《覺能之戰》

詡興致勃勃的問：「乜有好多種賭局咩？」

亞豪興奮地回應：「係㗎！你入商場，幾乎間間店都有投注區，每間嘅賠率同賭法都唔一樣，好受歡迎㗎！」

鹿仔補充：「可惜比賽只會响甘氏大廈或附近幾間酒店做直播，如果全城直播，我一早就發咗達喇！」

亞豪說：「絕對唔係俾壓力你地，但全隊好似得雲耳木耳同黎達最少人買，黎達個次好似好多人鬧。所以，你地一表演得錯就臭名遠播，好似黎達冇乜人想請佢出戰。」

鹿仔正經地說：「好喇！講返正題先！首先，由於我地係職員，我地可以自由出入所有場所，除咗虛擬訓練場個層，你地應該都冇乜入過啦！次次一上就上一樓。我一陣帶你地去集合處睇一睇，分別有A1、A3、D1同D3四個集合處。如果你地想現場睇比賽，可以上二樓或以上任何位置睇，健身室等等平時做訓練嘅地方都可以由窗望落去賽場或有電視直播，但如果想係觀眾席睇就要企側邊或後面，費時俾人鬧啦！如有屋企人想睇比賽，可以用職員證免費攞飛帶佢地上柏德斯加二至九樓觀眾席，雖然唔近比賽場，但都好搶手㗎！」

「帶定望遠鏡會再好啲！」亞豪提議

「第二，你地出場時間表同集合位置已經定好，當然隨時會有改變啦！可以攞本會場小冊子睇時間，自己留意手錶、露天花園、先鋒隊專用食堂同宿舍通告板有咩改動！領地爭奪賽贏咗會有決賽同總決賽，因為領地爭奪賽有大量正式隊員參加，你地呢班見習都未必入到決賽，不過都要注意消息！」鹿仔飲了一口水，繼續說明：「第三，籠統啲講，睇比賽攞經驗。虛擬訓練場嘅場地每埸比賽後都有啲唔同，因為比賽後除非被破壞得好厲害，如果唔係，唔會執返個場，亦即係愈後嘅比賽，場面愈破爛，碎石爛地愈多。但好處係就係愈嚟愈爛，都係用緊同一個場，而領地爭奪賽日子較後，即係你地有三至四日睇到個比賽場地，用你地嘅眼睛同幻想力熟習下個場，對你地比賽有幫助。同埋，當有見習隊員參加嘅比賽都記得要睇一睇，你地閉幕仲有場變陣表演賽，對你地有好處。」

亞豪笑言：「所以！你地會好忙！唔好以為玩下hea下就過到！」

鹿仔收拾好要帶的物件，準備出發：「好喇！我帶你地行一圈集合區，就一齊睇浩政表演！」

梓旻問：「高級隊長唔係唔使玩咩？」

亞豪解釋：「佢係唯一唔係第一年加入嘅高級隊長，而且佢年年都係熱門，考慮到佢連贏加上商業因素，佢冇得唔玩。」

鹿仔及亞豪帶了四人到集合處後，拿了一些小冊子，內頁包括了部隊的總人數及七天比賽的賽程。

AP特種部隊先鋒隊資料

總人數為131，其中包括一名總長。先鋒隊分隊總人數及每個職位的人數，如下：
力量隊 (P隊)總人數為39人，包括一名高級隊長、四名隊長、三十一名隊員及三名見習隊員。
念力隊 (T隊)總人數為36人，包括一名高級隊長、四名隊長、二十七名隊員及四名見習隊員。
醫療隊 (M隊)總人數為39人，包括一名高級隊長、四名隊長、二十九名隊員及五名見習隊員。
零星隊 (O隊)總人數為14人，包括一名高級隊長、二名隊長、七名隊員及四名見習隊員。

七天比賽的賽程

第一天
第1節 10:00-12:00 開幕表演賽 參賽人數為15人
第2節 13:00-15:00變陣賽 A組 參賽人數為20人
第3節 16:00-18:00變陣賽 B組 參賽人數為20人
第4節 19:00-21:00變陣賽 C組 參賽人數為20人

第二天
第1節 10:00-12:00變陣賽 D組 參賽人數為20人
第2節 13:00-15:00變陣賽 E組 參賽人數為20人
第3節 16:00-17:00卧底賽 A組 參賽人數為10人
第4節 18:00-19:00卧底賽 B組 參賽人數為10人
第5節 20:00-21:00卧底賽 C組 參賽人數為10人

