《覺能之戰》

七年前，突然大量黑影從天而降吞食人類變成黑影怪物，然後不斷殺害及捕食人類。雖然當年黑影怪物已被消滅，但仍有時會出現一些在社區。同時，用黑影怪物基因研發的超能力，通稱「覺能 Awakening Power (AP)」，於社會流通。黑市的非法注射覺能劑的犯罪者，即覺能犯 (AP 犯) ，出現。AP特種部隊為應對黑影怪物和AP犯而設，提供大量褔利吸引人加入。

主角梓旻也因個人期望及良好的福利及待遇加入部隊。初時的部隊生活充滿挑戰及歡樂，後來發現某AP犯罪組織後，梓旻發現部隊裡及身邊的人也有令人難以接受或難以理解的秘密，背後的事實及真相超出他的預期。

作者的話

故事主以書面語為主，對話會用廣東話。
故事已經喺penana同紙言更咗一段時間，所以頭幾篇會更得快一啲，直至追上penana同紙言嘅進度。
Penana:
https://www.penana.com/story/107943/%E8%A6%BA%E8%83%BD%E4%B9%8B%E6%88%B0/
紙言:
https://www.shikoto.com/articles/250621.html
希望大家鍾意個故事，同可以俾啲意見我，令我可以寫得更好！

〈入隊篇第一章: 入伍面試〉

「又到咗一年一度回憶『黑影日』嘅日子，相信大家對七年前嘅今日所發生嘅事仍然記憶猶新。我仲好記得當時咁啱喺其中一個遇襲地點附近行緊街，突然天空一黑，之後就有一大班人好遠地方尖叫，然後就見到一隻怪物追過嚟。嘩，嚇到我！」電視正播放有關『黑影日』的節目，主持人的說話引起了餐廳內眾人的熱議，七嘴八舌地分享自己在黑影日的經驗，有人說得繪聲繪影，有人明顯在誇大其詞，可見黑影日的經歷在眾人的記憶中仍然歷歷在目，當然對於侍應們也不例外

「喂！當時你地喺邊？我當時屋企瞓到隻豬咁，醒個陣都完曬！」一名束馬尾的女侍應問起其他兩位同事在黑影日的經歷

「我算係好彩，機鋪打完機諗住走，一打開門就有成班人衝入嚟，叫我地唔好出去，仲話有怪物。仲以為佢地癡線，點知睇手機先知係真。好彩我怕咗個幾條衝入嚟嘅癡線佬，唔敢經過佢地出去，返入去繼續打機。」旁邊一名高瘦的男生興奮地回應

「生死關頭居然返去打機…」女生露出鄙視的眼神道

「鬼知咩事咩…你夠瞓到成隻豬咁啦！咁梓旻去咗邊？」男生望向身旁較他矮小一點的黑色短髮男生

「我…同我媽喺東蓀曲環行緊街。」梓旻把玩手上寫單用的原子筆

「喂！個邊好似都係重災區！」高瘦的男生非常驚訝地叫道

「係，本身係去接收工嘅家姐行街食晚餐，點知我同亞媽去到附近，望住我家姐喺好遠天橋行緊嚟…突然一下重響，天橋就冇咗……然後就見一隻黑色怪物背住我地食人，我同媽被人群迫向反方向，都冇時間去擔心我家姐。」梓旻把原子筆放回左胸口的袋子裡，目無表情地補充道

「咁你家姐…」女生皺起眉

「唉……失蹤咗一星期後搵返，都算不幸中嘅大幸，但就非常怕啲怪物同AP能力者。」梓旻嘆氣道。AP (Awakening Power)，又稱「覺能」，是某生物科技公司用黑影日出現的怪物研發的一種超能力稱號，也因為是由怪物作為原料研發，所以姐姐對此極為反感。

「我記得你諗住考AP特種部隊喎？一定要注射AP劑先做到？咁點算？定係你入研究組？」高瘦的男生忍不住好奇地問

「唔係研究個邊，我想入執行組，我已經瞞住我家姐遞咗申請表。我媽都讚成，我諗唔會話同我斷絕關係掛……」梓旻低下頭有點悶悶不樂的。此時他們看到老闆於廚房走出來，三人隨即散開回到工作

「梓旻，你下星期個假批咗，努力啦！」老闆拍一拍梓旻的膊頭，梓旻苦笑回了一句：「謝謝」

實際上，梓旻這一決定已考慮了至少三年，他知道家人會反對，尤其是極度反對怪物及AP的姐姐。但奈何進入AP特種部隊後的工作待遇實在太吸引。在這世代，沒有學歷且沒有父母幹的人沒有什麼好出路，而AP特種部隊正正是一個不錯的賺錢途徑，先不說薪資特別高，所有的政府或非政府機構的費用及車資幾乎全免，還有大量資助津貼獎金予家人，唯獨工作內容非常危險。梓旻清楚AP特種部隊面對的不是一般罪犯，而是於黑市非法注射覺能劑的犯罪者，即覺能犯 (AP 犯)，及有時出現的黑影怪物。他也曾經糾結過，但就在前些日子，就在他放工回家的時候，遇上了舊同學，這同學指出多名舊同學也為生活進到AP特種部隊，現在生活相當令人羨慕，令他下定決心提交申請表。

「我出去喇！唔好俾家姐知道，唔係又煩一餐㗎喇！」梓旻起行去面試前再一次叮囑母親。由於面試地點偏遠，梓旻需清晨時份起行，這正合他意，因為他姐姐都是晚起的人，為免她囉嗦，還是早早離開更好

「得喇！我知點應付佢㗎喇！不過……你真係想考入去？如果為錢，屋企真係未窮到要搵命駁喎！」媽媽擔心的說，其實媽媽也不太想兒子做那麼危險的工作，但眼見兒子第一次那麼堅定地決定去做一件事，她也難以阻止

「我已經考慮得好清楚，特種部隊都開咗五年，都冇乜人死過……而且，佢人工待遇又好好，假期都多。同埋，而家都好多人入咗去做，識用覺能仲可以保護屋企，乜冇嘢唔好。」梓旻挺直背部，露出堅定的眼神，表明了他進隊的決心

「都係嘅……咁小心啲喇！」媽媽雖然非常擔心，但也未有阻止他

他背著背包到樓下，坐上了到特種部隊總部的特別的士，由於總部在高石巨島的某個沿海區域，很偏僻，車程近兩小時，他在乘車的時候已經開始擔心離開時如何捱過這麼長的車程呢…下車後，他走了約五分鐘，終於到達一座極高且有透明玻璃外牆的大樓前，而玻璃大廈的後面較遠處有座較矮及灰黃色外牆的建築物。這裡就只有幾座建築物，它們都被綠油油的山丘包圍。玻璃大樓方方正正的，外由圓形的水池所圍著，水池四面也有木製地版路供人跨過水池走進建築物。梓旻走到木製地板才發現這根本是一道闊木橋，水池根本不是池，那是瀑布，水流近乎垂直地傾瀉而下，肉眼見不到瀑布的底部，看清楚原來有玻璃地板在上，至少不怕因小心造成人命傷亡。

