《覺能之戰》

推。

祝新一年事事順利！

推。

畫面快速轉換，首先看到的是媽媽離開豪宅的背影，小女孩不屑一顧，對小女孩說，這貧窮的媽媽只是她的負累。然後，畫面轉到小女孩爺爺的喪禮，小女孩站在人群中沒有人理會，她的目光從棺木移向人群聚集的地方，在那人群中心的是小女孩的父親及其新妻子及兒子，他們就像在喜慶的日子大聲地與其他人說笑。再之後的畫面顯示小女孩被父親和其新妻子及兒子講出家門流浪街頭的景象。最後，小女孩已成為一個只能在地下酒場這種污煙漳氣地方留連的少女，濃妝艷粉加上一身性感打扮，讓梓旻用了好幾秒時間才認得出，這就是Lina本人。

在這一段回憶中，雖然曾經出現黑影日的畫面，但只有她看到新聞電視報道的情況，似乎黑影日對他不太影響。而「播放」得最長及最仔細的回憶是喝醉的少女Lina 攤坐在陰暗的後巷，明顯不是在清醒的狀態。性感的裝扮引起了附近幾名男子的注意，似乎他們都想「特別照顧」這名漂亮的少女。

正當他們打算伸出魔爪，一位送貨路過的大嬸前來阻止，她救起了Lina並把她帶回家去。可是，大嬸的好心並沒有得到回報， 酒醒的Lina只是對她破口大罵，仔細觀察可發現那位大嬸居然就是當年離家出走的媽媽。

不知算是血緣的吸引，還是命運的安排， Lina由媽媽拯救後被好好照顧起來，似乎過了一段不算十分愉快，但是算是Lina爺爺死後頗為輕鬆的時間。Lina和他的媽媽由互相不理解及不信任變成了一段互相倚賴的關係。

就在與媽媽重逢的一年後，Lina脫胎換骨，找了一份相當不錯的工作，不再留連煙花之地。而且，媽媽更介紹她的另一個女兒，亦即是Lina的妹妹，給Lina認識。回憶中，妹妹的身體狀況不是太好，看來是昏迷在醫院了一段時間。

Lina接受了媽媽的同時也接受了這位昏迷不醒的妹妹，她把自己的薪金全給予媽媽作治療妹妹之用。畫面中，媽媽對此感激流涕，二人相擁而哭。無奈，這感動的重遇故事原來也只是媽媽的一個陰謀，媽媽在Lina的飯菜裏落迷藥，再把Lina送往某個地點。當Lina醒來時，她只見所處的環境漆黑一片，四周都有人哭泣及大聲呼叫。

「呢一個就係敵方「獨」其中一個實驗基地，但係而家已經報廢咗。當時佢地專由成癮者、販賣人口及拐帶人口之中購買或搶走人作為實驗材料。」姐姐指向畫面中的人群道

少女Lina緊張的哭起來，亦都很後悔相信欺騙媽媽。畫面中最讓梓旻等人注目的是，離Lina不遠處的人群中有一位他們也熟悉的人，雖然畫面中的那人年紀還小，但他們可以肯定那就是樺。

(待續)

推。

「嗰個係咪樺？」澈硯率先問

「我諗係……」詡回答，當他們嘗試走近看時，畫面突然閃出紅光，是那基地的警示燈在閃爍，其地內的研究人員打算逃離時續一倒下，然後畫面變黑，只剩下Lina和姐姐的對話

「我想殺死曬佢地！」Lina哭叫著

「好，我幫你，但有條件！」姐姐未說完條件，他們便回到主研究所去

「點解樺喺入面？你本身識佢？」梓旻問

「佢係你朋友，你自己問佢。關於Lina的弱點就係咁，時間有啲趕。聽日會唔會唔得閒，我地睇咗個比較需要注意嘅人先！」姐姐帶他走到壹雄前，再向梓旻伸出手，四人又再來到回憶世界中

他們來到一個普通的房屋單位，與一般的耀皇城單位差不多大，房內有一張兒童床及一張高架床，每張床上都睡著一個小男孩。男孩們的媽媽進房叫醒他們起床上學，雖然他們的媽媽對他們每一個都照顧有加，但明顯特別照顧最小的那個孩子，其中一個較大的男孩看到後很不是味兒。

