《覺能之戰》

「睇咩睇到咁入神？」鹿仔不知何時回來了：「覺力賽？係喎！過兩個月你就要參加喇喎！」

梓旻看一看月曆，今月是八月，驚道：「吓？個個都要參加？」

「係，覺力祭一星期七日開朝十晚十，每日最多六場，可以訓練先鋒隊隊員，又可以收集研究數據，甘氏大廈同柏德斯加訓練場之間開放市集俾觀眾食同玩，觀眾仲可以買飛落賭注賺錢，一舉好幾得。由於係訓練，新人都要參加。十月份同入隊時間太近，怕新仔未受足夠訓練，新仔可以自選一種參加。因為參賽次數係無上限，P隊嘅人就好鍾意不斷去玩。而冬夏覺力賽就不得了喇！所有人除高級隊長都要玩。不論春秋定冬夏頭日變陣賽最為刺激，一嚟因為變陣賽多勁人，二嚟佢地頭幾日比賽對場地最陌生，冇乜嘢策略可言；而表演賽都好受歡迎好刺激㗎！知唔知點解？」鹿仔說完後露出古怪的笑容

「點…點解？」梓旻被他的笑容嚇到

「因為表演賽就係一場變陣賽，除左上年最低分嘅五位隊員，今年所有見習新人都要參賽！」鹿仔掀開後一頁，指著表演賽一段

「即係同我同期個班？」梓旻腦內立即回想同期同事們的樣子

「no, no, no！係今年！除左八月新人，仲有二月新人呢！」鹿仔不懷好意地笑起來

「佢地…佢地早我地成半年！」梓旻驚訝地張大嘴巴高聲說

「所以話年尾新人係比較蝕底，人地仲玩過四月同七月覺力賽！簡而言之，你地俾人㩒住嚟打！」鹿仔奸笑

「呀!!!!!!」梓旻慘叫了出來

「因為你地好新，冇乜人識，落注得我地內部嘅人多，如果睇中某新人，又贏咗，個賠率……哈！賺到笑！哈哈哈哈…」鹿仔沉迷於自己幻想之中

「咁…我地自己贏咗會點？輸咗又會點？」梓旻沒有理會賠率是什麼意思

「參賽者贏咗就有積分，算係最賺積分嘅活動。輸咗冇乜點，但要記得如果你想出多啲行動，一定要俾人睇到你嘅能力！」鹿仔提醒了梓旻O隊要上任務的方法之一是盡力表現自己能力

「係咪要同返自己分隊一組？」梓旻懶得看小冊子

「當然唔係啦！你有朋友可以隨時組隊，不過如果唔夠人，佢會隨機派個人入隊。你地得返兩個月！自己好自為之！我下午要返M隊，我瞓一瞓先。」鹿仔又回到自己的辦公桌去

(待續)

作者想法分享一推

關於覺力賽嘅玩法，我嘗試用多少少力去諗點先令遊戲有趣啲，又可以實行到，又可以以訓練之名去玩。我個人比較鍾意變陣賽玩法，如果各位對玩法有咩睇法，歡迎分享！希望大家喜歡呢個覺力賽嘅設計

不久後詡也回來了，二人討論了覺力賽的事，梓旻急切需要提升自己的能力。但由於浩政還未確定訓練的時間，他們可以做到的只有提升自己的體能，所以二人到了柏德斯加訓練場的健身房健身。縱使未可開始AP訓練，至少都要練好肌肉。在健身房偶爾會遇到同期加入的其他隊隊員，大家都互相勉勵，但仍會聽到一些人看不起他們O隊的身份，尤其P隊的人。

「P隊都幾多冇腦嘅人。」詡投訴，雙眼直盯盯地怒視在用啞鈴的數個P隊成員

「唔好咁講，至少尚華唔係嘅～」梓旻說完笑了笑

「你完全冇諗過楓喎！」詡道，二人相視而笑

「hi，咁啱嘅？」一女性聲音從後而來，二人嚇了一跳，因剛才說完壞話有點心虛

原來是逸樺，梓旻有點口震的回應：「H…i， 你又咁啱喺度嘅？」

「M隊喺體能上面比較差，所以被要求嚟練。今日健身室，聽日落體育館練跑。你地覺力戰搵到隊友未？」逸樺對他們那麼驚訝有點好奇，但未有多問

「咁快？仲有兩個月喎？」詡驚訝問

「差唔多喇！得返兩個月喎！除咗自己提升仲要合作呢？領地爭奪賽都要盡力呀！」逸樺邊整理她的重訓手套邊解釋

「我地未，我地組隊？」梓旻熟悉的人不多，逸樺及楓香是他能夠想起的人

「就係想叫你地組隊，楓都想咁。」樺露出很甜的笑容

「但我地唔夠五個人喎！」詡提醒了他們人數不足的問題

「再識下人囉！仲有時間。我返去健身喇！」樺揮手離去

梓旻及詡繼續健身，梓旻到了放工時先走。頭一星期過得非常輕鬆，也沒有什麼要做。迎新會最後定於一個月後，因各隊員的時間表也不同，較難夾時間。梓旻的個人訓練也終於開始，浩政在百忙之中抽空為他訓練，兩眼的黑眼睛也比平時更深了。二人相約於柏德斯加訓練場的體育館。

「我地嘅能力就同念力好似，你甚至可以當自己係念力咁練，唯一唔同就係我地比較難做一啲比較細緻嘅操作。你應該做過將玩具波升起嘅練習啦⋯⋯你試下將個單層有蓋波車升起，升少少得喇！」浩政做了簡單的說明，再要求梓旻把A區中間裝滿籃球的藍色有蓋波車升起

梓旻伸出兩手，嘗試如升起玩具球般升起波車，但一個波車的重量與一個玩具球的體積和重量不同，他再用多點力打波車升起，還是升不起，再大力點，升不起，再大力點，整個波車飛上三層樓高的體育館天花板。數十籃球於波車內飛出，在體育館練跑的M隊成員尖叫起來，嘗試在籃球掉下前找地方避開。就在籃球快要掉到頭上，所有球及波車停在半空中，然後浩政揮一揮手，波車和球也回到本來的位置，所有籃球回到波車內，接著道：「呢個就係問題，比起普通EYE Mark*，我地嘅爆發力都比較大，一般人用念力，就只有夠唔夠力嘅問題，而我地面對嘅係會唔會太大力嘅問題，醫療AP訓練係我地最弱，比起壓縮空氣，我地更善於壓爛蘆薈，所以跟住一星期你嘅功課就係升起波車！」

Eye Mark 意指 A Mark 在眼，其他稱呼有 Arm Mark (A Mark 在手臂) 及 Ear Mark (A Mark 在耳)。而梓旻、浩政及亞豪等特別情況稱 S Mark 或 Special Mark.

