《覺能之戰》

太忙，居然冇up文
今日補返

「佢又咩事？」Crystal不耐煩問

「佢被派次救援隊，係未獲批准下擅自同亞豪調換咗，連累Rose被處分。」鼓鼓爸爸此話一出，眾人也對Dali感到憤怒

梓旻生氣問：「點解佢唔出？」

「審緊，可能有佢嘅原因呢……」鼓鼓爸爸說完看看背上的珈純道：「帶咗啲人去醫院先，搞掂之後我同富哥有排忙……」

「我跟去睇睇啦！」Crystal揮動右手趕梓旻等人離開：「你地返去先，唔好阻頭阻勢。」

梓旻及澈硯只好離開，沒什麼地方去就回O隊辦公室。來到O隊辦公室門外，剛好碰見睡眼惺忪的翊。

「搞咩？你係度……」梓旻問

「醒咗嚟睇下最新情況囉！搞咩？你地兩個都係度嘅？」翊望望澈硯，澈硯傻傻的笑着

「係喎！你做咩嚟O隊辦公室？」梓旻現在才察覺不妥，不知為什麼澈硯要跟來

「我其實俾人派咗嚟O隊！以後大把機會見！」澈硯嬉皮笑臉的

「你轉咗入先鋒？研究組個邊呢？」梓旻驚訝問

「我原則上仲算係研究組，我其實申請入先鋒好耐都唔批，但唔知點解今次批咗，但條件係我要定期返研究組做實驗，仲要係一級嘅實驗！」澈硯興奮道

「咩一級實驗？」詡問

「唔講你聽住，遲啲先！嘻嘻嘻嘻⋯」澈硯笑得很古怪，梓旻露出不安且感到噁心的表情望向詡，想得到詡的共鳴，但詡居然面無表情的道：「好吖！所以你地點解一齊行嘅？」

「其實⋯⋯」梓旻嘗試把剛才發生的事告訴詡，詡「嗯嗯、哦哦」的回應完，最後以一句「咁即係都未有咩新進展啦！」總結後離開了。

詡一向對其他人滿口怨言，偏偏對澈硯卻是沒什麼反應，儘管澈硯多麼的古怪及嚇人。梓旻一再感到不解，望著澈硯道：「詡佢⋯⋯可能幾鍾意你。」

「吓？唔係話？我對活生生嘅男人冇興趣喎！」澈硯裝作十分驚訝後又說出一句奇怪的話

「吓？」梓旻瞪大眼睛

「冇冇冇！講笑講笑！哈哈哈哈！」澈硯大笑著進了辦公室，梓旻深感不安且極不舒服，就這樣偷偷離開了

就在他思考到哪裡消磨時間的時候，手錶響起並顯示出「請立即到3號會議室進行匯報！」

他立即拍卡乘搭升降機到42樓，離開升降機的一刻便看見幾個工作人員在1、2、3號會議室門外坐著，梓旻直行到達3號會議門前，工作人員抬抬頭，再望回筆記型電腦冷淡地說：「名。」

「戴梓旻。」梓旻仍然不習慣面對這些工作人員

「坐。」工作人員指指旁邊的沙發

不一會便有人叫梓旻進房，如同一般會議室，有一張長方形長枱及多張辦公椅，整個會議室都以暗色為主，令落地玻璃外的天空看起來更亮眼。坐在長枱盡頭主席位是甘先生，他面帶微笑友善的伸出手示意梓旻坐在他對面的辦公椅上。梓旻不習慣面對這些嚴肅的場面，用盡全身的力控制雙腿走的時候不要發抖，及坐下時腰板挺直讓自己能夠正視三位隊長。

坐下來抬頭時，他用力控制自己的呼吸節奏，嘗試看清坐在甘先生左右的是誰。坐在甘先生左手邊的是亞塵，一如以往的一臉臭面，一臉無趣的看著他。而坐在甘先生右手邊的是一位面上掛著禮貌笑容的陌生男子，他白晢的皮膚配上黑色短髮中分頭，身材高大且背闊胸寬，整潔的外表加上有禮的笑容帶點文青氣質。

「梓旻，知你第一次匯報，放鬆啲！我同亞塵你識啦！而呢位就係P隊高級隊長叫吳偉謙，會同我地一齊聽匯報！」甘先生介紹完那位高級隊長，那人便點點頭說：「叫我亞常就得。」

梓旻也禮貌的點頭回應：「你……你好，叫我……叫我亞旻……就得。」

「好！亞旻！講一下你今次任務所屬隊伍、隊友同埋經過。」甘先生說出梓旻需要匯報的事項

「我今次係主救援隊伍第一小隊，同隊有Lorre、Baldwin、Fay、鹿仔、阮超同埋詡一組……呀……我只知道佢地個稱呼，唔知全名……」梓旻有一點臉紅，看到甘先生的「沒問題」手勢，就繼續說：「我地到達目的地就開始進行疏散群眾嘅任務，之後收到有百核高速向我地移動，就同其他救援隊隊員一齊離開。但到中途俾……籃球咁大嘅百核分身攻擊，我同詡、彭麗瑤，仲有……一位T隊隊員，我唔知佢叫咩名，四個就同大隊分開咗，然後我地就應付啲分身。冇耐百核本體想攻擊我地……」

