《覺能之戰》

推

推。

一轉身，映入眼簾的是一種怪物咬著孔sir的手臂，而另外兩隻已被孔Sir打死。那一剎，四周的空氣突然安靜，時間好像停頓起來。眼前出現一道白光完全遮蓋着他的視線，然後白光中出現一道門，拱門的左右站著兩個人。

「亞孔⋯⋯你覺得我地係咪應該繼續落去呢？」耳邊傳來梓旻自己的聲音，由拱門左邊的人發出來的，又是「預知夢」

「你指咩？」另一個明顯是孔Sir的身影

「殺怪物⋯⋯等於殺人，等於殺同伴⋯⋯咁做好咩？」夢中的梓旻問

「唔殺怪物⋯⋯等佢殺人，再殺同伴⋯⋯咁做又好咩？」夢中孔Sir回答完，梓旻便被極速抽離再回到現實

「唔好呀！」梓旻一拳打在咬著孔sir手臂的怪物臉上，怪物立即煙消雲散。他立即把孔Sir帶到比較乾淨的的地方坐下，問：「你冇事嘛？」

「你話呢？」孔sir的手臂正大量流血，梓旻馬上升起孔Sir，連同自己向露台飛出去，降到地面找澈硯

「孔Sir都搞成咁？唔係話好少嘢咩？」澈硯邊治療邊問

「一日都係我錯。」梓旻內疚的道，見他如此自責，澈硯也不好意思再問下去

「好喇！搞掂！」澈硯很快就復原孔Sir的手臂，除了多了點血也沒什麼特別

「我返上去搜證。」孔Sir站起來

「我都去！」梓旻跟上

「你真係預備好先⋯⋯」孔Sir話未完，梓旻就答話

「我預備好！唔會再猶豫！嚟啦！我升你上去唔使行樓梯。」梓旻走到建築物前，孔Sir也跟上，兩人又再回到剛才的樓層

這次他們再沒有遇到怪物，卻發現多粒紅色藥丸。把藥丸回收後，他們再到黑色帳幕外滙報情況，而孔Sir沒有提過任何與剛才意外相關的事，梓旻自己也密口不提。

那天晚上，梓旻約澈硯及詡到他的房間享用晚餐及詳述今天發生的事，包括預知夢的事。

「原來係咁，唔怪得你咁自責。冇辦法啦！亞豪嘅事係陰影嚟嘅！」澈硯道

「比著我都會。」詡安慰道

「但你冇退，而我有！」梓旻指指枱上的外賣：「三個一樣。」

（待續）

感謝支持

推

「咁啱嘅？我都係，亞旻呢？」詡也把蝦挑走

「我唔係，你地俾啲蝦我食啦！」梓旻把他們的蝦要走：「但我家姐係，唔知點解全家得佢係。」

「原因有好多嘅？唔一定係遺傳。」澈硯幫忙把蝦給梓旻

「而我就係遺傳我諗，因為我媽同我哥都有。」詡把蝦挑走完開始享用他的晚餐

「我都係遺傳。」澈硯答話

「點解我地講起蝦嘅？唔係講緊預知夢⋯⋯等等，你話你係遺傳？亞塵？」梓旻驚訝問

「你係咪傻架？亞塵係養父吖嘛！咁⋯⋯你點知？」詡驚訝的看着澈硯

「你係咪都傻㗎？我都有亞爸亞媽生㗎好冇？」澈硯罵

「對唔住，我以為你係某實驗室爆出嚟！重點係你點知自己父母嘅事？」詡有點氣憤

「我都有段時間同我親生屋企住㗎！好冇呀？」澈硯道

「咁講多啲！我想知究竟你爸媽係點先生到你咁怪冇人鍾意！」詡雙眼發亮的

「我有女朋友㗎！唔似得你得，暗戀都唔敢講！」澈硯原來已經發現了詡對美慧的事

「你咩意思？」詡驚訝，似乎真的不知澈硯在說什麼

「或者你唔好講其他嘢，直接講下你親生家庭，我都想知！」梓旻望著澈硯

「好！」澈硯大口嘆氣，放下餐具道：「我有爸有媽，有個同父異母嘅哥哥，及同母異父嘅家姐。」

「即係你父母係雙方再婚生你？」梓旻好奇問

「唔係，佢地⋯⋯係科學家，都係人稱瘋狂科學家嘅一類。我爸係真心迷戀嗰個女人，但人地只係當佢係研究partner利用佢，真係蠢！」澈硯咬牙切齒的道