梓旻點頭，伸出雙手，擺好姿勢的時候，突然有人走過來：「喂！浩政！你地搞咩？」

原來是M隊的隊長，浩政回應：「Hi，我係度同自己新隊員做緊訓練！點？阻到你地訓練？下次我申請自己用⋯」

「唔係唔係，繼續練就啱喇！你睇我個班新仔幾弱雞！幾個波叫到拆天咁，你繼續練就啱，佢地就練點避！」M隊隊長提出一同練習的方法

「咁得啦！你就繼續練，我今日就陪你一個鐘，然後我會請位T隊嘅人嚟幫手。波車爛多幾架你同我都冇咁多錢賠。」浩政向梓旻說

接下來數日都和M隊訓練，大家都成為了朋友，一起練習一起放飯一起下班。梓旻愈來愈熟練，而M隊的人也避得愈來愈快，M隊的隊長也很滿意。一星期很快就過去，梓旻到了「交功課」的日子，他成功把波車維持在離地一米的高度，浩政讓他通過，然後又要求他把三架三層高的波車升起至離地半米的距離，可以更低不能高過半米。

梓旻又再回到每天灑下籃球雨的日子，但這次M隊只是陪了他半星期，就換成了T隊。T隊的人與M隊同樣友善，這次帶領T隊的隊長也採取與M隊同樣的方法訓練念力隊。過了半星期，梓旻也未能順利完成課題，浩政也沒有什麼秘訣給他，唯有直接把交功課的日子再推遲一星期。這樣又過了半星期，迎來T隊最後一日的訓練，T隊的成員已順利地完成避球練習，但梓旻自己還未成功完成自己的課題。T隊最後一天訓練，高級隊長到場觀課，梓旻認得T隊的高級隊長就是之前拍背鼓勵他的那位矮小的男子，原來叫做甘嘉雄，是「角」生物科技公司的董事長。

(待續)

「喂！好耐冇見！你練成點？」高級隊長過來問他

「有啲⋯有啲阻滯⋯⋯我一直都做唔到只將三個波車升到只有半米高，每次都好似火箭起飛咁升到高空⋯」梓旻道出自己的情況

「唔使咁灰心！嚟！我陪你試下！」高級隊長搭著他的肩膀，二人望向波車，梓旻照著高級隊長指示：「首先，你要深呼吸一下，冷靜自己，只專注自己⋯做到之後慢慢開眼，望住目標，伸出雙手，想像能量由手出，放出嘅能量滲入成個波車嘅所有空間，係好似水咁滲入，慢慢慢慢滲入去⋯然後，當波車所有空間都充滿你嘅能量，你就停止，然後想像滲入能量由水凝固成冰一樣⋯最後你就好似手攞住一支好長好大嘅雪條咁舉起，因為成支雪條都係你嘅力量，所以你可能連力都唔使出。試下！舉起！」

三架三層高的波車升起至離地一米的距離，梓旻非常開心：「成⋯成功喇！」

「太好喇！都話你得㗎啦！」高級隊長拍拍梓旻的肩膀

「咁易嘅方法，點解浩政唔教我嘅？」梓旻抱怨

「呀⋯佢⋯佢係一個難得嘅天才，憑感覺就做到，所以都唔可以怪佢嘅！好喇！你繼續加油啦！」高級隊長說完就回到T隊

迎來下一個見浩政的日子，通過了考驗，浩政又再次發起新考題。浩政帶梓旻回到辦公室，拿了一張廢紙：「今次係要升起呢張廢紙，比起升起重嘅嘢，升起輕嘅嘢更考技巧。你練熟升起一張，然後就一疊，然後就一楝。下次就教你點升起人啦！」

梓旻掌握了升起波車的要訣後，升起紙張不算太困難，但就是不夠快，他只需加速整個過程就可以。練習途中，阮超氣沖沖的走進辦公室，跑到浩政面前：「我要申請由P隊隊長負責訓練我！嗰條友打到我咁呀！」

看清楚，阮超的右眼及雙手臂也有瘀黑，上下身衣服也有損壞的情況。梓旻驚訝問：「嘩！發生咩事？」

「咪就係嗰嗰陳德晉！叫我健身練跑一星期，然後打沙包一星期，之後今星期就叫我對打！我連點用AP落身體都未識，佢就拳擊加AP一下打落嚟！我照板煮碗直拳打佢嘅時候，發動AP打落去，佢又用AP強化雙手保護自己，然後又打落嚟。打咁耐我就周身傷，佢就乜事都冇，仲大大聲話實戰係最好練習，食屎啦佢！」阮超非常憤怒