「哥哥，覺唔覺得唔公平？」那男孩跟另一男孩道

「冇法啦！細佬身體弱嘛！」哥哥回答

畫面一轉，他們坐在殯儀館的家屬行列，棺材上是他們最小的弟弟的相片，父母泣不成聲，大哥也在哭，只有二兒子沒有哭。

「哥！做咩喊？」二兒子問

「細佬死咗嘛……」大哥哭回

「唔係幾好咩？少咗嗰煩人！」二兒子展露笑容，大哥恐懼的望著自己弟弟

(待續)

推。

可是，最小弟弟的死沒有讓身為二兒子的得到「公平」對待，父母的注意力都轉移到成熟可靠的大哥，二兒子為此而憤怒，在青少年時因偏心的問題在家大吵大鬧過。他們的父母理解到自己的偏心及對二兒子的傷害後，不但改變態度，並與二兒子促膝長談，皆因他們不想再失去一個兒子。

從那時起，二兒子與父母及大哥的關係有所改善，而且由過往懶散轉變成堅韌努力的人。由於大哥成熟穩重，照顧家庭的工作根本不需要二兒子的幫助，所以二兒子可自由自在的活動，性格也變得開朗起來。

就在某次的長線旅遊，他被告知大哥將會結婚的消息，立即起行回家參加婚禮。可是，他們在婚禮前一日遇上黑影日，二兒子當時未與家人一起，憑自己靈活敏捷的反應在怪物手中活下來。與家人相聚時，雖然家人都沒有事，但大哥的未婚妻卻走避不及而身亡。

自此，大哥就變得精神恍惚及自言自語，莫說是照顧父母，他似乎連自己也未能照顧好。面對失去自理能力的大哥，二兒子要負起照顧家庭的任務。他放棄了自由自在的生活，努力工作來照顧年老的父母。某天回家，家裡變成一片紅海，只有大哥站在客廳中央。

「哥……發生咩事？」二兒子問，這時候大哥的外表突然變清晰，梓旻很快就認得到那人與複製人亞傑的五官幾乎一模一樣。而這個回憶是屬於壹雄，雖然一直也看不清二兒子長大後的外貌，但由此可推測二兒子是壹雄，亦即是亞傑是壹雄的哥哥

「有人同我講我唔可以永遠都遷就人！我要為自己諗！佢話可以復活我未婚妻，只要我幫佢做嘢！但兩個老嘢又阻止我，點解佢地唔諗下！唔諗下當初唔係佢地，我就可以救到亞Da！」大哥既悲傷又憤怒的道

「你係咪睇得太多動畫？復咩活呀？究竟亞爸亞媽係邊？」二兒子大叫，大哥不發言，雙眼望向地上一些奇怪的物體，仔細一看，那似乎是人體

「你殺咗佢地？」二兒子驚恐的問

「唔係幾好咩？少咗嗰煩人！仲要兩個！」大哥抬起腿，腿上的黑紋看來就是A Mark，邊流淚邊笑道：「跟住會少多一個！」

二兒子仰天痛哭，面對擁有AP的大哥，手無寸鐵的二兒子只有死路。忽然，大哥被一度力量拉出窗外，此次回憶之旅就在此結束。

回到現實，梓旻的心情沉重，問：「真係有可能復活？」

澈硯進入研究員模式，邊想邊說：「對於AP仲有好多未知之數，應該有可能……」

姐姐打斷澈硯的說話：「冇可能！人死就死咗！AP連傷殘人士都救唔到，點會復活到人？佢就係被A Mark催眠，心靈脆弱嘅人特別容易被洗腦。(她摸摸正沉睡的壹雄的頭) 所以佢地都係危險嘅一群。當佢地離開咗呢間房，佢地就會唔記得曬你地頭先睇到嘅回憶，但唔排除佢地隨時會記起，你地要小心。」

(待續)

推。

第三十六章 樺的身世

「估唔到佢哋嘅過去係咁樣。」詡離開主研究所後道

「你講佢哋係邊個？壹雄同Lina佢地？」梓旻問

「當然係講緊佢哋啦！」詡回答

「我以為你同佢識咁耐會知道啲嘢添！」澈硯說

「你頭先都聽到啦！出咗個房門之後，佢都唔會記得晒所有嘢，我點會知啫？佢地都冇可能講到俾我聽⋯⋯我識嘅佢地號時候，佢地已經跟咗師傅好幾年啦！」

「唉，估唔到佢地個身世都咁慘。不過咁樣逃避好咩？好似頭先家姐話齋！如果對方一用洗腦嘅橋段，佢地係好易中招，咁其實佢地都係一堆計時炸彈咋喎！」梓旻疑問，三人終於走到甘氏大廈，準備回去辦公室當值

