第一百四十五話:雷霆救兵
我未料及 Mike Yip 會有此一著,而且這個田總阿 Kim 自己也想結識,我根本無從阻止,見他們已步出了廂房,我當然心急如焚想站起身跟隨,但旁邊的「黑白無常」存心纏住我又怎會坐視不理?兩人見狀連忙撲過來繞著我臂彎,三人一同緊貼坐在一張椅子上,我兩邊臂膀深深陷入一黑一白的乳溝中間,一陣酥軟觸感左右夾擊傳遍全身,弄得我好像被點了穴一樣。
Whitney 舉起酒杯,嗲聲嗲氣地道:「卡西,你咁犀利,我要敬你一杯呀!」
我匆匆喝完一杯,Tyra 便搶著替我添酒,再道:「卡西,你啲威水嘢我一早就有聽過架啦,我都要敬你!」
我卡西向來受軟不受硬,亦絕不向女人動粗,所以要硬起心腸摔開她們逃出去我實在是做不到,既然她們嚷著要跟我喝酒,我就要用最快速度,讓她們喝到不省人事,方能脫身。
可是酒過數巡之後,Tyra 和 Whitney 不但面不改容,而且還越喝越急,看來 Mike Yip 手下的酒量比起他自己還不知要強多少倍?
「黑白無常」果然不是省油的燈!
最要命的是,她們二對我一,以「車輪戰」的方式來敬酒,結果,她們每一輪各自只喝一杯,我卻連喝兩杯。
繼續這樣下去,我肯定未脫身之前便先會喝醉倒下。
既然速戰速決不了,我亦立刻要修正戰略,先拖慢節奏喘息一下才算,便打開話題的問:「係呢,嗰個田總好猛料架?」
「田總梗係猛料啦,佢係我哋『高瑞』Ultra High Net Worth Division 入面嘅超級大客嚟,我諗現時成個 PB 嚟講,都無乜邊個客可以大得過佢!」Whitney 答。
「田總除咗係內地嘅新晉富豪之外,佢仲交遊廣闊,好友遍布政商界,所以佢個名田百通真係改得好貼設,『百通百通,有佢百事都通』,係所有想同大陸做生意嘅人都想巴結嘅對象!」Tyra 補充的道。
「高瑞」和「川泓」是兩間不同級數的公司,可以在「高瑞」成為「超級大客」,我不敢想像在「川泓」會「大」到一個怎樣的地步!
加上田百通的人脈網絡,對於任何公司想去發展內地市場都有莫大的幫助,難怪阿 Kim 那麼緊張要認識他!
我對田百通這個人實在好奇,再追問:「講到咁誇張咁,有無佢張相拎嚟睇下呀?」
Tyra 拿起手機按了幾下,再遞給我看,道:「呢張相係上次田總過嚟香港,喺我哋招呼佢嘅飯局入面影架。」她剛剛稱田百通為「新晉富豪」,我還以為會看到一個年輕才俊模樣的大商家,怎料電話屏幕所見,是一個年過六十的老頭子!
「吓,又話係『新晉富豪』?乜係條老坑嚟嘅?」我脫口叫道。
「『新晉』都唔代表一定年輕嘅,正如『肯德基家鄉雞』創辦人桑德斯上校係喺佢六十六歲嘅時候至搞自己嘅炸雞生意發跡成為富豪,佢當年都係『新晉富豪』嚟啫!」Tyra 笑道。
另一邊的 Whitney 則插嘴道:「你咪睇田總佢一把年紀咁,佢玩起上嚟比起好多後生仔玩得仲癲架,份人又闊綽喎,我諗係因為咁所以佢至有咁多朋友。」隔了半晌,她放輕聲線,竊竊私語地道:「佢呀,仲好鬼鹹濕添架,係女都啱,一有機會就博人懵,Tyra 話佢個名田百通解做『百事都通』,我就話佢係『田伯光』同『周伯通』嘅混合體啦!」
想不到「讀番書」的 Whitney 對金庸武俠小說也頗熟悉,連《笑傲江湖》中的「採花大盜」田伯光和《射雕英雄傳》的「老頑童」周伯通也知曉。
慢著!Mike Yip 不是正帶著阿 Kim 去找田百通嗎?既然他是一個超級色鬼,超級色鬼遇上超級美女會有甚麼事發生也不用多說吧?那麼阿 Kim 的處境不是非常危險嗎?
一個 Mike Yip 已經難搞,現在忽然又多了一個田百通,難道我女神今晚真的是難逃一「砌」嗎?
但無論怎樣,我都一定要救我女神!