「咁佢又講得冇錯喎！」詡不知由何處冒出

「你去醫院治療一下先，我幫你申請一下。詡，你需唔需要？」浩政問

「我唔需要，自己搞得掂。」詡拒絕

「好，梓旻你自己摸索下喇！我就入去填表。」浩政說，轉身回到他那凌亂的辦公室把門關上

「佢平日就係咁掉低你自己摸索？同冇教你有咩分別？」詡問

「算係set咗啲目標俾我嘅⋯聽聞佢係天才，憑感覺就做到⋯跟著天才係咁辛苦㗎喇！你呢？唔使搵人教？」梓旻不解為何詡能夠那麼休閒，又不見他有找人教授他使用AP

「得啦！我搞得掂！」詡擺擺手，就回到自己的辦公桌打起遊戲機來

一星期過得很快，也相當輕鬆，這次的功課不太難，因此也通過得非常輕鬆。這次訓練的場地改為七樓室外運動場，詡也到場。可能因為工作變少了，浩政的黑眼圈也變小了。

「今次就係升人上天，同升死物上天最大分別就係人或動物會郁，而且太大力嘅話就唔係賠錢咁簡單。而且係你練熟之前，你記得要確定自己個人情緒穩定先好做，心情唔好，會死人。一詡今次會陪你練習，佢自薦嘅。」浩政向身後的詡側側頭，詡瞪大眼睛驚訝的望著浩政

「吓？我冇…」詡驚訝問，被浩政大力拍頭

「我就輕輕示範一下，你就盡量領略啦！」浩政伸出右手道：「我地釋出能量包圍佢雙腳，然後腰肚至胸部位置，再好似舉起佢咁升起。」

詡像天上的風箏般飛起，開始游水般郁動手腳，浩政繼續說：「我唔建議你飛得佢太高，如果唔係⋯」浩政手指動一動，詡從頭空高速墜下，詡大叫「呀！」，然後他在接近地面不到一米時停下來。浩政露出笑容：「會跌死佢。好！今日T隊隊長嚟替我睇住你練習，升到一詡，就試下升埋隊長，然後你可以加人數又好，升自己又好。一星期後交功課！Bye!」

(待續)

多謝支持

「原來浩政唔忙唔攰會係咁。」梓旻望著浩政的背影

「咁我寧願佢永遠忙到冇得瞓！」詡看起來有點不爽

梓旻伸出雙手，擺好姿勢，開始發出能力的時候，突然詡叫停：「等等！你⋯得唔得㗎你？唔會屈斷我手手腳腳㗎？」

「唔知喎。我都係第一次試！」梓旻有點想惡作劇

「不如⋯不如攞醫療隊個人形公仔試下先啦！你⋯你未試過軟兼人形嘢！」詡不斷後退

「咁⋯唔使麻煩啦！信我！」梓旻調皮的笑

「點信？喂喂喂⋯」詡未說完，梓旻成功用用AP包圍詡的下半身，詡不敢動，雖然梓旻成功升起詡，但詡在高空中沒有像剛才浩政升起他般動，仍然保持直立，梓旻把他輕輕放回地方

「使唔使驚到唔敢郁？」梓旻有點不滿地皺起眉頭

「唔係吖！你用AP包實曬我，我根本郁唔到！你成個過程係點運作㗎？」詡的頭及肩微微動起來，但肩以下的位置仍保持僵直

「我⋯我想像AP好似水咁圍住你，然後凝固再舉起你。」梓旻把詡放回地上，有點苦惱的道

「所以就咁硬⋯有冇啲軟啲輕啲嘅嘢，例如⋯例如⋯雲吖！」詡指著天空說

「雲係穿得過會跌死你㗎喎⋯⋯」梓旻認真的回應

「唉！比啲想像力！好似近時睇卡通片咁，啲雲企到㗎嘛！你又唔係真水份，你咪當⋯咪當好似有好多枕頭包起我咁囉！」詡沒好氣的說

「哦哦哦⋯我試下。」梓旻雖然聽懂了，但就是感覺不對。梓旻再次伸出雙手，擺好姿勢，發出能力再次把詡升起，這次詡可以郁動手腳，梓旻把詡放下再次問感受

「今次我覺得鬆咗，但好多阻力，手腳郁得唔夠順。」詡托著頭回應

兩人陷入沉思，就在苦難如何解決問題時，後面有人大力拍他們的背。

「喂！搞乜咁苦惱？」原來是整個月沒見的楓

「嚇死人咩！你又點解係度？唔使操練咩你？P隊日日都有嘢要練喎！」詡掃心口，想安撫因被嚇而加速跳動的小心臟

「就係因為咁我先逃走！日日練好悶㗎！」楓理直氣壯地說，似乎不認為自己逃避訓練有問題

「啲隊長冇捉住你？」梓旻問

「冇，可能我發脾氣打爆咗三個沙包，怕咗我。」楓又再直氣壯地提起一些不太正確的事

「點解你呢啲問題兒童唔使入O隊⋯」詡表示不解

「咁講真，佢本身能力同新人訓練個陣表現都冇乜大問題嘅，除咗⋯」梓旻回答，二人對視一下，有共識的想起「冇腦」

「除咗咩？」楓好奇的問

「冇，講返正題，我練習緊點升人上天，但⋯」梓旻盡量詳細的把剛才的情況和困擾一一道來

「哦！咁易解決啦！你當整個水泡俾佢游水咪得囉！」楓手指打圈在空中畫出水泡的形狀

二人恍然大悟般瞪大眼睛，梓旻立即試一次，這次詡可以自由郁動手腳。梓旻問准陪練的T隊隊長及楓後，一次過升起三人，雖然升得有點慢，但總算成功。

梓旻把三人放回地面，楓說：「咁我唔陪你地練喇！本身想去辦公室搵你地玩，點知你地隊友話你地有嘢練先嚟睇下，我唔想逃走之後又係訓練。」

「返工返到搵人玩，你都係第一個。」詡有黠無言

「咩呀⋯⋯P隊啲人話你地O隊日日無所事事，係返嚟打機呃飯食多！」楓無惡意的說出P隊隊員對他們O隊的評價

二人有點生氣，但無奈除了訓練，他們的確沒什麼做，甚至訓練也是自行決定。

「上次你地隊有個人嚟要求訓練，俾人恰到發脾氣，打到我地隊幾個人住咗兩日院⋯」楓突然說起其他事

二人立即想起阮超，他們突然記得前兩日阮超在辦公室很無聊的走來走去，還在沙發上睡起覺來，問他怎樣回事，就語無倫次的說起一大堆粗言穢語，看來就是因為這件事。

「⋯佢好火爆，但力度唔夠！係我一定打到唔只瞓兩日！」似乎對楓而言，比起出手打人，出手的力度才是值得留意的事

「楓⋯」二人心裡默念

「好喇！我走喇！我搵逸樺玩！」楓揮手跑走了

「好彩佢冇入我地隊，一個衝動，一個冇腦，兩個都Arm Mark，絕對令我地隊更加出名⋯差個方面。」詡道，梓旻大力點頭表示同意

「但我啱啱俾個冇腦嘅人點醒我點做。」梓旻說完後，此刻不知為何二人有種失落感

(待續)

