【願玫瑰在君子的屍體上盛放】《誤上了黑幫老大的情婦，我只好躲在中環的職場胡混》- 第四季：玫瑰篇

推

可唔可以試下一日一篇

第一百二十一話：一個盛產寡婦的組織



Harminia 一個箭步撲過來，向我怒道：「冼 Sir，你好賤呀！你竟然趁我一時訓著咗，就走去套我阿媽講嘢？」

「我從來都無否認過我係好想從你哋嘅口中知道更多真相，但係你有無諗過，如果你媽媽係完全滿意而家嘅狀況，無論我點套佢，佢都唔會講半句啦？」我反駁道。

「冼 Sir 講得啱，係我自己想講，根本就唔關冼 Sir 嘅事！」麥太亦插嘴道。

Harminia 拉著麥太的手臂，道：「媽，你飲醉就唔好出聲啦！」

「你頭先就飲醉，我都不知幾咁清醒。」麥太站了起身，摸一摸 Harminia 的臉龐，柔聲道：「我知你好叻女，又好識諗，所以媽媽一直以嚟都聽晒你講，不過，今次你要聽返我講一次啦。」

「之但係．．．．」Harminia 皺眉道。

「條片已經係一個活生生嘅例子，証明無論我哋點跟佢哋去做，佢哋都從來唔會當我哋係自己人，咁繼續落去，當佢哋達成最終目的嘅時候，佢哋肯定會毫不猶疑咁放棄、甚至對付我哋，等到嗰陣時就太遲架啦，所以，我哋要趁自己而家仲有價值時，要畀人利用都要識揀一個值得啲嘅人利用！ 」麥太正經地道。

Harminia 即時擺出一副不屑的表情，反問：「你唔係話冼 Sir 就係嗰個值得嘅人吓嘛？」

「嘿嘿，我淨係知道呢個冼 Sir 好特別、同埋好有情趣，明明係用緊條淫片嚟勒索我，但係約我出嚟又揀個咁 classy 嘅地方，連 send 畀我嗰條淫片都經過精心剪輯，雖然我知佢嘅目的係想威逼我幫佢，不過我覺得佢似係 date 緊我多啲。」麥太笑了一笑，續道：「所以，冼 Sir 可能會係嗰個我哋一直等緊嘅人嚟架。」

事緣是因為偷拍回來的原片太長，所以在 send 出去之前一定要剪輯，而鑑於我在大學中是「Filming Club」的成員，現在潮流又興玩 Vlog，所以在剪輯的過程裡忍不住加入一些後期製作，以美化那條短片變得更精彩，這純粹是出於技癢。至於選擇在「鄉村俱樂部」會面，完全是因為想喝喝夫人存放在這裡的免費酒之原故，但這種種在麥太的眼中，竟變成了「特別」和「有情趣」？

如果不是麥太守寡守得太久，她就肯定是患上了「斯德哥爾摩症候群」。

「阿女，我哋一直係咁根本唔會有出路，我永遠都畀卓太、駱太同尤太佢哋食住，而你亦都只會淪為佢哋啲女嘅跟班，一味痴埋晒啲無實權嘅富二代度，你話咁有咩益處？」麥太頓了一頓，再道：「我唔想睇到你咁，因為我知道你嘅能力，你唔應該係咁，所以冼 Sir 呢個係一個機會，係一個可能可以改變我同你命運嘅好機會！」

根據麥太的說法，我相信 Harminia 應該是為了要跟「寡婦幫」的女兒們「埋堆」，現在是有「援交」的！

難怪 Harminia 的言行思想都比她實際年紀成熟，又對雪茄紅酒這些奢侈品是如此熟悉，看來她一直都有「招呼」不少權貴吧？

這時 Harminia 已冷靜下來，並坐在我旁邊，點起一枝紅萬，道：「媽，既然你決定要押注喺冼 Sir 身上，我都無謂再多講，你想講咩就即管講啦！」

麥太點一點頭，然後坐在我的另一邊，隔了好一會，才緩緩地道：「其實所謂嘅『寡婦幫』，只係『玫瑰會』派入『拔道書院』嘅一小隊，所以卓太都係聽命於『玫瑰會』嘅一隻棋子！」