「原來呢啲嘢有遺傳，同某人好似！」梓旻和詡說完，二人笑起來，但澈硯忽略他們的諷刺

「他們嘅目標係創造出超人類，當時未有怪物嘅時代，佢地多次做人體實驗都失敗，所以佢地諗到由胎兒開始做。由於願意接受研究嘅孕婦太少，你想像下幾難先會有人肯，就算有人肯，對方唔係道友就青少年，阻礙嘅因素太多，所以個女人提出由佢生，我爸緊係ok。生咗第一個，我哥係一個天才，學乜都好快上手，但始終係普通人，冇得到超能力，令佢地好失望。個女人開始諗，會唔會係我爸嘅問題，就同第二個人生咗我家姐，呢樣嘢一定好傷我爸心，但我未出世，冇機會睇到，實在太可惜。我家姐都係個體能方面天才，係我角度，佢都算係某程度上嘅成功，因為佢明明冇乜肌肉已經做到好多專業運動員嘅嘢。當然，對佢地嚟講都唔夠，所以就提議我爸同其他人生我，好可惜我唔夠我哥聰明，亦唔夠我家姐體能好。佢地決定將我變成研究所嘅白老鼠，研究開始唔夠一年，個女人就意外死咗。我哥係我爸同我媽生嘅當然留得低，而且可以幫手做研究，而我家姐生得好似我媽，所以就算唔係我爸嘅都留得低，而我⋯⋯佢只想進一步折磨我，我哥就私底下幫我逃走咗。」澈硯說了一個頗複雜的過往，令梓旻二人也沉默了一會

「咁你哥同家姐仲有冇同你聯絡？」梓旻問

「我哥都仲有講過嘢，不過止於交換情報形式，佢都逃離咗我爸，而佢話我聽我家姐都走咗。個個仔女都同亞爸關係唔好。」澈硯再拿起餐具

「咁你都仲有你哥嘅⋯⋯」詡感嘆道

（待續）

推。

「講到好似你冇曬屋企人咁？」澈硯問

「有係有，我媽好似仲嬲緊我，還好我爸對我都唔錯。」詡道

「你頭先唔係有提亞哥㗎咩？」澈硯好奇問

「死咗好耐……但就算佢未死都唔會有任何聯繫，佢同我關係唔係好好……不如話冇嘢傾，佢同你哥一樣係天才----絕頂嘅天才，由我出世開始，個個都話佢係天才，甚至有人同我講佢係變種天才，叫我千祈唔好迫自己變成佢，包括我父母。佢冇朋友，老婆同佢離婚，得返我媽會同佢傾到，連我爸都唔得。最後發癲失控，殺咗人……死埋，之後……就冇之後。」詡說起沉重的過往，吃下最後一口飯

「噢，家家有本難唸的經。」澈硯把吃完的飯盒收拾好

「唉，喺我家姐成為我上司之前都未咁難唸。」梓旻幫忙收拾飯盒：「話說，我地一開始好似講緊個夢？我想講今次又好，上次又好，我硬係覺得啲夢好真實！唔係只係預知咁簡單，就好似我永遠唔會叫孔sir做亞孔咁。」

「嗱！好多研究話夢呢……」澈硯試圖解釋

「喂，我真係覺得好真，唔係你啲乜乜乜科學……」梓旻道

「心理學。」澈硯插話

「心理學可以解釋到。好冇？」梓旻嚴肅的看著澈硯

「咁……不如問下知好多我地解釋唔到嘅嘢嘅人，可能佢講到咩呢。」二人望向詡

「我唔知！」詡立即回答

「真唔知定假唔知？」澈硯質疑

「就算佢知都講唔到我地聽啦。」梓旻道

「只要你同佢講一俾你知道佢講大話，你呢世都唔會同佢講嘢。」澈硯指指梓旻再指指詡

「我一定唔會同佢講嘢！」梓旻嘗試用堅定的語氣和眼神

「喂！唔好咁啦！」詡慘叫

「即係佢知啲嘢啦！佢講唔到句子，我地就問是非題，如果佢答完冇暈冇嘔就假，有就真。」澈硯道

「但佢仍然可以講大話格？」梓旻問

「咁你就可以有心理準備未來某日冇咗個朋友。」澈硯笑言

「你啱！」梓旻點頭

「咁你最好唔好講大話！你究竟知唔知點解梓旻發預知夢？」澈硯瞪實詡，詡猶豫了一會，然後搖頭

(待續)

