【願玫瑰在君子的屍體上盛放】《誤上了黑幫老大的情婦，我只好躲在中環的職場胡混》- 第四季：玫瑰篇

正喎

校對中，晏啲出文

第一百五十六話：地底下的天空



當七人車駛進「拔道」的範圍，遠處可見四野無人的停車場內停泊了唯一一輛車，還是一輛最新款的林寶堅尼，隨著我們的越駛越近，就看到那跑車裡面坐著的果然是 Elise，她還比我們早到。

不消一會，七人車就停在 Elise 的旁邊，我一趟開車門，一陣夜風就撲面吹來，當堂泛起莫名的寒意，再環顧四周，週末晚上的校園充斥著一片荒涼感，跟平常學生熙來攘往的情景有很大差別。

這時，一身運動裝束的 Elise 已下了車，一邊走過來，一邊道：「乜你哋咁耐架。」

「塞車嘛。」先下車的我胡亂應一句，當其餘的人都隨我身後魚貫跳出來後，我簡單的介紹一下大家，再向眾人道：「雖然各位今晚嚟到呢度可能係為咗唔同嘅目的，但係一陣間入到去就係坐埋同一隻船，我唔知我哋會遇到啲咩，總之大家記緊要千萬個小心。」

眾人皆點點頭，接著就由我帶路，朝擴建工程地盤的方向走去。

地盤重地當然被鐵皮圍欄包圍，免得有閒人誤闖，我們卻在鐵皮與鐵皮之間找到一條不太窄的裂縫，並竄進了工地範圍內，這個時候裡面已經停工，到處不見人影，只見亂石高堆，遠方還看到本來滿布天然植披的山坡被劈去了半邊，形成一道高高的山崖，山崖下則是一大片瘡痍的石牆，似礦場多於一個建築地盤。

阿 Kim 拿起手機打開 Google Map，再指往山崖下的一個石窟，道：「根據座標嘅指示，入口應該就係嗰邊個窿度。」

我們鎖定目標就往那石窟進發，遠距離望以為是個小洞穴，直到站在前面才發現洞口原來是很高很大，憑地上留有不少粗粗的車輪痕跡，可斷定工程車有駛進去作業，洞裡面還深不見底，猶如惡魔張開的巨口要把我們吞噬一樣，叫我不禁緊張起來。

但我身邊幾位女士看來沒有被嚇倒，更亮起自己手機背面的白燈，便昂然踏入石窟之中。

入窟後，我們一個緊貼一個小心翼翼的走著，一直沿螺旋形的岩洞往下走，越是走得深入，四周越是黑暗，起初還可以聽到外面呼呼的風聲，到後來已經聽不見，加上一直圍圈的走法早已喪失了方向感，在這種既漆黑、又死寂的迷失環境裡，很容易會令人精神錯亂，為了緩和一下氣氛，我想找些話題跟大家交談，就隨便道：「蝦，喺校董會開會嗰陣聽就聽得多，今次都終於踏足呢個校園擴建嘅地盤啦。」

「係啦，你知我之前都係學校『行政及財務委員會』嘅主席嚟，都有跟過個校園擴建嘅設計，家陣落到嚟現場睇，至覺得呢個地盤點睇都唔似打緊地基喎。」Elise 回應道。

「我都係咁話。」Siri 點點頭，再好奇的反問：「咁你哋覺得呢度似做緊啲咩呀？」

「似開緊一條地下停車場嘅隧道咁。」我答。

「我就覺得似一個石礦場囉。」阿 Kim 亦加入我們的討論。

就這樣的你一言、我一語，洞穴內便熱鬧起來，在我暗暗自喜策略開始奏效之際，連下車到現在都默不作聲的 Sandy 亦開腔，問：「我．．．．我可唔可以都問一個．．．．好蠢嘅問題？」

