【卡西進軍豪門！？】《誤上了黑幫老大的情婦，我只好躲在中環的職場胡混》- 第七季：紫式篇

「紫式苑」雖擁有悠久的歷史，但一磚一瓦仍是「新簇簇」的，原來是因為這裡在不久之前都有做過大規模的修葺工程，而最早建造的「承香」偏偏沒有，難免令人覺得當中有古怪！

「嘿嘿，所以話你啲後生仔諗嘢唔好咁簡單。」昌哥乾笑了幾聲，又拿出新的一根煙，點起火抽了一口之後，便索性將我整包煙收進自己制服的前袋裡，再道：「我聽我以前啲前輩講，喺承誌源仲在生住喺『承香』嘅時候，除咗佢自己之外，任何人一律都唔可以落去地牢最低嗰層，原因無講，大家只知道嗰度係『紫式苑』嘅禁地，你諗下，承誌源佢係開金鋪架嘛，嗰度肯定收埋咗好多金銀珠寶，話『承香』鬧鬼，十成十係唔想其他人去掘寶咋！」

昌哥的說話也不無道理呢！

直覺告訴我「承香」的地庫很可能會是藏金的地方，便忙道：「係？咁不如你帶我去睇下啦！」

「你都痴筋嘅！萬一真係有鬼咁點算呀？」昌哥想也沒多想就回應一句，然後舉起手指了一指，再道：「嗱，你跟住呢條路一直行，行到無咗條路都 keep 住繼續咁行，之後你就應該會遇到一排鐵絲網，你跳過佢又好、爆入去都好，總之鐵絲網後面就已經係『承香』嘅範圍，間鬼屋就喺裡面，你想去你自己去，阿叔唔會阻你發達，不過有咩後果自負！」

我朝昌哥指著的方向一望，只見夜色朦朦朧朧，瀰漫著一陣詭異的氣氛，我本想再追問下去，卻已聽見昌哥在說：「好喇，吹咗咁耐水，我哋都要去繼續巡邏喇！」說罷，便與明仔往相反的另一邊離開。

（待續）

入咩先？

拔道系列

第二百四十六話　鬼屋中的驚人發現

我一邊思考著昌哥和明仔的說話，一邊走回到自己的新居，當打開大門走進客廳時，見除我「同居」的「未婚妻」Rionna 之外，坐在梳化之上還多了男男和 Siri。

「咦，嚟咗呀。」我隨便說了一句。

「你哋新屋入伙，我哋梗係要嚟踩下場啦！」Siri 一個箭步撲了出來我的跟前，拍著我的肩膊，笑道：「呢度真係好鬼正喎，我又要搬入嚟！」

「你鍾意咪嚟囉，呢度大把地方。」我冷淡地回應。

Rionna 察覺到我好像有點不對勁，便問：「乜你出完去返嚟之後成個人就呆呆滯滯咁嘅？」

「因為我仲嘴嚼緊頭先套返嚟嘅料啫，呢度嘅歷史背景同人物關係一啲都唔簡單呀。」之後，我便將剛才在管理員身上取得有關朱家、承誌源和「承香」的情報一字不漏的說了出來。

說罷，眾人都沉默著，良久，首先開腔的是 Rionna，她以不屑的語氣叱道：「朱建東真係係女都唔放過架喎，老婆個妹又上，個女嘅同學又上，我都見過唔少鹹濕佬，佢都算係淫獸之中嘅極品，好彩而家癱咗啫，如果唔係慘遭佢毒手嘅女肯定會陸續有來呀！」

「嘿嘿，呢個只係你個人嘅諗法嚟啫，幾多拜金女都唔知幾恨想試下佢隻毒手嘅滋味，再嫁埋入嚟做少奶奶添呀！」Siri 打趣地笑道。

男男忽然追問：「你真係咁肯定啲金係收埋咗喺『承香』入面？」

多甜plx

我想了一想，道：「肯定又唔敢講住，不過我嘅直覺話畀我聽個機會都相當高啫。」

男男突然站了起身，道：「好，咁行喇！」

「行？去邊呀？」我奇道。

「既然你覺得啲金係收埋咗喺『承香』度，我哋就梗係要即刻去實地調查一下啦，乜你唔記得咗我教過你查案要『大膽假設、小心求証』架咩？」男男反問。

「吓！？乜．．．．乜你唔驚有鬼咩？」Rionna 脫口驚道。

「鬼喎，堅撞到嘅話又點會唔驚架？」男男失笑了一聲，再正色地道：「不過如果真係有鬼，我諗都唔會恐怖得過住喺呢度嘅人囉。」

「行．．．．行咪行，橫掂頭先我都諗住自己去架啦！」我唯有逞強地道。

獵奇系列

這種探險活動當然不適合懷有身孕的 Rionna，所以最後，就只有我、男男和 Siri 三人踏上前往「承香」之路。

其實我連日軍戰俘監獄和德軍兵器工廠的遺址也踏足過，夜闖「承香」從任何一個角度來看都是屬於「小兒科」，但不知為何，當我依照昌哥指示的方向前進時，雙手雙腳卻不時發抖，大概只是因為我已搬了一整天的家，四肢出現如此徵狀亦很正常，怎也應該跟恐懼扯不上關係吧，至少我是這樣跟自己說的。