推。

推。

所以佢真係有預知能力

都算係

「我應該換過冇咁肯定嘅問題，你對於梓旻嘅預知夢有冇一啲頭緒？」澈硯問，這時詡按着他的頭，好像被人發現詭計一樣，苦惱了一會，輕輕點了頭。見狀，澈硯興奮說：「一早話有啲嘢㗎啦！」

「到我問，會唔會同我家姐有關係？唔係！應該換個問法，會唔會有可能同我家姐有關？」梓旻強調「可能」二字，詡按着頭，輕輕點了一下

「咁你估係唔係佢家姐想佢發嘅？」澈硯立即補問，詡上了一會兒，搖搖頭回答他的問題

「咁我呢啲夢究竟係唔係預知夢？」梓旻再問

「我諗算得上係預知夢，某部份係應真實會發生，而你家姐寧願你一世都唔會知道呢啲事。」詡一口氣說完這句話後，他便拿起外賣袋吐出來

「即係唔覺意㗎啦！如果係咁，其實你家姐係咪都發緊同一樣嘅夢呢？」澈硯表示疑問

「唔知道亦唔想考究邊個可以問佢？」梓旻望望詡

「發神經，唔使旨意要我同佢講到半句嘢！」詡抺抺嘴

「或者，樺可以？」梓旻想起樺是姐姐的卧底

「發神經，搞我女朋友？」澈硯激動地說

「咁就唔知啦！但假若佢都知嘅話，佢明明可以預知咁多事，都唔幫手？」梓旻有點生氣

他說這句話，三人也沉默下來，其他二人大概也不想在這話題上在延下去，大概是剛好時間也挺夜的，所以就決定離開房間回去休息。也許是其他二人沒有與梓旻探討下去，他自己鑽牛角尖發覺自己的姐姐明明有能力，也是很多事，但也沒有出手幫忙，感到十分懊惱。

由於此事實在太困擾他了，翌日的早上他快速更衣後，走到辦公室找他的姐姐月文，他清楚知道早上通常都只有他姐姐一人在辦公室裏。來到辦公室裹真，只得他姐姐在辦公室裏幹活。