「唔知點解你家姐對佢地咁仁慈啦！我又覺得係我就唔會留啲計時炸彈喺身邊！不過都有可能因為佢冇其他人可以用，又要用得咁秘密，又願意服從佢嘅真係唔多囉！」澈硯發表自己想法，三人進入升降機後，梓旻按樓層

「你地有冇諗過⋯⋯其實我哋識嘅係洗咗腦之後嘅佢地，而唔係真實佢地？如果真係比佢地記返起舊時嘅事，咁樣會唔會變成完全唔同嘅人呢？」梓旻捱在升降機的一個角落問

「我覺得會囉！頭先你睇吓壹雄同Lina本身個性格都同而家唔同啦！我相信佢地而家嘅性格係心理補償而營造出嚟！就例如Lina其實想返去細個咁受寵愛被照顧嘅一個角色，或人錫嘅角色，就好似佢妹妹咁，而且同時佢又想成為有能力嘅人，所以佢對住壹雄佢地成日叫哥哥姐姐，然後做嘢嗰陣時又咁落力，咁討好你家姐囉！而另一邊壹雄就明顯係模仿緊佢大哥啦！可能根本上佢心裏面就希望自己成為好似大哥咁成熟穩重嘅人！唔知其他人係咪都係咁呢？以佢地兩個嘅個案，我估計佢地係有一個咁嘅心理反射喺度嘅！」澈硯說了一大堆令人難以理解的說話，令梓旻和詡皺起眉頭

「佢喺度講緊咩？」詡問梓旻

「唔知，我相信都唔係好重要嘅嘢！而呢一刻我想知嘅係點解喺Lina嘅回憶之中，阿樺會出現喺敵人嘅基地之中！」梓旻轉變話題

「唔通佢係敵人基地嘅人？」詡問

「我覺得唔會囉！如果係嘅話你家姐就唔會嗌我哋問佢嘢啦！以及佢就唔會對佢咁友善啦！你睇吓你家姐點對楓？」澈硯立即否定詡

「人哋同你分咗手啦！唔好成日幫住人啦！」詡提醒澈硯被甩的事，澈硯立即扁嘴低頭

「唔係喎！我覺得佢講得有道理喎！以我哋理解我家姐嘅性格，係敵人嘅話，佢唔會放過佢，而且我記得樺曾經話自己有一個恩人，可能就係我家姐去救佢出嚟！」梓旻說完望望澈硯，他立即後悔了

「點解樺同你講，唔同我講㗎？嗰陣時係幾時啊？」澈硯追問

(待續)

推

推。

梓旻不回答，也不知如何回答，因為之前樺接近澈硯的原因大概都是與他姐姐有關，亦即是樺應該一早已知道他姐姐的身份，也知道他與姐姐的關係。碰巧三人在回辦公室的路上遇到樺，三人隨即把樺拉去一個無人的地方對話。

「我地已經知道你同我家姐係識㗎啦！」梓旻率先叫

「咁又點？」樺完全不驚訝，也不意外，這讓梓旻有點氣忿

「可唔可以解釋吓咩原因你地會識？同咩原因你細個嗰陣會喺敵人嘅基地？」梓旻追問

「點解你知？佢同你講？」樺沒有回答

「唔係！係我地偶然自己發現嘅，請你解釋！」見樺沒有回答，梓旻也不想回答

「我唔想解釋，總之我就係企你哋嗰邊！」樺依然不回答，而且打算離開

「之前你話恩人叫你做嘅事，係咪就係我家姐叫你做？恩人就係我家姐？」梓旻踏前阻止她離開，可是在旁的詡見澈硯的臉色愈來愈難看，他想拉著梓旻，可是梓旻完全沒有理會他

「係，所以我係同你哋企埋一邊……」樺反復說著同一句話

「佢家姐叫你做啲乜嘢？點解唔同我講？」澈硯終於忍不住問，梓旻這時才意識到澈硯的存在，眼見澈硯那麼激動，眾人也沉默起來。眼看眾人也不發一言，澈硯越來越緊張及不安，並反覆追問：「究竟佢叫你做啲乜嘢？」