訓練篇第六章: 提升AP量

之後的數天，他們研究如何讓人在空中也能自由活動，發現只要梓旻繼續輸出AP，再允許詡向「水泡」輸入自己AP，那麼詡就可以自由操控「水泡」帶他飛去想到的地方。但此輸出需大量AP，梓旻最多只能升起兩個人，升起兩人後就沒有多餘AP進行其他操作。

「點樣提升AP呢？」梓旻對自己的能力受限於AP量有些失落

「唔知呢⋯但已經做得好好喇！慢慢嚟啦！」詡安慰他，吃著三文治

「喂！你地⋯」多日沒見的浩政看起來精神非常好，黑眼圈沒了，看起來也頗帥：「唔使練住，過嚟幫幫手！」

浩政把他們帶到17樓的實驗室，研究員都各自忙碌，有些人手拿試管搖晃著那黑色不明液體，有些人聚在一起討論，有些人在紀錄研究結果。他們被帶到最內面的一間房，打開辦公室門，可見其混亂程度與浩政的房不相伯仲，房內唯一的工作枱那邊，有個一頭濃厚黑色曲髮的人伏於桌上，活像凶案現場。

「我嚟喇！Lina！」浩政非常熱情且開心的叫著

隨著浩政熱情的大叫，伏在桌上的人立即抬起頭，厚厚的眼鏡鏡片後一雙又圓又大的黑眼睛伴隨著一對大大的黑眼圈，擘大口，非常驚訝接近慘叫的問：「點解⋯點解你可以咁精神嘅？」

梓旻二人因她奇怪的問題及語調驚訝，浩政極高興的回答：「公司放咗我一日假呀！」

「點解！點解公司唔批假俾我⋯我已經⋯已經三個月冇放過假⋯而你可以兩個月放一次⋯」梓旻似乎聽到她的啜泣聲

「想問⋯唔係規定每人每月四日假咩？」隨著詡的問題，那兩人呆了呆再低下頭，彷彿就要哭出來

「佢地冇㗎～」一位墨綠色長髮的女研究員拿著幾個大文件夾走進來：「佢地呢啲天才級員工，公司當然～要好好重用啦。」工作枱再次傳來啜泣聲，女研究員指著右心口的名牌「Taylor Chan」繼續說：「我係呢度最靚最後生嘅女實習研究員，芳齡十七，叫我Taylor得喇！」

Taylor 的皮膚很白，身型微胖，身材算是該有的都有，但就是不吸引人。而Taylor 似乎非常的自信，她的一舉一動也看得出充滿自信甚至有點自負，她舉起右手，由左指去右，理所當然的說：「呢度全部都係要放入資料室，貼咗編號喺右上角，記得要放啱位置！」

「好喇！呢度就靠你地！你地可以用AP移動啲文件，放好曬就返辦公室講聲，我幫你地申請返啲積分。」浩政接著說

「咁你呢？」詡問

「我好忙，好多嘢做，一陣見！」浩政說完就逃走似的離開了

「郁啦！唔係要我教下嘩？」Taylor道

二人手搬起部分文件，梓旻用AP升起兩層人般高的文件，轉身時，二人有默契地小聲說：「八婆！」

二人由十二樓開始放資料，然後續層向下移動。到了十一樓，梓旻收拾時發現其中一份英文報告寫著「黑印⋯與抑壓之⋯報告」，英文不太好的梓旻好奇看了兩句：「黑印⋯使用⋯延伸⋯」

「你睇緊咩？」詡放好自己的文件後回來

「喂，你英文好唔好？佢講咩？」梓旻指著文件的標題問

「講咩？」詡皺了皺眉頭，看了數秒文件：「睇唔明喎⋯⋯唔好睇啦！」

把手上幾份文件放好後，梓旻突然發現一份中文的報告寫著「增加AP量的實驗報告」，梓旻立即打開讀：「研究發現面對逆境及不斷使用AP量至極限是最有效增加AP量的方法。」