「吓？『玫瑰會』？」我驚奇問道。

麥太繼續道：「無錯，『玫瑰會』係一個非常神秘嘅組織，專門喺世界各地嘅孤兒院吸納有潛質嘅孤兒，再培育佢哋成為任何男人都想『採摘』嘅『玫瑰』，當時機一到，就係稱之為『花蕾』要『綻放』嘅時候，組織就會替每一朵『玫瑰』物色指定嘅對象作為『宿主』，同時亦都會暗中安排喺一啲社交場合入面，令『玫瑰』同『宿主』發生邂逅嘅機會。」

我將半杯紅酒倒進乾涸的口中，再問：「點為之有潛質嘅孤兒？」

「美貌當然係首要條件，但係才智亦都係不可或缺。」麥太答。

我忍不住問：「咁『玫瑰會』係點培育『玫瑰』架？」

「培育『玫瑰』嘅過程基本上同一般人接受嘅教育無乜分別，之不過因為有『玫瑰會』龐大嘅網絡協助，令『玫瑰』幾乎都可以進入世界頂尖嘅名校，大部分更會以一級榮譽畢業，組織要栽培到每一朵『玫瑰』都能夠才貌兼備，咁至可以確保任何目標『宿主』都無法抗拒。除此之外，組織亦都會嚴格訓練『玫瑰』取悅男人嘅技巧，因為咁，每一朵『玫瑰』都好識得點服侍男人。」說到這裡，麥太便換個交叉翹腳的坐姿，短裙裙腳掀起了，露出一雙性感修長的美腿，看得我心卜卜跳，之後再道：「當『宿主』遇上『玫瑰』後，『宿主』就會好快不能自拔咁瘋狂愛上呢朵經組織悉心栽種嘅『玫瑰』，而『宿主』為咗可以得到『玫瑰』咩都會願意，甚至將自己所有嘅權力、同畢生嘅財產都會奉獻畀『玫瑰』。」

我把另外半杯紅酒倒進口中。

「最後，直到組織認為『宿主』已經再無『養份』可以提供，喺呢個時候，『宿主』往往就會死於非命，然後由『玫瑰』取替『宿主』，咁就係為之一個『花期』。」麥太長歎了一口氣，又道：「所以『玫瑰會』嘅格言係：『願玫瑰在君子的屍體上盛放』，就係咁嘅意思，而我，就係其中一朵組織培育出嚟嘅『玫瑰』。」

原來跟我之前估計的一樣，這班女人就是一群「黑寡婦」，利用美貌吸引異性，再透過吞食對方來為自己供給養份，所以「玫瑰會」根本就是一個盛產寡婦的組織！

而在「玫瑰會」的格言中所提及的「君子」，會跟「君子黨」有關嗎？

繼曉葵姐跟我說的「高跟黨」，之後從福伯的口中得知有「君子黨」，現在還多來一個「玫瑰會」，究竟這個世界上還有幾多個秘密組織是在陽光照不到的地方下運作，當中更有多少秘密組織的成員，一直在暗中行事，以達致不可告人的目的呢？

既然「寡婦幫」是隸屬於「玫瑰會」的一小隊，我想手法類似的龍夫人也是「玫瑰會」的成員，只是委派了到「龍雀門」，而且記得在「龍氏宗親會」那晚，阿綠播出龍雲海臨死前的錄音，他就以絕望語氣吐出的那句話中包含了「玫瑰」二字，便跟麥太求証的問：「咁你識唔識一個嫁咗畀龍雲海，喺『龍雀門』入面個個稱佢為龍夫人嘅女人？佢係咪都係你哋『玫瑰會』架？」