第三天
第1節 10:00-11:00卧底賽 D組 參賽人數為10人
第2節 12:00-13:00卧底賽 E組 參賽人數為10人
第3節 14:00-15:00卧底賽 F組 參賽人數為10人
第4節 16:00-17:00卧底賽 G組 參賽人數為10人
第5節 18:00-19:00卧底賽 H組 參賽人數為10人
第6節 20:00-21:00卧底賽 I組 參賽人數為10人

第四天
第1節 10:00-11:30領地爭奪賽 預賽 A組 參賽人數為20人 4隊*
第2節 12:00-13:30領地爭奪賽 預賽 B組 參賽人數為20人 4隊*
第3節 14:00-15:30領地爭奪賽 預賽 C組 參賽人數為20人 4隊*
第4節 16:00-17:30領地爭奪賽 預賽 D組 參賽人數為20人 4隊*
第5節 18:00-19:30領地爭奪賽 預賽 E組 參賽人數為20人 4隊*
第6節 20:00-21:30領地爭奪賽 預賽 F組 參賽人數為20人 4隊*
*每場兩隊晉級

第五天
第1節 10:00-11:00領地爭奪賽 複賽 AB組第一隊晉級隊對決 參賽人數為10人 2隊
第2節 12:00-13:00領地爭奪賽 複賽 AB組第二隊晉級隊對決 參賽人數為10人 2隊
第3節 14:00-15:00領地爭奪賽 複賽 CD組第一隊晉級隊對決 參賽人數為10人 2隊
第4節 16:00-17:00領地爭奪賽 複賽 CD組第二隊晉級隊對決 參賽人數為10人 2隊
第5節 18:00-19:00領地爭奪賽 複賽 EF組第一隊晉級隊對決 參賽人數為10人 2隊
第6節 20:00-21:00領地爭奪賽 複賽 EF組第二隊晉級隊對決 參賽人數為10人 2隊
決賽抽籤

第六天
第1節 10:00-11:00領地爭奪賽 決賽 1組 參賽人數為10人 2隊
第2節 12:00-13:00領地爭奪賽 決賽 2組 參賽人數為10人 2隊
第3節 14:00-15:00領地爭奪賽 決賽 3組 參賽人數為10人 2隊
總決賽抽籤
第4節 17:00-18:00領地爭奪賽 季軍賽 參賽人數為10人 2隊
第5節 20:00-21:00領地爭奪賽 冠亞軍賽 參賽人數為10人 2隊

第七天
第1節 10:00-13:00閉幕賽 參賽人數為35人

梓旻他們屬於領地爭奪賽E組，尚未看清楚自己的對手，鹿仔就催促他不要顧著看小冊子，然後帶他們上二樓健身室，此時已經很多人在健身室向運動館那邊的窗邊聚集。他們一眾人也走往窗邊，原來這位置可以很清楚地看到比賽場地。運動館除觀眾席外的地板被收起了，可以看到最低層的虛擬訓練場，像一個深淵一樣，因為本來運動館及虛擬運動場的樓底也非常高，即使二樓健身室也不是看的很清楚，難怪亞豪建議用望遠鏡看。健身室內也很細心安排了坐位，平日只是用來播隊內最新消息及室內外溫度等資料的電視也直播著比賽實況。

「一樓，即係運動館位置，嘅觀眾席視野同氣氛最好，但貴，多數啲大老闆或贊助商買。而呢層同上面每層都有觀眾席同電視睇比賽。健身室或訓練場只有職員可以入嚟，唔想多人又可以免費，呢度係不二之選！」亞豪介紹

「其實都幾反智，攪到咁大型，啲犯咪知曬我地啲能力？」詡問

「小朋友，你永遠唔知啲老闆諗咩，有工就做，有錢就賺啦！」鹿仔指指樓下一樓的觀眾席

「咁⋯會死人㗎喎⋯⋯」麗瑤有點擔心

「所以點解你地福利好到直程好似包養你咁呢？仲要記得，我地有一半係一間生物科技公司投資，所有考慮離唔開商業因素。而且對外宣稱，覺力祭目的係讓大眾監察部隊嘅進度同為城市增加旅遊景點，賭博等等唔係由公司或政府主導，只係冇特別監管個別商戶嘅商業行為。你地可以做嘅係不斷提升、改變同執生。」鹿仔提醒他們

「講起死人⋯覺力賽會唔會死人？」阮超問，眾人的目光由阮超轉向鹿仔

「放心啦！你地帶住個錶本身有偵測身體功能，只要覺得你已經無力作戰就轉紫，T隊同M隊都會有人係場外支援。一旦被判定無力作戰就一定要停止，唔好賴死，如果唔係會扣分。」亞豪指一指自己的錶回答：「當年P隊一位隊長連輸兩年俾浩仔，第三年再戰就賴死唔走，明明無力都仲要企起身打，死唔斷氣咁。雖然浩仔游刃有餘，但都唔耐煩，完咗向上級投訴，而家就有扣分制。」