「hi，你又係嚟in部隊？」一名看起來和梓旻差不多年紀且臉帶稚氣的男子在身旁出現，他有一頭蓬鬆而短的啡髮，身高比梓旻高一些，身材頗為健壯。梓旻以點頭回應他的問題，那男子接著自我介紹道：「我都係嚟in先峰部隊，我叫亞詡！」

「我叫亞旻，你點知我係嚟in先峰？」梓旻好奇問

「運動衫」詡笑著回答，梓旻這時才發現原來大家也穿著運動衣，兩人相視而笑，接著一同步進玻璃大樓。大樓內部的設計像一般的商業大廈，時尚且高級，左邊是通往寫字樓的升降機大堂，右邊是一個特大的商場。他們走到升降機大堂，看到一塊指示牌寫著「先峰部隊面試 五樓」，二人乘搭升降機到達五樓，隨即見到登記處。

「咩名？幾歲？號碼？」工作人員像機械人般問道

「戴…戴梓旻，25歲，號碼係xxxxxxxx」梓旻有點反應不來
「吳一詡，22歲，號碼係xxxxxxxx」亞詡也報上名來

「可以喇，攞份表格同合約入去坐低填，文具係側邊攞。」 工作人員只有在核對相片那一剎抬過頭，態度冷淡的，令人感到不舒服

二人拿了表格及合約就隨便找個座位坐好。填了一會，就有工作人員開始介紹面試流程，面試總共分三部分，且分三日進行。第一部分是性格測試及體能測試，參加者需完成一份性格問卷，個別見面試官及完成體能測試；第二部分將是注射變種能力劑；第三部分是能力及基本知識測試。全部通過才算正式入隊。

「你知唔知佢地體能測試係測乜，網上完全搵唔到。」梓旻聽完面試流程後小聲問詡。

「次次唔同，總之就係正常人做唔到嘅要求。佢哋只係想test下你耐力，因為支針嘅副作用都幾難頂，你冇咁嘅耐力，好難捱，總之盡做就得。」詡非常樂意回應。

「你點知？」 梓旻疑問道

「問朋友，佢地形容的好恐怖，好似好難頂，有定心理準備會好啲！」詡回應後，梓旻更為擔心。詡的體格明顯較他好，先論身高比他高半個頭，手臂的肌肉證明了他有煅煉過。梓旻本來也是沒什麼自信心的人，眼見詡的體格明顯比他好都這樣說就更加失落。詡見狀立即安慰道：「冇事嘅！盡力做就得啦！你實得嘅！」梓旻只以苦笑回應

很快，他們就被安排進行一小時的性格測試。這部分梓旻輕鬆完成，接下來就是見面試官，面試房以黑白色調為主，房間燈光較暗，只有一張五角形的枱、兩張膠椅、一部小電視機及一大部錄影設備在旁，感覺像審犯室一樣。梓旻大力深呼吸一下，面試官示意他坐在對面，他乖乖的坐下後，面試官就開始自我介紹：「你好，梓旻，我係Eddie，好高興認識你，都歡迎你加入，坦白講只要過到體能，你就入到部隊，而呢節面試係為分派你嘅隊伍，考慮你應該入文職定上陣……」

「上陣！……我想，我想上陣。」梓旻未聽完就插話

Eddie 微笑靜了一會，邊寫文件邊說：「細心聆聽上級嘅說話好重要㗎！」

梓旻立即後悔自己太衝動，Eddie 寫完又望回梓旻：「上陣受傷，重傷或者……冇命都試過，敵人唔會留手，呢方面你知㗎可？」

「知！」梓旻不假思索的回應

「你都仲想加入？」Eddie維持他那有點陰險的微笑

「係！」梓旻繼續快速回應

「訓練會好辛苦㗎喎！」Eddie接著說

「冇問題！我有信心！」梓旻大聲且堅決的說

「可能有好長時間要留宿總部。」Eddie繼續

「明白！」梓旻再大聲一點的說

「可能要殺人……」Eddie此話一出，梓旻立即靜了下來，呆了一會，不知如何回答。Eddie 沒有等待梓旻的回應就接著說：「哈，講笑啫，我哋都好重視人命，絕不希望搞出人命。已經可以喇！你去體能測試啦！」

梓旻不太滿意自己的面試表現，覺得自己答得一塌糊塗，梓旻為此感到難過，但體能試還是要進行。他們首先要做身體檢查，就在檢查體重及脂肪磅那刻，檢查人員邊紀錄邊搖頭道：「過到體測係奇蹟。」梓旻萬分沮喪地走出檢查室，詡上前問道：「係咪話你過唔到體測呀？放心，係特登講嚟打擊你，我個個朋友都聽過！」詡這番話令他心裡舒服一點，感恩自己能在面試認識他。

收到體測內容後，梓旻面有難色的，詡在旁也不禁驚訝道：「嘩！咁多跑嘅？」梓旻當下只能盡力應付測試，及祈求離開時還有力步出總部。不出所料，完成一半測試後，他完全進入半死狀態，詡已經在旁邊的垃圾桶把早餐吐得一乾二淨。其後的項目，梓旻完全忘記自己如何完成了，只記得他走出總部的時間一定比進入總部的時間多。

伴隨肌肉酸痛，梓旻一整星期進入昏睡狀態，父母偶爾會進房為他按摩，那段時間他覺得自己像廢人一樣。雖然他姐姐曾問過為何他那麼疲累，幸好母親幫忙，否則吵起上來就更辛苦了。但紙始終包不了火……一星期後，他收到第一部份合格通知，他心中又驚又喜，立即跟母親報告結果，忘記了姐姐放假在家休息，此消息令姐姐極度憤怒：「咁危險嘅工，就算注射唔死，都捉犯都可能會死，你有份安全嘅工唔打，走去送死？」

「而家好多人都想加入，加入到嘅都冇事啦！你問下亞爸亞媽佢哋朋友好多仔女都有入伍？係最快最好福利嘅工，仲可以用能力保護屋企……」梓旻知道他總有一天會與姐姐為這件事吵架，只是沒想到這刻來得這麼突然