「喂！你睇呢份，你睇呢份！」梓旻興奮叫道

「面對逆境及不斷使用AP量至極限，兩樣都好難做喎！」詡繼續皺眉

「逆境唔得啫！不斷用AP仲得，可以試下！」梓旻非常興奮的打開文件內頁閱讀起來

「但⋯」詡似乎不太同意

「邊個係度？」詡未說完，就有人在文件櫃的盡頭大聲問：「你地喺度做乜？」

「我地分⋯分緊文件。」梓旻吞吞吐吐的回答，立即把文件放於身後

一名黑色短髮淺灰色眼睛的女生走近，她的身高只到他們肩膀位置，她抬頭望望他們二人，又望望他們手上的文件，問：「分定睇？」

「分！當然係分啦！」梓旻緊張的回

「我要向上頭報告你地偷睇！」女生警告他們

「等等等等等！我地睇個標纖跌咗落去，緊係要開嚟睇！」詡立即走上前

「有咩證據？」女生翹起雙手不滿地問

「咁你又有咩證據我地偷睇先？」詡翹起雙手笑著反問她

「今次放過你地！我會記住你兩個O隊嘅人。」女生回答不了，只能放過他們

「喂！等等！咁你又邊位㗎？得你知我地，我地唔知你係邊個！」詡問完，望向她右心口的名牌「美慧」

「我係支援隊人員。」美慧不知為何有點囂張

「但你對眼⋯」梓旻凝視美慧那淺灰的眼睛道

「做唔掂先鋒嘅人都可以入支援㗎！」詡洋洋得意的

「我都係向上級報告你地偷睇⋯」美慧用較重語氣威脅他們

「仲有特～別有腦，可以見微知著，縱觀全局。」詡立即補充

「得喇！我唔告喇！快啲放曬啲文件佢，我睇住你地放！」美慧露出勝利的微笑

「其實唔俾睇，又點解叫我地放呢？」梓旻問

「你理得公司點諗，定你想我幫你搭路見上面？」美慧歪頭看著他

「咁又唔好！」詡趕緊回答，手輕拍梓旻的頭

二人用了一個下午才擺放好所有文件，美慧全程監視他們，最後很滿意的離開了。梓旻有點抱怨的道：「如果唔係佢，我一早睇咗內容！」

「咁又唔怪得佢…你真係唔應該睇嘅！」詡有點自言自語的小聲道

梓旻非常驚訝的問：「好少聽你幫人講嘢！你鍾意人？」

「中學生咩你…你差啲令我地要見上級呀！」詡很激動地否認

「唔係喎！你成日都睇人唔順眼。難得今次睇得順喎！」梓旻調皮的笑

「食屎啦你！我返宿舍，你返屋企啦你！」詡似乎有點生氣，快步走回自己房間去，梓旻非常肯定看到詡在臉紅害羞

(待續)

詡第二天早上沒有陪梓旻練習，一直賴床至下午，他好不容易起床後，坐在床上發了會呆。他打開手機，看見有數條信息，他的通訊應用程式裡沒多少個聯絡人，他父親傳了數條問他近況的信息，他回了兩句「我很好」就退出了對話。他在程式的底部找到他母親的對話框，他進隊時曾傳訊給母親成功入隊的消息，母親一直已讀不回。他簡單梳洗一下，穿上訓練衣就到了七樓的室外運動場去，映入眼簾的是有一雙大大的黑眼圈，幾乎不能挺直腰背的梓旻，詡驚訝地問：「嘩！你練咗幾耐？」

「5⋯5個鐘⋯」梓旻似乎連說話都沒有力

「你不如休息下啦！」詡非常擔心

「唔…唔使…」梓旻接著就倒下了

梓旻再次張開眼睛就已睡在醫院的床上，床邊除醫療支援人員外，浩政也在身邊：「聽詡講你練咗好耐。點解要咁做？」

「我想自己可以多啲AP，升多啲。」梓旻嘗試解釋自己的行為

「邊個同你講？」浩政似乎有點生氣

「我⋯我估㗎咋。」梓旻不能讓浩政知道他偷看研究文件

「練過度有可能會令你長時間用唔到AP，即係唔單止升唔到，你分分鐘連覺力賽都玩唔到。你跟住一星期都唔好練喇！」浩政開始生氣地說起教來

「但係兩星期後就覺力賽！」梓旻緊張起來

「你都識講兩星期後覺力賽，你回復唔到，我就要寫多份報告喇！你去同隊友傾下合作方法好過啦！仲有後日就係O隊迎新會，唔准缺度！」浩政說完就離開了

天色已黑，病房內留下梓旻一名傷者。由於第二天就可以出院，醫療人員也沒有多管梓旻，總部醫院的特色是沒有傷者就沒有醫生護士，因為這裡的醫生護士多半都是醫療隊或實驗隊人員，梓旻這些輕症，就只留下一名醫療支援人員照顧就可以。梓旻只能溜溜手機無聊等明天的來臨。

「唔該，我想要止血帶！」一個中年男人的聲音從房門口傳出

「乜又係你呀？好心你愛錫下自己身體啦！嘩！搞乜鬼成個手背都係血？」醫療支援人員不耐煩道

「我宿舍劏魚唔小心整到⋯」男人給人感覺畏畏縮縮的，亂糟糟的黑髮像整年沒有整理般，前蔭遮掩雙眼，他那詭異的笑容令人不寒而慄

「唉！你等等呀！」醫療支援人員沒好氣的，轉身走向醫療櫃找合適的醫療用品

「咦！Hello！我叫黎達，可以叫我Dali！你係？」他走過來和梓旻打招呼，看清楚可見到他那淺啡色的左眼及深黑色的右眼

「我⋯我叫戴梓旻，我係O隊，你係⋯T隊？」Dali突然走過來自我介紹，令梓旻一時間反應不來

「我都係O隊！多多指教！多多指教！」Dali伸出沒有傷的右手打算和梓旻握手

「我係後輩，我多多指教就真！」梓旻有點猶豫的伸出手

「唔好咁講，我都係入咗隊半年唔夠⋯」Dali緊緊握著梓旻的手

「但呢半年成日都嚟醫院呢！不如直接調過嚟啦！左手！」醫療支援人員插話，Dali這時才鬆開他的手，走向醫療支援人員

「唔得！我由細都大都會做英雄，而家有機會喎！緊係好好把握啦！」Dali說

「至弊你未做到英雄，你就死喺總部，你下下無啦啦都可以搞到周身傷，唔係呢度流血就嗰度流血，止血嘅嘢未用完，你都流血流死咗喇！」醫療支援人員開始比包紮他的手

「唔會嘅，我會再小心啲！」Dali笑言

「得喇！快啲走啦！」醫療支援人員很快便處理好他的手，全程也沒有望向他的臉

「唔該晒！梓旻，後日見！」Dali笑著揮手

「後日見！」梓旻回答

「就因為佢咁樣先冇人要佢⋯」Dali走後，醫療支援人員邊收拾醫療用品邊說

「你意思係？」梓旻不解

「EYE Mark 一般都會俾人安排做災後收拾現場嘅工作，而佢就因為成日整傷自己，出災後行動如果唔係嚴重缺人都唔會要佢。O隊嘅人有兩極，一係人人都想要，一一就完全冇人要，佢絕對係後者，你都要小心啲！你咁用AP法，隨時係冇人要個班！」醫療支援人員解釋及警告