麥太搖一搖頭，答：「其實『玫瑰會』入面有幾多成員、或者有啲咩人我真係唔知架，我只係知道作為『玫瑰』一定要絕對服從上級嘅命令。」

「上級？『玫瑰會』點分上下級架？」我好奇問道。

「『玫瑰會』係用玫瑰嘅顏色嚟區分等級，我所屬嘅『黃衣舞仙』係最低級，跟住就係尤太嘅『翠衣妖姬』，然後就係駱太嘅『藍衣教士』，而卓太再高一級係『紫衣祭司』，『紫衣祭司』喺『玫瑰會』入面都只係屬於中級『玫瑰』，再上嗰啲高級『玫瑰』我就唔知啦。」麥太解釋道。

「咁你哋遇到自己友又點相認呢？」我又問。

「『玫瑰會』嘅成員每一個都好神秘，一般情況我哋唔會遇到其他『玫瑰』，但係如果真係咁啱遇到，我哋都會有方法辨認對方係咪『玫瑰會』嘅人，因為組織要每一朵『玫瑰』嘅身上，都有屬於自己級別嘅玫瑰作記認，例如我今日就佩戴咗呢條有黃水晶玫瑰吊墜嘅手鏈啦。」說罷，麥太便提高自己的手，將手鏈在我眼前晃了幾下。

由麥太進來的一刻開始，我都只注視著她一束性感的晚裝和一對雪白的大奶峰，如不是現在她主動給我看，我根本不曾留意過她手上這條象徵著「玫瑰會」的飾物。

記得龍夫人腳鍊上的玫瑰花是用兩粒金黃色寶石作為花蕊，相比之下，麥太這條淡黃色水晶手鍊似乎有點兒比下去，便問：「我記得我講嗰位龍夫人都有戴玫瑰花有關嘅飾物，不過．．．．不過佢粒寶石好似金黃色好多喎，咁有無啲咩分別架？」

「嘿，你嘅觀察力都幾強架喎。」麥太清脆的笑了一聲，再道：「雖然大部分嘅『花苗』都係喺孤兒院入面揀選，由細到大培育出嚟，但係咁樣做實在太花時間，亦有鑑於『玫瑰』嘅需求越嚟越大，於是組織後來就喺外面搜羅一啲有潛質嘅合適者，並邀請佢哋加入『玫瑰會』，然後再訓練佢哋成為『玫瑰』，之後，為咗識別呢一批『中途出家』嘅『玫瑰』，所以組織就加入咗粉色系嚟區分，亦即係話就算係同級嘅『黃衣舞仙』，都有分開『正黃衣』同『粉黃衣』兩種。」

原來龍夫人是「正黃衣」，麥太則是「粉黃衣」。

「係呢，你成日開口埋口都話組織乜組織物，咁其實個組織係邊個話事架？」我忽問。

麥太呷了一啖酒，道：「唔知架，我淨係知道掌握每一朵『玫瑰』生殺大權嘅係『花王』，所以我估『花王』應該都係『玫瑰會』嘅最高話事人啦。」

「你估？」我奇道。

麥太苦笑歎道：「我咪講過『紫衣祭司』以上嘅高級『玫瑰』我已經唔知，更加咪話高高在上嘅『花王』，所以『花王』嘅稱呼我都只係聽過架咋，好似我呢啲低級『玫瑰』，就梗係未見過佢本人啦。」

「你無見過『花王』，咁『花王』點向你落 Order 呀？」我追問。

麥太又答：「『玫瑰會』入面階級觀念極重，通報機制係一層傳一層，以『寡婦幫』為例，『紫衣祭司』卓太收到上面嘅 Order 後會傳落去『藍衣教士』駱太，跟住就落到『翠衣妖姬』尤太，再由『翠衣妖姬』傳畀『黃衣舞仙』嘅我，所以邊個喺上面傳 Order 畀『紫衣祭司』我係無辦法知道，我淨係知道所有 Order 都係由『花王』發出。