「我家姐叫佢觀察我……」梓旻嘗試模混過去

「你唔好講大話啦！我知道唔係咁簡單，頭先就唔會咁樣瞞住我啦！究竟係啲乜嘢？點解唔可以講俾我聽？唔通同我有關？唔通你同我分手係受家姐指示？」澈硯一臉愁容，但仍然得不到任何人的回應，澈硯接近崩潰的道：「定連拍拖都係方便收料？你……係咪……從來都冇鍾意過我？」

「唔……唔係！」樺嘗試解釋，但澈硯已經無法接受，離開了現場。

「有需要將呢件事搞到咁僵咩？你究竟係為緊邊個好啊？為佢好定為緊你自己好？你可唔可以唔好咁自私？」樺氣憤的跑走，只剩下詡陪著梓旻

梓旻無法接受，追上樺打算問究竟，可是途中亞塵突然跑出來叫停了樺：「呢份咩嚟？」

樺望望他手上的文件：「我要轉隊！」

「唔得！」亞塵撕破她的轉隊申請表

「只要新隊長畀就得！總之我一定要轉！」樺逃走似的跑走了，和月文(梓旻姐姐)擦身而過

「你嚟得啱喇！拒絕佢嘅申請！」亞塵憤怒的叫著

「冷靜啲啦！」月文冷漠的看著他

「你知我點解冷靜唔到格！」亞塵繼續咆哮

「你都知要點做……」月文直直的盯著他，他退縮了一下

(待續)

推。

推。

「只要你唔批准就得！」亞塵不打算低頭

「冇錯，只要你當初唔批准就得。」月文反駁，指着不遠處的梓旻：「咁就唔會有今日。」

「我控制唔到亞甘！」亞塵聲量轉細：「而且我已經盡力勸退！」

梓旻此時終於明白，亞塵一直以來針對他的原因，並不是他本人，而是因為姐姐的指使。為了勸退他，不得罪姐姐這個麻煩人，梓旻此刻無比體諒他的情況。

「你知我本身幾憎佢㗎！可以我都唔想！係亞甘瞞住我！」亞塵的這句讓梓旻剛本的體諒心情全部煙消雲散，似乎不應想像亞塵是被迫的

「你做唔到，我都做唔到！你自己搞掂佢！」月文打算拂袖而去，但又被亞塵叫住

「如果你當初肯講清楚就冇事！」

「我原句還返俾你！如果你當初肯講清楚就冇事！我估計仲有約一年時間，但所有野唔同曬，你小心連一年都冇！」月文拋下一句貌似警告的說話就離開，即使經過梓旻身邊也沒有說一句話，亞塵也低著頭離開

「佢真係慘，一定心情好複雜，手心又係肉，手背又係。」詡似乎很憐憫那樣低落的亞塵

「而家我唔複雜咩？畀人鬧完，再畀人鬧咁！」梓旻愈想愈氣，衝回辦公室當值去，剩下的數小時當值時間也不知澈硯在哪兒，他們也沒有深究他缺席當值的原因

那晚，梓旻及詡回到宿舍時，梓旻發現澈硯奇怪地站在走廊中央，看著梓旻的房間。梓旻立即拉著詡，靜悄悄的走向澈硯，本想開口問澈硯發生什麼事，但當他們走到澈硯身後就看到梓旻的房門開著，房內傳來怪聲。

「爆格？」梓旻突然低聲問，嚇得澈硯跳起了

「作死咩！突然係人地身後講嘢！」澈硯小聲罵完又說回房間：「爆格都唔會嚟總部啦！」

「怪物？」詡又問

「只攻擊我間房？」梓旻問

「唔通係複製人？」澈硯說完，三人吞吞口水

當下未知是否敵人的情況下，他們不能輕易聯絡控制室，因此他們決定進去一探究竟。梓旻熟知自己的房間，所以由他帶頭進走，他手緊緊抓着腰間的鎚子，以防萬一遇到攻擊。詡舉起雙拳，為梓旻作掩護，而澈硯則手放在耳旁，萬一有什麼就立即通知控制室。