「喂！開始喇！」有人大叫

(待續)

推

覺力賽篇第九章: 開幕表演賽

男女主持用中英文讀出開幕致詞：「歡迎大家嚟到覺力賽，今年會舉辦28場嘅比賽，大會希望大家可以從比賽認識更多我哋AP特種部隊嘅成員，讓大眾有途徑監察我哋隊員嘅質素，仲可以提升大眾對覺力嘅了解。就讓我地開始今個季度嘅覺力賽啦！喺隊員入場正式開始之前，提提現場嘅觀眾，你地應該每人獲派一個無線耳機，大家可以收聽到評述員嘅即時轉述，離開時，請大家記得歸還耳機。而係甘氏大廈收睇直播嘅觀眾，如果想收聽到評述員嘅即時轉述，記得照指示去到有轉述嘅樓層收睇比賽。好！我哋今季第一場比賽正式開始！」

隨音樂聲響起，參賽者進場，大家的眼神也轉到電視螢幕上，健身室的直播沒有即時轉述，只聽到觀眾們的議論聲音。鹿仔在旁說明變陣賽的玩法：「變陣賽每十五分鐘就改變參賽者嘅所屬隊伍，只要你用當刻身份，成功去親手直接抆走去敵方嗰兩支陣地旗，比賽就完。」

「咁等夠十五分鐘轉隊伍個陣，轉身抆支旗咪得囉！反正你企係原地，夠時間就會轉隊啦！」楓突然從身後出現，眾人也被她嚇到

「每次轉隊都係隨機嘅，所以未必次次中。仲有，雖然話就話隨機，但為增加娛樂性，如果你就摸到支旗，但咁啱夠鐘都好大機會被轉陣。」鹿仔回答她的問題

「我記得上年孔sir臨時出行動冇得玩，浩仔又怕麻煩，十五分鐘內抆走曬啲旗，完全無視咗個遊戲，俾上頭照咗陣肺。」亞豪突然說起上年的戰況

「今年孔sir有玩應該冇咁易十五分鐘內完到。其實浩政同隊長級嘅人賽力咁懸殊，真係冇咩好睇。只係單方面屠殺咁。」鹿仔說

「咁下面啲大老闆鍾意睇吖嘛！佢哋睇，你先有糧出！」亞豪有點激動的說

比賽場地燈光全開，可見場內以石地為主，但佢有草地及花草樹木，場地中間的小丘令兩側的隊伍看不見對方，但代表陣地的旗幟相當高，即使看不見敵人也看到在場地四角的旗幟。據比賽簡介，場地總長256米闊100米，長邊平分成ABCD區，闊邊平分成123，總共12區。

這場紅隊陣地於A區，藍隊陣地於D區，兩隊旗幟分別插在A1、A1、D1及D3。電視播出此場賽事15位參賽者名單，除了浩政外，其他參賽者都是各分隊的隊長。每位參賽者都穿著行動制服，心口位置也有一個小燈顯示所屬隊伍，這次紅隊隊員7人，藍隊隊員8人，而認識的人當中，浩政及之前陪梓旻訓練的T隊隊長Albert屬於紅隊，富哥、鼓鼓爸爸及孔sir屬於藍隊。

會場響起倒數的聲效，幾乎所有在場的觀眾及參賽者也十分緊張，唯獨是浩政看起來似乎十分輕鬆。隨著代表開始的聲音響起，本於A2的浩政已於鏡頭消失，突然一聲爆炸聲響起，C區的藍隊隊員裡有4位隊長級的人被炸飛。鏡頭很快就找到正高速飛行的浩政在C2上空，一名位於C2及D2交界的藍隊eye mark隊員用念力造出阻力嘗試阻止浩政前進，但只是稍微拖慢了一點。

另一方面，有紅隊Arm Mark成員於B3區把一顆因剛才爆炸而生、比人還要大的大石拋向那位藍隊隊員，藍隊隊員過於集中阻礙浩政，躲避不及，被大石撞倒。同一時間，另一藍隊Arm Mark隊員不知何時已走到C2區，用力一跳以直拳攻擊浩政，但他尚未碰到浩政，浩政就揮一揮手用念力把那名隊員掉開。