「我越嚟越唔明點解你咁有能力都唔出手幫吓人，要等到而家先出現喺先鋒隊。」梓旻第一時間就質問姐姐

「我唔想次次都要解釋一啲我已經解釋過嘅事，我講多次，我只想保護屋企人，唔想成為英雄，亦唔想分神去保護其他人。」

「藉口！你根本可以同時保護屋企人同其他人，你嘅能力保護所有人都綽綽有餘啦！」

「唔係藉口，只係你唔知道自己而家面對緊啲咩敵人先會咁講！」

「咁你應該要講明俾我聽發生啲咩事！就好似我每次都發一啲預知夢，冇人解釋俾我聽，我只係會覺得非常之困擾！」

（待續）

推

月文沉默了好一會兒，沉思完後再說：「如果你打得贏伍陸，我再講，而家你未夠班知。」

「但⋯⋯」梓旻未說完，其他人包括新舊隊友全部回到來，他也不好再問下去

「你地搞咩？」澈硯走到梓旻身旁問，梓旻搖搖頭表示沒事

忽然，一個小孩子跑進辦公室，蹦蹦跳跳的抱著Kiki，Kiki開心大叫：「鼓鼓！好耐冇見！」

「哎呀，對唔住，佢好耐冇跟我返總部，唔知我已經轉咗工作地點，一支箭咁衝過嚟。」鼓鼓爸爸隨後跟過來，蹲在鼓鼓面前邊說邊做手勢：「爸爸搬咗辦公室，我地要走喇！」

鼓鼓抱Kiki抱得更緊，鼓鼓爸爸眉頭皺緊：「鼓鼓，唔好任性。」

鼓鼓開始流下眼淚，這讓鼓鼓爸爸更頭痛，他望向Kiki：「有冇可能⋯⋯」

Kiki面有難色的：「我唔可以全日留係度，有可能⋯⋯呢度鼓鼓識嘅舊隊員有可能有一段時間唔係辦公室。」

「哎呀咁⋯⋯」鼓鼓爸爸苦惱的看着鼓鼓

「唔緊要，我睇住佢。」月文突然提出由她照顧，這讓梓旻感到驚訝

「以我所知，我家姐一啲都唔鍾意小朋友，要單獨相處超過五分鐘都唔得。」梓旻小聲跟澈硯說

「可能呢個又啞又聾唔同呢！」澈硯低聲回應

月文此時走近鼓鼓，蹲下來，溫柔地撫摸鼓鼓的頭，接著手停在鼓鼓的臉蛋上，道：「你好，鼓鼓，我叫月文。你聽唔聽到我講嘢？」

鼓鼓睜大眼，好像發現新大陸一樣，立即放開了Kiki，向月文狂點頭。看來月文向鼓鼓使用了AP，令她聽到。

「咩話？你點做到？」鼓鼓爸爸驚訝問

「用AP輸入，但過多會爆頭而死，我下次教你控制過再做。」月文回答

（待續）

推。

推。

「吓，咁⋯⋯咁危險？」鼓鼓爸爸摸摸鼓鼓的頭

「放心，只要操控得宜唔會有事，而且⋯⋯我唔會俾鼓鼓有事㗎！（摸摸鼓鼓的頭）鼓鼓咁可愛係咪？」月文以無比溫柔的聲音道

「你家姐對小朋友好溫柔喎！」澈硯跟梓旻說

「我生存咁耐都未見過佢咁溫柔⋯⋯」梓旻回應澈硯：「唔通真係因為有缺憾就咁？」

「唔清楚喎⋯⋯詡，你知唔知咩事？」澈硯及梓旻望向詡，但他似乎比梓旻二人更驚訝，似乎連他也意想不到這情況

「喂，你知唔知咩事？」梓旻問壹雄及Lina，但二人也表示不清楚

「可能係準備煮佢嚟食嘅先兆。」壹雄開玩笑道

「係嘅，掙扎少啲，放血都易啲嘅！」澈硯接著開玩笑

「唔好咁啦！我居然覺得呢件事會發生呢下先慘。」梓旻苦著臉道，引得澈硯及壹雄大笑，而在旁的詡竟沒有附和，更是愁眉苦臉的

「冇⋯⋯冇。」詡吞吞吐吐的回答，看起來非常沮喪

「哈，佢想要你家姐咁溫柔咁對佢吖！」壹雄笑言

「唔係嘛！」梓旻笑話

「癡線！」詡臉紅耳赤的離開了

「你估佢係咪鍾意你家姐喇！佢好似唔只一次見你家姐對其他人好而唔開心喇喎！」澈硯低聲道

「吓！唔係掛？唔好啦！」梓旻對此難以接受，但心底裡又擔是這是真的，因為詡的反應異常得令他不解

（待續）

推。

推。

打錯，月文想梓旻打贏的是肆伍，唔係伍陸

那天之後，梓旻為了打贏肆伍二人，每天也努力訓練，偶爾會請壹雄及lina教導，偶爾會叫詡及澈硯進行對打訓練。約兩星期後，澈硯某日下班後把梓旻拉到他的房間去。

「咩事？你又搞咗啲麻煩嘢？」梓旻一步入門口，全房都是一些奇怪的實驗研究的用品，呆問：「咩事？」

澈硯把梓旻拉到書桌前，書桌上有數個培養皿，每個培養皿上都有一些深紅色液體。澈硯指著深紅色液體道：「係血嚟！」

「血？邊度嚟？」

「紅色藥丸。」澈硯指指枱角膠袋內的透明藥丸殼

「入面係血？邊個嘅血？」

「唔知，反正係人類嘅血。我用咗嚟做唔同嘅實驗，先將血稀釋到唔同程度，再隨便搵個普通人嘅血……」

「喂，偷藥我唔理你，血？」

「落血是但同啲人講有免費治療外傷服務就會一升升咁嚟。」

「犯……唉，唔理，我唔知。」

「總之，藥丸啲血本身會侵食一般人嘅血，然後就會變成冇牙仔。」澈硯指指衣櫃旁的小魚缸，內裡全是微型黑色怪物，繼續道：「只要將藥丸啲血稀釋到一定程度，就可以相容，愈稀愈可以共存。然後，我試係白老鼠身上做實驗。」

梓旻環顧四周，這裡沒有老鼠籠，接著澈硯從小型雪櫃拿出白老鼠屍體，梓旻厭惡地道：「我以後唔會係你雪櫃攞任何食物或飲品！」

「你雪豬雞牛肉都係咁咋！你睇！」澈硯打開白老鼠的口，內裡有黑色的紋

「係A Mark？」

「嗯，所以我估計，當呢啲血液注射入人體，足夠稀釋到人體承受到嘅時候，就係我地呢啲可以用AP嘅人，而且同A Mark嘅老鼠或人會有類似嘅基因訊息。再考慮埋亞豪嘅情況，呢啲血可能會因為我地大量使用而變多，最後將我地變成黑色怪物。」

