《覺能之戰》

推。

第四十三章 不想接受的真相

見梓旻等人都坐好及靜下來，亞常開始說：「孟蝶有同你提起過「時空」嘅事，其實就係指我地曾經進行時空跳躍，由本身嘅時空去另一個時空，跳躍得一個觸發點，而且返唔到轉頭，亦都唔可以選擇時間地方。而觸發點係咩，恕我唔講得你地知。我認識月文嘅時候，佢已經同浩政進行至少一次嘅時空跳躍，當時嘅佢地都唔知觸發點係咩。佢地之前發生嘅事，我都係聽返浩政講我聽。

最初浩政認識月文嘅時候，係佢嘅時空黑影日發生後唔知幾多年嘅事，所有嘢都被怪物摧毁，完全係睇電視電影個啲末日求生嘅情景。當時嘅月文應該係沉睡狀態，或者應該講話佢係一條屍體咁準確啲。經過李博士嘅研究同實驗，月文係唯一一個實驗成功而醒返，以及第一個擁有A P嘅人。由於製造月文之後就再冇成功品，所以李博士轉移使用浩政作為實驗品，將月文嘅血注射入浩政體內，浩政成功成為第二個擁有AP嘅人，但都得佢一個成功。佢地用盡方法推返李博士嘅不人道實驗嘅時候，唔小心觸發時空跳躍返到過去。

再去到新時空，佢地睇到嘅係月文被從天而降嘅怪物吞噬，再殺自己屋企人，即係你同你媽咪，嘅一幕。我知救唔到屋企人造成佢好深嘅創傷，佢同浩政用盡方法殺死咗個隻怪物，並且將自己嘅屍體處理咗，因而令嗰個時空嘅李博士冇辦法再製造出另一個有AP嘅月文，除而代之，製造咗我同亞甘兩個。

由於我本來都識浩政，加上我唔喜歡李博士用怪物造嘅研究，所以我好快就轉移幫助佢兩個。但係亞甘本來都幾聰明，而且好勝嘅性格，都真係搞咗我地好耐。都因為亞甘嘅智慧加野心，喺嗰個時空佢成功研究出AP注射劑，並且製造出軍隊。

經過一連串苦戰，成功將亞甘㩒住，本來想進一步將博士及軍隊消滅，但可惜唔小心觸發時空跳躍。嚟到第二次跳躍，即我嘅第一次跳躍，我地都仍然改變唔到自己親人被殺死嘅情況，縱使我地將落力避免自己嘅屍體被發現，或阻止李博士製造出新嘅AP者，最後都製造咗亞塵以及孟蝶出嚟。

亞塵完完全全係一個投機主義者，只要對佢有好處就會試，但佢做唔到亞甘咁令人得到AP，而佢當時嘅研究主要係配合李博士製造複製人。當時嘅複製人冇依個時空嘅複製人咁利害，而似一堆隨時變怪物嘅計時炸彈。既然複製人唔似人，李博士就開始打算用一直想有小朋友嘅孟蝶生出有AP嘅人，但一直唔成功，所有都胎死腹中。

由於我地都至少有四個人，加一堆我地信任嘅人接受AP注射，最終都幾乎推翻曬李博士。我講幾乎係因為李博士係混亂中逃走咗，我地以為冇事，點知佢觸發咗時空跳躍，我地都被送返過去。雖然我地當時唔知咩係時空跳躍嘅觸發點，但個刻我地認知到，只要係被李博士直接改做而得到AP嘅人，加埋主要觸發者先會跳躍。月文、浩政、我、亞甘、亞塵同孟蝶都喺冇直接觸發嘅情況下被送返過去。

今次嘅轉移，月文及亞塵終有足夠力量成功救返自己屋企人，加回收自己嘅屍體。今次因為有長期輔助李博士嘅亞塵加盟，知道咗原來李博士一直都用自己雙胞胎孫女——亞半同亞滿，作為原料製造有AP嘅人。我地以殺死李博士及奪回雙胞胎為目標，但最後都被李博士帶同亞半逃走。