「請問！」我求之不得的道。

「呢度．．．．呢度係咪『拔道書院』？」Sandy 一臉疑惑地道。

我失笑了一聲，第一個反應是：「你唔係吓嘛，咁嘅問題都問得出口？」但又想到，我好像從頭到尾只跟 Sandy 說今晚去探險，並沒有提過去哪裡探險，所以她問這個問題絕對不是愚蠢，便耐心的答：「無錯，呢度就係『拔道書院』，我哋要探險嘅地方，就係喺『拔道書院』嘅地底。」

「真係『拔道』．．．．又會咁橋嘅？」Sandy 若有所思地道。

「咁橋？乜嘢咁橋呀？」我不解的問。

「我．．．．我有個三哥哥，佢之前都係喺『拔道』教書架．．．．」Sandy 吞吐地道。

「之前？乜你三哥哥而家無喺度教嗱？」我感到很奇怪，再追問：「咁你三哥哥係邊個呀？講個名出嚟，我或者 Elise 可能會識架喎！」

「我三哥哥叫丁竣，我講『之前』，係因為我三哥哥已經死咗啦。」Sandy 沉聲道。

「丁竣」！？「丁竣」不就是我的上手，中六甲前班主任「丁 Sir」嗎？

洞穴內刻苦經營所得來的輕鬆氣氛，被 Sandy 的一句說話便一掃而空，還瞬間陷入了一片詭異之中。

「你．．．．你三哥哥．．．．就係自殺死嗰個丁 Sir？」Elise 語帶顫抖的問。

「雖然警方認為案件無可疑，話我三哥哥係自殺，但係我好清楚我三哥哥嘅為人，佢係唔會自殺架！」Sandy 堅定地道。

「你三哥哥係丁 Sir．．．．咁．．．．咁你都係姓丁嘅？」我忍不住多此一舉的問。

「咁我係我三哥哥個妹妹，我就梗係姓丁啦，我叫丁籬。」Sandy 沒好氣地答。

我除了不知道我 Team 中的 Sandy 對古董和歷史有深厚的認識之外，原來我連她姓丁也不知道，我真是一個很差勁的 Team Head。

「卡西，你係咪知道我三哥哥係點死架？」Sandy 又問。

「我梗係唔知啦，我只係一睹過『靜思維』活動同了解過『靜協』嘅功能之後，對你三哥哥同佢學生袁凱霖嘅死有啲睇法啫。」我苦笑道。

「『靜思維』？『靜協』？係咩嚟架？」Sandy 奇道。

「卡西，你趁而家不妨都同 Sandy 講下你所知道嘅嘢啦。」阿 Kim 道。

我「嗯」了一聲，便扼要地將「玫瑰會」、「君子黨」、「靜思維學會」和「靜協」是甚麼說一遍，在最後，我將我的結論說出來，道：「二十歲以下嘅『巨乳處女』係『性修行』嘅基本素材，我估計『靜協』搞嘅所謂『靈量大會』真正目的，就係透過『靜思維』將世界各地最佳的素材收集起嚟，以供『君子黨』享用，丁 Sir 就係因為喺『靜思維』嘅活動中，誤破身為『覺知者』袁凱霖嘅處子之身，所以招致殺身之禍。而袁凱霖嘅死，或者就係『君子黨』對不忠嘅『覺知者』嘅一種懲罰。」

Sandy 越聽我說，臉上的表情越是顯得困惑，直到我說完之後，良久才長歎了一口氣，道：「真係好難令人相信．．．．成件事嘅背後竟然複雜成咁．．．．」

我再補充道：「不過呢啲都係我嘅個人推測，完全無真憑實據嘅支持。」

「其實我有啲唔明，你講過話當參加『靜思維』活動時，香老師會用催眠術令所有學員完全受佢控制，到恢復知覺時，你就連自己被催眠其間所做過嘅事嘅記憶都無，而香老師照計亦好清楚『覺知者』一定要保持處女嘅重要性，佢當時無理由任得丁 Sir 搞袁凱霖架喎？」Siri 不解的問。

