《覺能之戰》

「大獲！就到時間！要走！」澈硯叫道

「我……我未問曬！」梓旻很想留下，但沒有辦法

「喂！拜託你地係出面打聽下我爸媽嘅事吖！我……我好擔心！」鄭子謙皺眉道

「好！」梓旻說完便跟澈硯跑出去

二人順利跑回禮堂，由於已經深夜，所有人都離開了，只剩下蓋上了的棺材。他們隨便找了個位置坐下，澈硯開始按起手機來，而梓旻則看著亞豪的棺木發呆。安靜的環境令梓旻開始回憶起剛才的事。

「……過度用AP，你地叫嘅A Mark就會擴大，蠶食你地嘅身體……」

鼓鼓爸爸和鹿仔也有這危機。

「……怪物都係人變……」

如果他們都變成怪物，梓旻沒有自信可以與他們對峙。

「……一直殺緊人都唔知？」

這是梓旻最感害怕的事。想著想著，意識開始有點模糊，大概太累了。閉上眼的一刻，一段段回憶從腦海中閃過。

***

「係係係，我叫亞豪，俾人捉入隊一年。我係偷渡過嚟，信錯人，俾人捉咗去做試非法AP劑嘅白老鼠，所以我嘅A Mark特別啲，係喺腳度，我幾乎由腰到腳板都係A Mark，除褲俾你地睇吖！哈哈哈哈⋯」

「鼓爸！鼓爸！點解我俾人派咗去駐守隊伍？我一向係主救援隊格？」「根據醫生報告，你唔適合出動！」

「呢度所有屍體都係經證實不尋常死亡個案，你地唔可以留係度！」

收拾時發現的英文報告寫著「黑印⋯與抑壓之⋯報告……黑印⋯使用⋯延伸⋯」

最後『想』到了之前的預知夢，梓旻翻開下一頁，文件上的相片是亞豪的樣子，問：「咁邊個同事死咗？」

「條友四號隊……」澈硯咬著飲管道

「同你同屆喎！咩事死？」梓旻翻開文件

澈硯咬著飲管，雙眼望向通告板，指著一張海報。海報上寫著口號「防止黑怪化 為家人 為愛人 為隊友 定時檢查 打預防針」

梓旻望回文件，嘆氣道：「唉……都叫佢地注意啲，海報都出埋都唔識節制下……」

「佢呢……身世都好慘㗎……即係呢……佢有個妹……佢妹本身都得反佢一個親人……」澈硯終於放開飲管，欲言又止的說

「停！我知你想我做咩！唔得！」梓旻把文件放下，拿回奶茶

「唔係呢！佢個妹走嚟求我呢……你又識……」澈硯一手拿奶茶，另一手拿文件

「你知點解我入二號隊㗎可？唔得！」梓旻指指胸前的分隊標誌，說完便轉身走回辦公桌，澈硯跟上

「我知！但係……你仲可以同你地二號隊大佬兼大老闆甘生講下……可能……得呢……」澈硯笑一笑

「喂……嗱！我可以提下嘅……但如果要處決嘅話，你要替我更！」梓旻作出了讓步，但澈硯似乎不太開心

「但係處決要殺隊友，我……我唔想……」澈硯表示抗拒

「講笑……都唔到我控制啦！如果可以，我都唔想。」梓旻苦笑後收回笑容

突然，他們的手錶響起，錶面寫著「您已被選中為此次執行官，處決對象為第四隊成員，其妹妹擔任見證家屬。請於xxxx年xx月xx日xx時正到達處決室執行職務。」

***

(待續)