因為我地都估計到有新嘅AP能力者出現，我地決定全力追捕李博士。今次就到枳洛同亞卯嘅出現，枳洛係個悲觀主義者，所有事都以極負面態度看待，所以極難溝通；另一方面，亞卯係過分天真而偏執，簡單嚟講係蠻橫無理嘅人，又係溝通唔到。單單兩個人就已經麻煩，以為今次冇善於科學研究嘅人幫手，點知殺出一個Rose。可能之前個時空有亞塵喺度，埋沒咗Rose嘅才華，又或者如亞塵自己所言，話自己做咗手腳令複製人唔成功，總之喺呢個時空佢成功做出高智慧且可控制嘅複製人。我地因敵人數量過多而陷入苦戰，「蟻多摟死象」，我地開展咗一段漫長嘅戰爭，最後月文同亞塵嘅屋企人被戰火誤傷而死。

對亞塵嚟講，可能係第二次面對家人離去，但對月文嚟講今次係最有希望一次，加上個陣佢有咗浩政個仔⋯⋯」

「咩話？」詡驚訝大叫：「佢有咗邊個個仔吖？」

「浩政。」亞常笑回

(待續)

推。

「佢⋯⋯我⋯⋯佢同我係同母異父？」詡說了一句讓梓旻極為驚訝的說話

「咩話？同母異父？點解我家姐個仔同你係同母異父？」梓旻驚訝問，澈硯在旁忍不住笑了出聲

「我呀⋯⋯」詡難堪起來，以視線向亞常求助

「你同你哥都係同母同父。」亞常雖然看起來苦笑，但也看得出他在忍笑

「唔要！我接受唔到！我唔要！」詡大叫

「你唔要咩？即係點？即係點？」梓旻已經完全陷入混亂之中

「哈哈哈！即係你係佢舅父，佢係你外甥囉！哈哈哈！」澈硯大笑起來

「唔要！唔好叫我舅父！」梓旻回想起自己擔心鈞悅學業的夢：「唔怪之得我係夢裡面會擔心你讀書啦！但我都唔要咁大個外甥，唔准叫我舅父！」

「如果佢係你舅父，咁我就係你亞叔！你可以叫我叔叔！」澈硯大笑

「我唔會叫你做舅父，我識嗰個舅父先唔似你而家咁嘅樣！另外，點解我要叫你叔叔？你癡線呀？我而家同你地差唔多大咋！唔好覺得我係外甥就細過你地，而且外甥老過舅父大有人在！」詡拒絕道

「因為我真係你亞叔！哈哈哈！」澈硯大笑

「唔明。」梓旻不解，亞常及詡也對澈硯的說話皺眉

「唔明就算⋯⋯哈哈哈！」澈硯笑言，梓旻突然想起澈硯之前有提及過自己有兄姊

「浩政係你亞哥？」梓旻問完，詡難以接受的大力搖頭，相反澈硯笑著點頭

「浩政冇提過喎！」亞常似乎也是第一次聽到這事

「點解你要而家講呢？」梓旻問

「好玩囉！你睇佢個樣幾難受！」澈硯指着詡笑

「你真係唯恐天下不亂。」梓旻無奈道，詡已經近乎想哭起來

「我同浩政幾乎冇幾句，以前關係完全好似陌生人一樣，分分鐘你地個個同佢嘅關係仲緊密過我同佢。我都講過啦！我係失敗品，我幾乎冇機會同啲亞哥家姐講嘢。我都係入咗嚟先同浩政講過兩句。」澈硯回答亞常的疑問

「你又震驚啲咩？點解可以連自己亞爸係邊個都認錯？」梓旻問詡

(待續)

推

工作太忙，壓力太大，要停更一日，唔好意思各位

照推

推。

將於八月六日再續

「唔怪得佢嘅，因為月文冇講，而且真正係佢亞爸嗰個浩政一早死咗。」亞常道，三人目光焦點又再重新集中在亞常身上。亞常繼續：「雖然話月文因屋企人又再消失而大受打擊，因為失控而得到更大力量，但李博士當時已經掌握大量生產同月文佢地一樣純正強大嘅AP能力者。直到鈞靖出世，戰爭都冇停過。我地冇辦法之下都要增加幫手，可以算係我地「角」先鋒隊嘅初型。喺某次交戰下，浩政無人知發生咩事下死咗，當時已經有咗鈞悅你，但係戰爭一日未完，再生一個小朋友只會令大家負荷更重，所以月文決定用AP限制你肚內成長。