「保護屋企？你入隊返緊工個陣，你會係屋企咩？有能力唔係大曬，到時保護唔到屋企，你自己都有事咋。」姐姐非常憤怒且激動的罵他

梓旻深呼吸了一下，嘗試回復穩住自己的怒氣，以免事情進一步惡化：「已經決定咗加入！你阻止唔到我。」

姐姐繼續破口大罵：「你想死，唔會有人阻止你！」姐姐話說完就氣沖沖的回房，梓旻生氣得把玻璃杯亂掉，右手手掌因而受傷流出鮮血，嚇得媽媽尖叫起來。晚上，梓旻難以入睡，望著高架床上層的床板，想著大概姐姐已經熟睡了。回想起姐姐的說話，都明白她只是過份擔心才這樣說，想著想著不知不覺地進入夢鄉。那晚他夢到了姐姐坐在床邊，說著責罵他的話。

就這樣他和姐姐開始了整整一星期的冷戰，雙方互不相讓，難為了一向不喜歡家內不和的母親。然後到了第二部份面的試早上，媽媽照舊為他整理衣服，擔心道：「你完左打比我，我接你好唔好？」

梓旻拒絕道：「唔好啦，都大啦…唔好睇。」

他明白上次回家後的狀態嚇得媽媽擔心數天，但始終都不能依賴她。第二次來總部，感覺車程比之前快了點，或許是因為上次回程太辛苦了。漫長的車程中，沒事可做又睡不著的他此刻突然緊張起來，始終這次回去是要注射藥劑，如有排斥反應怎麼辦？連體測都那麼辛苦，入隊後又是否能應付呢？雖然在車上想出多個問題，甚至有一刻想退出，但當他再次站在那楝高高的玻璃大樓前，所有的疑問及擔憂也立即煙消雲散。他再次回到五樓的房間，但人數顯然比上次少了一半。

( 待續 )

〈入隊篇第二章: A Mark (Awakening Mark)〉

「喂！你都入咗……」詡突然從後走出來，但話未說完，就突然退後幾步。

「做咩？」梓旻立即檢查身上有沒有附上奇怪的東西

「你……冇沖涼幾日？好臭！」詡捏著鼻子，臉有難色的道

「唔係掛！？」梓旻立即大力聞一聞自己身上有沒有異味

「講笑咋！咁認真！」詡又突然笑起來，再把手勾搭在梓旻的肩膀上，梓旻因此而鬆了一口氣

他們進去後隨便找了個較後的位置坐下，工作人員很快就開始解說今天的流程。他們拿著一張接種同意書，上面寫著「覺能劑 (AP劑)的副作用：輕微發燒，頭暈及嘔吐。似乎副作用不重。而接種成功的人可能會瞳孔變色或身上有類似胎記的「A Mark (Awakening Mark)」出現，這些都是正常現象。」梓旻反倒覺得正常現象比副作用更嚇人。

「聽聞少數人會喺耳仔出現A Mark，多數人喺手，但眼變色嘅人多數負責指揮工作。」詡細聲說道。

「有冇講點解？有咩分別？」梓旻好奇的問

「冇點解㗎，但你居然連咩分別都唔知？」坐梓旻前面的一個女生轉身答話。這女生黑色長髮，束著馬尾，即使坐下也看得出她個子算高，黝黑的膚色及頗健碩的身材看得出有長期煅煉身體。雖然這女生看起來跟他差不多，但說起話像是一個小朋友般幼稚：「個個都知，印出喺耳就入醫療隊，出喺手就先峰部隊打前線，出喺眼就先峰部隊打後防。印喺手嘅人多數係肉搏戰多，喺眼嘅就念力同頭腦戰多。」

「亞楓……你都係聽朋友講知，咁樣話人唔太好！」旁邊淺啡色中長髮，五官標緻的女生轉身望向他們：「唔好意思，佢份人係比較……直接。我叫逸樺，希望大家可以好好相處。」這女生明顯比那個亞楓的女生有禮得多，她舉止溫柔且斯文，這和她那有點肌肉的身材形成奇怪對比，完全不像來投考先峰部隊的。

突然燈光轉暗，眾人目光也集中到演講台上，台上的投射屏幕播放出一段介紹覺能及部隊的短片。

「七年前的「黑影日」，一群黑色嘅外星生物如殞石般降落，襲擊附近嘅途人。雖然好快就被消滅，但仍然死傷無數。大部分外星生物屍體都收歸本生物科技公司 -- 「角」所擁有。為防止再次發生類似事件所引發嘅死傷，我地公司決定研發能對抗外星物種嘅武器。外星生物從天而降嘅第二年，我地成功研發出適用於人體嘅「覺能劑」，即係AP(Awakening Power)劑。接種AP劑嘅人都會有唔同嘅超能力，我地稱之為「覺能」，亦即係AP。由於始終都只入侵性的物質，且數據不足，現時仍未能推出予大眾使用。可惜AP劑推出後半年，突然出現一啲使用AP犯罪嘅人，即係AP犯，佢地唔知由邊度獲得非本公司研發嘅AP劑。同時，城內不時出現唔知從何而來嘅黑色怪物襲擊市民。為負起社會責任，本公司決定與政府合作推出一支覺能特種部隊。喺嚴格嘅訓練及充足嘅醫療設施下，為願意服務社會嘅各位接種AP劑，並讓大家參與各種拯救行動。在此，本公司感謝各位熱心且勇敢嘅參與，就讓我地攜手創造出安全且令人住得安心嘅耀王城啦！」

短片播完後，工作人員朗讀一次接種同意書的內容並提醒大家簽名後，就開始續一點名叫人到接種站接種藥劑。

「下一位，韋楓香。」隨著工作人員的叫喚，剛才黑色長髮的女生站起離開。

「八婆，希望之後唔會見。」詡小細說道，梓旻用眼神提醒詡，那女生的朋友逸樺仍在前面，示意他不要亂說話

「你地想入咩隊？我想入醫療隊。」逸樺突然轉身微笑道

「手啦，我唔太叻頭腦戰。」詡似乎對剛才說亞楓的壞話沒有一絲歉意，很自然地回答逸樺的問題

「我……我都係今日先知分別咋……」梓旻對自己的無知表示失望

「呀…呀…其實唔知都正常，我都係識亞楓先知」逸樺支支吾吾的安慰他，眼見梓旻失望的樣子，詡也立即點頭表示同意逸樺的話

睜開眼的一刻，他聽到生理監察器的聲音，接著是媽媽慌張大叫醫生的聲音。他努力回想發生了什麼事，同時亦嘗試對抗著疲倦的感覺。醫生到來檢查後，問了各式各樣的問題，最後他也抵抗不了疲倦感睡去。再次醒來時，看到的是媽媽的倦容，這次他可以自己起來說話了。從媽媽的話得知，他昏去後已即時報警送進醫院，昏睡了整整三日時間，醫生表示可能身體對AP劑有排斥反應，屬罕見情況。醫生不久後就為他檢查身體，並抽血送往特種機構檢查，如無意外明天可離開。抽血後兩小時，醫生就收到報告，內容指他的血液已有AP劑的成份，相信只是對AP劑反應過大所致。第二天下午，他就離開醫院，他來檢查電話訊息