他們打開房門，房間的燈全亮著，先聽到的是女子碎碎念的聲音，然後是罐子拍在桌上的聲音。走前兩步，他們發現那人是樺就放鬆下來。看到好幾個啤酒罐在地上，梓旻大力嘆口氣問：「你係我房做咩呀？」

樺轉望向梓旻，她雙頰通紅，明明不清醒的坐起來，舉起啤酒罐狠狠的向梓旻掉過去。三人敏捷避開，罐子直飛到對面澈硯的門，且造成了一個凹痕。

(待續)

推。

「吔日醉衰都係你呀！」她醉得有點口齒不清：「而家你揸車唔俾我轉喇！我又日唔到隊，女渣係⋯⋯」

之後的話說得愈來愈不清不楚，聽得三人皺起眉頭。詡拍拍澈硯：「搞唔掂喎！完全溝通唔到！你有冇方法呀！」

「有係有，但要對佢用AP，我唔會咁對佢！」澈硯搖頭

「咁唔緊要啦！你嘅原則重要啲，咁睇下搬唔搬佢返去囉！唔搬呢，佢室友可能擔心，搵起嚟發現係我間房醉曬咁瞓係度，咁你知啦！人人都誤會我同佢有嘢，而家仲瞓埋，好平常啫！」梓旻見澈硯不願意幫手就扮得不介意的說

「咁緊係搬啦！」澈硯不想樺的名譽受損

「咁就係邊個搬喇！嗱，我搬就惹人誤會啦！你搬就俾人傳舊情復燃唧⋯⋯呀！唔係喎！你平日俾人印象都唔係咁正常，可能啲人覺得你灌醉咗佢，唔知做過啲咩嚟咁喎！一係詡囉！但啲人又八八卦卦咁，又鍾意作嘢講故事，一個唔小心俾好似珈純呢啲人知樺醉成咁，可能就話佢搞完一個又一個。」梓旻知自己說服力不夠，但他憑有限的智力只有激脹法，望見澈硯有點猶豫，他再補充：「冇嘅！又叫唔醒佢，唔好害兄弟！我嚟啦！」

「唔好！我叫醒佢！」澈硯終於願意出手，梓旻感恩澈硯一遇到與樺相關的事，智力似乎就會急劇下降

澈硯用自己的槍向樺射出泡泡，樺不消數秒就清醒過來，呆滯的望着梓旻等人：「點解我係度嘅？」

「好問題！我都想知點解你係我房，仲飲到醉晒，而且仲攞啤酒罐掟我。」梓旻繞着手說

「哎呀！」樺按着額頭，視乎她已經知道發生什麼事了：「我只係有啲唔開心⋯⋯對唔住，我而家就走。」

「或者你應該講俾我哋聽點解你唔開心，以防下一次你又入我房攞啤酒罐掟我。」梓旻說完，樺靜默下來。梓旻見她似乎仍未打算告訴他內情，他嘆一口氣再說：「其實咁樣落去都唔係辦法！之前我唔知道我家姐係高級隊長同係你恩人就話啫！而家知道咗你都講俾我哋聽發生啲咩事，永遠唔會有信任㗎喎！枉我近時做乜嘢都同你哋講，我覺得自己好傻仔囉！」

(待續)

推。

聽完這段說話後，樺似乎有點動搖，但仍未願望開口。見狀，詡就插話：「係囉！有咩事，我地都可以幫手，乜都唔知，乜都瞞住我地，就只會得你一個。如果有需要，可能⋯⋯可能我地可以幫手說服師傅俾你入隊呢！」

詡也開口說服樺道出內情，可惜她仍緊閉嘴巴，似乎他倆的勸說也未能令她動容。此時，澈硯跪在她的面前，雙手搭載她雙手上，道：「樺，如果我幫到你，你即管講，我一定幫你。我唔介意你因咩事同我分手，唔介意你係咪愛我，唔介意你過去現在將來係點！我只會永遠支持你，永遠幫助你，永遠等你！」

