【願玫瑰在君子的屍體上盛放】《誤上了黑幫老大的情婦，我只好躲在中環的職場胡混》- 第四季：玫瑰篇

成功收兵

失踪的孖女係咪打麻將嗰2個?

收花期 , 突然諗到小甜甜 老公

支持

夫人唔會就係男男掛

夫人係男男

母女丼

小甜甜同我心目中嘅「玫瑰」有好大落差喎

點解咁聯想

好想知d幕後主腦嘅身分

LM

第一百三十二話：武松的委託



回到家後，就收到麥太的 WhatsApp，問我查到了甚麼。

這個麥太遇著我都算是她的運氣，如果不是我，單憑她提供的那條「變磚」邊緣的手帶，大概也不可能會有甚麼收獲，我想她自己是心知肚明的，所以當我將有關駱太、尤太和曹太三人合謀為非作歹的資料發給她時，她高興得簡直就想立刻飛到我面前抱著我狂吻，最後更發了一段影片來，是她將我和 Harminia 的淫片刪除的片段。

此舉顯然是麥太主動向我釋出善意，代表我們的合作關係正式確立。

我相信，只要麥太將這些資料交給「寡婦幫」的首領卓太，她就可以取代駱太和尤太的位置了。

現在的我正準備向「玫瑰會」全面開戰，以後有了麥太這個臥底，肯定對我有莫大的好處。

既然麥太的事總算是暫時告一段落，我亦應該把握緊接著的長周末，好好休息一下。

夏天都過了好一段時間，但香港的氣溫像是沒有回落的跡象，熱辣辣的陽光透過窗簾刺在臉上把我弄醒，我迷迷濛濛睜開眼來，便看見窗外一片蔚藍，是一個萬里無雲的早上。

男男已走了超過一星期，在她離開的這段時間裡，我調查總算有很大的進展，尤其對「玫瑰會」的認知，只可惜未能一一告訴給她聽。

不知道男男這刻身在何方？她跟我一樣都看得見同樣的青空嗎？

男男臨走時留下的字條，叫我好好替她看著偵探社，所以每當我有空便會走到樓下的鋪開一開門，至少打掃一下地方，免得她回來時責罵我這個助手辦事不力。

見這個長周末都沒特別事幹，今個早上我又到偵探社走走，當我背著門蹲下，正拾起地上一大堆宣傳單張和信件之際，突然感到身後有數個黑影慢慢伸長直至完全籠罩著我，我心陡然嚇了一嚇，連忙站起來彈開，一轉身便倉皇失措地叫道：「邊．．．．邊個？」

只見幾個穿著整齊西裝的男人一字排開，站在中間的那個首先開腔，道：「我哋老闆想見你。」

「你你你．．．．你老闆喺邊個．．．．做乜要見我呀？」我顫聲道，心想難道有人要殺我滅口？

西裝男還沒有來得及回答，忽然又有一個身影「呼」一聲從外面飛躍進來，瀟灑的站在我和那班人的中間，接著就聽到一把少女聲線，清脆的喝道：「有我喺度，邊個都唔可以郁佢半條頭髮！」

我再望真一點，原來那「飛」進來的少女，竟然是 Siri！

我驚奇地問：「吓，你點會喺度架？」

Siri 紮起馬步架起雙手，凌厲的眼神一直沒有離開過那班西裝男，一邊戒備一邊低聲答我：「夫人話報唔報到仇都靠晒你，就派我跟住你嚟睇下有咩可以幫到你手，點知真係咁快就有料到！」

「我諗兩位誤會咗啦。」一把洪亮的男聲從門外傳來，接著前面一班西裝男就不約而同地分開左右兩排，讓出中間一條路，便見一個年約四十出頭，身穿運動套裝的男人緩緩走過來，他體格魁梧，高顴骨直鼻樑，長相不像本地人，下顎鋪滿濃密的鬚根，讓整個人帶上成熟沉穩的氣息，甚有大企業家的風範，應該就是西裝男口中的老闆吧。

那男人向兩邊西裝男打了個眼色，他們便恭恭敬敬迅速魚貫離開，轉眼間偵探社內只剩低我、Siri 和那男人三人。

我和 Siri 見狀稍為放鬆一點，之後三人就紛紛圍著茶几坐下來。

「首先自我介紹，我叫姚一卒，係『兆京集團』嘅董事。」姚一卒道。

「姚一卒」這個名字好像有在甚麼地方聽過，而「兆京集團」據我所知是一間在國內頗有名氣的大企業，要勞煩他們的老闆親自來找我，實在令我受寵若驚，便急急問道：「哦，原來係姚總，久仰久仰，唔知我哋有咩可以幫到你呢？」