「想攻擊你嗻……」亞塵突然插話

「吓？」梓旻被亞塵嚇住

「冇，頭先同攻擊隊嘅人匯報有講到百核本體想攻擊你，所以都想問知唔知點解呢？」甘先生補充

「唔……唔清楚。」梓旻回應

「唔緊要！繼續！」甘先生說

「繼……繼續，攻擊隊嘅人都趕到，佢地打低本體之後，回收咗核心就收到有三隻紅核……」梓旻未說完又被打斷

「聽講中途佢地發生咗啲爭執喎！」甘先生問：「知唔知發生咩事呢？」

梓旻對當時的情況記憶猶新，但他有種感覺是似乎不論怎麼說也對浩政不太有利，因此他只答了：「唔太清楚，當時太驚唔記得。」

聽到他的答案後，亞塵不禁「噗」一聲笑了出來，而甘先生兩邊嘴角輕輕向上彎一彎，點點頭道：「好嘅！繼續啦！」

不知是否太心虛，梓旻覺得甘先生已看穿他的謊言，但既然已經答了就不管了：「我地趕進行新一輪搜救行動，四個人被派去地面搜救市民，但中途殺出一位白衫男人同紅核。紅核俾主攻擊隊伍第二小隊嘅人打低，然後就出現一個腳有A Mark嘅人打暈咗主攻擊隊伍第二小隊嘅人，浩政避唔切，俾人一腳踢暈咗……」

「一腳？真係一腳？」這次被那位叫亞常的高級隊長打斷他的匯報，亞常拉高聲線，興奮帶點驚訝的，仿佛找到一些有趣好玩的事

「係……係……」梓旻語塞

「哈哈哈哈！佢都有今日喇！哈哈哈哈！」亞常大笑道

看梓旻一臉不知所措，甘先生笑勸：「冷靜啲！」

「唉！我識佢咁耐都未見過佢咁失威！」亞常用手抹去眼淚

「唔好誤會，佢地好friend！」甘先生笑道

「繼續啦！」亞塵仍然一幅臭臉

「好……之後就有……好似叫一角嘅角獸，用非常血腥嘅方法殺死咗嗰個人。」梓旻繼續匯報

「佢有冇同你講咩？」亞塵問

「佢？」梓旻不解

「一角吖！」亞塵有點不耐煩

「冇……冇，我唔知佢識講嘢。」聽完梓旻的話，三人眉頭向上揚，似乎很驚訝，然後眉來眼去的，似乎他們有一些情報只有他們三人才知

(待續)

今日要停更一日 努力工作中

「唔知點解白衫男求一角帶走佢，但一角冇理就走咗。之後我地點問個男人都唔講原因。」梓旻繼續

「關於嗰個白衫男，佢暫時判定為唔危險，會喺研究組個邊扣留一段時間，你同另外兩個送佢返嚟嘅同事就負責佢啦！」甘先生給梓旻一個黑色文件夾

「兩個？應該三個喎！」梓旻嘗試糾正

「兩個，吳一詡同彭麗瑤，個位T隊隊員已經退咗隊！呀！加埋澈硯啦！佢新入你隊。你報告到呢度就得！走啦！」甘先生揚揚手叫他離開

居然退隊了，但那個T隊隊員都是見習隊員，第一次就遇上那麼多事，也難怪萌生退隊的念頭。梓旻拿著黑色文件夾離開，一邊走向升降機，一邊細閱內容：「鄭子謙，犯罪集團『獨』的協助者及實驗對象，於十月七日背叛其組織。」

「實驗對像？」梓旻不禁把心中的疑問說出聲，他模糊的記起近日好像聽過類似的事。升降機門開啟，梓旻只看文件沒看路，一下子撞上了正在離開升降機的詡。

「搞咩？唔睇路！」詡搓著自己胸口埋怨

「Sor！我掛住睇份文件，係甘生叫我地跟嘅，關於個白衫男人……你而家要去報告？」梓旻問

詡拿走梓旻的文件邊看邊回答：「係吖！有邊個人喺入面？」

梓旻回想一下：「有亞塵、甘生，仲有……好似叫亞常。」

詡立即眼睛發亮，聲音帶點喜悅：「亞常係度？」

梓旻有點被嚇怕，所以只是點頭回應，詡顯得更興奮，立即把文件交還給梓旻，說著「一陣先傾」就快步走了。梓旻對詡的反應有點不解，究竟亞常是詡的什麼人呢？為什麼他會那麼興奮？帶著疑問及文件又再回到O隊辦公室，就在他踏入辦公室一刻，他後悔了。

「終於返嚟？」是澈硯，他坐在休息室裡的沙發上，把玩著不知從何來、手般大的黑色骰子。梓旻完全忘記了他本來就為了避開澈硯才沒有在辦公室逗留。

梓旻沒好氣的「嗯」了一聲，然後就直接走回自己的辦公桌去，隨便把文件夾放在桌上。澈硯隨即把文件夾拿上手看，這一動作激怒了梓旻，梓旻想把文件夾搶回來，不果，罵道：「有冇禮貌呀你？」

「份嘢我有份嘛！」澈硯已打開看

「你又知？」梓旻想起甘先生的確有提起澈硯

「亞塵啱啱SEND信息嚟講明『戴梓旻啱啱攞咗份黑色文件夾，睇睇佢！』咁講。」澈硯奸笑道。這讓梓旻不爽，想著亞塵是否故意為難他，畢竟亞塵一直看他不順眼。本來只是猜想，但接下來澈硯的一句話令梓旻肯定這個想法：「佢仲講『以後你就跟住梓旻學嘢啦！』」