終於到呢幕！

推。

再推。

凌晨自推

幫推。

「梓旻！梓旻！醒醒！醒醒！」澈硯的聲音很急忙，梓旻被他嚇醒，胃有感抽痛

「咩事？咩事？」梓旻驚慌問，東張西望的，想找出有什麼危險靠近，但除了澈硯和棺材，什麼都沒有

「你睇你睇！」澈硯把手機遞給梓旻看，手機屏幕上顯示「此資料只限管理員閱覽」

「咩事呀？」梓旻不耐煩道：「我頭先發緊預知夢，而家畀你打斷！」

「係？個夢講咩？」澈硯興奮問

「你講咗你呢個咩嚟先啦！你咁緊張叫醒我，唔會係小事吖？」梓旻有點生氣

「呢個資料係同亞豪嘅死有關！而家居然開唔到！我頭先見完鄭子謙就開始諗，我地隊明明咁多人，耐唔耐就用下AP，點可能冇人出過事？我就嘗試回憶一下有咩人AP印有擴大，得O隊最多，其中一個出名嘅就係亞豪！佢成日同人講自己偷渡，畀人當白老鼠，仲成日話除褲畀人睇AP擴散到腰！而且做得白老鼠又點會放佢出嚟？一係就係佢其實係間諜，一係就係佢就嚟冇用！當佢一定係後者，咁即係就嚟用盡嘅人啦！然後仲不尋常死亡，而家仲要管理員身份先可以查閱，管理員資格只有研究主任、支援隊高級主任同高級隊長或以上先有，咁好大機會……好大機會亞豪已經……」澈硯滔滔不絕的說出他的分析

梓旻聽完他的分析，露出非常失望的樣子，無力的垂下兩手，望著地板思考澈硯的說話，他不想接受亞豪曾變成怪物的說法，因為接受了這說法仿佛接受了自己的夢，亦即是自己殺了亞豪。最終他找了一個說不通的原因：「Ki……Kiki呢？咁好人放走佢，而……而且我相信佢地唔會係間諜！」

「哦！又係喎！咁就唔通喇……咁你呢？你發咩夢唧？」澈硯興奮問，充滿期待的望著梓旻，梓旻不太想讓他知道夢的內容，因為說了就像是證實了他的推論。內心萬分掙扎下，梓旻曾想過說謊或避開重點，但當下有種感覺這樣他應該坦白，亦留有一絲希望澈硯可以為他證實他的夢是錯的。幾經掙扎，最後決定坦白。

「都話㗎啦！」澈硯接近大叫道

「你……你都冇證據！你究竟明唔明唧？咁代表我地殺咗佢！我地先係殺人兇手！」梓旻非常不高興，不知為何他會那麼興奮

「證據……」澈硯的視線移到亞豪的棺材上

(待續)

幫推。

「你……你想點？唔可以！唔可以搞佢條屍！佢係朋友嚟！唔可以郁佢條屍！」梓旻激動地站起來叫道

「佢……係你朋友，但我……同佢唔熟！」澈硯說完便轉身跑往亞豪的棺木上，梓旻想制止他，但他居然用力量攻擊他的腳，令他跪下。澈硯用AP增加力量把蓋子拋開，再把蓋在他身上的被子扯開，掀了亞豪的上衣，然後挺冷靜的退後了兩步。