冇咗浩政咁大嘅戰力，令我地失士氣。對方知道呢件事就趁機攻過嚟，係我地大家都絕望嘅一刻，係鈞靖救咗我地。同其他人唔同，鈞靖天生有能力，但因為佢冇A Mark，所以我地冇人知佢有AP，當然冇訓練。青少年嘅鈞靖憑一己之力完全推返局勢，令我地士氣大增，亦都成功反擊。再一次失望嘅係，李博士因為上次成功觸發時空跳躍，今次佢都有做同一件事，我地又被迫跳耀。

今次跳躍成功之後，不幸地又再被李博士搶走雙胞胎妹妹亞半，為對應情況，今次我地決定將AP分享俾所有人，所以幫手人數大增。同時，有一堆人本身係李博士旗下轉投我地，情況就更樂觀。我諗梓旻一直發夢發到嘅係呢個時空嘅嘢，所以我講詳細少少。

我哋以當時最主要嘅同伴分成七隊，包括負責一隊嘅月文、二隊嘅亞甘、三隊嘅楊枳洛、四隊嘅亞卯、五隊嘅孟蝶、六隊嘅亞塵同埋七隊嘅我。當時梓旻你家姐相信你及早有能力比較好，所以好快就說服你入隊，只係你唔想under你家姐，所以轉投亞甘嘅隊伍。其實而家有入隊嘅人大多上個時空都入隊，只係關係有啲唔同，例如你除咗同澈硯關係好，同孔SIR關係都好好咁。

為咗制止李博士，亞塵嘗試從李博士身邊抽走Rose，不過事實係不論今個時空定上一個，佢都係背叛咗我地。雖然最保險係令Rose無法知道我地部隊內幕，但亞塵今個時空仍然用佢及想相信Rose會感化，但亞甘就覺得Rose嘅背叛係必須發生而允許Rose加入。除咗Rose，仲有啲事無法避免地發生，例如亞豪嘅死，我地都盡咗力，但佢最終都變成怪物。既然今時空都變成怪物，我地就希望盡量搵返同樣嘅『劊子手』，即係你同澈硯，唔同嘅係上個時空你地都知道佢係隊友，而今次你地唔知。我地唔想俾你地知，係因為上個時空對要殺死自己人非常抗拒，甚至得到精神病，我地唔想再次發生呢啲事先冇講。

睇住隊友死或殺隊友係唔開心嘅事，我地都理解。慶幸，並唔係所有人都出現同樣結果，例如澈硯同樺。我諗你都有夢到，或講俾佢地聽澈硯點死，以及你同樺鬧離婚後自殺死嘅事。」

聽到這裡，梓旻渾身一震，偷望澈硯。澈硯提高聲調，驚訝問：「咩話？咩離婚？」

(待續)

推。

「噢，我係咪講咗啲唔應該講嘅嘢？」亞常觀察到梓旻在逃避澈硯的眼神

「講啦！你係咪有啲嘢瞞住我？」澈硯整個身體轉向梓旻，迫他說話

「我⋯⋯我⋯⋯我覺得你聽完唔開心先冇講。」梓旻吞吞吐吐

「而家！立即！講！」澈硯憤怒的道

「咁嗰個時空嘅你同樺拍拖期間，自己毒死咗自己嘛！咁嗰個時空嘅樺又有咗你個仔喎！母子冇人照顧又好慘，咁我咪以結婚承諾照顧佢囉！點知嗰個時空嘅樺唔知點解駝駝下冇咗個B喎！咁佢太傷心想返出嚟打前線，咁嗰個時空嘅我又唔想佢受傷，咪最後迫到大家好唔開心，然後佢就⋯⋯嗰個時空嘅佢就⋯⋯自殺⋯⋯」梓旻愈說愈心虛，不敢正眼望澈硯

「我可憐嘅亞樺，居然係我死之前同個冇用嘅人渣一齊！陰公！」澈硯搖頭皺眉

「喂！係嗰個時空嘅我唧！呢個時空冇咪得囉！」梓旻說

「我都係鬧緊嗰個時空嘅你吖！」澈硯回

「哦！所以亞塵討厭你係有原因，你喺上個時空迫死咗佢個女。」詡恍然大悟

「好，咁我繼續嗰個時空嘅其他故事啦！雖然跳躍之後，隨住鈞靖使用AP嘅力能愈來愈成純，部隊同李博士嘅戰爭都好快受控制，月文最初係唔想浩政呢個時空再咁辛苦要帶領討伐，但中間發生啲事令月文更唔想認返嗰個時空嘅浩政，亦都唔敢生鈞悅落嚟，就係鈞靖嘅婚姻。」亞常說