「催眠術？如．．．．如果係催眠術嘅話．．．．我三哥哥一定唔會咁輕易畀人控制到架喎．．．．」Sandy 喃喃道。

「此話何解？」我緊張的追問。

「丁家喺古董界中享負盛名，被稱為係一個『考古世家』，因為我哋四兄弟姊妹全部都係攻讀同歷史同考古有關嘅領域，我三哥哥除咗係喺『哈佛大學』讀考古學之外，佢亦有副修心理學，本身都係一個催眠高手，試問一個催眠高手又點會咁易畀人催眠同埋控制到呀？」Sandy 答。

「嘩，乜你三哥哥咁勁架？咁佢嚟『拔道』教書好嘥料啫！」我脫口叫道，轉頭又問 Elise：「喂，你嗰時係點請丁 Sir 返嚟架？」

「我．．．．我真係唔知架，學校請老師嘅事一向都係由古校長負責，當時我要同『寡婦幫』鬥，正值用人之際，古校長就介紹咗丁 Sir 入嚟，話佢係自己人絕對信得過，而事實上，丁 Sir 嚟咗都好幫到我哋手，所以我都無再特別問有關佢嘅來歷。」Elise 一臉茫然地道。

阿 Kim 沉思了半晌，再道：「咁聽落，丁 Sir 並唔係一個普通嚟教書嘅老師，而佢同古校長之間亦好可能有不可告人嘅秘密。」

丁 Sir 表面上是老師，卻不是一個老師，而古校長表面上是校長，卻又不是一個校長，常言「當局者迷」，「旁觀者」的阿 Kim 一語便道破當中之關鍵。

我一邊搖頭，一邊道：「只可惜古校長留得一個咁嘅 Email 畀 Elise，佢都應該唔會再出現，想刮佢出嚟當面問清楚佢都幾難。」說罷，眾人手中的手機背燈突然閃了數下，然後更不約而同的熄掉，幾位女士當堂驚呼起來，再紛紛撲過來捉一捉緊我。

有美女爭相投懷送抱我當然是豔福不淺，但現在顯然不是享受的時候。

我是這裡唯一的男生，明明內心也是怕得要命，亦要裝作若無其事，更從褲袋拿出打火機打起火來，舉高照一照四周，晃動的火焰，將窟道內映照得格外陰森可怖，卻令我留意到之前粗糙猙獰的岩壁，已不知不覺間變得光滑如黑玉，可以看得出這個部分的洞穴不像是在短時間內開採出來，而是要經長年累月才可興建而成的。

我忽然想起男男偷偷裝在我身上的「第三隻眼」事件，便回首向眾人解釋，道：「我上次落到地牢時都遇到有類似電子設備突然間失靈嘅情況，應該係關呢度有部分地方畀人裝咗『電磁脈衝』以防止秘密外洩嘅原故。」

阿 Kim 表現出一貫冷靜的作風，默默心算了一會，再道：「喺頭先遇到干擾之前，我啱啱有望過我條手帶嘅步行讀數，以一直行緊呢條螺旋形嘅坡度嚟計，我哋應該差唔多去到古校長 Email 入面講嘅深度啦。」

「我哋邊行邊講，原來已經行咗成二十層樓咁深架啦？」Siri 伸一伸舌頭道。

接著，我們繼續向前多行一會，漸漸走到了平坦之地，窟道兩旁的牆壁好像蕩然無存，而且，頭上本來高得可讓重型車輛駛進的洞穴頂，到現在抬頭一望竟然更看不到盡頭，如果不是還可見有兩排參天的巨石柱列陣，我會以為自己已身處在曠野之外。

這是一個空敞得令人可怕的地下空間！

巨石柱除了支撐著地底的天空外，彷彿還有帶路的功能，我們沿柱廊中間走了不知多久，最後遇到一道石門擋住去路，這扇石門高大無比猶如為巨人而建造，門的表面刻有似字非字、似圖非圖的印章浮雕，眾人站在前面都感到自身極之渺小，頃刻之間更從心底萌生起一陣恐懼，完全想像不到門的背後，究竟會是隱藏著怎樣的驚天大秘密？