我們走著走著，直到離開了路燈可照及的範圍，便亮起手中的電筒，整齊明確的石板路已經不見了，要繼續前進便要伸手撥開高至腰間的野草才可以，如此步步為營的又走了片刻，就遇到昌哥提過的那道鐵絲網擋住去路。

幾時先屌到男男

我檢查了一會，才道：「呢道鐵絲網個看更有講過架，應該係朱建東搬離『承香』之後至加上去，以防止有人進入。」

另一邊廂的 Siri，她已用鉗子在鐵絲網上剪開了一個缺口，再神氣地笑道：「呢啲咁雞嘅防線又點可能擋得住我哋？入得去咯！」

爬進去後，鐵絲網範圍內的野草長得更高更密，我們三人的身子都被淹沒了，四周更不時傳來令人毛骨悚然的「瑟瑟」聲，都不知道草叢中是否藏有甚麼野豬或狼狗之類，隨時都會撲過來「招呼」我們似的，「主菜」未到達，單單是「野草陣」的這道「前菜」已夠驚嚇，唯有抬著頭鎖定前方再不住加快腳步，大概只走了數分鐘的路程，感覺已像過了好幾小時，一幢荒廢已久的歐式古老大屋漸漸出現在眼前，從外觀來看，牆壁和柱子被重重的蔓藤包圍著，一磚一瓦無一不是破破舊舊，不用多說也可以確定這鬼屋似的大宅就是承家的祖屋「承香」！

我倒抽一口涼氣，道：「『紫式苑』每一處都咁靚，又點會留咗一笪野草横生嘅地方、同一間咁陰森恐怖嘅鬼屋架呢？」

Siri「格格」的笑了兩聲以作回應，又道：「呢間屋如果 Halloween 用嚟搞『哈囉喂』真係一流！」她的表情已沒有剛才那般輕鬆，笑聲亦聽得出有點生硬，這個「天不怕、地不怕」的小丫頭顯然也給「承香」的外觀赫倒了。

我們脫離「野草陣」後，沒多久便找到了大屋的入口，男男隨手捉實門柄輕輕一扭，門果然是鎖上的，她就從褲袋拿了萬字夾出來屈成「L」的形狀，然後將長長的一端伸進入鎖鑰孔中，經幾下靈活的攪拌動作，門鎖內的機關突然發出一下「嚓」的清脆聲響，男男隨即用力一推，對開大門的其中一邊就被打開了一道約一尺闊的門縫。

男男隨即用力一推，對開大門的其中一邊就被打開了一道約一尺闊的門縫

這是我頭一次親眼見識男男開鎖的本事，不禁脫口讚道：「嘩，好勁呀！」

男男對我的讚賞沒有任何表示，就毫不猶豫地從那條縫隙閃身鑽進裡面的黑暗當中，Siri 見狀也立刻跟隨著男男踏入去，我實在被她們兩個過人的膽色氣壞，當堂暗罵一句：「有無搞撚錯，駛唔駛勇成咁呀！」亦只好吞一吞口水，咬實牙關也衝進去。

屋內是另一個與世隔絕的世界，除了耳朵再聽不見外面風吹草動的雜聲外，眼前室內的裝潢亦彷彿將我們帶到文藝復興時代的歐洲一樣，圓形的穹頂全是古典優雅的浮雕，覆蓋著下方則是一個以巨型方格雲石作地台的大廳，隨處布置都是鑲滿華麗飾物的擺設和傢俱，雖然已很殘舊，但仍能看得出屋主卓越的氣派和非凡的品味，可以想像得到當年這裡每個晚上，當天花一列水晶吊燈亮起時，每一塊雲石、每一面鏡子、每一粒水晶和每一處棱角所折射出來的光華會有多絢麗燦爛，可惜現在只得我們幾支電筒亂搖亂射，光柱掠過的都是厚厚鋪著的灰塵罷了。

