[鐵膠飛機膠撈埋][有圖長氣多字]2023暑假生日半獨遊日本5+10日

樓主下個禮拜會唔會去鈴鹿

唔會喇，買唔到飛，亦都無時間飛

CONT.

繼續北方民族館

喺寒冷地域生活，一定要厚衫，野獸嘅皮毛就係最好材料
左邊係楚科奇人(生活喺西伯利亞嘅少數民族)、右邊係因紐特人(生活喺北美，北極圈週圍嘅原住民)，都係用鹿皮毛造嘅大褸、褲同靴


阿伊努人男性出席重要場合嘅服飾，都幾型


因紐特人用海豹腸衣整嘅衫，完全防水又透氣，古代版GORE-TEX
而其實唔只會用海豹腸，都會用鯨魚、海獅或者熊腸衣整衫，有相近效果
都係畀佢地出海打獵用，唔會因為濕身而失溫


赫哲人(現居黑龍江同俄羅斯濱海地區嘅少數民族)用魚皮整嘅衫褲，因為冬季太長，氣候寒冷，棉、麻都生長唔到，所以就用魚皮，都係防水保暖


當然，除咗動物之外，都會用植物整衫，就有北美原住民用樹皮整嘅衫


因紐特人嘅未婚女性喺節慶著嘅套裝


重有唔同嘅用具


重有狩獵同生食海象嘅片段，well.........


因紐特人嘅居所還原


圖騰柱，都係北方民族常有嘅裝置


重有最重要嘅狩獵工具

CONT.

大部份北方民族都係沿海居住，船就自然係最重要嘅交通工具，最主要都係用寒帶生長嘅針葉樹幹整嘅



另一種最重要嘅交通工具就係雪橇，冰天雪地移動唔通剩係用腳行咩


當然，喺冰天雪地行，都要靠工具先行到嘅


阿伊努人嘅狩獵工具，主要都係用弓箭，同埋有個陷阱，不過影唔哂


海上打獵用嘅浮袋，用海豹皮造的


睇到咁上下就出返去，重有個特展，有關北方民族嘅編織工藝


因紐特人嘅公仔

CONT.

睇完北方民族館，又call DOKOBUS

其實都係HIACE嘅內籠咁


好快就到咗網走監獄，先見到鏡橋，係出入監獄嘅必經之路


閘外，買飛都排長龍


見時間差唔多，不如食個早lunch，當然試下監獄食堂，
不過最出名嘅犯人餐因為要分散人流而調咗去遠d嘅地方先食到


都係自助機叫嘢食，出飛交畀廚房就等
https://tabelog.com/hokkaido/A0110/A011001/1028871/
TABELOG 3.29分


叫咗個和牛漢堡扒飯SET，用返監獄養嘅和牛整嘅味道唔錯

民族館原來咁多野睇

都真係唔少，重有個喺白老嘅民族共生空間都想去睇下

你一早飛，然後去完2個地方都重係食早Lunch，啲時間咁充裕

十一點幾算早掛？

成日以為你去左咁多地方一定用好多時間

監獄都有和牛漢堡食

CONT.

食完嘢，係時候入去

入場券要1500YEN，同埋會問你來自邊個國家


博物館網走監獄，明治時代開始的確作為監獄咁用，1973年經過網走當地居民極力爭取同籌到錢，將本身想改建同拆嘅舊監獄設施保留，並轉移到天都山腰保存再改建做博物館，最後喺1983年正式開業，同時係日本現存最舊嘅監獄設施，亦都登錄成為重要文化財


而正門入面都有兩間房，一間看更用，一間畀探監嘅人等候用


監獄嘅廳舍，係監獄嘅管理中心，跟返明治年代學校同政府辦公室嘅風格建造，稱為「仿西式建築」，而家係指定重要文化財


入到去有唔同展板介紹北海道喺明治年代嘅各個監獄，而當中政府亦用犯人去幫手拓荒，修橋補路開礦乜都齊，當中有大量犯人死亡，呢d血腥嘅歷史嘛........


成個博物館嘅建築物一覽


地板印咗道內早期唔同監獄嘅位置，同埋由犯人開拓嘅路，一共有724公里


隔離係小賣店同cafe，個人像嚇死人


小賣店有賣由函館少年監獄犯人整嘅產品


行完廳舍行出去，呢度係監獄嘅裡門，亦係有形文化財


監獄嘅水閘，因為網走川會流經監獄前面，所以會利用河川運輸，
呢個水閘就係由犯人建造，作為水路運輸嘅出入口，不過眼前見到嘅係後期重建嘅

係，而家真係用緊嘅網走監獄係有牧場養牛種菜，類似勞改性質咁
而d和牛亦係由犯人飼養嘅

CONT.