訓練篇第七章: 新隊員

迎新會出席的人不多，本來每年分來O隊的人就很少，沒想到舊組員就只有十人。在場參加迎新會的甚至不是O隊的人，例如楓香和逸樺。認識的人中，鹿仔和亞豪在夾食物，似乎在說些很開心的事；而浩政和鼓鼓爸爸似乎關係不差，有說有笑的。鼓鼓爸爸身旁有個個子很小的小女孩，大概就是鼓鼓，短而曲的淺啡色頭髮，既圓又大的一雙黑眼睛，非常害羞的躲在爸爸身後。楓香上前想和鼓鼓玩，可是鼓鼓不知所措的望著爸爸，爸爸做了些誇張的動作，再向楓說明：「鼓鼓係聾啞人士，佢一出世就聽唔到嘢發唔到聲，所以佢唔識反應。如果你可以陪佢玩波，佢會好開心！」

楓找了個訓練用的玩具球，正嘗試吸引鼓鼓玩。梓旻問：「佢幾歲？媽媽呢？」

「三歲⋯佢媽媽生佢個陣遇AP犯，然後⋯然後難產死⋯我⋯我救唔到佢⋯」鼓鼓爸爸眼泛淚光，哽咽道

「你身兼母職做得好好㗎喇！咁開心嘅日子唔好喊曬口面，一陣俾你女見到點算？」在旁的浩政拍拍鼓鼓爸爸的背安慰他

「係嘅！係嘅！我去攞嘢飲先！」鼓鼓爸爸擦擦眼淚，走了去拿食物，與亞豪鹿仔談起來

「佢返到去，老婆已經奄奄一息，用盡AP都救唔返。因為過渡使用AP，所以個A Mark先咁誇張。個女雖然救返，但又聾又啞。襲擊佢老婆嘅AP犯自殺，連捉都捉唔到。我講完你地聽，記得以後小心講嘢喇！」浩政說明及提醒

「好！」梓旻回答

「去攞嘢食啦！」浩政擺一擺手，然後喝起啤酒來

梓旻聽完鼓鼓爸爸的經歷，心裡有點不舒服。他找到詡及拿了點食物後，一起隨意找個位置用餐，默默地觀察現場的人。此時，現場唯一一個沒跟任何人交流人走過來，他是Dali，他鬼鬼祟祟的望了眼詡，沒有向他打招呼，就走過來梓旻身邊，露齒笑道：「Hi！你⋯你認唔認得我？」

梓旻不太喜歡他忽略詡：「Hi！我記得。佢係亞詡，同隊嘅。」

Dali望望詡，維持著那有點怪的笑容：「Hi…梓旻你會唔會想覺力賽同我一隊？」

「我地組咗隊喇！」詡很不滿的大聲說

「哦哦哦，咁打搞晒！」Dali似乎也感覺詡的不滿，畏畏縮縮的離開了

「佢好討人厭！」詡氣憤的跟梓旻說

「喂喂喂！你地講邊個討人厭吖！」亞豪從二人中間冒出來，嚇了梓旻二人一跳

「嗰個！」詡指著Dali

「哦，佢份人係怪啲，可能冇人同佢一層宿舍啦，一個人孤伶伶係怪啲㗎喇！我地都冇乜人鍾意佢。」鹿仔在梓旻身後出來，偷了他手上那包芝士薯圈吃

「嚟嚟嚟，介紹下！個邊三個女隊員，係我地隊少數嘅女隊員，分別係Crystal 、雲耳木耳同我妹Kiki！」亞豪指著站在中間的三個女生，由左至右，Crystal看似OL，西裝短裙加纖腰絲襪長腿，白滑的皮膚加上長至腰部的直髮，正面也絕不令人失望，精緻的五官加上淺藍色的眼，絕對是美女；雲耳木耳一看就知她的花名在形容她雙耳朵，左右耳全黑，年輕的少女有腹肌，穿耳環、熱褲及小背心；Kiki雖比亞豪矮一點，但仍高大，與豪一樣黑色捲髮長髮及淺褐色皮膚的外國人樣子，但少了點粗獷多了點柔美。

「我細細聲同你講吖！Crystal 暗戀咗我地浩政好耐喇！但浩政唔Show佢！」鹿仔在二人耳邊小聲說

「我地浩仔一睇就知係浪子啦！水晶姐真慘，做晒秘書，由工作跟到日常生活每樣嘢都主動幫浩仔搞！你睇浩仔！乜表示都冇。」亞豪接著說

「仲有唔好係佢面前提起Taylor，佢將Taylor當成假想敵，雖然冇明確講起過Taylor同浩政關係！」鹿仔笑話

「你地會唔會講得大聲咗啲呢？」突然有人從後說話，原來是鼓鼓爸爸，他說完就回去跟浩政說話

鹿仔二人望望女子三人組，知道沒被發現後鬆一口氣，轉了話題：「再介紹，德晉、富哥同佢隻鸚鵡圓婉，一個冇咗左手，一個盲咗，兩個都因為出搜救受傷！富哥同鼓鼓爸爸係我哋隊隊長，富哥隻鸚鵡受過訓練，可以係任務代替佢望嘢，再發出指示！好勁呢！有時唔使出行動，佢會放低隻鸚鵡係度，見到可以同佢傾下偈，好搞鬼！」德晉右手全黑及身材非常健碩，一看就知他長期健身保持健美身材，大嗓子令人難以接近；富哥是成熟穩重的中年男子，外表有點粗獷，兩眼緊閉著，中長而曲的黑髮加健壯身材配上皮褸，五官有點硬朗，他右肩上有一隻非洲灰鸚鵡在「咯咯」笑。

(待續)

對唔住各讀者
因尋日食完團年飯太攰冇up文, 今日已補返!
各位新年快樂!!!!