除咗咁，『玫瑰會』入面仲有一班『蝴蝶』，一般係用嚟傳遞訊息同協助『玫瑰』完成『花期』，呢班『蝴蝶』全無半點感情可言，就算有啲係幫『玫瑰』手，但係同『玫瑰』就唔會有半點交情，所以『玫瑰』亦都無可能從『蝴蝶』身上知道上面發生嘅事，同『玫瑰』一樣，『蝴蝶』都係以顏色同品種嚟分等級同功能，『玫瑰』可以差遣同自己同級或以下嘅『蝴蝶』，例如作為『黃衣舞仙』嘅我，聽我吩咐嘅『蝴蝶』就只有『黃斑弄蝶』，亦都同『玫瑰』相似，各『蝴蝶』身上會有屬於自己品種級別嘅蝴蝶圖案作記認。

不過有時我覺得『蝴蝶』比起『玫瑰』仲神秘同恐怖，話就話『蝴蝶』係幫『玫瑰』手，但係似乎佢哋見過乜做過乜都會直接上報，真係有啲乜嘢唔覺意得罪咗班『蝴蝶』畀佢哋喺背後『篤灰』，到時就真係死咗都唔知咩事呀，所以查實我都確係幾驚見到『蝴蝶』架！」

「玫瑰」竟然怕「蝴蝶」，就像「水手」怕「水」般，之前真的是聞所未聞。

我相信「玫瑰會」的創辦人肯定是對玫瑰和蝴蝶很有研究，其組織架構鉅細靡遺之程度比起「高跟黨」和「君子黨」更有過之而無不及，除了所屬「正黃衣」的龍夫人之外，女管家鎖骨對下的位置亦紋了一隻黃色蝴蝶，根據麥太的說法，她應該就是「玫瑰會」中的「黃斑弄蝶」。

想起女管家的冷淡和無情，十足十麥太形容的一樣，那時她應該是收 Order 才進來浴室去調查我的「能力」吧？卻不清楚她是奉龍夫人的命？還是奉「花王」的命罷了？

（待續）

走甜

冇人睇？

Push

好高汁 但有小小慢
皮已正

我都想成日同大家見面，但係實在要絞盡腦汁，製作需時，不過話咁快聽日又出文啦

二四六岀？

二四出，下一話在校對中，晏啲發文

Push

唔想再有手足被黑警自殺？用呢4個apps!
- 分享自 LIHKG 討論區
https://lih.kg/1864933

借個位嚟

請大家幫手正評，lm，避免沉底

加油!

加油呀，卡西

第一百二十二話：校董們的生意糾紛



麥太一邊替我的酒杯添上紅酒，一邊道：「你而家知道我哋係咩人啦？」

我想了一會，問：「咁你哋混入『拔道』，又搞埋晒啲咩『靜思維』，究竟最終係為咗乜？」

麥太答道：「其實一開始嘅時候，我只係收 Order 鎖定麥潤昌係我嘅『宿主』，當我做咗麥太之後，我至知道原來仲有卓太、駱太同尤太嘅存在，而佢哋當時已經完全控制到佢哋嘅『宿主』，仲搵咗香老師返嚟將『靜思維』引入嚟『拔道』，目的就係要藉住『靜思維』嘅神奇功效，去收買班校董同家長嘅人心，你都知而家嘅風氣，只要可以令到啲細路學業成績突飛猛進，個個人都會當你神咁拜，而結果都無令到大家失望，『靜思維』嘅成功，令到校董會就聽晒嗰四位由我哋控制嘅校董嘅說話，然後隨住我哋四個嘅『花期』陸續完成，最後仲完全取替咗佢哋嘅位置，成為『拔道』嘅校董，形成你而家見到嘅局面。」

麥太口中的「花期陸續完成」，說出來的語氣雖然輕描淡寫，但我卻清楚這是曾經涉及四條人命，便深感「玫瑰會」作風之心狠手辣，叫人從心底裡不禁滲出寒意來，隨即又將半杯紅酒倒進口中。

