【卡西進軍豪門！？】《誤上了黑幫老大的情婦，我只好躲在中環的職場胡混》- 第七季：紫式篇

推。

我發出錯愕的「吓」一聲，連忙坐直起來，便聽見岑學羚已徐徐地道：「雖然婷熙有份通姦証據喺手，要令楊醫生改口暫緩幫朱建東『拔喉』聽落都十拿九穩，不過咁做都只可以頂到一時三刻，因為時間耐咗，如果朱建東嘅狀況無咩實質嘅好轉到，啲家屬自然就會質疑楊醫生嘅講法，呢個世界唔係得佢哋兩叔姪兩個醫生，我怕到時佢哋等到無晒耐性，喺外面搵另一個醫生嚟睇下，就即刻穿煲咋。」她苦笑了一下，又道：「況且，要知道三姨太佢哋嘅目標係要分朱建東身家，就算朱建東條命可以保得住，但係試問一個瞓喺病床度同死無分別嘅佢，又點可能同佢哋鬥呢？」

男男緩緩地點了頭一下，再一字一語地道：「無錯，要同佢哋鬥，就一定要搶返個主導權返嚟，所以一係就唔做，一做就要做到最盡！」

此言一出，我內心不期然泛起了一個很誇張而又非常變態的念頭，但隨即又自覺得太過瘋癲，便迅速打消，不敢再想下去，然後再追問男男：「你嘅意思係？」

男男狡猾一笑，沒有回答我的問題，卻反問一句：「你有無熟讀我畀你嗰本『偵探筆記』呀？」

每次當看到男男這個笑容就沒有好事發生，我已經知道我心裡那個念頭肯定是沒錯的了，便顫聲道：「你你你．．．．你唔係要我假扮朱建東吓話！！？」

「朱建東」係咪會食曬咁多位姨太

多謝蛇巴大駕光臨

仲要再娶多幾個姨太

男男拍一拍我的肩膊，笑道：「似乎你都有諗到喎，呵呵呵。」

「咩話？卡．．．．卡西扮朱建東？我．．．．我無聽錯吓話！？」Siri 瞪大雙眼問。

「你無聽錯。」男男爽快地答了一句，再道：「要朱建東嘅狀況有明顯嘅好轉，最直接了當嘅方法，就係用一個健全嘅人扮演佢，我哋呢度得卡西一個男人，所以搵佢扮就最適合架啦！」

Rionna 一臉疑惑，問：「講．．．．講就容易啫，但係要花𡃁咁嘅卡西假扮一個老到差唔多死嘅朱建東．．．．點扮呀？」

Siri 眼珠靈巧地圈了一個，道：「咁呢層你又可以放心喎，其實卡西都試扮演過好多唔同嘅角色同身分架啦，有冼 Sir、卡內侍、黃先生、J 先生．．．．仲有呀！我第一次見佢嘅時候，佢就係扮緊熊本熊喇！」

「吓？連熊本熊都有扮過！？」Rionna 詫異地叫了一句，半秒之後，又回復較平和的聲線，自言自語地道：「咁卡西之前都有扮過我男朋友，而家又扮我未婚夫同肚裡面嘅爸爸嘅．．．．」

愈睇愈正

「卡西，咁你自己點睇？」男男問。

「先講個殼，我之前參加『紳士禮』嘅時候識咗一個有『妙手盲匠』之稱嘅老裁縫，佢做人皮面具嘅功夫可以話係舉世無雙，有佢幫手將朱建東由頭到腳成『浸』皮做晒出嚟，我相信外表睇嚟應該無問題。」我想了一想，再道：「之於舉止同言談，你本『偵探筆記』我一早已經練到熟晒，仲一有機會就會實踐下添，只要畀朱建東昏迷前啲片段同講話我研究一下，我都有信心會模仿得到嘅．．．．」

「乜原來你咁勁架？咁睇嚟我都要跟你學下嘢添呀！」Rionna 插嘴道。

我沒有理會 Rionna，卻皺起眉頭，續道：「之不過呢啲都只係外在因素嚟，朱建東嘅性格同記憶，至係我最擔心．．．．」

「呢方面你更加唔駛擔心啦，只要楊禮韜肯幫我哋向家屬講話朱建東嘅情況有好轉時，佢就已經係洗濕咗個頭，到時再要佢話朱建東因曾經長期昏迷導致而家性情大變、甚至乎係失晒憶，都係我哋話事架咋，你估我要楊禮韜做嘅嘢，就真係只係講句無傷大雅嘅說話咁簡單咩？」男男笑了一笑，再道：「同佢呢啲咁嘅衣冠禽獸講道義簡直係嘥氣，佢要怪，就怪佢有痛腳喺我手啦！」