迎新會完結前，梓旻跟其他第一次見的隊員打了招呼及寒喧幾句後就回宿舍去。第二天，他跟詡、樺及楓三人於先鋒隊的專用食堂一起討論覺力戰，過了早餐時間，食堂幾乎沒有人。覺力戰愈來愈接近，他們仍未找到第五位人選，四人為此感到非常頭痛。

「不如⋯阮超⋯」梓旻有點遲疑，因為阮超跟他們不算是非常合拍，而且有點過份暴躁，不知能否與他們相處得來

「問咗有隊喇。」詡答，居然已經迫得一向不喜與人相處的詡邀請阮超加入

「麗瑤好似都有自己隊喇…」梓旻想了想：「唔通⋯要Dali？」

「死都唔要！」詡反對，他非常討厭昨天無視他的Dali

「人地有組喇！」楓突然答話

「你又知？」詡訝異

「我地尋日問，Kiki、亞豪、富哥、鹿仔同黎達五人一組。」樺回答

「唉，咁我地點算？」楓苦惱地問

「你地識唔識人吖？」詡問

「我⋯就算識，多個Ear Mark都好似⋯冇乜用⋯」樺支吾答

「唔係咁講呀！好過派個唔識嘅人入隊啦！」梓旻說

「呀！我識！我問下先！」楓突然說，然後拿出手機傳信息

「喂！講俾我地聽咩人先！」詡想制止楓，但已經太遲

「Send咗喇喎！」楓說

「唉⋯」詡感到有點頭痛

「覆埋，我叫佢嚟啦！」楓興奮地回覆訊息

「介紹咗咩人嚟先呀！」詡再次大叫

「Eye Mark㗎！佢好勁㗎佢！救咗我好多次！」楓終於回答詡的問題

「你做咩要俾人救？」梓旻及樺齊聲問

「我有幾次唔聽教練話去碎石訓練場⋯」楓解釋

「碎石訓練場？有啲咩？」梓旻問詡，詡搖頭

「係咪聽㗎？」楓接著說：「我練緊碎石嘅時候，啲碎石從高處墜下，係佢經過救我。吖！佢到喇！」

他們望向食堂門口，原來是美慧，她看到詡及梓旻二人，突然表現得有點囂張

「等等，個訓練場係邊？」詡問楓

「係柏德斯加訓練場七樓！」楓回答

「支援組經過柏德斯加做咩？」詡不解

「保養維修同紀錄都要㗎！你地真係無知。」美慧已經走到他們身旁

「Hi，又見喇！乜支援組可以參加咩？」詡問，語氣帶了點挑釁

「可以，有積分攞嘛～但唔強制，我見楓楓叫我先嚟㗎咋，唔鍾意可以走㗎我！」美慧得戚地笑起來

「我地好歡迎你！你好！我叫逸樺，叫我亞樺就得！」樺自我介紹

「好高興認識你，大家可以叫我美慧。」美慧回應

「好⋯咁⋯開始傾？」梓旻表現得有點尷尬

「綜合一下先！大家而家嘅AP可以做到咩？」樺問，美慧坐了在楓香及梓旻之間，但仍與梓旻身旁的詡互瞪，令梓旻更感尷尬

「我先！我可以強化右手前臂，加上AP可以一拳打穿半米嘅水泥牆！」楓舉起有A Mark的右手

「我就可以治療輕傷，可能比賽入面唔係幾有用，但我可以輕微加強你哋嘅體能，同要我近距離對抗M 或 P隊嘅人都得！」樺有點怯的說

「我可以用念力隔空移動唔重過自己嘅物件，同可以控制感知，簡單嚟講，我可以令人即場反胃或噁心難受。」美慧似乎很自滿

「我同你一樣可以用念力隔空移動物件，大概三架三層高嘅籃球波車重量都得，亦可以令人喺天度飛，但就只可以令兩個人飛起。」梓旻說明自己能力

「我就可以強化左右手上臂，加上AP可以一拳打穿接近一米嘅水泥牆咁啦！」詡得意忘形地說，楓不爽鼓起臉頰，看來有點不忿氣，美慧露出鄙視眼神

「好喇！不如我地入正題點夾啦！」梓旻阻止他們發展成吵架

接下來的日子，他們也經常一同訓練及討論合作方法，由於大家也是見習隊員，決定參與的自選項目只選領地爭奪賽，以免輸得太難看。

(待續)

插曲(二)

迎新會的尾聲，眾人也顯得有點疲倦。鹿仔因M隊的工作需提早離場，亞豪一人拿著一罐啤酒，於辦公室的一個角落坐下，觀察眾人的互動。

亞豪非常喜歡於生活中尋找有趣的事情，能夠過平定安靜的生活是他的夢想。偷渡前的生活環境極差，因過度貧窮而餓肚子，因太弱小而被欺負。他與Kiki的雙親健在，但也無法改變這惡劣的環境。本來他們共有八兄弟姊妹，亞豪排第二，Kiki最小，由於大哥需要工作，亞豪成了弟妹主要照顧者。亞豪十七歲及Kiki五歲時，兄弟姊妹中排五六的雙胞胎弟弟倆九歲，正值有點活潑又頑皮的歲數。某日，在父母默許下，凌晨亞豪與損友打算實行偷竊計劃，雙胞胎二人因好奇心偷偷跟去，最後計劃失敗，一弟弟死於店主亂棍之下，令另一弟弟從此變得寡言陰沉。

偷竊計劃失敗後，家人都責備他的行為導致弟弟的死亡，他最恨的是他的父母，因為當初也是他父母默許才進行，而且過去他們也有因此而受益不少。為了逃避家人的責罵及對自己弟弟的內疚感，他離開了家人十年，每日過著偷竊及搶劫的生活，雖然生活不算富裕，但過得多姿多彩。某次搶劫計劃失敗後，一直跟隨的老大出賣他們，多位兄弟被捕，亞豪幸運地成功拿著積蓄逃走。有一段無所事事且流離朗蕩的日子，他突然想家了，就悄悄回家偷看。剛巧見到Kiki在家門前正被陌生人拉走，大聲掙扎也沒人救她，亞豪不認得那是自己的妹妹，本沒打算出手救助，直至他見到大哥回家阻止，他見事有不妥，幫助趕走了那陌生人。那時他才知道，他離開後，過去他給家人的贓物被父母揮霍掉了。因過於窮困，父母把其他三個妹妹也賣了，哥哥及弟弟則被迫做苦工。亞豪說服哥哥及弟妹放棄父母一同出走，但由於弟弟不願意，認為最起碼需要有住的地方，連帶哥哥為了弟弟也決定不離開，Kiki也沒太大信心與多年不見的二哥出走，最後亞豪以願意賺錢回家換得讓妹妹留下。