楓：旻你失蹤左幾日去咗邊？
我：入咗廠
詡：咁大獲？
樺：冇事嘛？
我：冇，佢話排斥喎，但都成功接種，檢查曬全身都冇嘢喇
詡：咁就得啦！咁有冇A Mark？我係右手，你地睇下！（圖：啡色，像樹纏著整個上臂一樣）型呢！
楓：算吧啦！你睇我（圖：淺啡，像一絲絲巾纏著右手前臂）靚呢！
詡：切
樺：我係耳仔，好開心（圖：淺啡，左耳耳輪至耳垂位置，感覺像是戴了一個大型耳環一樣）

梓旻檢查左右手，再看看街上的鏡，眼沒有變色，耳也似乎沒有。在街上檢查始終不清楚，回到家再看一次手、耳和眼，但即使父母幫忙留意也找不到。就在他心灰意冷，脫衣準備洗澡時，母親發現他背上有朵如花一般的形狀。他似乎找到自己的A Mark，可惜他不知這是否正常或代表什麼。

接下來的兩天，他也是休息為主，沒有外出，甚至連走動都不多。他盡量安撫父母過份緊張的情緒，而姐姐似乎也停止了冷戰，但還是久不久就說出埋怨的話，梓旻決定保持沉默，不回應可減少很多煩惱。就在第三日，他終於踏出門口，回到總部進行最後一次面試，這次面試將決定他們進入哪一隊分隊。首先，他們需要進行的是身體檢查及紀錄A Mark位置。他們重回五樓的房間，此時各人都興高采烈的向身邊認識的人展示自己的A Mark。

「我真係第一次聽A Mark係背脊出現！」楓大聲道

「殊！」梓旻緊張的道：「我唔想咁快就咁引人注目！」

「瞞到一時，瞞唔到一世。五分鐘後就要入更衣室除衫檢查，你放棄啦！」詡笑言

「咁就俾我瞞多五分鐘啦！」梓旻壓低聲量

「A Mark喺特別位置嘅人……好似…好似都會有幾…特別嘅安排。」樺吞吞吐吐的說

「因為多數係黑市接種非法AP劑，A Mark先會出現係眼耳手以外嘅地方嘛！緊係要特別關注！」楓立即接著說。這讓梓旻更難受，他並不想如此「特別」，他開始想像自己要面對各種質詢，甚至被懷疑注射非法AP劑而非常擔心

「收聲啦！」詡咬牙切齒的說，狠狠盯著楓。

「唉…算啦…」梓旻愈來愈沮喪

那五分鐘對梓旻來說又漫長又難捱，就在工作人員召集男生進入更衣室時，他已經進入半放棄狀態，要來的始於要來。也許大家都誤以為他背部的A Mark只是個紋身，直到工作人員開始為他檢查身體前都未有人留意他那特別的A Mark。

「身體一切正常，A Mark係咩位置，咩色。」檢查人員邊紀錄數據邊說

「背……背脊，黑色。」梓旻又緊張又怯的回答

「吓？」 一直低頭寫文件的檢查人員終於抬起頭來，用驚訝的眼神望著梓旻

梓旻轉身讓人員檢查，檢查人員驚訝地望著及摸他的A Mark，嘴默默說著「背……背脊？黑色？ok，你著返衫。」然後工作人員打了個電話後，就叫梓旻離開，梓旻此刻心內無比的擔憂。他穿上衣服直至離開的期間都聽到其他人在旁竊竊私語。他又再回到五樓的房間，他感受到房內眾人的目光也集中在他身上，他低下頭向詡他們的位置走去，此刻只想找個洞躲起來。

「成班八婆咁！唔好理佢地！」詡也完成了身體檢查，他拍拍梓旻的背示意他不用管那些閒言閒語。

「點？有冇講咩？」樺見到他們立即問，女生也完成了身體檢查。

梓旻搖頭回應。

「起碼你仲可以坐係度就得啦！」楓香接著說

接下來，他們要聽入伍簡介。由於梓旻不願太顯眼，他們隨便找了個較後較側的位置坐下。今日大概的內容是簡單介紹覺能及接著下來的日子他們要做什麼。

「能力大概分三種，治療、力量及念力。所有人都可以用呢三種能力，只係某一種比較易上手。呢度有張時間表，下星期將要入營，一個月嘅訓練可以令大家學識簡單控制能力。雖然我地叫特種部隊，但因為大家嘅能力好唔同，入隊之後各小隊都有自己嘅處事風格，咩步操咩紀律就正式入伍先慢慢學，你地就當自己係中學生咁學下嘢就得。今日就咁多先，下星期見。」講師一身實驗袍，不用說也知她是負責研究工作，非先峰隊的人員

「嘩！有訓練呀！好興奮、好期待呀！我呢星期要練好啲體能先得！」楓表現得非常興奮

「你練體能無助於控制覺能㗎！我勸你練下個腦啦！我怕你聽都聽唔明亞SIR教咩呀！」詡又再找機會罵楓

「個腦點練？」楓天真的問。詡反白眼，樺在苦笑，梓旻開始擔心自己似乎認識了一個蠢材

「我就想休息多一陣，以後應該仲有好多訓練等我地。亞旻呢？」樺的聲線非常溫柔

梓旻思考良久才道：「我諗……我要返餐廳辭職先。」

(待續)

輕輕一推

〈入隊篇第三章: 能力及基本知識測試〉

梓旻回到餐廳向同事及老闆報告面試成功的消息，同事們都為他高興，老闆更提早收工，親自下廚為他慶祝。這讓梓旻有點不好意思，之前數天因他突然昏迷而人手不足，現在還慶祝歡送他，他卻只帶了一盒西餅作散水餅之用。

這星期比之前兩次都過得平靜，可能姐姐都終於願意和他說兩句話，在家壓力也少了點。一星期後又再回到總部，這次終於不用到五樓的房間，他們被帶到七樓的戶外運動場。工作人員派發每人兩件的訓練服，獲得訓練服的人很多都抱怨似中學的運動服。訓練服上衣是圓領、短袖及用純棉的材質製造，以白色做底，肩膀及腰側黑線條的設計，左胸口一個「角」，背部寫著「horn」的黑色字樣。配以綿質黑白色長褲，穿上更似中學生了。當以為平時多多投訴的詡會抱怨幾句時，今次他居然沒有說什麼，即使問他想法都只是說了句：「反正都只係訓練用。」