「我第一次聽我哥結過婚喎！」詡驚訝地說

「你出世嘅時候，佢甚至係一個半身A Mark嘅中年男人添啦！佢嘅婚姻係一件冇人想提起嘅不幸事件。鈞靖完全遺傳咗浩政嘅聰明才智，但同時都似足浩政唔識人情世故，非常冷漠。細個已經唔同同年嘅人玩，大咗仲變得更加寡言。唯一完全冇得到遺傳嘅係浩政個種病態愛妻嘅性格，佢對一切都冷漠，冷漠到月文擔心。

但某日，鈞靖忽然變得經常同唔同女性交往，而且好大部份都係鈞靖想分手，女方死纏爛打。當時，我地仲講笑話，當浩政迷戀月文一個嘅時候，佢個仔居然可以令全世界嘅女性為佢瘋狂。

最終某日，佢同月文講佢愛上某個人，愛到決定要同佢結婚，而嗰個人就係鼓鼓。一向擔心鼓鼓嘅宏基得知鼓鼓搵到自己喜歡嘅人，兩邊父母都全力推進呢段關係，由公開戀情到結婚不過三個月時間。之後，呢段婚姻過咗一年之久，我地發現鼓鼓嘅精神狀態異常，但點問都問唔出原因，最後我地只好偷偷地裝攝錄機。我地發現原來佢一直當鼓鼓係白老鼠，用佢嚟做各式各樣嘅實驗。

因為呢件事，我地更加發現佢一直以嚟都有用佢啲女朋友做實驗。佢一直都堅持自己愛鼓鼓，甚至愛過每一個女朋友，但我地知佢只係愛佢地嘅實驗價值，而鼓鼓咁合佢心意係因為佢講唔到嘢。

我地用盡方法將鼓鼓從鈞靖身邊拉走，但都唔成功。我地甚至用到洗腦嘅方法令佢討厭鈞靖都唔成功，隨住日子一日一日過去，鼓鼓係情況愈嚟愈差，差到瞞唔到宏基。知道愛女受虐嘅宏基當然出手想阻止，最後仲打起上嚟。出盡九牛二虎之力，我地阻止咗佢地，亦都成功停止鈞靖嘅行為。鼓鼓變得愈嚟愈健康，宏基都放心啲。

推。

鼓鼓冇咗實驗價值，鈞靖理所當然冷待多咗鼓鼓，轉為集中咗係研究上面，啲研究殘忍，多數係以動物作實驗對象。但大家都明，由人類轉為動物做實驗已經係好大讓步，而且仲要佢幫忙處理李博士嘅事，大家都隻眼開隻眼閉。

鼓鼓呢件事俾月文最大啟示係，不論李博士、浩政定鈞靖都係一樣缺乏基本人性道德，咁照估計佢肚入面嗰個就高可能出現同樣情況。佢唔想生鈞悅出嚟，亦都唔想接觸令佢仔變得咁冇人性嘅浩政。

佢逃避咗好耐，但鈞悅即使被抑壓都係緩慢成長緊，而且開始有反抗母體情況，反吸返月文自身能量，導致月文控制唔到AP。面對愈嚟愈激烈嘅戰況，佢又作為最大戰力，控制唔到AP係極大問題。

最後我主動提出成為BB爸爸，佢先願意生鈞悅出嚟⋯⋯雖然你出世大多時間都係梓旻湊多，哈哈⋯⋯佢其實好興幸你唔似浩政或鈞靖，亦都因為你唔似佢哋，今個時空佢先願意俾浩政加入隊伍。」

「唔怪得你家姐對鼓鼓咁好啦！估唔到詡個亞哥咁變態，同浩政一樣冇乜人性！」澈硯道，梓旻及詡二人睜大眼驚訝的看着澈硯

「喂！你好似都一樣喎！三番四次破壞隊規嘅人好似係你喎！」梓旻道

「點同！我又對你地好，又對樺好！」澈硯搖頭說

「閘住，你幾時對我好過？另外，如果話對女朋友好，浩政都好啦！」詡道

「呀！上個時空雖然月文冇接觸浩政，但浩政喺某場合見到一次月文之後，就為月文賣命，縱使月文拒絕見面，佢都願意完成各個月文指派嘅任務。浩政喺任何時空都擺脫唔到月文，所以唔使擔心佢會變節。」亞常繼續補充：「雖然話鼓鼓後來都向好，但最後身體太虛弱死咗。之後，就發生樺自殺事件，最後明明取得最後勝利，鈞靖就忽然發作，殺死所有人。月文最後都要自己落手處理鈞靖，令月文精神衰弱，都令佢唔想面對鈞悅。」