被澈硯的真誠打動，樺開始痛哭起來，她抱著澈硯的頸哭道：「對唔住呀！對唔住呀！我真係唔想呃你！但我好想幫我媽咪報仇！我需要戴月文幫我，我好差！我好差！對唔住呀！」

「好！好！好！唔使對唔住！唔使對唔住！我心甘情願嘅！」澈硯回抱樺

樺冷靜後開始說起自己的往事：「十年前，我爸媽離婚之後，我媽一直都情緒低落，佢係啲冇男人養就照顧唔到自己嘅人，我爸一走咗就日日出去識新男朋友。當時間愈耐，屋企嘅儲蓄愈少，佢就愈急。當年屋企真係唔夠錢，我唯一嘅希望就係我爸，但當我想聯絡我爸嘅時候，我媽話我知佢地離婚原因，居然係我媽外遇有咗返嚟搵我爸埋單，而有咗嗰個係我。我爸好錫我，但因為我媽，因為我嘅存在⋯⋯我接受唔到就開始唔理佢，即使住係同一空間，我都冇關心過佢，唔知佢開始借大耳窿，仲識埋一班販毒人士，染上毒癮。（樺又再開始流淚）個班販毒人士並非一般毒販，佢地係同「獨」合作，當啲人冇錢冇利用價值就送去做實驗。最後，我地被恩人救出，但我媽已經捱唔過實驗死咗！」

「原來佢地除偷渡客，仲有捉道友！」詡道

「唔奇，做實驗要好大班白老鼠，可能唔止毒，其他範疇都有做！佢地視人命如糞土！」澈硯貼心的遞上紙巾

「所以我家姐救咗你之後就叫你入隊？」梓旻比較在意樺與姐姐的關係

「唔係，佢冇叫我入，係我自己想入！」樺澄清

「咁佢又叫你做嘢？」梓旻追問

（待續）

推。

「佢因為嚟睇你覺力賽而知道我入咗去，有嚟問我點解入隊，我講⋯⋯總之我想入隊，佢就同我講你、詡同澈硯都係好人，而楓就要留意下咁⋯⋯」她有點歉疚的望向澈硯：「點知你嚟搵我，仲同我表白，所以⋯⋯對唔住⋯⋯」

「唔緊要！我願意嘅！你肯同我拍拖已經好幸福！我仲要多謝月文添！」澈硯捉緊樺的手說，樺不禁害羞甜笑

「如果⋯⋯我地重頭開始⋯⋯好唔好？」樺小聲問

「你⋯⋯你講真嘅？（樺點頭）緊係好啦！」澈硯大笑起來，梓旻在旁做了一個想吐的樣子

「然後呢？然後呢？」梓旻不耐煩的要求樺說下去

「之後都冇特別聯絡，直到你質問我，話我利用澈硯⋯⋯」樺又似楚楚可憐的眼神看着澈硯

「佢係衝動啲，但都係為朋友好，你原諒佢啦！」澈硯回以同情或是愛慕的眼神道

「喂！我使乜佢原諒？」梓旻有點怒火，開始覺得樺根本就是賣可憐，駁同情

「但而家乜都冇喇！我自己又冇力量，月文又唔畀我入隊，我乜都做唔到喇！」樺流下眼淚，可是梓旻一點也不同情這個虛偽的八婆

「梓旻，月文係你家姐，你幫下佢，說服你家姐俾樺入隊啦！」澈硯抱著樺道

「我家姐而家都未肯講清楚曬啲嘢我聽，啱啱仲同亞塵嘈完，你覺得我改變到佢？你會唔會太天真？我地幫你報仇未得囉！」梓旻愈來愈不憤

「我媽媽嘅仇要由我嚟報！呢個已經係我唯一嘅生存目標喇！」樺搖頭痛哭

「唔好喊！唔好喊！梓旻，連你都唔幫佢，就冇人幫到佢！你唔係咁冇人性呀？」澈硯開始指責梓旻

「你條反骨仔！重色輕友！你、你⋯⋯」梓旻話未說完就突然覺得暈，然後眼前一黑便倒下

***

窗外下起很大的雨，風從窗外吹進來，把兩邊蕾絲窗紗吹起，讓室內的人感到有點寒意。從沙發及電視等家具可知，這應該是某人家中的客廳，可是這裡滿地雜物，凌亂不堪，令人注目的是地上那破爛的嬰兒床，明顯是被人畜意破壞的。家中唯一的光源是來自露台的位置，依稀看到一個女人的黑影坐在近露台的沙發上遙看山景及樓景。

「做咩熄曬啲燈？」燈亮起，梓旻看見另一個梓旻在門的位置脫鞋，似乎是剛回到家。

梓旻又在發預知夢了⋯⋯

(待續)