所有人換好衣服後都回到運動場集合，工作人員示意大家坐在兩個籃球場的中間等待。三名工作人員站在他們前面，明顯地中間的那人是較高職位的一位，這男人黑色短髮、身軀魁梧而高大及膚色黝黑，看來是長期處於戶外而造成。他兩手整個手臂也有深灰色紋身，如龍一般纏著整個手臂。他看上去非常嚴格，說起話來也有威嚴：「我係孔sir，由今日開始四星期，每日都會係呢度上堂或練習，上堂遲到會被處分。處分唔單止係革扯你，仲會打逆覺能劑，比你之前個針辛苦十倍，高燒、昏厥、反胃、流鼻血甚至昏迷。（楓樺詡下意識望向梓旻）反正你地入得都唔打算咁快走啦！捱埋呢個月就正式入隊。今星期我地主要係訓練你點升起個玩具波，大家而家去攞一個啦！」

所有人起來到球籃前排隊拿玩具球，詡站在梓旻後面，疑惑道：「喂，啲症狀中曬喎！你究竟有冇能力㗎？」

梓旻自己也不太清楚，只能皺皺眉，鬆鬆肩的回應：「唔知…試下咪知……」

「拎咗波嘅就過嚟睇示範！」隨孔sir一聲令下，所有人都聚到他面前：「我諗大家都知，我哋大概有治療、力量同念力三種，而家我地做嘅係最基礎嘅念力練習，做法係感覺全身嘅力量聚係手掌，然後想像力量從手心而出，好似有風係手心吹出令個波升到半空」他一邊說明一邊示範，把球放到右手手掌，球就凌空飛起

「只要學識點令佢凌空飛起，你地就可以學識點控制佢飛到幾高」說完，一陣強風從他手心而出，球已飛到不見蹤影，約一分鐘後球又掉下來回到手上：「練啦！淨玩升高個波呢下都夠你哋玩一堂，功課就係要你地後日就將波由心口位置升高過頭，聽日唔會見到我，有嘢問就今日5點前問，5點我收工喇！聽日開始24小時任你地用呢個場。我身後兩個助手會係度，到時有咩事就搵佢哋啦！」

各人看完示範後各自散開找位置練習，梓旻四人則聚在一起練習。使用念力也是他很想嘗試的一項能力，他此時此刻非常興奮，幻想著可以很快就靈活運用此能力。雖然他一度擔心自己不能使用AP，但很快他就不再擔心。因為他的球有輕微升起，最高可以升至五厘米的高度，雖不算高，但至少他確定球是升起來，而非他拋起的。由開始課堂已過三小時，他們都未有一人成功，所有人都決定午膳後再嘗試。午膳後過了一小時都未有人成功，眾人都十分氣餒。再過多一小時，突然有人興奮大叫：「得咗喇！我終於得咗喇！」

所有人圍著那個男的看，不斷問他要訣，又讚他是第一個成功的人。那男的露出勝利的微笑：「基因好！我爸都係好快上手！」

詡不爽地說：「佢爸就特種部隊P隊隊長，喺度得得戚戚咁！」

楓恥笑詡：「有人唔抵得人地靚仔又靠山啦！」

詡不爽的望著楓：「我先唔會，去練嘢！」

一個人的成功激發了所有人的鬥志，至少梓旻受到很大的影響，非常想成功。他閉上眼幻想力量聚在手中，大大的吸了一口氣，在呼氣一刻，雙手用力，幻想把球吹起。這一嘗試，他成功把球吹到高空再掉下，四人既驚訝且興奮，抱在一起大叫起來。這一成功令其他學員也士氣高脹起來，接著愈來愈多成功。直到晚上9時，所有人也成功至少一次。回到宿舍，梓旻洗澡後大字型躺在床上，滿意道：「今日真係開心！」

「你就威啦！第二個成功喎！仲要冇後台！」詡的一句令梓旻沾沾自喜，他期待明天的到來，期待成為最快把球升起的人。可是事與願違，第二天的練習裡，他反成為了唯一一位不能把球升高於頭的人。

「唔好灰心啦…仲有時間。」詡拍拍梓旻的博頭，安慰道

「唔擔心就奇啦，聽日就要交功課喇！」楓完全沒有考慮梓旻的心情，實話實說

「楓呀！」樺皺著眉，要求楓住嘴，再拍拍梓旻膊頭：「可能只係今日狀態唔好，返去瞓個覺，聽朝早啲嚟練啦！」

梓旻沈默了一會，再答：「我都係練多陣。」

其他人都回宿舍享用晚餐，只剩下梓旻一人練至晚上十一時，他也只能把球勉強升至頸的位置。心灰意冷的他放下球，坐在地上休息，各種悲觀想法湧現。「係咪我接種失敗呢？」「係咪我根本唔適合用AP呢？」「我係咪一早聽家姐講唔入隊仲好呢？」

此時，球場大門被打開，一個高大的黑短髮中年男子走進來，他耳輪至耳垂的A Mark及一身的醫生袍可以猜測到他應該來自醫療部的人。A Mark不但覆蓋很大範圍，甚至出現像懸垂式耳環的情況，快長至肩膀位，這顯示此人的力量相當強大。

「hi，咁生面口嘅，新人？（梓旻點頭）咁夜嘅？」那男子拿出一包香煙，抽出一枝放進口，邊點燃邊說話

「我……我仲未升到個波高過頭……」梓旻失落的說

那男子望一望梓旻，吐一口煙圈，再坐在梓旻旁邊：「練咗幾耐？」

「今朝9點開始。」 梓旻看著男子調整坐姿，他似乎在尋找令他舒服的坐法

「嘩，好耐喎！特種部隊嘅人通常半日就得，可能……係你冇乜天份入特種。」此話一出，梓旻更加失落，那男子接著說：「咁又唔使咁down，醫療同文職嘅人都要人，你可以考慮下。」

「但係……我想入先峰隊……」梓旻支支吾吾的道

那男子再吐一口煙圈：「都係俾多條路你考慮下唧！你明啦！(吸了一口煙)先峰隊要面對AP犯同怪物，用AP叻嘅人都會陷入苦戰，冇天份嘅人？(吸了一口煙，再吐出煙)同送死冇分別。做醫療同後援冇乜唔好呀！至少唔使死先。」說完，那男子沒有離開，二人在尷尬的氣氛下坐了一會，他把煙吸完後才站起把煙蒂掉進垃圾桶。離開前也不忘再次勸說梓旻轉隊。

梓旻仰望星空，離島的天空特別清，星星也特別亮。經那男子一說，他更加猶豫，反思自己應否繼續下去，是否真的不適合繼續呢？此時，大門又再被打門，難道是剛才那位醫療隊男子？梓旻望過去，這次是一位較剛才男子年輕矮小的男子，他穿得非常輕便，難以估計他來自哪一隊。那男子走過來望一望他，再望一望玩具球，他一雙淺色眼睛顯示了他的能力是念力，可惜燈光太暗，未能看清雙眼的顏色。那男子雙手插著褲袋，眨了一眼，球隨即升起，跟著他的視線移動。時而升到肉眼看不見非常遠或高的地方，時而快速下降。球飛到遠處辦公室窗外，突然極速飛到梓旻面前停下。梓旻嚇得向後退了一兩步。

