，跟住嗰道暗格石門就『隆』一聲打開啦。」沐綾頓了一頓，又道：「我仲記得，每當爸爸拎出一枝行開咗之後，我就靜雞雞咁用髮夾攝入枝酒位於嗰行同埋位處嗰格嘅磚縫度，以作記認，我相信嗰啲髮夾應該仲留喺度架！」

我聽罷當堂大喜，脫口讚道：「沐綾，估唔到你細個嗰陣已經咁醒識得做記認添！」

接著，我們幾個便分頭作地毯式搜索，用了不算太多的時間，就將沐綾童年時所留低的髮夾全部都找了出來。

「哈，目前嚟講都好順利喎！」Siri 笑了一笑，再問：「嗱，放住嗰三枝酒嘅三格位置總算知道喺邊，咁而家我哋應該拎邊枝酒落嚟呀？」

沐綾卻搖一搖頭，反問我們：「唔知呀，你哋覺得呢？」

我大吃一驚，顫聲道：「乜．．．．乜你無喺嗰三枝酒度做埋手腳架咩？」，

「當時情況咁危急，又邊做得咁多嘢喎，我都有諗過之後會自己再落嚟睇下，再記低邊枝酒打邊枝酒，點知整下整下就無咗件事，時至今時今日至有機會落返嚟呢度。」沐綾攤一攤起手，語帶無奈地道：「所以我可以畀到你哋嘅線索，真係只得咁多咋。」

那個小時候不是「三分鐘熱度」？況且如果沒有沐綾，亦不能夠在這個藏有數萬枝酒的「酒海」裡，將目標範圍收窄到只有三格的位置，所以我們都沒有再說些甚麼了。

可是，當我向其中一格細心打量著，只見不同的酒一列一列分成十數層整齊地存放著，目測就已經密密麻麻擠了不下一百多枝，要把暗門打開，就要從類似的三格中選出正確的三枝出來，選錯了，亦有機會觸動這裡暗藏的防盜裝置，輕則暗門被永久封住真相從此石沉大海，重則我們甚至會有性命危險。

「咁而家都無計架，事到如今，唯有落足眼力調查下呢三格，尤其係放喺裡面嘅酒，睇下會唔會搵到啲咩線索啦。」男男苦笑了一下，再道：「不過酒呢家嘢真係唔係我嗰瓣，所以我諗都要靠大家啦！」

沐綾沒有回答，面卻露出難色，旁邊的彌姨姨見狀便代她的主子道：「唉，我同小姐都食咗長齋咁耐，一直過住啲滴酒不沾嘅生活，又點會對酒有研究喎？」

隨後，她們三人的眼神便落在我和 Siri 的身上，Siri 比我先開口，道：「我之前幫夫人打理『Club 52 Shade』時劈酒就多，啲酒斟到落嚟就乾咗佢，但係飲落肚嘅係咩就唔多點理喇。」Siri 用肘子撞一撞我，再笑道：「睇嚟今鋪都要靠喺啱啱嘅『酒』之考核中勝出，亦被『美酒之神』點名大力讚賞過嘅『黃先生』出馬至搞得掂啦？」

我吞一吞口水，緩緩地點了頭一下。

我知道，眼前的難題，非我去親自解決不可！

（待續）

第二百六十八話 茫茫酒海裡的三枝酒

第二百六十九話　極具歷史意義的酒藏

既然抽出酒樽的動作會觸動機關，在未將那可以把暗門打開的三枝酒確定之前，我們只能眼看手勿動的去尋找線索，所以，我便用手機在 Google Drive 開啓了一張新的 Spreadsheet，再 share 給男男、Siri、沐綾和彌姨姨，然後她們便分頭將放在酒格內的每一枝酒的酒標資料及拍下來的照片，逐一逐一按排列次序存到這表格上，花了數小時的功夫，終於都弄成一張完整的清單，讓大家可以在撥指之間，就能夠一覽放在三格內的所有酒。

從這份清單可見，三個酒格所存放都是三種不同種類的酒，第一格是白蘭地，第二格是紅酒，第三格是威士忌。

「我以為呢度全部都係紅酒嚟添，原來仲有白蘭地同威士忌架喎，又會將唔同種類嘅酒都放埋同一個酒窖度嘅？」Siri 好奇地問道。

「係紅酒比較驕生慣養啲啫。」我爽快地答了一句，再解釋道：「其實基本上適合放紅酒嘅酒窖，放埋白蘭地同威士忌都唔會有太大問題，只係基於酒精濃度唔同嘅關係，紅酒要放平擺等木塞保持濕潤，藉此延遲樽內酒質氧化，後者歸納為烈酒嘅就要竪直放，以避免高濃度嘅酒精侵蝕木塞，影響酒樽嘅密封性。」

「哦，原來係咁。」沐綾伸一伸舌頭，再啐道：「紅酒嗰格枝枝酒都訓低晒，真係搞到我同彌姨姨花多咗好多功夫，至影得晒全部嘅酒呀！」

「卡西，咁你 so far 有無啲咩諗法呀？」男男問。

「酒除咗用嚟飲之外，本身亦係一種可以封存歷史文化同象徵人類文明進化過程嘅載體，正如出自十九世紀法國微生物之父路易．巴士德（Louis Pasteur）嘅名言 －『A bottle of wine contains more philosophy than all the books in the world』，由佢發明嘅『巴士德消毒法』，時至今時今日都仲用緊架。」我隨手指一指就近威士忌格其中的一枝舊瓶裝 Johnnie Walker Black Label，道：「就以呢枝為例．．．．」

「呢枝！？」Siri 脫口怪叫一聲打斷了我，再嚷道：「個樽係就係舊咗啲，咪又係黑牌嚟啫，平時劈酒嗰陣我都隊唔少啦，仲會溝梳打飲添！」

我不慌不忙地笑了一笑，道：「喺英國歷史上公認為最偉大嘅英國人前首相邱吉爾，大家都知佢煙不離手又嗜酒如命，佢其中最鍾意飲嘅就係 Johnnie Walker 嘅 Black Label，而威士忌溝梳打呢種飲法亦都係因為佢想中和烈酒嘅灼喉感而發揚光大，相傳佢做首相嘅期間，要求食嘅早餐除咗有多士、雞蛋、煙肉、咖啡同牛奶等等呢啲普通嘢之外，仲有唔少得嘅就係黑牌溝梳打啦。」

「吓？早餐都要飲『威水』！？」Siri 失笑叫道。

「嘿，所以眼前呢枝上世紀五十年代樽裝嘅黑牌，正正就係邱吉爾飲開嘅，咁你話係咪好有歷史價值？」我再遞起手機，向眾人展示屏幕上的其他酒，逐一介紹道：「嗱，呢枝 LOUIS XIII，係 1944 年時法國臨時政府主席戴高樂將軍為慶祝二戰結束而開嘅，仲有仲有，呢枝 1968 Beaulieu Vineyard 嘅 Cabernet Sauvignon，係 1976 年第三十八任美國總統福特，喺美國革命二百週年記念晚宴時所準備，當晚連英女皇同菲臘親王都係佢嘅坐上客，有份一齊享用．．．．」

Siri 嘖嘖稱奇地道：「好似你咁講法，呢度每一枝酒都真係一本一本嘅歷史巨著嚟喎！」