(待續)

梓旻感到非常不爽，莫名的怒氣湧上，忍不住盯著澈硯，直白的說出一句：「你知我討厭你㗎可？」

澈硯露出令人難以觸摸的笑容：「好難唔知，但我幾鍾意你。」

梓旻聽完起雞皮疙瘩，面容扭曲的道：「躝開啦！」

「亞塵叫我同你跟……高級隊長嘅命令我唔敢唔聽！」澈硯說完還在偷笑，令梓旻對他的厭惡感倍增。雖然很想逃離現場，但澈硯拿著他的文件又坐在他唯一的「逃生通道」，走不了令他更心煩。澈硯指指文件說：「條友聲稱自己係俾人捉去做基因實驗嘅無辜市民。陰公……冇乜朋友，冇拍拖，亦冇結婚，屋企人又失蹤曬，又冇親戚。」

「咁……又查唔查到咩基因實驗？」梓旻左手按壓著自己的太陽穴不耐煩的問，不知為何覺得這段對話似曾相識

「冇寫，可能查緊，研究組成日收收埋埋，我地未必有機會知。除非……呢個鄭子謙肯講我地聽！」澈硯有點小興奮，似乎對任何與研究有關的事都有極大興趣

「研究組成日收收埋埋？」又是一句似曾相識的說話，這感覺已經困擾得梓旻渾身不自在：「你唔係研究組組員咩？」

「有分級數㗎嘛！主研究所我都係近排先攞到限權進入咋！」澈硯又露出惹人厭的狡笑：「所以我要入去查清楚所有秘密！」

梓旻吞了一大口水，仍然應付不了這樣的澈硯：「主研究所？係邊？」

「係甘氏大廈後面座山嘅位置，因為比較隱瞞，所以就咁望望唔到。」澈硯放下了文件，終於離開了梓旻的辦公桌

「你之前個咩一級研究都係嗰度做？」梓旻立即站起來，拿起文件夾，緩慢的向通往休息室門移動

澈硯在文件櫃上找到一袋花生，他高興的打開包裝：「係吖！諗起都興奮！唔知要做啲咩呢！」

澈硯似乎十分喜歡花生，急不及待的吃起來，完全沒有留意梓旻已經走到通往休息室門前。正當梓旻想轉身逃離辦公室的時候，突然有人大力推開門，大叫：「嘩！今日好開心吖！」

是詡！他看起來很開心，不但梓旻，他甚至興奮地向澈硯打招呼，那怪異程度令梓旻第一次與澈硯產生共鳴，二人交換眼神。詡興奮地在辦公室走來走去，不知在做什麼，澈硯不知何時抱著花生走到梓旻身後，細聲問：「咩事呀？發姣呀？」

梓旻搖搖頭，這刻的詡比澈硯更可怕。興奮的詡四周蹦跳完後，才帶點氣喘的走過來說：「亞塵叫我地三個去二十樓醫院集合。」

「三個都要？」梓旻心裡萬分不願跟兩個傻的一起走

「係！」詡回答過後，三人同行到二十樓。升降機門一開就看到麗瑤及亞塵二人在等待他們，亞塵望望抱著一袋花生的澈硯，再望望笑得一臉傻氣的詡，最後看著緊抱文件夾的梓旻發出恥笑的聲音。梓旻相信他們看起一定非常蠢笨。

亞塵不哼一聲便轉身向病床的方向走，走到最內面的病床停下，嚴肅的叫出了床上的人的名字：「鄭子謙！而家開始呢度四個人會輪流負責睇住你！」

(待續)

終於有時間返嚟up文，雖然都要凌晨，sorry 各位

多謝繼續支持今晚會有文

第十八章 新拍擋

鄭子謙的外表比初次見面時整潔得多，雖然粗眉及中長頭髮尚在，但鬍鬚剷光及頭髮被束成小馬尾，鵝蛋臉清晰可見。臉色及膚色偏黃偏暗加上他骨瘦如柴，看起來像一個營養不良的青年。但他骨架堅實，只要多點操練似乎挺適合體力勞動的工作。

「不論你瞓覺、食飯同去廁所，佢地都會陪住你。」亞塵向鄭子謙說完後轉身面向梓旻等人道：「你地兩人一組睇實佢！每八個鐘換更！一詡同麗瑤一組！梓旻同澈硯一組！」

「咩話？點解呀？」梓旻立即提出控訴，而澈硯在旁微笑著

「因為我係高級隊長！因為你係見習隊員！This is order！唔鍾意吖？退隊囉！」亞塵近乎咆哮的回應，梓旻雖感不爽但不敢反駁。亞塵乾咳兩聲，清清喉嚨道：「Rose會負責你地！有嘢就同佢報告！」

亞塵氣沖沖的離開了醫院，剩下他們四人及鄭子謙，他們討論過後決定先由梓旻及澈硯看守，因此詡及麗瑤便先行離開。梓旻二人走到病床前，梓旻與鄭子謙二人尷尬的互望，二人不發不言，醫院只剩下醫療機械的聲音及澈硯吃花生的聲音。