由於澈硯控制了力道，梓旻很快就站起來，走到亞豪的棺木前，他看到亞豪的腹部有一個小孔，而心臟位置有一個大洞，大得幾乎整個胸口也沒了。另外，他的手和頸也有瘀傷。

「我記得我地擊中咗個比較細嘅傷口令佢大叫？」澈硯問

「……係。」

「我記得我地擊穿佢個身，破壞咗核而成功合格？」

「……係。」

「咁即係真係我地……」

「但……但係都唔可以證實係我地打？」梓旻仍然不想相信

「你地做咩？」亞塵忽然出現在門口：「點解要打開個棺材？有人想睇亞豪嘅資料我就知有嘢！好彩我過嚟睇？你地居然打開佢個棺材？」

梓旻不知所措，不知如何解釋現在的情況。澈硯靈機一觸，大聲問：「點解你要我地殺死亞豪？」

「咩話？」亞塵驚訝問

「唔好扮啦！我知道曬！你以為我查唔到呀？我要查乜都查到！我仲問過鄭子謙！我知道曬喇！」梓旻知道澈硯在嘗試扮作已知道發生什麼事來引亞塵說出真相，梓旻不想知的真相

亞塵靜了一會，想了一會，冷靜道：「我知你根本未知道曬全部事實，但好樂意話畀你地聽，係！你地畢業試對嘅就係亞豪。原因只係覺得你地適合，就係咁簡單！」

亞塵的話讓梓旻崩潰，他腦內開始不斷迴響著：「我殺咗亞豪……」

「你接受唔到？咁你應該退隊！」亞塵由始而終也只有一個目的就是要他退隊

「點解一定要殺？可以攞嚟研究！可能可以變返做人呢？」澈硯問

「我話你知答案，佢唔會變得返！你唔使諗！」亞塵道

「所以要由我地殺死佢？明明仲有辦法……明明仲有……」崩潰的梓旻當然不知道還有什麼辦法，但他不想接受

「你唔怕我地講畀人知咩？」澈硯直接忽略梓旻

「講！你地講！講咗又點？佢地反對？交出力量？定離開部隊唔交出力量，同我地成為敵對關係、因唔還力量成為AP犯定係會自組新隊拯救市民？」亞塵邊說邊走近：「我話你地聽，唔會！你地只係製造混亂！有接近七成嘅人係因為福利入隊，約兩成想要力量，會因呢件事而反對嘅只有唔夠一成！就算你對外講都唔會夠公司鬥，只要少少錢少少宣傳就可以擺平！」

亞塵經過梓旻及澈硯身邊走到棺木前，伸手幫助亞豪整理衣服：「如果大家唔過度使用AP，以及有聽醫生話，我保證你地全部人冇事……我從來唔想人犧牲，所以我先用盡方法保住宏基同鹿仔。你地鍾意同人講就同人講，散佈恐懼只會令其他人做起事畏首畏尾。而家『獨』耐唔耐就做嘢，士氣低落只會令佢地死得更快。殺死變成怪物嘅人係最理想嘅方法，而畀你地做送葬人，係一種人情。做法我地唔會變，唔鍾意就退啦你地！」

直至亞塵離開，梓旻也沒從地上站起來，澈硯上前想拉起梓旻，但被他拒絕了。梓旻自己站起來，沒有理會澈硯的叫喊，精神恍惚的離開了禮堂。

(待續)

幫推

幫推

兩日前篇預知夢果到睇唔明

梓旻啱啱恰著諗起過往種種同「AP會擴大」「亞豪死得唔自然」有關嘅過去。之後就進入預知夢，個預知夢之前發過，但嗰次發唔到張海報寫咩，今次發得到係叫啲隊員定期身體檢查，防止「黑怪化」。可能呢度我帶得唔太好，「黑怪化」其實係講緊AP用盡變成怪物。

而夢入面嘅亞豪係因為黑怪化而死，梓旻同澈硯被派到進行「處決」職務，個夢暗示緊梓旻同澈硯負責殺死變成怪物嘅亞豪

即係定期檢查可以check到AP用到盡未？
只要足夠休息AP就可以回復？
咁之前梓旻練習練到無晒力又係咪用盡AP？

執行殺呀豪任真係好sad

定期檢查加打預防針係可以控制
亞塵最後段話有微微講過首先要過渡使用，梓旻之前無曬力都算係過渡使用，但唔代表用盡
過渡使用 〉A Mark擴大 〉擴大至全身 = 用盡 〉變成怪物
只要回復力氣體力都可以用AP，但A Mark擴大後回復唔到，要用預防針控制
簡而言之，用盡等於就嚟黑怪化變成怪物

鹿仔Kiki要見證亞豪死都sad雖然佢地未知

幫推。

第二十六章 只能重新振作

梓旻搖搖擺擺的回到露天花園，打算回宿舍去。當他走到升降機大堂時，有人在露天茶座區大叫：「梓旻！」

回神一看，原來是尚華在叫他，梓旻還未回復過來，但既然停下了，不打招呼又不禮貌。梓旻走到尚華的旁邊，尚華遞給他一罐啤酒，在那麼崩潰的情緒下，啤酒的魅力難以抵擋。他接下了啤酒，坐在尚華旁，打開啤酒喝一大口。