姚一卒卻立即更正我，道：「唔係幫我，係幫我大哥，姚一兵。」

「姚一兵」？對了！

之前我在 Chloe 姐家中看過一本叫「Hong Kong Tatler」的紳士名流雜誌，裡面刊登了一篇有關「名媛股神」姚甄梓綸和她丈夫的專訪，姚甄梓綸的丈夫就是姚一兵。

全靠這篇文章，我才押重注到「富利好」，然後不但能夠「剝」到公司三隻「巴辣雞」的「牙」和「衫」，亦為我日後自立門戶升上 VP 踏出重要的一步。

原來姚一兵就是姚一卒的大哥，那麼姚甄梓綸就是他的大嫂了。

我記得姚一兵是一個容貌奇醜的人，當時在雜誌中看到二人的夫婦合照時，我還在想漂亮動人的姚甄梓綸怎會選一個樣子那麼難看的姚一兵做丈夫？現在見了姚一卒，更奇怪為何他的弟弟竟會比他高大威猛、英俊瀟灑得多？

這分明就跟「武大郎」和「武松」一樣！

「你大哥發生咗啲咩事？」我問。

姚一卒徐徐地道：「件事係咁嘅，年幾之前，我大哥喺慈善拍賣會上識咗一個叫甄梓綸嘅女人，好快我大哥就畀佢迷住咗，無幾耐仲閃婚添，其實佢哋呢段關係我一早就唔係咁睇好，因為好老實講，以大嫂嘅條件，我唔覺得佢會真心鍾意我大哥，但係我大哥就愛佢愛到不得了，所以做弟弟嘅我都無再講啲咩。

婚後，大嫂就不斷教我大哥收購埋啲細價公司，又買埋晒啲細價殼，而『兆京』不褸都係做開實業，所以我就梗係反對公司行呢個方針，之但係我大哥就乜都聽晒大嫂講，仲氹到我大哥喺『兆京』旗下拆咗一間叫『莉莉斯』嘅公司出嚟畀佢打骰嚟玩細價股同買殼，令到成個決策過程可以完全繞過咗我，大嫂除咗工於心計，投資眼光亦出奇地準，基本上佢買親都中，外面嘅人安咗一個『殼之鍊金術師』嘅稱號畀佢，漸漸仲搞到成班董事局嘅人都信晒佢添。

無錯喺短短時間入面，『兆京』賺多咗好多快錢，但係我就懷疑大嫂係想運用財技，將一啲原本『兆京』擁有嘅優質資產轉走，錢蝕咗都算，我怕到爆煲嘅時候，連『兆京』嘅控制權都蝕埋畀外人，到時我伯爺死都唔眼閉呀！」

Siri 伸一伸舌頭，叫道：「嘩，乜啲資產話轉就轉咁兒戲架咩？」

姚一卒笑了一笑，道：「其實唔係好難架咋，情況就好似你用自己值五蚊嘅貨交換一樣人哋扮值五蚊嘅貨咁，交易時人哋仲打個九折畀你等你以為自己好著數，交易後至知道根本換返嚟嘅貨原來連五毫子都唔值，但係你值錢嘅貨已經畀人換走咗，財技就係將一啲本來係人都易睇易明嘅嘢簡單複雜化嘅技倆，就係去隱藏類似呢啲咁顯淺嘅操作，務求將人哋嘅利益同錢不知不覺咁轉入自己個袋入面，好多公司就係咁呃下呃下畀人成間呃咗去，你睇市場入面啲上市巨企有幾多間係因為循規蹈矩做生意而做到咁大啦？」

聽完姚一卒的說話，我即時想到福伯本來持有優質的「風資」，就被人家的財技換成了垃圾的「西夷」，這種事情在資本世界中真的比比皆是。

「照計你搵你大哥傾下，佢唔會唔明架？」我不解的道。

姚一卒搖搖頭，歎道：「唉，大嫂佢好識做，對內好識氹我大哥，對外又係女強人兼大慈善家，形象極好，所以除非有真憑實據，否則我講咩我大哥都唔會信。」

「咁你唔係要我哋幫你搵証據吓嘛？要識破個女人啲黑財技，搵返啲會計師呀、核數師嗰啲會好啲喎！」我又道。

「我係要你哋幫手搵証據，不過唔係商業上面嘅証據，而係個女人紅杏出牆嘅証據！」說罷，姚一卒便從衫袋拿出一張照片放在枱面上，再道：「相入面就係我大哥大嫂啦。」

「嘩！你大哥好．．．．」Siri 脫口叫道，說了一半卻深感自己失儀，大概將「衰樣」或同義的字眼硬生生吞回肚子裡去。

這張照片跟我在雜誌看過的封面十分雷同，除了是「美女與野獸」的配搭外，亦是男坐女站的姿勢，所以我的反應未如 Siri 般驚訝，唯一分別是姚一兵坐的，竟然是一張輪椅！