「Hi……」梓旻輕輕揮手，但鄭子謙沒有反應

「Hi！我叫澈硯，佢叫亞旻，點叫你？」澈硯走前邊吃花生邊坐在病床的椅上，梓旻跟著坐在澈硯旁，小聲問：「邊個俾你叫我亞旻？」

「咁叫梓旻？」澈硯賊笑

「仲衰！最好唔好叫我！」梓旻怒目

「點？我可以點叫你？跟住唔知要對幾多日，我唔想下下叫你做『喂』。」澈硯望回鄭子謙

「…亞謙…」亞謙猶豫了一會，細聲回答

「嘻！亞謙可唔可以透露下點解你要逃離嗰個叫咩……「獨」？嘅犯罪集團？」澈硯直接問自己有興趣的事

「咁直接問？佢唔會答你！」梓旻皺眉在澈硯耳邊道

「因為佢地唔當我係人，根本……根本想殺死我！」亞謙居然回答澈硯的問題，而且表現得非常激動

澈硯得意洋洋的向梓旻揚了揚眉頭，再問：「殺死你嘅意思係？」

「佢地用各種儀器嚟電我或者用刀或針傷我，有時仲搵啲黑色怪物追殺我！」亞謙愈說愈激動，兩手握緊拳頭不斷拍打他的被褥，雙眼含著淚

「咁點解你要求一角帶走你？」梓旻問

「求一角帶走？」澈硯有點興奮，似乎第一次聽到這件事

「一角……一角係我地大家嘅唯一希望……」亞謙的回答讓梓旻二人更生興趣

「『我地大家』？」澈硯問，他已經興奮得停下吃花生了

「嗰度唔止我一個白老鼠，仲有好多人，但我算係最捱得嗰個。唔知點解亦係待遇最好嗰個，雖然都受虐待。」亞謙低頭沉默了一會，似乎憶起了過去的事，但很快就回復：「我地聽聞一角曾經救出某啲實驗體，而且……佢一定比『獨』嘅人厲害，比……你地可靠……」

「居然一隻怪物比我地可靠？」梓旻質疑

「咁！其實係咩實驗？關於咩？點解要做？」澈硯比較關心實驗內容

「呀呀呀……以我所知係想製造角獸……」亞謙被澈硯嚇壞了

「製造角獸？」梓旻二人驚訝叫起來

(待續)

製造生物兵器

有材料緊係要搵啲嘢溝下實驗下

「咳咳！」突然有人在他們身後輕聲咳，轉身一看原來是Rose，在她身邊的是樺，樺微笑跟梓旻揮手，梓旻微笑回應，始終不能越過Rose跟她打招呼，但澈硯卻傻傻的揮手回應。

「好喇！病人要進行恆常身體檢查同治療！你地嗰邊等等！」Rose指指對面病床。

梓旻立即移動，但澈硯卻仍然在原地傻笑著，梓旻只能滿臉嫌棄的把他拉走。待Rose把分隔病床的簾拉上後，澈硯傻笑道：「佢真係又溫柔又體貼又善良㗎唧！」

「你話邊個？」雖然梓旻又大致猜到

「緊係講緊周逸樺啦！」澈硯果然對樺有好感

「發姣呀你！」梓旻雖然覺得一臉傻氣的澈硯好笑，但同時覺得樺有點可憐，被個瘋子喜歡上

「我認㗎！仲發咗好耐，由我覺力戰第一場受佢照顧之後，就當正佢女神！」澈硯一副傾慕於樺的樣子令梓旻覺得有點噁心。澈硯還用手肘輕推梓旻道：「你同佢一隊一定好熟啦！介紹下啦！」

「咁對我地個場又唔讓下我地？仲整暈人！」梓旻下意識做出避開他的動作

「嗱！我有放水㗎！但又唔可以放得太明顯，所以我就用好輕力度整暈佢，事後佢醒返我有誠心道歉㗎！」澈硯說得滿有道理的，但這解釋令梓旻更不爽

「哈！即係女神就放水加『誠心』道歉，我就落重藥兼無意道歉，仲想我介紹添？發神經！」梓旻說完立即走開了

「喂！唔係呢！唔同呢！咁記仇㗎你！」澈硯緊張的追著梓旻道

此時，例行檢查已經完成，Rose把簾拉開，再跟梓旻二人說：「病人因睡眠不足同營養不良，身體狀態比較差，至少要住多兩日。佢嘅心理狀態都有可能影響到佢回復，期間唔好要佢回憶被殘酷對待嘅事比較好，而且要有安靜嘅環境休息。你地最好唔好問佢太多問題，安靜係旁邊監視，有人問起佢嘅嘢就照我講嘅匯報啦！」

「知道！」梓旻二人齊聲回應。Rose轉身離開，樺跟隨其後，澈硯又再一副傻樣的向樺揮手道別，梓旻心感不爽，大力拍打澈硯揮動的手，澈硯立即投訴：「小氣！」

「係㗎！差啲要瞓院半年喎！我唔係樺面前踩多你兩腳，良心會過意唔去！」梓旻以警告口吻道

「唔……唔好！我同你道歉啦！你好大方嘅！大人不記小人過！求下你啦！」澈硯非常慌張，這反應讓梓旻感到滿意，但時間久了就有點後悔，因為二人有八個小時一同當值，澈硯沒有一刻停止過求梓旻原諒，梓旻感煩厭了就原諒他，但仍不願介紹二人認識。

既痛苦又沉悶的八小時過去，梓旻終於解放，不需要對著澈硯的時間是歡樂的。疲憊不堪的梓旻決定到食堂解決自己的晚或早餐再回宿舍，由於已經是凌晨四時，只剩下熟食售賣機可買吃的。他走到熟食售賣機前點選了一個照燒三文魚飯團。就在他離開的一刻，他聽到有人在食堂暗處說話。