那男子大笑著，再把球移到手心中，邊拋玩著玩具球，邊說：「識控制嘅話，念力真係一樣好好玩嘅嘢！我之前要練到離開我50米，用咗…三個月，100米用咗兩個月，1公里用咗一個月。愈練愈上手，愈練愈飛得遠（他把球拋給梓旻）開頭係辛苦啲，努力練就有成果。咁夜你仲係度練，辛苦曬！加油！（拍了一拍梓旻的背）不過……係時候要抖下，而家就嚟12點，聽日仲要訓練。」說完，那男子就離開，雖然梓旻最後也不知他是誰，但那刻男子短短的幾句話令他感到有一股力量從心而出。

他突然覺得自己不應這麽快放棄，那晚回到宿舍睡了一覺後，第二天他竟以最佳成績完成功課並得到讚賞。此舉令他在班內變得受歡迎，雖然很多人來討教，但他也不知自己如何做到，只是建議重覆練習即可。而第二堂的念力課是把氣球、玩具球及網球拉扯及壓縮至爆破，梓旻很快就能弄破氣球，但玩具球及網球外皮較硬，梓旻未能一兩日間完成，此功課期限為一星期後，詡對此有些微怨言：「教唔夠一個鐘，坐下就收得工。而我地就自發練一星期，佢個位都好好做喎！」

一位同學聽到詡的說話後走過來，是之前最快把球升起的人，答話：「孔sir唔只要訓練新生，仲要出其他搜救工作，而家P(力量)隊嘅高級隊長長期缺席，佢要做埋高級隊長個份，冇你諗到咁懶懶閒。」

詡露出不快的表情，嘴裡喃喃自語的表示不滿，但那位同學未有理會他，轉向梓旻友善地自我介紹：「我叫尚華，我爸係P隊嘅隊長，我都打算入P隊。你呢？你叫咩名？你個A Mark係邊？我見你耳眼都冇A Mark，我仲諗你係咪會入T(念力)隊，你操控得咁好。」

梓旻望望尚華右手臂如鱗片般的深啡色A Mark，不用他多說也知他是P隊的未來成員。梓旻咬了咬唇，A Mark被衣服掩蓋著，當然就不知他那奇怪且與眾不同的A Mark，他細聲答道：「我叫亞旻，我…個A Mark喺……喺背脊……」

尚華驚訝得睜大雙眼道：「我未聽過有係背脊，我可唔可以睇下？」

梓旻快速退後了一步，望向四周在練習的同學：「下次先啦…總有機會嘅……」

尚華突然醒覺要人當眾脫衣不太好：「啊！都係，下次先。不過你都係有心理準備要入「棄兵」隊。你連A Mark都唔同過人，好大機會要入，小心啲。！」

尚華離開的時候，詡做出了鬼臉，活像一個十歲小孩子般。梓旻聽完後有點不解，雖知什麼是棄兵，但不知有這樣的隊伍，就問詡：「咩係「棄兵」隊？」

詡把玩弄著手中的氣球，答：「應該係零星分隊，多數係其他三隊唔要嘅人。但如果我要同個佢同隊，我寧願做棄兵。」

梓旻皺皺眉，望著詡：「亞詡呀…你覺唔覺得……好似好多人你都睇唔順眼……」詡沒有理會，繼續練習。

(待續)

第二星期的第一天是資料課，他們又再回到五樓，聽著支援隊人員介紹黑色怪物的種類及資料。

「低級嘅黑色怪物分兩種，一種叫紅核，另一種叫百核。紅核通常係一個成年人的大小，但有時都有例外，可以細到似小朋友咁細，但外表都一定係黑色同呈橢圓形。佢地會伸出觸手，多數進食先會張開口，口入面似黑洞，冇牙嘅。佢地嘅行動模式係捕食人類為主，冇計劃冇方向，似乎以感應人類體溫捕捉人類。唔識叫，唔識同其他黑色怪物溝通。

另一種黑色怪物叫百核，通常同隻成年象一樣大，外表一樣係黑色同呈橢圓形。佢地一樣會伸出觸手，進食先張開口，口一樣似黑洞，冇牙。行動模式同紅核大同小異，捕食人類為主，冇計劃冇方向，似乎以感應人類體溫捕捉人類。但可怕之處係會分身，分身大小不一，移動迅速。主體同分身都唔會叫，唔會同其他紅核或百核溝通，但會以某種方法控制分身。主體同分身最大唔同嘅地方係分身核心係白色，主體核心係紅色。」

樺坐在楓旁邊，在楓耳邊細聲說道：「唔出聲嘅怪物都幾恐怖！」

坐在後面的詡在梓旻耳邊細聲道：「嗄，究竟亞樺點解會加入，佢睇落都幾細膽，支援隊比先鋒隊更加適合佢。」梓旻不知如何回應，只是點點頭敷衍一下便算。

講座仍在繼續

「紅核同百核都係你地通常要面對嘅怪物，只要用覺能加埋武器切開，睇到紅色嘅核心回收就得。但佢地再生癒合速度頗快，所以放入「核瓶」都要快，我地一陣會教咩叫「核瓶」。而百核分身嘅核心只要用覺能或刀劍打爛同切開，基本就會變沙死亡。一般槍械甚至用火燒都對佢地無效，所以如果見到未經訓練嘅平民試圖用任何物理攻擊紅核或百核，請立即阻止並導引佢地到安全環境暫避。」

詡看來已經有點悶，但講座才剛開始，他嘗試與梓旻說話來減低自己的煩躁感覺：「會唔會有人咁傻，冇AP就攻擊啲怪物吖。」梓旻聳一聳肩膀以回應詡

「除咗紅核白核，仲冇另外兩種比較少見，見到都請立即離開，俾隊長或以上級數嘅人處理，就係角百核同角獸。角百核通常有一隻成年象大小，而且有至少一隻角，外表一樣係黑色同呈橢圓形。佢地一樣會伸出觸手，進食先張開口，口一樣似黑洞，冇牙。行動模式以捕食人類及其他黑色怪物為主，同樣冇計劃冇方向，似乎以感應人類體溫捕捉人類，但未知咩原因會捕食紅核白核。同百核一樣會分身，分身大小不一，移動迅速。主體同分身都唔會叫，唔會同其他紅核或百核溝通，但會以某種方法控制分身。主體分身最大唔同嘅地方係分身核心係白色，主體核心係紅色。

最後一樣係角獸，角獸至今只發現幾隻，二、三、四或六隻角嘅角獸都有，暫時有對峙過都得一兩隻，有啲就算面對面都唔一定攻擊你，但都保持警剔，立即撤離同報告上級。以上就係至今發現嘅怪物，剩下時間就由研究組人員講解基本工具點用。」

