【願玫瑰在君子的屍體上盛放】《誤上了黑幫老大的情婦，我只好躲在中環的職場胡混》- 第四季：玫瑰篇

卡西有出書？

想問依家仲係4+1？ 講完學校先到第5季？

第一百五十八話：埋藏在校園下的秘密

大概眾人因為在石門前談論案情都待了不少時間，早已適應了四周的環境，現在即使要踏進一個未知的石室中，但大家已表現得沒有之前那麼害怕。

在我的探險隊伍當中，最勇敢的兩個成員必然是阿 Kim 和男男，不用多說她們也肯定會主動帶頭，雖然我只是虛有其表，但始終在這裡是唯一的男生代表，所以硬著頭皮我也要一馬當先做第一個衝入去的人。

石室裡面也是一個看不到盡頭的廣闊空間，但我卻感到這裡的空氣較外面侷促一點，或許這是個封閉密室的原故。幸好男男給我們每人都找來汽油燈，就不用再靠那快要油盡燈枯的打火機都可看到路，當其餘人等都一一進來後，我們便貼在一起小心謹慎地走著，隨著一步一步的前進，我卻留意到燈光照在石室的地上，偶然反射出閃閃的金光。

「咦，你哋見唔見地下好似有啲嘢閃令令呀？」我奇道。

Siri 蹲下來，執起一塊上手看，然後顫聲道：「係．．．．係金條嚟架！」

「吓！金條？」我大吃一驚，便拿去 Siri 手上的那塊檢查，一看在暗燈下仍發出金澄澄的光澤，果然是一條如假包換的金條，再高聲嚷道：「真係金條嚟呀！」

其餘的人聽到我這樣說，都趕快蹲在地上，想找出更多金條，可是在附近搜尋了一會，頂多只能多找到四、五條，而且全部都是破缺不全，沒有一條完整。

「『拔道』嘅秘密．．．．就係呢啲金條？」阿 Kim 以疑惑的語氣問。

男男倒抽一口涼氣，緩緩地道：「我諗呢個石室，原本係一個用嚟裝住呢啲金條嘅大夾萬，而『拔道』地底嘅秘密，就係呢個寶藏。」

「寶藏？唔好玩啦，呢度得嗰幾條，仲要又崩又無咁忽咁，我屋企求其打開個櫃桶都唔只咁啦！」Elise 失聲笑道。

「好明顯，所有金條喺我哋入嚟之前已經畀人搬走晒啦！」我歎道。

Elise 不屑地道：「哼！咁肯定係古校長啦！殺完人，仲攞埋個寶藏至著草，而家都唔知喺邊度風流快活緊啦！」

「但係，點解又會有個寶藏收埋喺間學校嘅地底度嘅？」Siri 不解的問。

「我．．．．我諗我知道呢啲金條嘅來歷。」Sandy 說罷，便拿起其中一條金條，向我們展示著刻在表面的一個長方形印章，上下兩個中文字寫著：「聖庫」

「聖庫？」我完全不明所以，只是照字讀了一次，再問：「咁即係咩呀？」

「『太平天國』時期實行一個將全國資源統一處理同分配嘅『聖庫制度』，喺呢個制度下，國民唔會擁有個人財產，老百姓若私藏金一兩或銀五兩以上通通都要問斬，所有一切皆為國家所有，而用嚟貯存全國財富嘅地方，就係『聖庫』。」Sandy 答。

「吓！咁個『聖庫』入面咪值好 Q 多錢！？」我脫口叫道，再追問：「咁究竟裡面有幾多啫？」

Sandy 搖搖頭，道：「歷史書上揣測咗唔同嘅數字，但係就無事實嘅基礎去支持，不過我相信肯定放咗多到難以置信嘅黃金。」

阿 Kim 忽問：「Sandy，你知唔知『太平天國』總共統治咗幾多年？佔中國嘅人口大約係幾多？」

Sandy 很快便回答：「『太平天國』1851 年建立，1864 年亡，統治咗十三年，控制中國南部大部分嘅地區，佔中國人口約 3,000 萬。」

阿 Kim 沉思了一會，再道：「我曾經睇過一本《世界經濟千年史》嘅書，作者叫安格斯麥迪森 (Angus Maddison)，佢喺書入面提到十九世紀嘅環球經濟同人口概況，當年中國嘅人均 GDP 大約係 200 美金，如果『太平天國』佔人口 3,000 萬，粗略估計『太平天國』嘅全年生產總值約為 60 億美金，咁十三年統治嘅生產總值總和就得出 780 億美金。