「你咁搞落去對件事冇好處！你要死自己去死，唔好拉埋我落水！」是有點熟悉的女聲，可是聲音太小，梓旻聽得不太清楚。大概因為食堂的玻璃門關門時有緩衝器，加上平日客人進門自動播放音樂的裝置沒有開，所以不知道梓旻的存在

「冇事嘅！停職唧！有乜大不了！你因住而家係醫院嗰個人吧啦！都唔知佢會唔會認到我地！」這次是一把令人討厭且帶點怯懦的男聲，梓旻清楚認出這把聲音是屬於Dali的

「至少我肯定佢唔認得我！你停職就匿返去你間房，靜靜地等件事過！唔好再搞啲事出嚟！再有咩事我唔會放過你！」那女聲說完話便從近廚房的後樓梯離開，她大力關門，可見她相當憤怒。

「我唔會放過你！」Dali不高興地重複那女聲所說的話，然後也接著離開

(待續)

梓旻吞吞口水，不敢那麼快離開食堂，雖然不完全了解他們所說的來龍去脈，但深知是他不能知的事情。與醫院的誰有關呢？提起醫院只想到是鄭子謙，如與鄭子謙有關，那即是與「獨」有關，亦即是與犯罪組織有關？換言之，Dali與犯罪組織有關？那他是間諜？他做了什麼事令那女的憤怒呢？最近與他有關的事只有亞豪的死，難道他故意害死亞豪？那女的又是誰？如果他是間諜，又可以跟誰說呢？

現在詡還守在鄭子謙身邊，不方便與他討論，還是回到宿舍比較好。梓旻悄悄的從正門離開，每當走到轉角位也探頭確認沒有人才敢走前一步。最後也安全回到自己的房間，戰戰兢兢的把飯團吃下，緊張的坐在床上，望著天花板慢慢被睡魔帶進夢鄉。

***

「你！係你！係你害死我哥！我要你去死！我叫你去死呀！」在接見室淚流滿面的Kiki在對著什麼哭叫著，被兩個看不見臉的人從身後拉著，防止她衝向前

梓旻在接見室旁的小房間透過房內的單面玻璃觀看著整個情況，大大的吸一口氣，伸出手按下接駁接見室擴音器的麥克風開關，輕輕的吐出幾個字：「會面結束，拉佢走。」

放開開關後，Kiki便被人強行帶出接見室，梓旻望向仍留在接見室內那看起來怯懦無能的男人─Dali，他頭破血流且全身發軟坐在角落，似乎被人狠狠的打了一場。梓旻嘗試抑壓怒氣和厭惡感，保持平靜的表情及語氣向身旁的人問道：「滿意啦？」

「多謝！」滿臉淚痕的鹿仔輕輕彎腰低頭道謝

「半個鐘後返嚟醫返好佢！」梓旻用命令的語氣跟鹿仔說，鹿仔聽完後點點頭再轉身開門離開

「亞旻，四隊想你今日內交報告詳細交代點解會發生咁嘅事。佢俾人打到咁，仲問唔問到？」澈硯擔憂的看著接見室內的Dali

「你以為我真係咁好人，就咁放人入嚟打佢？個個都放我咪好唔得閒？呢條友死都唔肯講點解要咁做，冇辦法之下，知個妹係可以用『暈眩』同『輕微命令』，叫咗個妹幫手。」梓旻似乎在逃避澈硯的眼神

「亞旻！你終於開竅喇！」澈硯裝作要抱梓旻

「妖！死開啦！如果唔係迫到我咁盡，我絕對唔會用呢種方法！」梓旻一臉嫌棄地避開澈硯

「呢啲犯規嘢不嬲我做開喎！究竟有咩迫到你要咁做？」澈硯重新站好

「我懷疑……佢幫緊枳洛做嘢！」雖然房內只有他們兩人，但梓旻仍不禁話聲量收細：「而家知道我嘅懷疑係啱。」

「枳洛？楊枳洛？佢點解要咁做？」澈硯驚訝問

「我諗……佢想自組軍隊，可能……嗰個叫亞豪嘅可能被邀請，但唔願加入，所以……」梓旻有點遲疑

「所以滅口？冇咁大膽吓？咁……咁個妹……」澈硯既驚訝又擔心

「我已經叫咗鹿仔睇實，佢地咁fd，應該安全。」梓旻深呼吸一下，再說：「聽聞枳洛有參與基因實驗，雖然未有證據，但上面嗰幾個人係發現基因實驗現場個日開始就奇奇怪怪咁。」

「如果佢同基因實驗有關，咁上面一定唔會放過佢㗎喎？」澈硯疑惑

「點知……你知佢地幾個嘅關係比我地想像中複雜，而且……唉！唔好諗佢地，總之而家小心，你都小心自己隊嘅人，我估應該唔只Dali一個！」梓旻提醒澈硯，澈硯鎖緊眉頭，點頭回應

***

「嘟、嘟、嘟」房內平面通訊屏響起來電鈴聲，梓旻萬分不願的爬起身，按下「接聽」的標示

「亞旻！換更喇！你去咗邊？」詡的聲音從平面通訊屏傳出

梓旻看看時間，現在已經是十二時，他急急的回應：「嚟緊！嚟緊！」

關了電話後，他急忙的換上制服趕到醫院。升降機門一開，他不只看見詡、麗瑤及澈硯，還看到一群人，以及正怒目相向的Rose及Lina。梓旻識趣地繞過憤怒的二人，走到詡等人身邊。梓旻揚揚眉頭用表情動作問詡現在的情況，詡做出讓梓旻保持安靜的手勢，再指指Rose二人。