Sandy 深呼吸一下，接過我手中的打火機，並走近門身，細心檢查著那破舊的浮雕，再皺起眉頭，自語自言地道：「蝦，呢個印章我好似有喺邊度見過呢？不過又無理由架．．．．」

Siri 也踏前一步，靠在 Sandy 的身邊，隨手敲一敲石門，道：「最慘而家無得用手機啦，如果唔係影低佢，再 Google 一下，可能會有線索。」

就在這個時候，石門後面突然傳來一下尖銳而嘶啞的叫聲，雖然聲浪是很微弱，但在極寧靜的地底中還是清晰聽見。

Sandy 立即花容失色，連忙退後幾步遠離那石門，悚然道：「咩．．．．咩聲嚟架？」

眾人在極度恐慌的氣氛中屏住了氣息一會，委實又再聽不到任何怪聲，我便順勢安慰大家，勉強笑道：「唏．．．．邊度有聲呢．．．．」

我話剛說完，那一下怪聲又一次響起，而且比上一次更清楚、更駭人。

我們都沒法再騙自己了。

Elise 已被嚇得面無血色，雙腳發抖，顫聲道：「門．．．．門後面．．．．會唔會有喪屍架．．．．我．．．．我哋．．．．不如走啦．．．．」

（待續）

勁好睇，如果可以好似之前暖巴咁課幾百蚊可以一口氣睇多幾十章就好

加速

讚，超好睇

披著甜故皮既超好睇劇情故

今集探險寫的好緊湊
希望快d有下一集

加返D甜OK?

故？

咁又一週，晏啲會出文

第一百五十七話：呷醋的校長



阿 Kim 拍一拍 Elise 的肩膊，冷靜地道：「呢個世界又點會有喪屍？你估拍戲咩？唔好自己嚇自己啦。」

見女神那麼勇敢，我當然也不能退縮，吞一吞口水便附和著道：「咪係！同埋我哋咁辛苦至落到嚟呢度，點都要入去睇下先走啦！」

Siri 點點頭，道：「係就係，之不過呢道石門咁重，我哋得幾個人又點打得開呀？」

Siri 所言甚是，我無言以對再環顧一下四周，見雖然這裡停泊了零星的重型機械車輛或許可以幫到手，但我們等人又怎會懂得操作？

霎時之間也想不出其他的解決辦法，所以我還是明知故問，指著那些外形如龐然巨獸的工程車，苦笑問道：「你估你哋會唔會有人識得楂嗰啲車呢？」

四女登時八目交投，然後一起無奈地搖頭，Elise 更乾笑了幾聲，道：「我 Lamborghini 就楂唔少，Caterpillar 我真係未楂過、亦唔識楂喎。」

Siri 還補充一句：「最衰呢度無得上網，如果唔係我都可以摷本 Manual 出嚟學下點楂啦。」

忽然，漆黑中傳來一把清脆的女聲，喝道：「你哋通通走開！」

我們立即朝聲音的來源一望，只見其中一輛工程車已亮起車頭大燈，更來勢洶洶的向著石門衝過去，在車頭的機械臂快要撞在石門之際，機械臂末端一個呈叉狀的鏟子，突然張牙舞爪的九十度一轉由水平扭成垂直，再乘著車子往前衝的衝力，「轟」的一聲把整個鏟子狠狠地插進兩頁石門的門隙之中。

之後，機械臂上的油壓撐桿隨即發出「咯噠咯噠」連番巨響，似乎正在凝聚著九牛二虎之力，果然不消幾秒，插在門隙中的叉子便開始緩緩地分開起來，兩頁石門竟就這樣被打出了一條約一尺寬的裂縫，接著，幾隻疑似是蝙蝠的物體就「吱吱」聲從這個缺口飛了出來。