「如果係咁，我地同隊嘅人咪都有相似基因訊息？」

「係，已經測試過！」

「等等！你點拎到啲血？」

「新仔易呃。而舊人都冇幾個醒，尤其P隊啲人成日傷。舊人嘅AP基因血係多啲，但都有同新仔相似嘅基因訊息。內裡幾複雜，我講啲醫學用語你都唔會明，不過呢種做法冇可能黑暗日之後一兩年就研發成功，究竟甘生同亞塵有幾聰明？」

「我家姐失蹤一星期就有AP？」

「啱，唔係以年計，仲係以日計，有可能咩？仲要，你家姐失蹤一星期就咁勁，時間完全唔啱喎！」

二人陷入沉思……

(待續)

推。

謊言與隱瞞篇第三十八章: 長夢

為了能夠早日知道姐姐所隱藏的秘密，梓旻唯一可以做的方法就是打贏肆伍二人，他日復日的練習只是希望能夠得到更多進步，在下次的覺力戰中戰勝他們。對於姐姐提出的條件，詡認為梓旻這一世也不可能達到條件，但仍願意與他對練，並嘗試從自己與肆伍訓練中找出他們的弱點，好讓梓旻有更多把握打贏。

而澈硯則嘗試各種可以強化梓旻而不弄死他的方法，可即是他願意幫助梓旻，他也沒有放棄尋求其他能夠盡早知道秘密的方法。他曾嘗試再度偷滑進高級監倉尋找楓的弟弟，但礙於上次亞豪的事件，似乎提升了監倉的保安設施，令他無法再次輕易地進入。另一方面，他不斷用詡做實驗，打算找出各種方法可以令他說出內裏的秘密而不會因念力洗腦而導致生理不適或死亡，這對於詡來說是一場災難，因為儘管他拒絕多少次，都會被澈硯用各種方式帶到他的房間做實驗，例如用AP弄暈他或偷偷在他的飯餸下藥。

在這段日子裏幾乎所有人都非常繁忙，舊隊員們固然要幫忙處理總部各種事務或出動任務，而浩政那七位新隊員則有各種由姐姐分配的秘密任務要執行，大多時間也不會在辦公室，最多有時會看見Lina幫忙處理文件。唯一在O隊辦公室內最無所事事的就是經常被人遺忘的鄭子謙，這天梓旻當值的時候有看見他坐在辦公室發呆。

「點解你可以成日都冇嘢做咁得閒？」梓旻問

「冇辦法啦，我又唔似你哋係舊會員，都唔知道點運行又冇人教我，我又唔係你姐姐嘅人，佢冇嘢俾我做。」

「咁你都可以去練習一下㗎 ？」

「佢哋話我唔需要太犀利，去到呢一個程度已經好足夠。而且好似都唔係好想我繼續落去，你哋新人手冊上面寫一個畢業試，到而家都未安排俾我，而且啲搜救行動都冇叫我去，我唔知可以做乜嘢。」

「既然你咁無所事事，不如陪我練習啦！」」

「好喎！點都好過我坐喺度發呆。」

二人離開了辦公室，來到技能訓練館，開始了對戰練習。由於鄭子謙並沒有任何武器在手，所以公平起見，梓旻也不使用武器練習。可能因為鄭子謙對戰練習不太多，開始時他們也有點尷尬不知如何開始。

梓旻提議不如使用AP用拳擊對決，鄭子謙聽到後表示同意，但仍然沒有任何主動開始的行為。梓旻唯有首先向他揮出拳頭，此時鄭子謙立即反應過來，勉強避開攻擊。接着，他用最普通的直拳反擊梓旻，梓旻再次提醒他要附帶AP作練習，子謙才記得使用。開始練習後，大概有三十分鐘的時間到時梓旻提醒子謙使用能力，其後的三十分鐘才比較像樣，然後子謙使用力量越來越純熟，不斷增加力度，梓旻由輕鬆對決變成認真訓練。在某一瞬間，子謙的力度忽然大幅提高及爆發，梓旻躲避不及被狠狠擊中致暈倒。這一擊把梓旻再次帶到預知夢裏去。

（待續）

推。