「最衰你家姐咁啱呢幾日飛咗,如果唔係都可以同佢索下料嘛。」我苦笑地道。
「無辦法啦,家姐臨時要同姐夫去新加坡出席嗰啲咩亞洲經濟論壇,家姐唯有叫我哋自己搬咗入嚟先,等佢過幾日返香港再一齊同三姨太食餐飯,到時再將朱家啲人介紹畀我哋識,點估得到我哋一搬入嚟就遇到個咁鬼繞口巉手嘅小紅魔喎。」Rionna 歎了一口氣,再道:「到時睇下等家姐返嚟之後,仲有無機會先問下佢多啲有關朱家嘅事啦。」
我想了一想,然後拍案叫道:「諗諗下,其實要索料,都唔駛等你家姐返嘅,我哋可以自己主動出擊架嘛!」
「吓?我哋喺度乜人都唔識架喎,點主動出擊呀?唔通好似 CID 查案咁逐間屋㩒鐘洗樓咁問呀?」Rionna 反問。
「梗係唔係啦,我話嘅主動出擊,係同呢度啲看更套料呀,乜你唔知道無論係公屋定係豪宅,看更永遠都係知道成個屋苑入面最多秘密嘅人嚟咩?」我一臉胸有成竹,再道:「我敢肯定,向啲看更埋手,喺佢哋口中一定點都會有啲收獲嘅!」