好景不常，過了段平靜的日子後，國家爆發內戰，人人自危，本身已是相當窮苦的生活就更難捱。亞豪偶遇好久不見的朋友，介紹他偷渡過境的渠道，他本打算回家提議兄弟妹四人一同離開，擺脫困苦的生活，可是兄弟三人外出做苦工期間，戰火波及，大哥和弟二人不幸葬身火海。好不容易逃出的亞豪回家後發現Kiki又要被賣走，亞豪趁機拉走Kiki逃跑及一同偷渡。無奈這次偷渡的目的地居然是非法AP劑的實驗場，二人再次用盡各種方法逃離，直至兩年前因實驗室發生事故才能逃出，最後還是被捕到這裡出行動。

「搞咩喺度發呆？」Kiki走過來問正在發呆的亞豪

「諗起舊時嘅嘢⋯」亞豪回答

「唔好諗喇⋯都返唔到去⋯」Kiki皺眉不太滿意道

「係嘅⋯」亞豪準備喝一口啤酒時，Kiki拿走了他手上的杯，換了一杯水給他

「你身體檢查嗰度點？尋日係咪去咗樓下醫院身體檢查？」Kiki喝一口剛從亞豪手上拿走的啤酒

「幾⋯唔錯，冇事，放心⋯」亞豪無奈喝下清水

「咁就好，我得返你一個亞哥咋！」Kiki搭著亞豪的臂

「Kiki⋯如果⋯如果連我都走埋，你⋯會點？」亞豪搖晃著水杯

「做咩咁講？你身體檢查真係冇嘢？」Kiki緊張起來

「冇冇冇，只係諗起我哋其他兄弟姊妹⋯唔知仲有邊個仲生存緊呢？」亞豪揮揮手

「都叫你唔好諗洛！而家生活得都幾開心就得啦！」Kiki沒好氣的說，再喝一口啤酒

「係嘅，係嘅⋯我哋要向前看，開心咁過埋落去，希望以後都咁開心就好。」亞豪一口氣把水喝光，再向Kiki笑了笑

(下章將進入 覺力戰篇)

唔好意思，今日要停更一日，明天補返

作者分享感受一推

多謝大家繼續支持！晏少少就會返去up文，開始覺力戰篇之前，想分享少少作呢篇嘅感想

由於呢個故事講得「戰」字，點都會有打鬥場面，而係呢方面，我完完全全係個新手所以作嘅時候都用得幾多時間去諗同拖稿，我嘗試搵一堆動作詞語同形容詞去令件事更具體，如有任何問題，敬請指教

跟住呢篇會比之前兩篇長啲，包含咗幾場嘅比賽，希望大家鍾意

希望大家繼續支持，多多留名正皮comment! 你地係我嘅動力

覺力賽篇第八章: 覺力祭開始

覺力祭終於開幕，平日沒多少人的甘氏大廈變得熱鬧起來。甘氏大廈及柏德斯加訓練場之間的空地變成了市集及攤位遊戲，雖然沒有太多人，但已見長長的人龍在排隊進入柏德斯加訓練場。而甘氏大廈內的商場擺設及裝飾也充滿氣氛，商場地下的空地位置也變成了室內市集，而另一邊教育資料館每層嘅設有大電視或投影機直播覺力賽，讓沒有付錢的觀眾坐在地上或資料館內的椅子上看比賽。梓旻、詡、阮超及麗瑤早上九時前已到辦公室集合，其他O隊隊員也於九時集齊。

「O隊嘅大家都應該知道覺力賽對我地隊而言別具意義，只要大家表現得唔夠好，就會冇咗出搜救行動嘅機會，我要提醒大家，如果兩年間出嘅行動少於兩次，係絕對有機會被要求調到支援組、研究組或退出兼打逆AP劑！黎達！我係提醒緊你！」浩政少有的以高級隊長集合全隊，嚴肅帶點警告意味的發言：「要表現得好，但唔好過份緊張！尤其新人第一次上場多數連郁都郁唔到，呢個都係點解你地出行動前就先要出覺力賽嘅原因。見習隊員嘅領地爭奪賽多數係睇小朋友打架居多，但由於年年O隊嘅表現都唔差，所以O隊嘅新隊員…呢個係優勢，亦係你地嘅劣勢！你地表現絕對係初賽最受注目嘅一環！而舊隊員你地都唔可以鬆懈，雖然你地都經歷過唔止一次比賽，但仍然係被受高度關注，所以要保持實力！知道未？」

「知道！」全部人齊聲回應

「好！解散！」浩政望向鹿仔及梓旻：「鹿！同新隊員講下有咩留意！梓旻！一陣睇表演賽，留意我攻擊方法！」

「知道！」鹿仔大聲回應。見浩政離開辦公室後，向見習隊員說：「喺度加大我地壓力…我同你地講，我地被受關注嘅主因就係佢，因為佢幾年間唔小心多次攞全場最高分，爆大冷，頭兩年輸咗好多賭仔錢！」

亞豪插話：「咁又唔好咁講，你都應記一功！聽聞有人係某以A Mark分類做賭局嘅鋪頭，自己買自己贏，之後爆大冷成為Eye Mark第三位得分最多嘅人，賺到笑喎！」

鹿仔笑回：「承讓承讓！我都聽聞有人係某用新人做賭局嘅鋪頭，自己買自己贏，之後爆大冷成為新人王第三位得分最多嘅人，又賺到笑喎！」

亞豪笑回：「承讓承讓！」