「哦，頭先聽到嘅怪聲原來係啲蝙蝠嚟啫。」Siri 恍然道。

事出突然，我定一定神後，回想剛才整個破門過程清脆利落，居然能夠將笨重的工程車操作得如此瀟灑自若，那駕駛者顯然是擁有極高超的技術！

我忍不住讚一句：「爆門嗰下真係爆得靚！」

工程車的車門突然打開，裡面的駕駛者便道：「咪同你講過我讀書時做過好多份工，連地盤都有撈過，所以識楂呢啲車好平常啫。」說罷，就跳下車一步一步向我們走過來。

此人背著車頭大燈，我一時都看不清楚她的正面，只見一個苗條玲瓏的身影越來越走近我們，後腦紮著的馬尾隨之左右晃動，終於步到有火光照及的位置，柔和的光線映在那臉龐之上，精緻的五官清麗脫俗，尤其一雙黑白分明的眼眸靈動慧黠之極，絶美無雙的容貌透出颯颯的英氣，在幽暗之中綻放出明亮的光彩，簡直叫人不敢直視，她不是我朝思暮想的男男又會是誰？

我當堂又驚又喜，叫道：「男．．．．男男！？」

Siri 驚奇的「哦」了一聲，然後在我耳邊，輕聲地道：「原來呢個就係傳說中嘅男男？果然係好靚女喎！唔怪之得搞到你『瘟瘟沌沌』啦！」

我尷尬地笑了一笑，沒有理會 Siri，再問男男：「點解你會喺度嘅？」

男男笑道：「乜你唔記得咗我係『拔道』嘅 IT Technician 嚟咩？古校長 send 畀胡太嗰封 Email 我都有睇到，咪根據個 Email 上嘅座標嚟到呢度，頭先我一早離遠喺洞口就已經見到你哋啦，咪一直吊住你哋尾落到嚟囉。」

「你．．．．你走咗去咁耐，究竟去咗邊呀？」我差點就將一句很老套的「你知唔知我好掛住你呀！」說了出口。

男男道：「我去咗美國起古校長嘅底，發現古校長同丁竣原來係一早就識，佢哋係大學同學嚟。」

「吓？古校長佢從來都無同我提過喎！」Elise 脫口叫道。

男男續道：「我查到古校長係『拔道書院』建築師嘅後人，呢樣嘢畀讀考古嘅丁竣知道後，丁竣就想出要同古校長一齊揭開『拔道』地下室秘密嘅計劃，跟住，佢哋分別以校長同教師嘅身分混入『拔道』，並喺學校入面暗中進行佢哋嘅大計。所以，古校長佢哋同『寡婦幫』一樣，都係一早就知道『拔道』地下室嘅秘密，而校園擴建計劃好明顯就係圍繞住呢個秘密而發起，所以『寡婦幫』千方百計都要奪取呢個工程嘅主導權！」

「咁我明白啦，古校長一直幫 Elise 去對抗『寡婦幫』，又查『靜思維學會』，目的係要取得 Elise 嘅信任，再利用 Elise 喺校董會入面支持佢嘅校園擴建計劃，因為當擴建工程動工後，佢係校長，係學校日常營運同決策嘅最高負責人，佢喺個地盤入面搞乜校董會都理唔到啦。」我思考了一會，又道：「我唔排除古校長起初係有心同『寡婦幫』鬥，但係事情嘅發展竟然個工程畀『寡婦幫』佢哋攞咗，既然已成定局，古校長唯有改變計劃，利用我搞到『寡婦幫』雞犬不寧，佢再嚟一招順水推舟，借先行嘅地基工程喺地盤範圍進行挖掘，於是就挖咗呢個大窿出嚟，咁亦解釋到點解喺上次嘅特別會議入面，古校長要出賣 Elise 投反對票，係因為佢唔想進行得如火如荼嘅挖掘工作無啦啦被煞停。」