「但係我真係估唔到，『靜思維』嘅背後原來係啲咁變態嘅嘢．．．．我．．．．我一直仲以為我哋大家係一 Team 人一條心．．．．但係到頭來佢哋竟然連我同我個女都呃埋．．．．我都唔知佢哋仲有幾多嘢係呃住我．．．．」麥太好像欲言又止，之後再搖搖頭，歎道：「唉，所以既然我連『靜思維』係乜都至係啱啱知，你話佢哋嘅最終目的係乜我又點會知啦？」

我俯首沉思一會，再試探地問：「聽你嘅語氣，似乎駱太、尤太同你三個人，應該唔只淨係『玫瑰會』嘅上線下線咁簡單喎？」

麥太猶豫了半刻，再緩緩點著頭，答：「你無估錯，其實駱太、尤太同我三個人，曾經係 Partner。」

我大吃一驚，嚷道：「吓？你哋係 Partner！？」

「哎吔，唔係你諗嗰啲 Partner 呀，而係生意上嘅 Partner 呀！」麥太急急罵道。

我頭仰後，長長的「哦」了一下。

「喺中環半山一幢商業大廈入面，本來有一個高級秘密架步，係一個有提供高質素男女妓嘅 Club，叫『Club 51』。」麥太呷了一啖酒，再道：「嗰度嘅幕後老闆有三個人，就係駱太、尤太同埋我。」

「吓，你哋身為校董，竟然開雞竇？」我驚道。

「你咪大驚小怪啦，幾多有錢佬咪一路撈偏一路做善事，有乜咁出奇啫？」麥太又繼續道：「隨住經濟環境轉差，『Club 51』嘅生意一年淡過一年，跟住仲有間新架步開咗喺我哋樓上，令到『Club 51』嘅生意雪上加霜，無幾耐之後就終於關門大吉。」

「既然你話經濟轉差，點解喺同一幢大廈，人哋做又有生意，你哋做又無嘅？」我問。

「新架步好有綽頭，大玩神秘互動元素，你都知出嚟玩最緊要係新鮮、刺激同埋安全，新架步入面所有人不論男女都會戴晒面具，當中不乏貪玩嘅名模同明星、甚至係想嚟減壓嘅專業人士同企業高層，喺一個可以將自己隱藏而又唔知對方身分嘅環境下，你會產生無窮無盡嘅幻想，咁做除咗可以令啲客放心唔會畀人點相之餘，仲吸引到一班唔係出嚟撈嘅囡囡嚟客串，嗰啲女一啲風塵味都無，個個試過講返都話勁有戀愛 Feel，簡直就不能自拔嗰隻添喎。」麥太歎了一口氣，道：「咁搞法，你話我哋有乜辦法唔執笠？」

我想了一想，又道：「咁做生意嘅嘢都係公平競爭啫，人哋諗到條好橋，又搵到咁多良家婦女下海，站喺消費者角度嚟講係件好事嚟喎。」

「係，之前我本來都係咁諗，而事實上我而家都係新架步嘅常客，佢哋真係搞得好，商場汰弱留強，我唔夠人做蝕錢我都無說話好講。」麥太隔了半晌，再以怨恨的語氣，一字一語地道：「之不過，而家我開始懷疑，成單嘢，根本就係駱太同尤太夾埋起我尾注！」

「唔係吓嘛？」我不自覺的叫道。

「喺『Club 51』嘅生意開始變差嘅期間，駱太就以大股東嘅身分發起供股，話要夾錢裝修去吸引返多啲客嚟幫襯，我呢啲細股東加上又係佢下線，唔想血本無歸咪唯有死跟囉，點知條裝修數超支又超支，我就變相供完一次又一次，最後埋單都不知畀貴咗幾多，個場裝修完啲生意咪又係一啲起色都無．．．．」麥太越說越疑惑，續道：「裝修完無幾耐，樓上就開咗嗰間新架步，因為玩蒙面 Concept 所以就加個『Shade』字喺後面，叫『Club 51 Shade』．．．．我其實一直都覺得有啲古怪．．．．你話邊有咁巧合架？」