「嘩！好大壓力？」尚華笑問

「嗯……你呢？搞乜凌晨一點係度飲啤酒？」

「呀……我……同亞爸嘈……」

「Buck？」

「嗯……」

「嘈咩？」

「我……冇亞哥咁叻，自己又唔好，我爸媽一直都反對我加入，但我真係好想……好想入隊。話我發英雄夢又好，想扮我爸我哥，想駁佢地讚又好……我想佢地明白，下下都鬧我，反對我入隊，點解唔可以相信我？我一定會死㗎咩？點解次次都叫我退隊？」尚華生氣的罵，看來有點醉，梓旻看看桌上的數罐啤酒罐，尚華似乎已經獨個喝了很久

「我家姐都係咁……」梓旻喝了一口啤酒，想起姐姐曾罵他自尋死路，不禁苦笑了起來，笑自己沒有聽勸把自己推往墳墓，退隊被亞傑追殺，不退就要把怪物殺死或變成怪物死，轉研究又沒足夠知識，唯一的路只是轉支援。想到這，他不禁又苦笑，支援隊是安排先鋒進行任務，即是推人死的工作，回想自己最初進隊的目的是成為保護人的角色，那是何其好笑的笑話。想到這裡，梓旻不禁默默流下淚，懊悔當日沒有聽姐姐的阻止進隊。

「點解……點解呀！」尚華醉得很，這令正暗暗落淚的梓旻很安心

「我……咳……我家姐就話討厭AP，唔畀入唧！你爸明明入咗隊都唔畀你繼續，佢又唔退隊，又唔叫岡仔，Crystal呢？」梓旻清清喉嚨以防被尚華聽到他緊咽的聲音

「佢其實都有叫，佢地唔理唧……其實佢自己都有諗過退。」

「吓？Buck喎？點……點解？」梓旻被嚇得剛才的傷感感覺全消

尚華望望四周沒有人，把座位移近梓旻，低聲道：「我講你聽……唔好話人聽……公司有時會隱瞞隊員嘅死，為咗唔好破壞部隊形象，同唔好引起混亂，佢地會用錢解決問題，再唔准知情嘅人講出去。雖然依兩年都大幅修改輔助系統同隊規，但我相信真有發生，佢地都仍然會咁做。」

「你明知都入隊？」

「我需要力量，需要證明。我想做英雄救人。我想似我爸……」尚華的說話讓梓旻的點失望，似乎尚華就是亞塵口中的那兩成人

「哦……係呀？咁關Buck退唔退隊咩事？」

(待續)

幫推。

助推

「佢其實好唔開心……我有問我爸點解唔退隊。嗰陣佢話：『尚華，當年你仲細，我本身係做緊地盤，但係因為一啲唔公平嘅問題，我同亞頭反面，唔好彩加上個亞頭周圍唱我，成個月都搵唔到工。個陣又唔敢俾你媽咪知，你知啦……又要供樓又要養你地三個，話佢聽冇咗份工？唔使返屋企都得喇！所以成個月都係街「扮工」。扮到某一日，我終於有工做，終於可以挺起胸膛返屋企。居然遇上黑影日，我見住街上面嘅人慘叫求救，但我冇辦法救佢地！當我匿埋就諗起你地，諗起自己救唔到嘅人。

就因為咁我入咗隊……雖然我發現公司為利益問題隱瞞咗問題，有諗過退出，又有諗過公開，但公開又點？退又點？公開真係有人理咩？知嘅人唔多，會幫手防止發生死傷更少，我退咗就可能更加少人知，更加冇人救班細嘅……我要救佢地，我要救你地，我唔可以退！』就咁，哈……亞哥就入咗隊，我都入埋。」