「估唔到間屋嘅外觀咁嚇人，原來裡面都 OK 喎！」Siri 嘖嘖稱奇地道。

男男亦點一點頭，道：「承誌源似乎唔係一般財大氣粗嘅有錢佬嚟喎，淨係睇佢呢間屋都証明佢應該幾有 Tastes。」。

以為鍾情於《源氏物語》的承誌源只愛日本的歷史，看來他對歐洲的文化亦有深刻的研究，他簡直稱得上是學貫東西。

隨著屋內並沒有發現甚麼不正常的動靜，氣氛亦沒有之前那麼緊張，我們逛完地面樓層，又上了二樓參觀寢室，看見一幕又一幕的都是昔日浮華起居生活的遺跡，三人瞬間好像變了夜闖「凡爾賽宮」的遊客一樣。

當回到地面時，Siri 忽然向我道：「行咗咁耐，鬼影都無隻，証明呢間鬼屋都只係虛有其表，不過亦都見唔到有啲咩黃金喎，你估你啲直覺係咪錯咗呢？」

「既然 Siri 提起先我至講啦，其實我都對啲黃金收埋喺度嘅講法有啲保留。」男男以一副質疑的口吻，道：「因為如果三姨太之前有將『拔道』掘出嚟嘅黃金搬嚟呢度，照計個地下唔會仲有咁多灰塵架？」

「嗱，一向你查案作為助手嘅我都唔會同你拗，之不過話晒我平時都負責開清潔同吸塵，所以你係唔會想像得到香港大塵起上嚟會有幾大塵架喇！」我充滿自信的笑了幾聲，再道：「況且個看更都話『承香』地牢最低嗰層被稱為『紫式苑』嘅禁地，原因又不明，話唔埋會有其他秘道通去嗰度就未必會經過個廳架啦，所以呢度有無收埋到黃金，落埋地牢睇至知！」

多謝支持

am的品味人生個blog收左皮

「同意！」男男說罷，便一馬當先的從樓梯往下進發，我和 Siri 亦只好死命地跟著，一連氣走了好幾層樓直至走完整條樓梯到達盡頭，眼見這就是地庫的最低一層亦暫時未見有任何藏金，卻放著不少「液體黃金」，因為「承香」的最低層，原來是一個酒窖。

「嘿嘿，文藝復興時代嘅歐洲大宅，地庫最低嗰層係一個酒窖，好合邏輯呀。」Siri 提高嗓子笑道，言下之意是指我的直覺錯了。

「黃．．．．黃金喎，又點會隨隨便便咁放晒出嚟比你睇呀，就算有都會係收喺暗格度，要搵到個機關掣至會打開嗰隻啦！」我雖然即時作出反駁，但語氣已沒有之前說得那麼堅定了，顯然是在「死雞撐飯蓋」。

難道直覺當真只是女人的專利？

男男沒拿我辦法，唯有聳一聳肩，道：「一場落到嚟，咁我哋四周圍睇下啦。」

之後，我們三人便分頭在這層搜索著每一處角度，看看還有沒有其他的線索，在我已打了輸數之際，忽然，電筒無意之間照到塵堆中好像有些閃閃發亮的東西，我心頭一抖，連忙蹲低身將發光之物執上手一看，竟是半塊切斷了的金條！

我完全是喜出望外，急急嚷道：「執到金啦！我執到金啦！！」

男男和 Siri 聽見我有發現亦火速趕過來，一看之下，男男就擺出一副若有所思的表情，自言自語地道：「的確係金條嚟喎．．．．但係．．．．但係真係三姨太喺『拔道』搬過嚟嘅？」

看到男男的反應，我就將這條金條翻轉，可見上半截的背面真的刻了一個「聖」字，便再以堅定不移的語氣，道：「『拔道』地庫批金條每一條嘅背面都刻咗『聖庫』兩個字，代表係嚟自『太平天國』嘅『聖庫』，而呢半條金條背面又有個『聖』字，就梗係指『聖庫』啦，唔通係『聖安娜』咩？仲唔係三姨太搬金條嚟呢度時唔覺意跌咗半條喺度？」

男男緩緩地點了頭一下，然後又四周望了一望，再指著發現金條位置後面的那幅磚牆，道：「咦，原來呢度得呢幅牆係無放到酒架喎。」說罷，她便走到那磚牆前面細心檢查，近距離觀察了一會，再用力拍打了兩下，牆身表面傳來空洞的回音，連門外漢的我亦可以分辨出，磚牆背後很可能是藏有另一秘密空間。

此刻事實已放在眼前，Siri 亦轉了口風，緊張的叫道：「係暗格呀！啲金就係喺裡面喇！」

（待續）

我就將這條金條翻轉，可見上半截的背面真的刻了一個「聖」字