那隊員被掉開一剎，一巨石迎面而來，浩政這次決定避開，但又一巨石迎面而來，原來是孔sir在不斷拋石，最終把浩政迫降地上，孔sir就向前衝，似乎打算近身攻擊。浩政本打算把孔sir「揮」走，但失敗了，孔sir似乎能抵擋念力，浩政就只能亂拋碎石。浩政的拋石攻擊似乎不太起效，對方仍然直線衝到佢面前，一拳揮下，浩政避開了，他腳下的石地被打碎，浩政又再升到半空飛往位於D1的旗幟。

孔sir狂奔急追浩政，也不忘向浩政拋石，後來似乎知道追不來就轉身到D3的旗幟那邊去。現場其他隊員也努力阻止對方前行，兩邊似乎也留了一Ear Mark隊員留守陣地。Albert一直在BC區之間奮力阻止藍隊的隊員前進。

(待續)

爭奪賽令到戰鬥更多樣，更豐富。
多啲呢種團隊合作，策略互補， 戰鬥更加有趣。

之後仲會有幾場團體比賽希望你會鍾意
而覺力賽之後嘅實戰會增加一啲武器，令戰鬥更豐富，冇咁悶
敬請期待

一霎眼，開始短短10分鐘，藍隊已失一旗，浩政繼而飛向D3，但這時他遇到藍隊的富哥，他舉起手似乎製造了一道隱形的牆阻止浩政前進，看得出頗為有效，雖然浩政仍以非常緩慢的速度前進。當然孔sir也沒有放過浩政，他到了D3讓旗幟旁的鼓鼓爸爸為他加強了體能，比剛才速度及攻擊力也增加了，他拋起一個又一個巨石，像打排球用力拍，巨石碎開，碎石飛向浩政。浩政為接下碎石而停止前進，孔sir邊前進邊繼續拋碎石把浩政迫至D2區。此時，富哥走到D2區似乎想把他拉下來，但不太成功。

隨著時間一分一秒的過去，十五分鐘到了，代表轉隊的聲音響起，電視顯示出各人的新隊伍，藍隊只剩下5人，浩政被換到藍隊，鼓鼓爸爸維持在藍隊；紅隊增至10人，富哥及孔sir被轉至紅隊，Albert維持在紅隊。

「五對十？」梓旻驚訝

「咁先好睇嘛！」亞豪興奮地說

鼓鼓爸爸走到浩政他們身處的D2區，向孔sir舉起雙手，孔sir 就像加了負重般，動作變慢。鼓鼓爸爸隨即跑上前一踢，孔sir被踢至C2，未讓孔Sir反應過來，鼓鼓爸爸就跑前踢開富哥。富哥被踢飛的一刻，孔sir以極快的速度向鼓鼓爸爸跑去，而富哥起身後，鸚鵡重新指示富哥方向，用念力把幾百顆碎石向鼓鼓爸爸拋去，但被浩政阻止。

隨碎石墜下，浩政也降下到鼓鼓爸爸身旁，鼓鼓爸爸似乎為浩政做著加強的工夫，就在孔sir快到達他們面前的一剎那，浩政手一揮，孔sir腳下整塊大約五平方米的石地被翻起，鼓鼓爸爸的加強工夫似乎做完了。

「呵呵！比賽結束！」亞豪興奮地說

被強化的浩政手指向上輕輕一撥，富哥及孔sir被彈到B2。浩政輕輕一跳，已到達A區，他先到A1把留守的隊員以念力撥走，拔走旗幟後，飛往A3，把正趕上前的兩個紅隊隊員撥走，把紅隊最後一旗幟拔去，比賽就此完結。

「完！我仲買咗20分鐘內完全比賽，我太睇得起孔SIR！」鹿仔有點失望

「哈哈！我買咗15分鐘！去收錢先！」亞豪興奮地離開了健身室

「梓旻，呢啲就應該係你A Mark嘅好處，得你哋可以飛，又可以郁郁手撥走人。」鹿仔提醒梓旻

「不過大力過頭會唔會好似拍蚊咁變醬？」楓突然的一句換來眾人鄙視的目光，他們都同時想：「只有佢先會第一時間諗到呢啲嘢！」

但這提醒了梓旻自己的AP力度之大會傷人，道：「⋯多謝提醒。」

楓不知自己做了什麼值得被道謝，但仍然回答：「唔使客氣？」

「之後嘅比賽得閒就睇下啦！雖然大部分識玩嘅隊都唔會清一色全部同一種A Mark組隊，但總有啲係咁做，尤其T隊人比較內向，純T隊嘅隊伍係最唔好睇，成班遠距離攻擊，掉波比賽咁。」鹿仔說完就離開了健身室。