聽完尚華的一番話，Buck在梓旻心目中的地位又再提升，也同時為他解開煩惱。本來還在想應否退出或轉隊，現在他很清楚自己應該繼續在先鋒隊，就如Buck所想，公開不了事實，退或轉也無濟於事，為何不從中防止慘劇發生？只要自己有能力，總可以做些什麼。

(待續)

有少少都出少少

幫推。

推多下

「多謝尚華！你最好！」梓旻立即精神抖擻的

「係……係咩……我爸呢？」尚華已經開始口齒不清

「你爸都好！係呢！好少見你提你家姐嘅？佢唔係因為你爸入隊咩？」

「家姐？」尚華好像突然驚醒一下，再回到口齒不清的狀態：「佢……佢呢……因為睇覺力賽……睇覺力賽見浩政……打贏爸……爸爸，所以……」

「喂！喂！喂！」尚華倒下了，但不能讓他被人發現醉倒在露天花園。梓旻先把啤酒罐拋掉，再用AP浮起尚華，為了不要太難看，他把尚華站著浮起盡量不離地太高，也不離自己太遠。助尚華回到他所屬的宿舍樓層不大問題，因為手錶拍拍升降機拍卡位就到，問題是不知房號。到了所屬樓層，他站在升降機門前苦惱了一會，究竟應不應該敲門問呢？

突然，升降機門開啟，偏偏是珈純與他的朋友。梓旻選擇忽略珈純，問珈純身後的人尚華的房間，他們也表現友善，帶梓旻到尚華的房間。直至把尚華放於床上前，珈純也沒有哼一聲。可是，當梓旻離開尚華的房間時，珈純說了一句：「下次叫我地幫手就得，見O隊嘅垃圾係房門前走嚟走去就唔舒服！」

可能是酒精的問題，又或者是因為亞豪的事，梓旻這次沒有啞忍。手舉向珈純再用盡力發出AP，珈純一下子被推往走廊盡頭的牆上發出巨響，整個人緊貼在牆上。走廊內的燈光一閃一閃的，梓旻一步一步的走往珈純，停在珈純面前道：「你先係垃圾！」

梓旻說完便放下珈純，沒有理會那些探頭門外看發生什麼事的人們。這次的舉動連他自己驚訝都感到驚訝，但他不後悔，總不能讓這差點害死自己的人繼續欺負自己。最後他一直跑回自己房間，被子蓋頭而睡。

第二天早上，他被詡拍門叫醒出席亞豪的火化儀式，儀式順利完成，整個過程不乏Kiki的痛哭聲，鹿仔則全程照顧著Kiki。梓旻及詡不太敢接近Kiki，比起說完無謂的安慰說話，倒不如讓她獨自安靜一下。

澈硯在整個儀式中經常想接近梓旻，但梓旻實在不想理會他，所以也故意避開。幸好澈硯沒有太糾纏，這令梓旻鬆一口氣。儀式完結後，亞點走過來跟梓旻道：「Hi！尋日單嘢通曬天……」

「唉，會停我職？」梓旻嘆一口氣

「咩事？」詡問，樺也充滿疑問的望向梓旻，但梓旻不想解釋

「我知！佢尋日用AP打到珈純埋牆！」楓得意洋洋的說明

「嘩！咁叻仔？」詡高興道，梓旻以微笑回應

「喂！」亞點制止詡：「唔會停你職，只係扣下你積分。都大概知咩事，Buck決定酌情處理，但唔好太開心，如果覺得你冇悔意，佢地絕對可以停你職！」

「都多謝佢咁幫我，但坦白，我好難有悔意，你試下差啲俾人殺死！」梓旻有點怒意

「咁既然而家打又打咗，都唔大罰你，都擺明畀你過骨，你交一交戲都唔過分吖？係咪？」亞點說完，梓旻撇一撇嘴再點點頭，亞點笑一笑，拍拍梓旻膀膊便轉身離開

(待續)

有新讀者我會繼續努力

助推。