「我唔理佢健唔健康！總之佢唔死得就應該立即返實驗室！」Lina手指向地，大聲喝鬧Rose

「我唔明點解要佢立即返實驗室！佢唔死得唔等於佢可以承受到任何研究或實驗！佢應該要至少留多兩日！」Rose雖有怒氣，但未失儀態，未有太多的動作

「尋日話兩日，今日又兩日！我唔知你仲會要佢留多幾多日！既然佢仲係嫌疑犯就唔應該留係度！要立即移送去主研究所！」Lina非常激動的指著Rose：「嫌疑犯就應該歸我管！」

突然，升降機傳來開門的聲音，亞塵從升降機走出來，有點不耐煩帶點嚴厲的道：「我收到消息話你地嘈緊俾唔俾個病人出院。Lina，個病人嘅住院期係我定嘅！我話兩日就兩日！」

「但係兩日太少，佢需要……」Rose插話

「我話兩日就兩日！佢係嫌疑犯，唔係隊員！你想照顧病人就照顧返自己人先！」亞塵發怒

「但……」Rose仍不想放棄

「你大定我大吖？你既然唔聽命令，你呢幾日唔使返醫院！」亞塵憤怒的指著升降機，Rose只好不情願地離開。亞塵掃視現場聚集的人，大罵：「仲唔走？」

眾人隨即散去

(待續)

與詡及麗瑤等人道別後，梓旻及澈硯動身走回自己工作岡位時被亞塵叫停了：「你地兩個！今日唔使守！走得！」

「點……」梓旻雖然不在乎，但澈硯似乎很想知原因，他衝口問出第一個字卻換來亞塵怒目。可是澈硯的好奇心比恐懼感高得多：「請問我可唔可以知原因呢？」

亞塵沒有立即回答，只是帶著怒容盯住澈硯數秒，被好奇心支配的澈硯雖害怕但未有退避，梓旻相當佩服澈硯的求知慾。最後是亞塵輸了，他大力嘆了口氣，沒好氣的回答：「唔可以！快啲走！再唔走我就當你地違抗命令！」

澈硯非常失望的低下頭，活像被大雨淋濕的小狗，可憐得連一向不喜歡澈硯的梓旻也上前拍他背部安慰他。亞塵眉頭鎖緊，就像澈硯的反應很困擾他一般，但他也沒有說原因，就這樣走到鄭子謙的床邊指著兩名後勤醫療隊人員說：「你！仲有你！幫我推佢入去隔離病房！」

後勤醫療隊人員立即動身把床推進隔離病房，然後亞塵把人員叫離開，與鄭子謙二人留在房間。亞塵關上門後，澈硯立即走到隔離病房的門前，把臉貼近門，試圖偷聽房內情況。本來梓旻應該阻止，然而梓旻自己也相當好奇，所以他只是在旁看著。可是，過了十數分鐘也沒有任何動靜，梓旻怕亞塵隨時出來發現他們偷聽，只好出聲勸澈硯離開：「走啦！乜都聽唔到！一陣佢發現我地偷聽點算？」

「講對唔住囉！」澈硯完全不打算離開，可梓旻不想被亞塵罵，打算掉下澈硯轉身離開

此時梓旻的手錶響起，是零隊的內部群組信息：「Crystal：各位，浩政醒返喇！佢叫大家唔使擔心佢，鹿仔Kiki要好好休息！仲有關於新加入嘅澈硯，既然亞塵指派得梓旻負責就好好睇實佢，佢都算係一個麻煩人物，出事會好難交代。」

本來浩政醒來是一件值得開心的事，但當梓旻看到最後一句時，梓旻不禁希望他可以昏迷多幾天。現在逃走不成，還被增加壓力，梓旻心煩得很，絕對要把澈硯帶離醫院。他靜下來想了想，靈機一動，想了個好方法：「我就冇所謂，我而家走人就冇事。我係為你好咋！亞塵又係高級隊長，佢決定調配人手，一個唔高興……收返你個入主研究所嘅許可就唔好啦……」

澈硯渾身一震，似乎有效了，但仍未願意離開。梓旻繼續說下去：「冇嘅……眼前嘅嘢重要啲，你慢慢啦！」

梓旻轉身扮作要獨自離開時，澈硯終於離開那道門，跟上梓旻：「你講得啱！唔可以因小失大！」

梓旻暗暗露出勝利的笑容，他開始懂得如何控制澈硯，以為可以安全離開時，隔離病房傳出聲嘶力竭的慘叫聲，所有人都望向隔離病房。那慘叫聲響片整個病房，除了「呀」的叫聲，沒有其他說話。慘叫聲持續了好幾秒，愈來愈大聲，直至聲音變得沙啞，然後漸漸失聲。

「我……我地去睇下囉不如！」澈硯雙眼瞪大，他已經失控，想知內面發生什麼事想得發瘋了

「癡線啦你！快啲走！亞塵可能隨時出嚟！」話剛說完就聽到隔離病房的開門聲，梓旻知道沒有時間再説服他離開，他也不可能聽得入耳，梓旻情急之下只好發動AP把澈硯拉離醫院

(待續)