鹿仔離開後，阮超和麗瑤也跟自己隊友會合，剩下梓旻、楓及詡三人。梓旻記起剛才比賽時，浩政被強化的效果似乎比孔sir更顯著，便提出：「我哋係咪都應該搵樺夾一夾，我見鼓鼓爸爸強化孔Sir同浩政嘅效果有啲唔同。」

詡提出質疑：「好懷疑佢哋係咪夾定，咁可以快啲完咗個比賽。」

楓說：「樺要當值，今日應該唔得。」

「當值？」梓旻問

「因為要搬出無力作賽嘅參賽者出場同進行即場治療，所以M隊同T隊都會有隊員輪流當值，乜你哋乜都唔知㗎！」楓說明，梓旻及詡二人被她說成什麼也不知道，心裡不是味兒

「得喇！你乜都知喇！最叻係你喇！」詡不爽地說

「咁我哋而家點？」楓問

此時，梓旻的電話突然響起，是浩政打來的：「而家落嚟A1集合處。」

既然梓旻需要找浩政，他們三人就解散了。楓打算上技能訓練場練習，詡不太想接受訓練，也不打算陪梓旻見浩政，最後選擇回宿舍休息。梓旻到了A1集合處，他看到浩政、鼓鼓爸爸、孔sir、Crystal 、Albert及一名不認識的女性。他們似乎言談甚歡，而且除了Crystal 全是隊長級或以上的人，梓旻不太敢打斷他們的對話。

(待續)

「梓旻嚟喇？」浩政看見梓旻，向他揮手，梓旻這時才敢走過去，站在Albert的身旁

「Hi，大家好。個表演賽好好睇！」梓旻說

「嘖，十五分鐘完唔到。」浩政很不滿的盯著孔sir

「大佬吖！你唔驚照肺嗻⋯⋯我覺得煩吖嘛⋯」孔sir笑言

「好心你啦⋯⋯反正你都係飛下揮下手。」鼓鼓爸爸答話

「浩政由入隊就咁怕麻煩。」唯一梓旻不認識的女生笑言。此女生滿臉笑容，高佻的身型、黑而亮麗的秀髮加上一點穩重的味道，有一種和藹可親的大姐姐的感覺。她的兩耳耳垂至頸部位置有如像火般A Mark，而表演賽只有隊長級以上的人才需要參加，梓旻推斷她是M隊的隊長

「但又會係咁接嘢做，令自己忙到冇得瞓。」Crystal 插話。

「好彩有你喺度幫手咋！」Albert笑言，Crystal甜笑望著浩政

浩政沒有理會Crystal，冷冷的說了一句：「我自己一個都搞得掂。」

Crystal非常失落，氣氛變得相當尷尬。各隊長也不能說出一句說話打破這尷尬的局面，唯有身為見習隊員的梓旻發聲：「係呢⋯你叫我嚟⋯做咩？」

浩政向Albert及那位大姐姐般的女士說：「哦！Albert、Rose，佢就係我講嗰個人。」

「你好，我係Rose，係M隊隊長。」剛才那位和藹可親的大姐姐溫柔地說：「T隊要Standby，搬出無力作賽嘅人，之後要搬上醫療室，聽浩政同Albert講你可以一次過搬幾個人。」