NIPOPO，北方民族嘅守護神，而家網走監獄嘅犯人都有製作NIPOPO嘅公仔或者雕刻


舊釧路地方法院網走支部法庭，都係復原建築，入面有以前法庭用過嘅物件



單獨法庭，用到1991年，由一個法官處理性質較輕嘅，例如偷嘢、食霸王餐之類，訴訟金額少過140萬YEN嘅案件，所以用得都幾頻繁
而呢個場景就係重現緊法官盤問被告



亦有展板講下曾經出現過嘅冤案，唔.......


另外一個場景係合議法庭，負責性質比較嚴重嘅案件，會由三個裁判官共同審判，所以地方都大d

網走監獄係搬過架

以為佢係原地改建做博物館添

本身都以為係，但睇返而家用緊嘅網走刑務所重喺網走川另一邊
佢亦都係日本最北監獄

由平地搬上山，當年嚟講都幾大工程

由個報社社長牽頭，拉埋網走市、北海道政府同法務部，再自己出面搵財團借錢投資，籌咗九億yen
真係巴閉

CONT.

睇完法庭，繼續


行過d有兩間屋仔


佢地係休泊所，又稱流動監獄，
之前提過明治年間要配合北海道拓荒，而徵用犯人去修橋補路開礦，呢d裝拆容易嘅屋仔就係佢地外勤期間嘅休息地方
犯人們只有一張薄被同一個圓木造嘅枕頭，每日只有4~5個鐘嘅瞓覺時間
而透過敲打圓木側邊就係叫醒班犯人嘅最好方法


監獄歷史館，入面有關日本監獄嘅歷史同有一段講述犯人被徵召去開路嘅慘無人道故事，好意外地竟然有廣東話語音，估唔到
不過入面唔畀影相，算吧


再行上d，就係二見岡監獄分所，同時係農場，犯人會負責耕作，做到自給自足，而眼前呢棟嘢喺1999年由原址搬上嚟呢度，同樣係指定重要文化財


入到去先有飯堂，每日犯人就係食返自己種嘅嘢，同埋絕對唔準食剩任何嘢


同時因為太多人去頭先剛食完嗰間監獄食堂，所以將而家真實犯人食嘅餐搬咗過嚟呢度，不過呢邊無冷氣，同埋頭先食飽哂，所以無緣試喇，但聽講係唔錯幾好味的


監房，保存當年嘅木造建築


建築入面有個廁所，但只係場景，唔係真嘅廁所，所以就加張告示
而點解剩係得中文嘛...............


獄長室，同時管理埋農場

CONT.

更亭一個，顏色幾突出


放射式監房，同剛剛嗰個環境近似，不過呢個係向五個方向放射出去咁起


喺呢個偏遠嘅監獄，都曾經出現過兩個逃獄王：
一個係「五寸釘寅吉」西川寅吉，曾經成功逃獄6次，最後佢送到嚟網走監獄，最後71歲放監；而佢最初被補入獄嘅原因係14歲嗰陣手刃殺咗佢叔叔嘅仇人一家；
而佢「五寸釘寅吉」嘅名相傳喺佢逃獄期間畀五寸長嘅釘插穿腳掌，但佢插住支釘走咗12公里遠而得名，痴撚線

另一個就係白鳥由榮，號稱「昭和越獄王」，一共成功逃獄四次，佢最初因為強盜殺人而坐監，之後都係因為監獄對佢嘅惡劣待遇而逃獄，重可以喺偏遠嘅網走監獄走到出去，都幾痴線，最後佢喺53歲出獄


浴場，顧名思義係沖涼嘅地方，監犯都要沖涼嘅

而犯人沖涼嘅次數都因時代而有唔同：
明治5年嗰陣規定犯人每日做完嘢就要沖涼，夏天用凍水，冬天用熱水；
但去到昭和年間就變咗夏天平均5日沖一次、其他時間就7日沖一次；
到而家就大約一個星期平均沖最少2次
咁樣規定係主要都係因為衛生起見，人權？Ummmmm.......

本身係用加熱水方式，但1909年因為大火燒毀，之後重建成為用蒸氣加熱嘅水泥浴池嘅浴室，而呢個浴場場景係用到1979年的

至於點沖涼？佢地會以15人為單位，由除衫開始計，先喺第一槽沖6分鐘身，再去第二槽沖多6分鐘連埋洗臉，最後著返衫，一共需時大約15分鐘另外放監前一晚可以一個人慢慢沖涼

而典獄人員會睇實佢地並發號司令叫佢地進行沖涼步驟，亦都唔準犯人間交談同傳物件

另外沖涼只有兩樣嘢提供：毛巾同番梘；毛巾一律白色，但表現好嘅犯人可以自費買獄內指定嘅物品，所以都開始有唔同顏色或者圖案；
而番梘就曾經試過吊喺天花板畀犯人拎嚟用，而家會放喺木盒入面，唔準拎走

而水泥造嘅「浴缸」深95cm，就係為咗唔駛犯人屈住膝都可以高舉雙手沖涼

個浴場比起而家大部分溫泉旅館都唔差太多

其實佢地可以係度起個獄之湯俾遊客日歸浸

飛膠巴出池後啲遊記無咁好睇了

單手打文係差啲