詡鬆了一口氣，因為剩下的部分只有簡單介紹裝備的部分，這也讓梓旻鬆了口氣，旁邊有個煩躁多話的人令講座聽起來更難受。

研究組人員開始介紹工具：「首先係每人出行動至少有一個背囊，背囊經特別設計火燒唔著，不沾水，堅韌物料，而且貼身，但容量唔大。入面有啲基本急救物資，少許糧食，但請定期檢查並向支援組更新物資。

最緊要嘅係，「核瓶」，核瓶大小應該至少都似一個300 ml 水樽，每人至少兩個，用特別物料製成，上面有number，請唔好整唔見。一個「核瓶」只可裝一個核，即係裝多咗就會爆，因為核心係黑色怪物再生嘅主要元素，一個「核瓶」只能剋制一個核心再生，唔好嘗試將兩個核心放入同一個「核瓶」裏面。同回收嘅時候請僅記要帶好特製手套，因核心係會寄生係人體，冇辦法之下就只可以斬咗隻手落嚟，唔想冇咗隻手就要留意。基本裝備就咁多，一陣出嚟一人攞一個。

其他裝備仲有手錶同行動制服。手錶輕身同偏平，佢薄到好似一條手帶一樣，方便亦唔會阻礙大家行動，佢配置咗時間日期天氣等基本功能外，仲可以定位及監測配戴者身體狀況。派發時，手錶已經紀錄好，除左錶主外冇人可以用到，非常安全。而且手錶算係你地嘅員工證，顏色跟返你地所屬分隊，進出總部多需要到佢。仲有，如果配戴者有生命危險，手錶會變紫色，出行動時可能需要留意。而行動制服用嘅物料都同個背囊差唔多，但為增加舒適度，始終耐火同堅韌度都減弱，心口有所屬隊伍嘅標誌：醫療就白色耳朵標誌，念力就青藍色眼，力量就鮮紅色手臂，零星就黃色圓圈星星。內置耳機同通話設備，自己返去睇說明書摸熟佢。其他裝備過左實習就會經高級隊長同意下申請，個個唔同。手錶同行動制服會係通知入邊個分隊時派發。而家出嚟攞背囊先啦！」

(待續)

鍾意嘅請留名推post 請大家俾啲意見我寫好啲

他們拿了裝備後就離開五樓，楓指著核瓶問：「呢舊嘢真係有用？點解要回收？一嘢摙爆個核心佢咪得囉！」

梓旻及詡向楓投出厭惡的眼神，詡表示：「你可唔可以斯文啲呀？」

梓旻笑了一下：「我諗佢地有佢地嘅原因嘅，我地只要安全完成任務就得啦…何況有排都未到我地上前線啦！」

樺點頭說：「係吖，我地先啱啱加入，之後可能有人話我地知點解呢？」

梓旻提議到七樓練習，其他三人立即搖頭拒絕。此時不遠處的尚華跟梓旻揮手打招呼，詡及楓立即露出厭惡的表情，並要求梓旻不要太接近尚華。

「你地都將可能都入P隊，好好相處啦！」梓旻提醒他們的能力相似

兩人立馬回應「no！/ 唔要！」

梓旻獨自一人到七樓操場練習，用盡力才把玩具球拉扯至爆開，他打算再試幾個玩具球之後才試網球。此時，突然有人從後拍了一拍他的膊頭，嚇了他一跳。

「估到你會繼續練喇！」尚華笑道。梓旻並不討厭尚華，但不太懂得與他溝通。尚華給他的感覺陽光熱血，帶一點自負，看起來不是背後說壞話的小人，就只有太自來熟及過於健談這點有點嚇人。

「始終想快啲做到，基礎工夫做得好，第時面對怪物都輕鬆啲。」梓旻把玩著玩具球

「同意，一齊練啦！」他們練了數小時天便黑，累透的二人坐在地上休息，開始問起加入AP特種部隊的原因：「亞旻，咩原因加入部隊？」

「……錢……褔利，好膚淺呢…」梓旻頓了片刻道

「呢份工會死㗎喎！你唔驚咩？為錢為到要搵命駁？」尚華瞪大眼看著梓旻

「呀……」梓旻被他的問題難到，他嘗試迴避尚華的目光，心裡反問自己真的為錢？為褔利？真的有那麼缺錢嗎？還是自己太貪錢？

未等梓旻回答，尚華接著說：「我就好大原因都因為我爸，我覺得我爸好有型，雖然只係個隊長，但每次見佢帶隊出去再完成任務再返嚟個自信樣……我都想咁！但查實我又有啲驚，驚能力不足，驚會死。 」

梓旻突然想通了「我都想咁！」

那麼多年，他也甚少「成功」的時刻，學業不好工作職位不高，討厭的親戚每日在說三道四。因此，他甚少出席聚會，即使出席多由媽媽或姐姐出頭，別說幫助別人，自己也是被保護的那位。而這份工作正正可以令厭人的親戚們閉嘴，也可以成為保護人的角色，那種成就感，只是想像都覺得開心。

「我！」梓旻有點激動的道：「我都想咁！有時都想做下啲……令人覺得……可靠？或者有用嘅嘢，屋企因為冇人有接種AP，而家又搵工難，咁啱呢份又有錢又幫到人。頭先聽完怪物簡介都有啲驚，但又想做得到，就好似你爸咁有自信！」梓旻露出笑容

尚華也露出笑容：「咁我地都要努力！好喇……都夜喇！返去？」

「你返先，我想練多陣！」這刻梓旻感到充滿了希望和目標

「好！加油！」尚華先行離開，梓旻繼續練習。不久，突然有人站在身後點煙。

「今日心情幾好喎！」是醫療隊的男人，他邊吹出煙圈邊說

「還可以啦…今日我諗通咗啲嘢！」梓旻面帶興奮的笑容

「諗通咗啲咩？」男人疑問道

「我想努力成為一個有作為可依靠嘅人，我想堅持直至至少做到隊長位！」梓旻笑言

男人又再吹出一個煙圈：「小朋友，做醫療或支援都可以有作為㗎嗻，你入咗隊先講啦…而家幾有大志，面對怪物都可能變得不堪一擊。」說完就走了。雖然他的一藉話似乎在打擊梓旻，但梓旻沒有氣餒，第二天又再以最好成績完成功課。

(待續)

自推一下

再推一推

輕輕再推

念力的基礎課程就只有兩節，之後就轉成醫療課，醫療課的導師居然就是昨日跟梓旻說話的男人。

「我叫葉天宏，大家都鍾意叫我做亞塵，歡迎大家咁叫我。我係醫療隊嘅高級隊長，今次新生訓練會幫手醫療同力量基礎課程部分。醫療嘅AP比一般嘅念力用更加多耐性同更細緻嘅操控，如果非Ear Mark嘅人，一般係會覺得非常難嘅，所以醫療基礎課程要求唔高，只要做到令被割破表面嘅多肉植物復原就得，算係模擬治療輕傷嘅訓練，我地冇可能俾真人你地做訓練！而家圍過嚟睇我做示範！」他拿出一盆蘆薈，用刀輕輕一割，接著他把蘆薈放在枱上，兩手圍著著蘆薈被割的部分，口向兩手之間吹出風，蘆薈回復了