「係，每次應該可以搬4至6人。」梓旻回答，只要他們不需自主飛行，梓旻的確可以搬約六人

「太好，但點解唔可以做直接搬幾個人出場嘅工作，只俾佢幫手由場外搬人返醫療站呢？」Albert問浩政

「搬人出場要快，佢未完成掌握力度，驚一陣間出事。」浩政提出他的疑慮，這令梓旻想起楓的那條問題「不過大力過頭會唔會好似拍蚊咁變醬？」

「唔驚嘅，有我喺度嘛！」Albert有自信的說

「你最多幫到一個人，佢一移動兩個或以上，就死咁幾個。一係我准佢係你陪同下，移動最多一個參賽者出場。練熟咗先啦！」浩政堅持不讓梓旻移動多於一人

「明白！」梓旻回應，Albert笑著拍一拍梓旻的肩膀

「咁我走先，Buck應該又發脾氣喇！」孔sir道

浩政立即露出不悅的神情，皺眉說：「麻煩友一件，死唔斷氣咁。」

「唔好咁講，肯堅持，有毅力嘅人而家唔多喇！我走先！Bye！」孔sir道別離開

「你哋走先，我想同梓旻傾兩句，一陣叫佢搵Albert。」浩政手勢示意梓旻過來他身邊，鼓鼓爸爸及Albert也相繼離開，只留下Crystal及Rose二人。

「咁我係個邊等你！」Crystal指著長椅，但沒有得到浩政的回應。Rose苦笑向梓旻揮揮手後，便與Crystral肩並肩離開。

所有人離開後，浩政問：「頭先表演賽睇到我點做嘛？」

「呀…升起啲石、撥開啲人？」梓旻嘗試回想剛才的比賽

「係，升起石你就練得熟，拋出去都係個學問。一般而言，冇其他阻礙因素下，你對付真正嘅敵人，你幾大力都得。但當你要生擒或唔殺嘅人，或者現實啲，有人質、民眾同大量建築物嘅時候，你要控制力度同隨時停低。今次比賽對你而言，係一個好好嘅實踐機會，而且仲可以喺咁近距離睇到比賽，你要好好努力！」浩政手拿著一枝白色的筆，邊揮動筆邊說

「知…知道！」梓旻因太注目於那枝筆而走神了

「呀！仲有，你屋企人會唔會嚟睇比賽？」浩政似乎注意到自己揮動筆導致梓旻走神，把筆放回口袋裡去

「唔清楚，今日先知時間表，點解咁問？」梓旻對他的問題有點不解

「冇嘢，你入場搵Albert啦！」浩政擺擺手，梓旻就離去

梓旻離開時，Crystal 打算上前找浩政，但Taylor 不知從何跑出來，大叫：「浩政！你好型！」浩政多謝Taylor 的讚賞時，Crystal 的眼神充滿妒忌及怨恨。估不到亞豪他們的胡言是真的，梓旻於被Crystal 發現他看到她妒忌一面前，立即離開了。今天第二節比賽已經開始了，他走到A1集合地點查問Albert 的位置，得知他已到了B1的入口附近。梓旻沿訓練場外面走到B1入口的位置，已見Albert手拿黑色衣物及望遠鏡在門外等待他。

(待續)

仲有一兩千字就追上Penana 同紙言
下個月開始返工啲嘢就會愈嚟愈忙，雖然連登暫時得個位數正皮同幾位讀者留言，但我係唔會放棄呢邊

請大家繼續支持，多多留言正皮留名，多謝！

寫得幾好，唔知原來劇情係唔係比賽完就結束，進入下一章。
呢種場面幾似漫畫＜狐忍＞嘅中忍考試，＜獵人＞考牌。
通常會中間插入啲刺激場面，有人搞破壞等等，再帶出世界觀，未來敵人，伏筆。

我的英雄學院

多謝比賽後會有下一章，的而且確會之後帶多少少未來敵人嘅走向。

關於伏筆，人物嘅動作、性格、往事、角色之間嘅關係同某啲角色嘅名都嘗試留咗少少伏線/鋪墊希望同時可令每個角色立體啲

多謝支持 老實講，三套漫畫都係我鍾意嘅漫畫，尤其比賽中成長呢part我最鍾意。可能因為咁都受啲影響，我構思故事時其實係覺得淨訓練太悶，不如玩啲比賽啦！

主角初嚐比賽中，我比較傾向心理描寫多少少。鑑於第一次寫打鬥同寫作能力上，我未有太大信心寫得好刺激，到時請多多指教

「呢邊呢邊！套上身！」Albert 拋了一件黑色上衣給他即場穿上身，然後帶他進入會場，原來比賽場地的四邊都留有約四人身位的通道讓工作人員通過。通道分兩層，從長樓梯走上上層，上層可以清楚看到整個比賽場地，每區也有個值班室，室內有坐位及數部小電視看到每區的情況。小電視下有二十盞小燈炮，根據當場的參賽者人數亮起，一般是白光，若參賽者被判斷為無力作戰，白光就會轉成紫光。梓旻的工作是搬出他所屬區域，即B區，的參賽者離場。Albert提醒他，雖然他們當值的位置有防彈玻璃保護，但隔著玻璃使用念力效果不夠好，最後為更快帶傷者離場，他們還是需要在無任何保護的通道上執行職務，這時候就要小心被誤傷。

二人坐了一會，Albert開始說：「好懷念浩政仲有幫手嘅時間⋯」

「佢都要？」梓旻驚訝望著Albert，但問完就有點後悔，浩政總會有身為見習隊員的時候，總要做這些工作吧…

「係，佢上年先升做高級隊長，本身O隊就得啲被人放置喺度，有人醒起先叫嘅人，例如富哥呢啲傷兵咁，入咗O隊冇人記得就一直冇嘢做，所以每年都有O隊人退隊，尤其係一啲因被注射非法AP劑而入隊嘅人。前年其他高級隊長，主要係亞塵同甘生，討論起O隊被遺忘嘅情況，決定正式成立分隊，就升咗浩政上去，本身佢喺T隊隊長。」Albert說起之前O隊的情況，梓旻十分感興趣：「浩政又願意嘅？佢唔似想升職，攬麻煩事上身嘅人。」