首先,我就必需要擺脫「黑白無常」。
「飲咗成晚都未去過厠所,等我出去渣渣水先。」我忽道。
Whitney 當堂攬得我更緊,笑道:「你出咗去仲會返嚟?你呢個藉口連三歲𡃁妹都呃唔到啦!」
我裝出忍得很辛苦的樣子,道:「但係我真係急尿喎,同埋啲酒我叫架嘛,我哋都未飲晒,又點會走咗去唔返嚟喎!」
Tyra「嘿」了一聲,突然伸手插入我西裝褸的內袋,掏了我銀包出來,道:「咁啦,我哋幫你保管住你個銀包先,確保你真係會返嚟!」
我即時想從 Tyra 手上搶回我的銀包,但她卻敏捷地拋了給 Whitney,如是者一輪「馬騮搶球」,我始終敵她們不過,唯有舉手投降,苦笑道:「你哋唔係吓嘛,我去個厠所啫,咁都信我唔過?」
Whitney 一邊檢查我銀包,一邊笑道:「就係你呢啲 Banker 至最信唔過呀!」忽然,她從銀包拔出兩張咭,叫嚷:「嘩,乜你張身分証同回鄉咭上面個樣咁薯架!?」
「等我睇吓?」Tyra 拿起其中一張來看,再笑道:「哈哈,又真係好鬼老套喎!」
我的兩張証件換來兩女一陣嘲笑,之後,Tyra 稍稍收起笑容,一臉嫵媚的道:「你去就快啲去啦,如果你十五分鐘都未返到嚟,我唔敢擔保我同 Whitney 會點對你呢兩張証件架,萬一搞到你返唔到香港就唔係幾好啦,呵呵。」
說罷,她們竟將我的身分証和回鄉咭,插進一黑一白的乳溝之中,直至完全消失為止。
這畫面確實是香豔撩人,但我已無暇欣賞,匆匆站起來轉身就奪門而去。
踏出廂房後,陡然發覺這個「四合院」的氣氛跟我們來的時候已經不一樣,我不自覺地倚在走廊的欄杆上一覽四周,只見本來站在樓台上唱京劇的花旦不見了,取而代之是一個黑人 DJ 正打著碟播放強勁的派對音樂,而原先前空無一人的庭院,現在卻變成一個人頭湧湧的舞池,群眾紛紛隨著音樂節拍在擺動身體。
我終於明白為甚麼這地方叫「日與夜」,原來入夜之後,這裡就會變成一個人們來跳舞狂歡的夜店。
亦即是說,我要找 Mike Yip 和阿 Kim 就比之前更加困難了。
而我只剩下不到十五分鐘的時間。
我可以怎辦?
無助的我,忍不住仰天長歎了一聲,再叫道:「有無人可以幫我呀?」
「你想我點幫你呀?」我背後傳來一把清脆的少女聲。
我沒想過這句用來發洩的說話,會真的有人回應,便立即回頭一看,竟然是 Siri!
「Siri!?你點會喺度架?」我失聲驚道。
「咁你叫得我做 Siri,你一要幫手,我就梗係會跳出嚟幫你架啦!」Siri 盈盈的笑道。
我帶笑啐道:「我講真呀!」
「咪同你講過囉,夫人要我幫你手,你去成都,我咪暗中跟埋過嚟囉。」Siri 解釋道。
Siri 的出現就有如「及時雨」一樣,在我極需要人幫忙的時候,更覺她的笑容笑得格外甜美燦爛!
我相信 Siri 很可能會有阿 Kim 的線索,便問:「Siri,你一路跟住我,見唔見有個成日同我一齊嘅女仔喺間房度行出嚟呀?」
「你哋一行三人有兩個女仔,你係咪問我高高瘦瘦、個樣特別靚、個胸又特別大嗰個呀?」Siri 反問。
我大喜,急急點頭幾下,連忙又問:「係呀係呀,咁你頭先係咪見到佢?知唔知佢去咗邊呀?」
這次,Siri 卻沒有立刻回答,不禁令我緊張起來,再發連珠炮的追問:「如果你一直喺度無理由會見唔到架?佢係同一個個樣好乞人憎嘅男人一齊行出嚟架,你試下記下啦?佢係我女神嚟,對我好重要架!」
「我諗多咗陣至答你啫,唔駛心急成咁吓嘛?佢索得咁交關,係人望過之後都好難會唔記得啦!」Siri 沒好氣地答,再靠向欄杆往下一指,指著旁邊一個房子的大門,道:「我見到佢同個男人入咗嗰邊嗰道門度呀。」
確定了阿 Kim 的位置,我才稍為舒一口氣。
Siri 見我即時放鬆的樣子,便擺出一副不齒的表情,道:「蝦,你都真係超級無敵勁花心架喎,之前同我講話最鍾意嗰個係男男,跟住就殺咗個網友姚甄梓綸出嚟,而家又多咗個又話對你好重要嘅女神!」
「哎吔,無時間啦!」我望一望錶,嚷道:「而家唔係爭論呢啲嘢嘅時候!」
Siri 當然懂分輕重,隨即認真地問:「咁你想我點做?」
「間房入便有兩條八婆搶咗我個銀包,仲收埋咗我張身分証同回鄉咭,你求其搵個藉口入去同我攞返啦。」我說出來時自己都覺得好笑。
「你放心,對付女人我最有辦法,一於包喺我身上!」Siri 充滿自信的答,再反問:「咁你呢?」
我深呼吸一下,道:「我而家就落去你頭先指嗰間房度,救我女神。」
接下來,我和 Siri 便分頭行事。
我沿樓梯走回到地面,就衝進人山人海的庭院中力爭上游,這裡比起之前來的時候差別實在太大,震耳欲聾的音樂配合著黑暗中亂閃亂射的燈光和激光,稍一不堅定前進的目標,就很容易在群眾中迷失方向,我鎖定了阿 Kim 身處那房子的位置,幾經辛苦,終於穿過人堆「游」到剛才 Siri 指著的門口。
這大門跟我們樓上廂房的門大得多,紅色的對開門上鑄著密密麻麻的金色門釘,旁邊磚牆掛著的顯示屏寫著四個英文字 -「VVIP」。
任何人都可以看得出,這間必定是「日與夜」裡最尊貴、最高級的貴賓廂房。
我吞一吞口水,對自己說了句「死就死啦」,便推門入去。