「大家首先要用兩手圍住蘆薈或受傷地方，用之前拉扯及壓縮訓練所學，將傷口四周空氣輕輕壓縮，再將入面嘅空氣拉出，呢種方法係想將範圍內嘅污染物抽出，但唔可以令佢變成真空狀態，所以抽出同時要向傷口呼出治療嘅風。其實就係想像口中有治療效果水份，呼出風嘅時候口水霧化溶合空氣中水份到傷者傷口。」

突然有同學大聲問：「嘩！咁咪即係用口水醫人？如果傷者全身都傷，咁咪吹到醫療隊口乾？」

「問得好，係口水，不過唔用口水嘅方法其實有嘅，但口水入人體最快最少排斥，而且你冇曬治療液嘅時候用。當然唔完全用我地自身口水。當你熟練嘅時候，就可以調節口水內嘅治療AP濃度，即係質，加上調節抽取幾多空氣中嘅水，亦即係量，去治療傷者。有時會令四周空氣變得非常乾燥，Ear Mark嘅人要注意，你地未來必會面對呢個問題。再者，提提大家，你地急救包入面嘅部分緊急治療液都係由醫療隊人員嘅口水同血液練成。嫌核突嘅，唔好用囉！」

大家都靜下來，他接著說：「冇嘢問就練啦！下星期三交功課，提提大家醫療基礎之後就係力量堂，力量好簡單，五日不斷障礙賽，最後休息一日就連續三日考試同身體檢查。醫療基礎對你地好有用，好好練習，下星期三見！」

「癡線……」詡小聲抱怨。雖然聲很小，但仍然被亞塵聽到，走過去重重的拍打詡的頭部，威脅道：「你唔好俾我見到你偷懶！」然後走開了。

不知何故，詡和亞塵互相憎厭，當有眼神接觸，二人就會皺起眉頭。同時，亞塵處處針對梓旻，每次經過梓旻身旁就會說些令人氣餒的話，不斷說服他入後援隊，又稱他不適合前線。有見及此，詡的行動升級，展開了「保護罩」模式，當眼角望到亞塵走過來就會移動及阻礙他與梓旻的接觸。

由於有長達一星期的練習時間，大多數人黃昏後就停止練習。最初梓旻也黃昏就沒有練習，但頭三日的醫療練習也不順利，他只要稍微發力，蘆薈就會整個爆開，完全做不到將四周空氣輕輕壓縮。危機感漸增，練習時間也愈長。詡及楓第三日已經完課題，眾人也驚訝他們居然比耳有A Mark 的樺更快完成，樺也需要四天才勉強完成課題，剩下梓旻一人努力。梓旻第四天終於勉強不壓爛蘆薈，拉出內裡空氣時，又把蘆薈壓爛，這過程又用了兩天。最後一日練習，梓旻又再練習至晚上。

「旻？練成點？」詡吃完晚餐洗過澡後來到七樓

「差少少。回復得好慢，但交功課嚟講應該冇問題。點解你同楓咁快上手？」梓旻有點氣餒，續問

「練得多掛……」詡有點語塞的回答

「咁叫練的多？咁我算點？」梓旻反問

「對我而言已經算多，你口唔口渴？幫你買嘢飲！」詡嘗試轉移話題

梓旻說出想要的飲品後，詡就離開了。就在梓旻重新投入練習時，又有人來到運動場。回頭一看，原來是亞塵，看來他習慣於晚上到此吸煙。

「練成點？」亞塵從煙盒中抽出煙放口點燃

「都算順利……」梓旻對他有點戒心，怕他又打算說服他放棄

亞塵望望梓旻手中的蘆薈，問：「練咗幾耐？」

「尋日都做到，今日加速一下治療速度。」梓旻撒了謊，他數個鐘前才剛剛成功

「每次治療你用咗幾耐？」亞塵呼出煙圈

「四五個字左右。」梓旻仍然保持戒心的答

亞塵吐出煙圈，再說：「幾好。」正當梓旻鬆一口氣，終於不再被勸放棄時，亞塵又說：「但練太耐，說明你控制力量太差，比你入到隊，好大機會傷到同事。你都係入後援啦你！」

這次梓旻有點生氣，很想大聲問他為何針對他，但奈何他是上司，梓旻沒有對上司無禮的膽量。此時，詡剛好回到運動場，他從運動門口大聲問：「梓旻自己想點就點！唔關你事！」

「我係俾佢睇清楚自己應該揀咩路！」亞塵大聲回應

「唔使你教，我地都自己揀！」詡左手抱著零食，右手拿著飲品，走到亞塵面前，兩人距離很近，氣氛就像快要開打一樣

亞塵比詡高一些，但走得那麼近也沒有低下頭，他俯視詡，語帶警告道：「你識揀就應該聽我話！你應該知對你地都冇好處！」

「我會同上頭投訴你！」詡踏一步壓低聲量威脅他

「我唔怕投訴，反而係你，你小心俾你媽發現你喺度！」亞塵同樣壓低聲量威脅他後就轉身離開

直至亞塵背影消失之前，詡都沒有把視線移開。亞塵完全離開後，詡才轉身把飲品塞進梓旻的懷裡，再走到個比較開揚的位置，用眼神示意梓旻坐下。

「你地本身識？」梓旻邊坐下邊問

「係…都識咗幾耐。」詡正打開手上一袋芝士薯圈

「唔通……佢…係你亞爸？」梓旻小心翼翼地問

聽到梓旻的問題，詡瞪大眼睛，極大反應的回答：「緊係唔係！我爸好佢好多！佢識我爸媽，我又同我媽嘈緊咁解。」

「嘈咩？」梓旻拿了個薯圈吃，發現非常合口味就整個拿走

詡打開一包原味薯片：「好複雜，我哥激嬲佢，然後……總之就已經去到冇嘢好講，唔會見嘅程度。」

梓旻拿了塊薯片：「你有亞哥？你哥激嬲你媽又關你事？」發現薯片也很好吃，就把手上吃剩少許的薯圈還給他，再拿走薯片

「喂！好喇喎！」詡接過薯圈大叫

「未食晚餐呀！下次還返俾你啦！」梓旻狼吞虎嚥的

「咁你食埋呢包佢啦！」詡把薯圈遞回梓旻，梓旻一下子就吃光了。那晚二人的話題圍繞著零食與食物，由於意外地二人口味非常相似，最後竟聊到凌晨才回宿舍休息。

(待續)

加油！