「咁你無問清楚駱太同尤太架咩？」我追問。

「我梗係有問，不過佢哋話佢哋都蝕咗好多，唔想再提呢啲傷心事，叫我以後都唔好再講，咁佢哋係我上線，咁壓落嚟我仲有乜計呀，咪硬食囉！」麥太生氣得胸前的一雙巨乳在急促的起伏著，再道：「佢哋不褸都唔抵得我大波過佢哋架啦，所以由頭到尾到無當過我係自己人，十成十佢哋當時根本就係專登借裝修『Club 51』嚟呃我啲錢同整鬼我，話唔定，新架步嘅幕後老闆就係佢哋添呀！」

原來因為身材上的差別和生意上的瓜葛，麥太一早跟駱太和尤太已存有心病，那條淫片只是一條導火線，去將她一直囤積在內的不滿引爆出來而己。

「『Club 51』執咗之後，表面上我哋都仲有一齊出嚟玩，但係佢哋搞緊乜我真係唔知，淨係知道呢排多咗『家教會』嗰個曹太痴咗埋嚟，我估佢哋三個一定有啲秘密嘢搞緊。」麥太神情凝重地道。

「其實話時話，你哋明明係闊太嚟架喎，尤其你哋嗰幾位過咗身嘅丈夫係『拔道』嘅創校人，亦係香港有名嘅大慈善家，剩返畀你哋嗰份遺產都應該唔嘢少啦，大把錢點解仲要咁傷神搞埋晒啲私幫生意呀？」我不解的道。

「既然都講晒畀你聽，我都唔掙在講埋佢，其實有好多嘢都係你睇我好、我睇你好架咋。」麥太忍不住搖頭，歎道：「喺我哋結識『宿主』之前，組織已經深入調查過目標人物嘅底細，並掌握晒佢哋嘅權力同財產狀況至向我哋落 Order，所以當『花期』完成，我哋繼承咗我哋死鬼老公成副身家之後，當中有部分係要向上繳架，如果有 Trust Fund 嘅話仲要個個月畀添！」

「要上繳咁大鑊？咁點畀法呀？」我脫口叫道。

「點畀法？咪好似嗰啲層壓式直銷公司咁囉！」麥太滿腹牢騷，滔滔不絕地道：「我嗰層『黃衣舞仙』要進貢所得嘅 60% 派畀上面，而高我一層尤太嘅『翠衣妖姬』進貢比例會減至 50%，但係就收到嚟自下層『黃衣舞仙』嘅 10% 收益，再上一層駱太嘅『藍衣教士』進貢比例會減至 40%，但係就收到下層『黃衣舞仙』同『翠衣妖姬』各 10% 收益，大致係咁如此類算，所以喺呢個『進貢制』下，越高層付出越少收益就越大，你話我呢啲做最低級嘅幾咁慘？」

「咁你都肯嘅？」我反問。

「點有得唔肯喎？呢個係『玫瑰會』一開始 approach 我時已經講到明，我要同佢簽晒協議書至能夠加入，喺我未接受組織訓練成為『玫瑰』之前，我只係一個返朝九晚五、搵萬零蚊一個月嘅普通 OL，為咗可以滿足我嘅虛榮心、同埋過一啲上流社會嘅生活，嗰時你叫我簽乜都肯簽啦！」麥太皺起眉頭，道：「所以你話我唔偷偷地搵啲生意搞下幫補下又點掂喎？」