（待續）

「講起嚟⋯⋯我記得其中一個夢係亞滿同鈞靖爭執完就出事，唔通關亞滿事？」梓旻問

「癡線，佢細路嚟㗎咋！」亞常非常大反應，連詡也被他的反應嚇一驚

「佢地幾乎同年㗎喎！」梓旻問

「總之就唔會啦！得喇！嘢就講完喇！走啦！」亞常似乎非常不耐煩

「等等！我未問完！經歷咁多嘢，點解你地個樣都冇變嘅？每次都會reset？」澈硯問

「⋯⋯太強嘅力量會令我地冇咁易老。答完，走啦！」亞常說完便開門趕他們走了

———————-

搞唔掂，又病

「而家即係我家姐，唔係我家姐。」梓旻以此為由，要求詡及澈硯讓他有安靜的空間接受現實

梓旻獨個兒坐在天空花園的座上，喝著可樂仰天長歎，可能是坐姿不好，或仰望街燈，或喝可樂的關係，他開始頭痛起來。不久，有人移開他對面的椅坐下，梓旻因正抬頭望天而不知是誰坐在他對面。不管怎樣他只想獨處，他邊坐好，邊趕走那人：「走啦！隔離有枱吖！」

那人未有離去，梓旻不耐煩的望向那人，立即被眼前的人嚇呆，那人居然是自己。除了制服心口上的隊伍標誌不同，那個人完全就是自己。那人沒有理會梓旻，自己獨個兒在喝可樂。

「喂！搞咩？」甘生的聲音從後傳過來，眼前的自己望過去，眼神由迷惘變憤怒

「你⋯⋯因為你提議我家姐叫我入隊，我先要面對呢啲事，我可一世都唔知我家姐⋯⋯我真正嘅家姐已經死咗！」眼前的自己含淚道

「你始終都要知，知咗更加好啦！過去嘅事由佢過去，而家呢個都係你家姐吖！」甘生走到梓旻前面向眼前的自己擔

「但佢唔係我真正嘅家姐⋯⋯佢死咗喇！」眼前的自己說

「佢都唔係佢真正嘅細佬，佢都對你好，點解你唔得？」甘生說完後與眼前的自己對望

「甘生，好似守則有一項係唔可以對隊員使用AP，你作為制定者，係咪都應該遵守規則？」梓旻中途已察覺眼前的景象是由甘生的AP造成

「失控過係唔同啲，咁快發現。你放心，我最多只可以重現回憶，唔能夠製造假得咁真嘅景象。」真正的甘生從梓旻背後走出來，眼前兩個幻象也如霧般消失

「好彩而家可以感應到你嘅AP，我都差啲以為自己終於癡咗線。不論你呢段幻象係真係假都冇關係，影響唔到我。」梓旻再開了一罐可樂

「即係？」甘生不解

「即係我家姐唔係我呢個時空嘅家姐，但我知佢仍然係我家姐。或者真係因為我留有上個時空嘅我嘅感受，所以我唔太難接受。」梓旻喝一口可樂道

「咁就好，你家姐不論上個時空定今個時空都係重要戰力，要佢再經歷同家人和好嘅心理壓力，只會影響進度。上個時空嘅你仲威脅佢同爸媽講佢唔係真正嘅家姐，令佢煩惱咗好耐，而家唔使煩仲好！」甘生伸懶腰道

「我仲想佢煩下先，始終俾人瞞住一啲都唔好受，等返過零星期先同佢講。」梓旻要求道

「只要呢過零星期冇重要事，我都唔會理你地。好喇！你自己休息，我唔阻你！」甘生說完便轉身打算離開

「等等！點解我知真相仲好？明明唔知都可以照運作。」梓旻問

「兩姊弟坦坦白白唔好咩？」甘生雖然是回答了他的問題，但梓旻看得出他仍有事隱瞞