「唔清楚，但都冇乜得拒絕，俾三個高級隊長點名。不過，佢近時冇而家咁成日攬嘢上身做。唔知點解攬咁多嘢上身，一啲都唔似佢。」Albert雖然口在說過去的事，但視線從沒離開過比賽場

「你哋同期？佢A Mark同大家唔同，冇好驚訝咩？」梓旻睜大眼睛看著Albert

「同期～當時我知有人A Mark特別唔同，都有留意佢。佢份人怕麻煩到連同人交流都少。最初佢係新生訓練個陣都唔係咁厲害，之後覺力賽開始就唔同曬，可能佢係實戰派。」Albert望了一眼梓旻，再望回比賽場，梓旻發現自己完全忘記了工作，便立即坐好，眼望回比賽場

靜了一回，梓旻突然記起剛才醫療站外的事：「我想問⋯佢呢⋯同Taylor呢⋯係咪⋯關係好好？」

「支援組個Taylor？幾好掛，浩政升上高級隊長之後成日去支援組，成日見。做咩咁問？」Albert此時居然在側拿了一包朱古力條出來，拿了一條咬在口邊，然後遞給梓旻

「因為我見Crystal 姐好似⋯唔太⋯唔太鍾意浩政同Taylor見面咁。」梓旻拿了一枝放進口，打算下一節當值也要帶些零食來

「哦⋯唉，Crystal 咁靚女，都唔知點解鍾意佢⋯」Albert搖搖頭

「個個都知㗎？」梓旻瞪大眼睛

「公開嘅秘密啦！你睇佢個反應，又成日想癡住浩政。坦白講，個個都睇得出浩政根本對佢冇興趣。」Albert又咬一條朱古力條

「咁浩政又唔拒絕人？」梓旻又吃了一條朱古力條

「冇講明，點拒？你都睇到頭先嘅態度啦⋯⋯已經同拒絕差唔多。不過⋯我地有懷疑過根本浩政唔知咩事，佢有啲嘢真係完全唔理，唔想知就真係唔去嘗試知。好⋯有嘢做，B2區有人瞓低咗，升起佢帶返過嚟，快少少但唔好傷到人。」Albert在左側拿出了兩樽水，遞了一樽給梓旻

談了那麼久，終於有第一位退場的人，梓旻於場外用念力遠距離把人升起，再拉過來，參賽者安全離開場外了。

「太慢，要快多少少。呢場唔算激烈，如果個比賽激烈啲，搬運過程佢可能中流彈又傷多啲。你而家搬佢去醫療室，出門轉右直行有個帳幕就係。」Albert指指門口的位置

下了樓梯，走出門口轉右直行就看到藍色帳幕，梓旻跟帳幕外的工作人員打招呼後，就把身後飄浮的參賽者帶入帳幕。當值的樺上前指示他把人放在其中一張病床，其後兩M隊隊員一同上前，在病床三邊分別檢查參加者傷勢及進行治療。由於梓旻帶來的是這日第二位傷者，帳幕內幾乎都沒幾個人，醫療隊的人比傷者更多。正當梓旻轉身離開時，後面傳來熟悉的聲音，那人向某人道謝及道別後，帶著啜泣聲快速離開了帳幕。從側後面看，似乎是Crystal。然後，Rose從帳幕內面的房間走出來，微笑走向梓旻：「點解你嚟嘅？」

「我送個參賽者嚟。」梓旻眼神望一望門口：「係呢⋯Crystal ⋯咩事？」

「係因為浩政。你要小心唔好係佢面前提起浩政。」Rose苦笑

「明嘅。我⋯返去先啦⋯⋯」梓旻步出帳幕，看著Crystal 的背影遠去後才回到會場，那日他幫了幾場比賽，沒什麼特別刺激或深刻的場面，梓旻不太認為自己從他們的戰鬥方式學到什麼，但他送參賽者出場的安全性及速度也有所提升。

(待續)

覺力賽篇第十章: O隊出場

第二日的覺力賽開始，梓旻再回到柏德斯加訓練場，這次他正式穿著行動制服開工，由於他要和詡他們下午需要討論比賽的合作方法，因此請了半日假。他經過A1集合區時，他見到鹿仔、亞豪、富哥、Dali及Kiki在準備比賽。 