「我大哥患有『先天性小兒麻痺症』，下半身完全癱瘓．．．．唉．．．．」姚一卒的說話一時接不下去便黯然地語塞起來，似乎他跟大哥雖然有很大的差別，但兄弟之間的感情是很不錯的。

我亦猜到姚一卒的言下之意，就是他大哥大嫂的婚姻關係，一直以來都是有名無實。

我想到的，Siri 當然也會想得到，她看來亦為了要彌補剛才的失儀，安慰著姚一卒，道：「男女係好唔同嘅，你唔可以否認有啲女人完全對性無興趣架喎，或者佢哋根本都無呢個需要，所以就算自己丈夫無呢個能力，唔代表佢哋就一定會出軌架？」

姚一卒深呼吸一下，稍稍穩定了情緒，道：「我絕對認同你呢個講法，不過我知道我大嫂佢並唔係對性無興趣嘅嗰種女人。」

「你點知架？」我即時反問。

隔了好一會，姚一卒才緩緩地道：「因為佢曾經勾引過我，仲想我做佢情夫。」

既然是一個「武大郎」和「武松」的故事，又怎可以少了「潘金蓮」誘惑「武松」的戲碼呢？

「咁．．．．咁你有無．．．．？」Siri 緊張地追問。

「無！梗係無啦！我成世人最尊敬就係我大哥，我絕對唔會做一啲對佢唔住嘅事！」姚一卒斬釘截鐵地道。

姚一卒突然拿了一本支票簿出來，邊寫邊道：「我大哥大嫂都出咗 Trip 成個月，我大嫂忽然臨時臨急改機票要返嚟香港先，今日就會到，以我睇，我大嫂已經忍咗成個月，加上我大哥又唔喺度，佢一返到嚟一定會忍唔住去搵佢啲情夫，你哋把握呢幾日全天候跟住佢，一定會有收鑊！」

之後，姚一卒大筆一揮簽了個名，再將撕下來的六位數字支票遞給 Siri，再道：「我老媽同我講話『田力偵探社』有一新進女偵探正直無邪、屢破奇案，所以我知道你一定可以幫到我，到時証據確鑿，我大哥都會親自將個女人趕出姚家！」

「喂，咪住先，咩『田力偵探社』？咩新進女偵探呀？你唔係當我係嗰個田偵探吓嘛？」Siri 錯愕地道。

「吓，你唔係田偵探？我之前派手下嚟查過，佢哋明明同我講話田偵探年輕貎美，仲有一個其貌不揚嘅男助手，乜唔係你哋嚟咩？」姚一卒提高聲線反問。

聽到姚一卒用「其貌不揚」來形容我，我本來就不想理他，但看在他大哥姚一兵都算有「帶挈」過我賺了一筆的份上，我還是開口交代一下，滿不是味兒地道：「『年輕貌美』嘅田偵探正外遊當中，得返我呢個『其貌不揚』嘅助手幫佢睇鋪，一係你拎返張支票先，等到田偵探返嚟我再叫佢搵你，到時咪由佢去決定接唔接你呢單 Case 啦？」

姚一卒俯首不答，片刻之後，道：「我大嫂架機下晝就到，錯失咗呢次機會下次就唔知要等幾耐，加上你哋已經聽晒我啲秘密，所以而家已經唔到你話唔接就唔接。」

「唓，係你自己無搞清楚就講出嚟之嘛，怪得邊個呀？」Siri 啐道。

「我唔理，我哋姚家喺富豪排行入面雖然唔算係頂級嗰幾位，不過要用『合法手段』搞冧一間細細嘅偵探社應該唔會好難，相反，如果你哋幫到我，我一定會有好處畀你哋。」姚一卒又拿了一張字條出來，再道：「呢度有佢班機、同埋會去機場接佢架車嘅資料。」

最後，在姚一卒離開的時候，還不忘說了一句：「我會一直等你哋嘅消息，我希望只會聽到好消息。」

「有錢人」跟「黑社會」相似的地方，就是他們想要的東西，他們總有辦法一定會得到手，差別在於是用「合法手段」、或是「非法手段」罷了，但有時「有錢人」卻比「黑社會」更為可怕，因為「非法手段」至少還有法律去保護你，但「合法手段」你又可以奈他甚麼的何？

為了男男的「金漆招牌」，這次，我這個助手硬著頭皮也要出師了。

（待續）

推左先睇

再留名支持!

最辛苦嘅係又要等星期二先有

又開多條線

卡西親自出馬咪有捉姦證據囉

算吧啦

法律已死

諗多咗 邊有法律去制裁非法手段啊
家陣光明正大咁做都無人理㗎啦

好好睇，加油

又要等到星期二先有文😞😞