好不容易在亞塵開門離開隔離病房前跑進升降機，澈硯為自己不可留下探個究竟而大聲哀號。梓旻沒時間理會他，既然時間尚早，仍是工作時間內，他們唯一的選擇只有回到O隊辦公室。一走進辦公室就看見神情緊張的Crystal望向高級隊長辦公室位置，不知所措的道：「浩政！你未好返曬就唔好亂郁啦！」

浩政沒有理會她，専注於在他那凌亂不堪的辦公室尋找些什麼。Crystal忍不住出手阻止他繼續找東西，這手一出，令浩政更為煩躁，重語氣道：「走啦你！關你乜事唧？煩住曬！」

梓旻非常驚訝浩政居然會這樣說話，Crystal立即靜了下來，然後掩臉想跑出去時，發現梓旻二人站在休息室看到整個過程，臉變得比剛才更紅。梓旻不知應給出什麼反應，但Crystal沒有等他作出反應就跑了出去。

此時，浩政拿著幾張文件從自己辦公室走出來，看到梓旻二人便說：「咦？點解你地係度？唔使守個犯咩？」

「亞塵叫我地走，然後唔知係隔離病房對個犯做咩。」澈硯有點不忿

「亞塵？」浩政一臉不解，皺了皺眉頭

「我好想知發生咩事！你會唔會……」澈硯沒有放過任何一個可以滿足他好奇心的機會

「唔知！亦唔想知！做細嘅唔好亂問， 唔好知太多！如果唔係就返你個入主研究所嘅許可！」浩政一句就讓澈硯閉上嘴

「呀……頭先Crystal……」梓旻指指出口的位置

「唔好理佢，我都忍得佢耐！都唔知點解成日咁多管閒事！」浩政似乎真的非常不滿，梓旻真的覺得Crystal很可憐。浩政翻了翻手上的文件，搖了搖頭，似乎那不是他想要的資料。他站在自己辦公室門口，望著地上亂七八糟的文件嘆了口氣，再呆站了一會。突然，他好像想起什麼，轉向梓旻他們：「Lina今朝send信息嚟話輪到你地去開會傾下你地嘅武器點設計，得閒就去揾下佢。」

「點解佢頭先唔同我地講？」澈硯驚訝問

「頭先鬧到咁點會講？」梓旻覺得他的問題很笨，對於Lina不面對面說有關武器會談的信息，他更關心的是：「點解關佢事？佢入咗嚟唔夠三日喎！」梓旻真的萬分不情願跟澈硯扯上關係

「就算佢之前唔係先鋒隊，佢都早過你入隊，佢嘅能力已經係會內討論過好多次，而家正式入埋先鋒隊就更加需要武器啦！」浩政說話時眼看著地上的文件

「正式？唔係暫時咋咩？」梓旻毫不俢飾對澈硯的厭惡，澈硯在旁不知何故的笑著

「唔係！我收到嘅係正式轉隊通知。」浩政拿起地上某份文件，邊閱邊說：「嚴格嚟講，佢係你前輩！對前輩有禮貌啲！」

「既然係前輩就唔使我負責啦！」梓旻再度嘗試撇掉澈硯

「唔得！走啦！冇嘢做就揾Lina啦！」浩政掉下他們回到自己辦公室去

(待續)

仲未到戲玉

鋪排緊 鋪排緊

二人因此走到17樓的實驗室，走到最內面的房間找Lina。扣門後，Lina大叫讓他們入內，他們打開門看到的景象和剛才浩政辦公室的情況一樣，都是那麼凌亂不堪。

「坐低！」Lina望望他們再低頭處理文件，梓旻二人小心翼翼地跨過重重文件，在辦公桌前找到兩張椅，想坐下時又因文件阻礙不能把椅子移動到合適的位置，處理了良久才順利坐下來。即使順利坐下來，他們也等了十數分鐘，Lina才完成手頭上的工作：「唔好意思！要你地等咁耐，呢啲文件幾急，需要立即處理。好！關於你地嘅武器，呢度有一啲提案，可以望望。」

Lina很快地從桌上的文件山中找到兩份文件夾，她把文件夾遞了給梓旻及澈硯，再續一說明：「由你地上級同我地觀察員嘅報告顯示：『戴梓旻擅長釋放大量AP重擊或推倒敵人，然而攻擊時不夠集中，時而殃及身邊其他事物。另外，他可以帶人自由飛行，但不能超過兩位，可能與重量有關，武器的重量必需輕。』

(然後轉向澈硯) 而你呢：『澈硯擅長使用過度治療的方式攻擊敵人，雖然仍有治療別人的功效，但發動者本人未有能力控制力度，導致得物無所用，浪費天賦，令人可惜。建議武器可以調節AP發出量以便發動者可同時發揮治療及攻擊的作用，以免因個人懶惰而浪費了他的天賦。』睇完有冇問題？」

「有！點解我個份多咁多冇用嘅形容？」澈硯指著文件投訴

「咁要問反負責嘅上級同觀察員，但我係唔會透露相關負責同事嘅資料，你自己揾啦！冇問題就打開第二頁，係你地武器嘅提案。梓旻嘅武器係一個用特別物料製成嘅伸縮鎚，鎚頭大約只有兩個拳頭再大少少，希望可以令你出AP嘅時候更集中一點出。一邊平頭一邊尖頭，視乎你想幾集中去攻擊一個人。用嘅特別物料同浩政用嘅武器一樣，佢輕易壓縮，所以佢除咗係個鎚，只要你學識點壓迫，佢可以係一個能量炮，亦都可以係把劍。最大缺點係，佢唔容易癡返埋，所以唔好強行分裂佢，好難搞架！呀……仲有個可以算係弱點，就係佢難上色，所以只可以選白色、黑色或銀色。」Lina詳細介紹