「原來古校長調查『靜思維』都只係配菜一碟，咩擴建計劃、咩地基工程，全部都係古校長用嚟挖呢個窿嘅藉口。」Elise 恨恨地道：「古校長仲故意喺我面前扮到佢同丁 Sir 只係普通嘅賓主關係咁，佢哋根本就係同一夥人！」

「點只係同一夥人，我喺美國仲有搵過佢哋嘅大學同學嚟問，古校長同丁竣嘅關係好親密架。」男男又道。

阿 Kim 猜中了，古校長和丁 Sir 之間果然有著不可告人的秘密關係。

如果是這樣，我好像忽然想起些甚麼，便自言自言地道：「蝦，唔怪之得上次同古校長偷睇『靜思維』活動嗰陣，當見到麥太想用『假陽具』插入『覺知者』時，佢嘅態度就突然間轉晒啦，仲．．．．」

「佢態度點轉？佢仲點呀？」聰敏的男男即時聽出有古怪，就提高嗓子質問我。

我自覺說漏了口已經太遲，唯有狼狽地和盤托出，道：「我哋嗰次喺通風管上面𥄫住『靜思維』活動嘅情況，當香老師點起散發出『後宮曼陀』氣味嘅香油時，我已經即卡提醒古校長，同佢講話呢隻嘢聞咗會亂性，但係佢就一口咬定話一定影響唔到佢，仲叫我千祈唔好借頭借路對佢有非分之想添，點知．．．．點知一發生咗麥太嗰件事之後．．．．佢就主動咀我．．．．」

男男再追問：「淨係咀？」

「咁古校長話佢自己頂到『後宮曼陀』嘅威力啫，但係我頂唔到嘛，當時我已經周身都㷫恰恰，佢忽然又主動咀落嚟，咀咀下．．．．我哋咪．．．．做咗囉．．．．」我苦笑答道。

Siri 立刻連聲「哈哈」大笑起來，再道：「我都估到會咁架啦，卡內侍果然無令我失望！」

Elise 擺出一副不屑的嘴臉，道：「唓，個古校長平時喺我面前扮晒正經咁，原來咪又係淫娃一個！」

男男則漲紅了臉，嗔怒道：「無見一排以為你會無咁變態，點知都係一樣，嗰度叫得做通風管都知道有幾窄，咁你都搞到嘢？你真係無得救架啦！」

我跟男男才重遇了片刻，實在不想這樣無聊地鬥起嘴來，便耐心地解釋道：「其實我想講嘅重點，係古校長應該一早就估到丁 Sir 嘅死係同『靜思維』有關，當古校長喺活動入面見到麥太想插 Isabel 時，佢就更加確定，亦都幻想到丁 Sir 嗰時係點樣插袁凱霖，既然古校長同丁 Sir 係情侶嘅話，喺咁嘅情況下，古校長自然會醋意大發，咪就地取材，利用我嘅肉體嚟報復，以平衡自己嘅心理囉，完事之後佢仲多謝我幫咗佢忙添，所以．．．．」

「所以你又想講你都係無辜同被動嘛？」男男插嘴道。

我加強語氣，道：「呢個係實情！」

男男「哼」了一聲，頭便轉到另一邊不理睬我。

其餘的人則面面相覷，一陣沉寂過後，男男忽然問 Sandy，道：「係呢，以我所知喺『靜思維』嘅活動其間，所有學員都會處於完全被支配嘅催眠狀態，咁丁竣又點可以擺脫香老師嘅控制，自己走去破『覺知者』嘅處子之身呢？」

男男跟著我們進來的時候，應該有聽到 Sandy 說丁 Sir 是催眠高手，現在男男追問，Sandy 便趁機再解釋一番，道：「我聽過三哥哥講過，話其實所謂催眠，係催眠者對被催眠者嘅一種意識囚禁，然後強行接管被催眠者嘅身體同精神控制權嘅一種手段，但係任何催眠術都有破解方法，正如一道鎖住咗嘅門都會有一條鑰匙去解鎖一樣，我三哥哥係一個反催眠專家，佢就有本事可以喺門嘅裡面，搵出另一條鑰匙去打返開嗰道鎖住咗嘅門，以恢復自己意識嘅自由。」