「喂！梓旻，你响到做咩？」亞豪興奮地揮手 

「我幫手搬啲人出場。」梓旻回應 

「幾好吖！希望一陣唔使你搬我哋出去。」鹿仔說笑 

「係⋯係⋯係囉！」Dali吞吞吐吐的和應 

「有咩事記得第一時間帶走圓婉，就算我死，都唔想佢死係呢度！」富哥似乎在說笑，但他厚實無起伏的聲線，聽起來似認真的 

「唔好玩佢啦！邊有咁易死吖！圓仔可？」Kiki笑話

 「我係女嚟㗎！我係女嚟㗎！」圓婉大叫 

「你哋對咩人？」梓旻問 

「Buck加⋯其他三位P隊隊員再加一位M隊隊員，唔記得咩名。」亞豪回答 

「好心你就記下人名啦！人哋叫Cade、亞點同Edith，M隊嗰位叫Fay。」Kiki補充 

「冇乜所謂，反正講咗名佢都唔識㗎啦！」亞豪鬆鬆肩 

「我之前話連輸兩年俾浩政，第三年懶死唔走嘅就係Buck！」鹿仔道 

「太纏身嘅男人冇人會鍾意㗎。」Kiki道

 「人哋有老婆，仔入埋隊喇！」富哥提醒 「真係想知佢老婆咩樣！」Kiki道

「好似話今日嚟咗睇比賽喎！」鹿仔提出 

「慘！今場對我哋，嚟睇佢輸。」亞豪有點驕傲的 

「咁大口氣，一陣第一個出場嘅係你吖。」富哥笑說 

「變陣賽嚟㗎！一陣十五分鐘一轉隊我就㨃冧咗你！」Kiki威脅道 

「嘩！放過我啦！」亞豪做出投降的姿勢 

「好喇！差唔多時間入去喇！梓旻都要集合喇！一陣見！」富哥提醒大家 

「好，一陣見！」梓旻向他們道別 梓旻回到B區的值班室，Albert已經坐在值班室等待比賽開始，看到梓旻後，露出有點嚴肅的表情道：「梓旻，今次Buck出場，我形容一次佢個樣你聽，等你認一認啲人，你要認住佢，唔好送佢出場。」 

「點解？」梓旻把自己帶來的零食放在椅子下 

「一嚟，佢唔認輸，次次送佢出嚟都掙扎，你搞唔掂佢，一唔小心大力過頭就大鑊。二嚟，佢好憎浩政，知你同浩政同A Mark，又負責送佢出場，就唔知會發咩癲。」Albert忙著開啟儀器 

「明白。」梓旻也幫手開機及檢查

 「仲有，浩政批准你升兩個人出場喇！加油！」Albert拍拍梓旻的肩膀 

「好！我會努力！」梓旻很高興聽到這消息 

「話說，今日到O隊嘅隊員出場。」Albert終於完成所有準備工夫

 「應該都係掉下石同埋身打下交咁就一場？好似場場差唔多，冇乜新意。同埋，好似冇人會用得曬兩個鐘嚟比賽。」梓旻想起昨天那枯燥無味的比賽止 

「冬夏覺力賽係咁上下㗎喇！又有新人，個場太細，唔俾用武器，就只得個幾味可以做，比賽好少會超過一個鐘。」Albert把螢幕音量調高 

參賽者進場了，O隊的一眾人被安排為紅隊，他們進場後的歡呼聲不斷，亞豪也相當興奮的揮手，活像大明星一樣。O隊這邊各人都表現得頗為輕鬆，相反藍隊的人相對神色凝重。Albert向梓旻介紹藍隊各人的特徵：

Buck的身材完全是健美級數，比孔Sir更健壯，感覺上行為不敏捷，加上陸軍裝的髮型，再配上行動制服，就像一個軍人一樣，他雙手的A Mark覆蓋了整個手臂，據Albert說，A Mark甚至延伸至兩側腰旁；

Cade沒什麼肌肉，A Mark如手環般於兩手手腕上圍著，唯一顯眼的地方是他那淺灰色的頭髮；

亞點，人如其名，在比賽場上看她活像一個小矮人，全場個子最小的女孩子，但周身肌肉，右手A Mark如彈弓纏手一樣；

最後是Edith，栗子啡短髮的她那自信滿滿的笑容和站姿令人印象最深刻，據Albert說，她那A Mark是在左手手心的一個圓點，她那自信甚至到了自負的程度，但她AP之弱是出了名，因此她練得一副好比孔Sir的身材，及完美學會了Buck對戰鬥時的執著，如蚊子一樣，弱又煩人，卻又隨時吸你血。

（待續）