「銀色！」梓旻興奮的回答

「似乎你非常滿意。」Lina笑言，梓旻高興地點頭回應

「咁太好，我都設計咗好耐。」Lina滿意地笑起來，然後馬上再嚴肅轉向澈硯，但未等Lina說話，澈硯便搶著說：「喂！我個武器居然係一對手扣？咁可AP犯有咩分別？」

聽完澈硯的説法，梓旻不禁笑了出來。Lina嘆口氣道：「緊係有分別啦！你幾時啲犯可以自己調節個手扣同可以選顏色架？仲有個手扣唔單止可以調節AP，仲可以大範圍發動你嘅能力，唔需要再一定要掂到人先攻擊到。」

「唔可以再多啲設計咩？佢嗰個咁多功能！」澈硯指著梓旻的文件

「冇！你咁麻煩，俾多啲功能你咁棧搞？好喇！冇問題就收到通知返嚟攞，大約一兩日就有！走走走！」Lina收起他們的文件後趕他們離開

他們離開後，澈硯仍在碎碎念，梓旻則沉醉於自己的快樂及興奮的心情。突然，梓旻想起Lina讀出澈硯的能力描述時似乎未有提及他的姓氏：「你全名叫澈硯？個姓呢？」

「冇架，我係孤兒嚟，所以我入嚟又冇人管，死咗都冇人理架喇！」澈硯說完，升降機剛好到了研究助理宿舍，澈硯邊離開邊說：「我啱啱收到叫我搬入O隊宿舍，今晚宿舍見！」

接著回到辦公室等到放工時間，當晚回宿舍時沒見到澈硯，過了一晚後，梓旻在翌日收到武器已完成的信息。

(待續)

第十九章 畢業試

梓旻懷著興奮既期待的心情回到實驗室，Lina於自己的辦公室出來，但兩手空空的，笑道：「Hi，梓旻，今日應該得你一個。」

「咁太好，我唔想同澈硯一齊嚟。」梓旻興幸終於可以撇下澈硯

「我約你嚟除咗想親手將武器俾你，仲想教你點樣用。件武器已經送咗去訓練場，我地而家去睇睇。」Lina說完就先行走往升降機，梓旻一直跟在她身後

他們最後來到柏德斯加訓練場的技能訓練室，一位工作人員拿著一個小小的鎚子站在場中間，那鎚子似乎只有兩手掌般長。Lina走到那工作人員面前，隨手拿起那鎚子，輕輕一拋再接著，似乎非常輕身。她轉一轉鎚子，用力一揮，鎚子的手握位一下子伸長至人般高，再反方向扭一扭手握位把鎚子鎖實，再道：「只要扭一扭又可以鬆開再收返短，放心！已經測試過好多次，唔會出意外！試吓！」

Lina把鎚子的長度收回原狀，再向梓旻拋過去，梓旻接著的時候一點也不重，亦不會過輕。梓旻模仿Lina把鎚子的手握位伸長再鎖緊，他發現鎚子的長度跟他的高度一樣，梓旻滿意的笑起來。

Lina隨即補充：「鎚嘅長度係根據你嘅高度設計，再長啲就會好難控制。你試下揮一揮，睇下順唔順手。」

梓旻輕輕揮一揮，再如揮球拍般大力揮，鎚子重量剛好，揮起來手感不錯。接著，Lina指著眼前五六米外的箭靶道：「試下向目標打。」

梓旻動身向箭靶走，但Lina立即阻止，問：「做咩？」

梓旻充滿不解的回答：「打個箭靶囉！」

Lina不禁失笑：「傻豬嚟嘅，用AP吖！你係先鋒隊隊員嚟㗎！」

這一笑讓梓旻的臉紅起來，他拿著鎚子用AP輕輕一揮，「攻擊」就像撥扇一樣弱。這一揮讓Lina大笑：「你咁揮唔得架！用啲力！」

梓旻咬緊牙關，把鎚頭移向身後，儲力至鎚子，他用盡力揮出去。這次他的鎚子被他揮出去了，Lina在旁笑得站不起來，梓旻當下想找個洞躱進去。

當梓旻走去拾起鎚子拿回來時，鎚被Lina一下子拿走了，Lina嘗試教授他揮鎚的方法：「兩手渣實個手握位，左手係下面，右手係上面。你雙腳打開，打開到同兩肩一樣寬，膝頭彎曲，再重心降低令小腿和腰去到差唔多平行嘅位置。鎚身放係後腦後面，鎚頭向住目標。將重心放係右腳，發力嘅時候右腳膝頭發力，之後旋轉右腳腳掌。而你右手要向前發力，將鎚連AP揮出去。」

「點解你咁熟嘅？」梓旻邊問邊接過鎚子

「打開棒球。試打啦！」Lina指著箭靶道

梓旻聽從Lina所形容，擺好姿勢，用盡力把鎚揮出去。雖然箭靶被擊中，但是技能訓練室箭靶全被擊碎了。

(待續)

Live左
推

睇睇下有種好強烈嘅感覺，覺得樓豬做緊紀律部隊

多謝支持

唔係，不過我參考咗某啲紀律部隊嘅資料去寫，怕太假或太兒戲。如果可以令你有真實感就實在太好

如果可以更得密啲更好