Sandy 說罷，再反問男男，道：「咁你認唔認為我三哥哥同個女學生嘅死，都係『君子黨』嘅所為？」

男男沉思了一會，才道：「雖然未搵到實質嘅証據，但係丁竣嘅死暫時嚟講，『君子黨』嘅嫌疑係最大，因為殺人最緊要係講動機，丁竣亦始終都係主動破咗『覺知者』嘅處嘅人，之不過袁凱霖嘅死，我就覺得未必關『君子黨』嘅事，因為講到底，袁凱霖當時係處於催眠狀態，連知覺同記憶都無，同『迷姦』根本就無分別，呢啲至係真正嘅『無辜』同『被動』啦！」

男男說到「無辜」和「被動」時故意提高聲線，又望一望向我，我當然知道她是在諷刺我，便輪到我悶哼一聲，然後將頭轉去另一邊。

男男繼續道：「警方點解當時會認為袁凱霖係自殺，主要係因為警方根據校方提供袁凱霖最近一次所謂退步咗好多嘅成績表作嘅結論，不過我發現呢份成績表臨發出之前係有被人修改過，可以有權限 access 到呢啲咁機密嘅 File 而又做到手腳嘅人，全校唔會超過三個人，而古校長當然係其中之一。另外，學校入面好多人都知道袁凱霖一向對自己嘅外表好有信心，佢亦都好姣，基本上學校每個比較年輕啲嘅阿 Sir 都一定有畀佢姣過，丁竣自然唔會例外，呢兩樣嘢放埋一齊固然唔代表到啲咩，但係當我哋知道原來古校長同丁竣係一對情侶之後，我就覺得情殺呢個調查方向係我哋之前一直忽略咗嘅。」

「係古校長！古校長唔抵得袁凱霖勾引丁 Sir！所以就將袁凱霖殺死！」我忍不住將結論叫出來，原來男男已經將一件我們本來毫無頭緒的案件查到如此地步，她真是一個非常厲害的偵探！

「查案最緊要係『大膽假設、小心求証』，而家有明確嘅目標，就有得查落去啦，下一步，我就要攞古校長同丁竣嘅關係出嚟同佢對質，睇下佢仲有咩說話好講！」男男道。

我大力的點一點頭，隨即想了一想，又歎道：「話就話咁話啫，不過你都有睇到古校長封 Email 架啦，佢擺明已經著咗草，而家都唔知可以去邊度搵佢出嚟。」

男男指一指石門上的裂縫，笑道：「都講咗咁耐啦，我哋都係時候入去石室入面，睇下『拔道』究竟有咩秘密咁巴閉，同埋會唔會搵到有關古校長下落嘅線索啦。」

（待續）

有文

本身見到男男返嚟都有少少開心，點知未夠兩秒又開始陰陽怪氣一味話人屌女，差啲想即刻上一頁唔睇

不過有文就支持

真係要激讚作者的插圖👍👍

謝謝整插圖亦係我創作《誤上了》其中最享受嘅環節

取消書展對每一個愛書之人來說肯定是個壞消息，當然在漸趨嚴峻的疫情下，如此安排亦是無可奈何，但其實只要有作品和讀者，哪裡都可以舉辦書展，所以這個星期，我會在這片小小的空間開我個人的書展，並將一直埋藏在「拔道」地底的終極大秘密，一氣呵成地連載出來！

下一集會在稍後發布，敬請密切留意！

鐘意儲埋幾集一口氣追既讀者表示：又live左了

暫時係連登上面最喜歡既長篇作，覺得文長得黎但節奏快，中間冇乜悶場，要甜有甜要推理有推理，而家連探險都撈埋
各樣野balance得好好，想問下有朝一日大結局會唔會出書？