原來男男在婷熙面前說得輕描淡寫是故意的，目的就是要讓楊禮韜「落踏」，隨後那怕他只試過一次「同流合污」，為了保全自己的聲譽也只能夠一直地配合我們。

楊禮韜被男男當成針對的對象認真是倒大霉，這樣婷熙應該會是樂見吧？

卡西扮建東 係咪表示開啟食女之路？
會唔會recall 返啲少奶返黎
特別係二太太

「其實我仲有啲唔係好明。」Rionna 忽然舉一舉手，問：「『玫瑰會』既然係一個殺人唔眨眼嘅組織，如果三姨太真係咁想分身家，點解佢哋唔索性殺鬼咗朱建東佢呢？」

「我相信係因為朱建東『騎士』嘅身分，『君子黨』從來都係『玫瑰會』嘅終極目標，能夠控制『騎士』以滲入『君子黨』嘅權力核心亦係『玫瑰會』一直以嚟想做到嘅事，從呢個角度嚟睇，『玫瑰會』應該仲會好珍惜朱建東條命添。」男男頓了一頓，又道：「而三姨太貴為『白衣皇后』，自己就梗係唔會同『玫瑰會』對著幹，之但係如果朱建東係死於『自然』的話，三姨太當然好樂意將朱建東嘅財富同權力都袋袋平安啦。」

推。

我「嗯」的點一點頭表示認同，想了片刻，又好奇地問：「話時話，咁你又點確定到『玫瑰會』唔會因為突然間心急想攞筆巨額遺產，而改變主意將朱建東隊冧呢？」

誰料男男想也沒多想便攤一攤起手，擺出一副滿不在乎的表情，道：「其實都絕對有咁嘅機會架，所以卡西你扮朱建東時，記得自己要小心啲呀。」

「吓？你咁講即係推我去死啫！？」我脫口叫道。

「死？朱建東有成七個老婆咁多，唔計大婆承沐紗，都仲有六個喎，今次你扮朱建東真係豔福無邊，係推你去死，不過係爽死就真！卡內侍！你話係咪？嘿嘿！」Siri 嘲笑道。

Rionna 則一邊摸著自己的肚皮，一邊歎道：「唉，卡西，你今次扮朱建東，為求逼真，我知道你同佢啲老婆親熱就肯定在所難免架喇，不過就算係咁，你都千祈唔好唔記得我、同我肚裡面嗰個呀！我哋會時時刻刻都掛住你架！」

Rionna 此言一出，岑學羚即時向我投來奇異的目光。

我大呼「無辜」，再急急解釋道：「我．．．．我扮朱建東都係為咗大局啫！同埋，同埋我只係幫你同你個肚做煙幕架咋，又唔係真嘅，你咁講法好易令人誤會架！」

Siri 臉上的笑容笑得更誇張，道：「你唔駛解釋咁多架喇，你卡西係啲咩人，大家都好清楚架啦！」

睇嚟今季正式進入戲肉

7個姨太大混戰

為求逼真，我知道你同佢啲老婆親熱就肯定在所難免架喇，不過就算係咁，你都千祈唔好唔記得我、同我肚裡面嗰個呀！我哋會時時刻刻都掛住你架！

大姨太過咗身，咪癲啦

係咪準備重甜

接著，眾人便繼續七嘴八舌地討論著，過了不知多久，我就收到婷熙的來電，告知楊禮韜已經將朱建東情況好轉的突發消息向家屬交待，這代表計劃的第一步成功了，而「喪委會」的第一次會議亦因此遭腰斬，可以想像三姨太、王禹伊和 Teresa 因計劃功敗垂成肯定是震怒非常，但又要裝出親人脫險那欣慰的樣子，應該會是相當有趣。

隨著朱建東能夠「渡過難關」，「紫式苑」漸漸回歸往日的模樣，一切在表面看來正常不過，我們卻暗地裡進行那個「偷天大計」！

因為有婷熙作為朱建東的主診醫生之一，和她可以自由進出「常寧」之便利，我們很快便收集到朱建東所有身體形狀和生物辨識的特徵，再經「君子博」將資料發給庫帕，幾天之後，我就已經收到一個由斯洛伐克寄來的速遞包裹。

推。

一向都只替「紳士禮」弄頭套的庫帕，雖然有預先跟我提起過這是他首次製造由頭包到腳的「人皮」，但我試穿上身時，效果之好令我不得不再一次為庫帕鬼斧神功的手藝而驚歎，就連應該對朱建東的身體最熟悉和了解的婷熙，她也只能對著活脫脫已變成了朱建東的我目瞪口呆，吐出「毫無破綻」這四個字。

當我的生理和心理都做好變成朱建東的準備後，下一步，就是要將病床上真正的朱建東換走，而收藏與植物人無異的他確實比關起一個活人容易得多，在等待庫帕那副「人皮」的期間，我們已在朱建東的床做了手腳，秘密地把一具猶如棺材一樣的氧氣箱安裝在床底，並連接上一直延續他生命的儀器。

萬事終於都俱備，在一個「常寧」如常寧靜的晚上，我擺脫裡裡外外屬於自己的所有，化身成為朱建東，偷偷混入了朱建東的病房中，並躺在他的病床之上。

這個單單只是想一下也覺得超級瘋狂的計劃，我竟然真的付諸實行！

（待續）

召喚埋大太太返嚟玩，小說就可以改名為《誤上了黑幫老大的情婦，我最終竟躲了在異世界建立後宮》