知道了身為「玫瑰」的麥太背後的故事後，我覺得她雖然金玉其外，但其實是很可憐的，因為無論你表面有多富有，如果連自己的命運也無法掌握，那算是真正的富有嗎？

麥太靜了好一會，然後若有所思，道：「你無辦法知道，我要維持呢種華麗嘅生活，喺背後究竟要付出幾多嘢架啦。」

「咁睇嚟如果可以畀你再揀，你未必會揀返呢條加入『玫瑰會』嘅路嚟行啦喎？」我認真的問。

「哈哈，咪玩啦，萬零蚊都唔夠我而家買對鞋。」麥太失聲笑道：「如果要我一直賺萬零蚊，我寧願死咗佢好過！」

我未料麥太會有如此反應，便急急問道：「吓？你唔係想我幫你脫離『玫瑰會』架咩？」

「我幾時有話過要脫離『玫瑰會』呀？」麥太愕然地反問。

我瞪大雙眼，提高聲線道：「咁你話唔想睇到你個女一直係咁，又話同你啲上線夾份做生意畀佢哋呃咗好多錢，仲話要進貢畀啲『玫瑰會』高層好慘嘛？」

「無錯呀，我係咁講呀。」麥太沒好氣的答：「所以我咪要做『玫瑰會』嘅高層囉！」

原來我完全誤會了。

「我係一個非常貪心嘅人，我得到咗一樣嘢，就一定會動腦筋想要埋另一樣，我講咁多嘢畀你聽，係想你幫我，第一步就係打垮駱太同尤太嗰兩條八婆，等我喺『寡婦幫』入面上位。」說罷，麥太竟然一口氣將面前杯中的紅酒乾掉，再拿起我卡在煙灰缸上的雪茄抽了一口，然後把一團煙雲吹到我的臉上。

我當堂被她的煙嗆得連續咳了兩聲。

「你嚟緊就埋佢哋身去查下佢哋喺度搞緊乜鬼，最好搞到佢哋連『玫瑰』都無得做，如果你連呢點都做唔到嘅話就乜都唔駛講，以後就更加唔駛再同我傾啲咩合作。」麥太以命令的口吻道。

我愣著。

還以為麥太不吸煙，還以為她酒量差，還以為她是小家碧玉，還以為「寡婦幫」當中她最平實和善良，還以為她的女兒才是幕後軍師，還以為她是為了女兒才不得不背叛「寡婦幫」，還以為她一直是「玫瑰會」中的受害者。

原來我所以為的一切全都不是真的。

或者，麥太真的有天真戇直有如小朋友的一面，但這只是包裝著內裡充滿著計謀和野心的真面目之其中一面罷了。

其實只要想深一層，既然不少城中富豪一世英明，最後都一一栽在「玫瑰」的手上，麥太是當中的一朵，她又怎可能是那麼簡單？

極度貪婪的麥太，根本從來沒有把那條淫片放在眼內，她一直只想找一個合適而又可供利用的人，並暗中替她剷除踩在她頭上的人，讓她可以扶搖直上，讓「玫瑰會」中固有的「進貢制」令她得到更多。

這就是麥太現時最需要的東西。

遇到我這隻不識好歹的「盲頭烏蠅」撞過來，麥太簡直就是求之不得。

麥太已將手中的空酒杯放回枱面上，又道：「你唔好睇駱太同尤太喺外型上咁唔同，佢哋兩個喺『寡婦幫』入面一向都特別 close，而且鍾意埋啲嘢都差唔多，以我同佢哋一齊玩咗咁耐所觀察，佢哋會揀嘅仔通常會有一個特質，就係靚仔，不過真係唔怕得罪講句，以你個 Look，呢方面就真係『抆』咗少少囉。」

我「哼」了一聲，再以不屑的語氣追問：「我老媽生成我咁嘅樣我都無計架，家陣整容都整唔切啦，咁點算呀？」

麥太嫵媚地笑了一聲，然後咬著性感的嘴唇，答：「所以，我咪要發掘你其他可以彌補到呢方面嘅特質囉。」說罷，竟褪下我的拉鏈，將一直處於膨脹狀態的小卡西掏了出來。

麥太實在叫人太難以捉摸了。

（待續）

終於番來啦

竟然係女之前犯?!

有甜未

應承我，下一篇全力寫甜！ok?