鑑於『太平天國』行『聖庫制度』，財富儲備高度集中，我哋就保守啲用世界上擁有相對比較高『總儲備與生產總值比率』嘅地方香港嘅 1.1 倍嚟計，『太平天國』十三年嘅總儲備總值價格總和就係 858 億美金，再套用十九世紀嘅金價兌換，每盎司黃金值 980 美金，即係約 3,456 萬美金可以兌到 1 吨黃金嚟計，我估計，『聖庫』嘅藏金量可高達 2,500 吨，同現時『國際貨幣基金組織』嘅黃金儲備相近。」

「二二二．．．．二千五百吨！？」眾人無一不驚呼著，我也驚歎阿 Kim 竟擁有如電腦一樣精密的心算和頭腦，她果然是我的老闆。

靜了好一會，Elise 忽然一臉困惑，道：「嗱，我哋唔好畀嗰二千五百吨金迷住先，我都有讀過下中史，我想問洪秀全明明係喺南京建立『太平天國』，仲定嗰度為首都改埋名做『天京』嘛，就算真係有個『聖庫』可以保存到今時今日，咁都應該喺南京至係架？無啦啦點會搬咗嚟咗香港嘅？」

「呢點我都唔明，其實我哋頭先未入呢個石室之前，我已經懷疑石門上嘅浮雕係屬於『太平天國』嘅符號，但係明明呢度係香港，我都唔敢肯定所以就無講到出嚟，直到我睇到金條上嘅印章，我就無可否認啦。」Sandy 頓了一頓，再道：「而根據歷史上嘅記錄，1864 年當由曾國藩、曾國荃兩兄弟率領嘅湘軍攻陷『天京』後，就下令屠城三日，又大肆洗掠天王府，可稱得上係挖地三尺，搜盡天朝宮殿入面所有財寶，連秘密埋喺後花園洪秀全嘅屍首都挖埋出嚟燒，都無發現到有咩金窖，所以『聖庫』裡面嘅藏金究竟去咗邊？一直都撲朔迷離，久而久之，就變成咗至今都未能解開嘅『太平天國』寶藏之謎！」

眾人的神色慢慢凝重起來。

Sandy 續道：「有關呢個寶藏嘅下落都傳有兩個唔同嘅講法，有啲人話被曾氏兄弟私吞咗，佢哋奏報同治帝話搜尋金庫別無所獲係講大話。又有啲人話其實喺『天京淪陷』之前、『天京事變』其間，翼王石達開逃離『天京』嘅時候已經將藏金運走，再喺所率領嘅太平軍覆滅於大渡河嘅前夕，收埋嗰度某隱秘處，當時石達開仲留有一張藏寶圖，上面寫有『面水靠山，寶藏其間』八字。」

「吓，就咁『面水靠山』就係線索嚟嗱？寫成咁不如唔好寫！」我啐道。

「雖然線索係得咁多，但仍然都吸引咗好多人去追查。」Sandy 回應我一句，再徐徐地道：「喺抗戰期間，國民黨四川省長劉湘曾經暗中派超過一千名工兵去尋寶，喺大渡河安順場一帶山坡進行挖掘，終於搵到三個相信係石達開軍隊建造嘅洞穴，劉湘鑿開咗兩個，可惜兩個裡面都無咩發現，到佢想鑿開第三個嘅時候，掘寶嘅事就畀蔣介石知道咗，蔣介石怕到真係畀劉湘搵到個寶藏時佢會獨吞，就以保護古物為理由阻止劉湘繼續挖掘，實情係蔣介石自己想奪取呢個寶藏，呢件事亦都令到劉湘同蔣介石關係變差嘅其中一個原因。

過咗無幾耐，即係 1937 年，劉湘就率領川軍出擊到前線抗日，不過喺同年嘅十一月佢突然患上急病，過咗兩個月後仲病逝埋，而蔣介石就秘密委派有『中國第一間諜』之稱嘅戴笠去繼續調查寶藏嘅事，當戴笠帶人想掘開第三個洞穴時，就發生咗一次大規模嘅山泥倒塌，連嗰度嘅地形地貌都產生咗巨變，戴笠等人無從下手，蔣介石知道後亦不得不放棄個尋寶計劃。」

我真的佩服得 Sandy 五體投地，她簡直就是一本會行會走的歷史書！

「雖然講就係咁講，不過其實我唔太相信呢兩個講法。」Sandy 聳一聳肩，又道：「頭先都估『聖庫』藏金有成二千五百吨咁多，試問咁大量嘅黃金，又點可能可以畀曾氏兄弟、又或者石達開話拎就咁易拎得走呀？」

「如果好似你咁講，唔通『聖庫』入面嘅黃金真係一早已經畀人運咗嚟呢度？」男男想了一想，再問：「但係會係邊個運啲金出嚟？佢嘅目的係咩呢？而我心目中最大嘅疑問係，連蔣介石都唔知，但係點解丁竣、古校長同埋『玫瑰會』會知道呢個寶藏原來係藏喺『拔道』嘅地底？」

眾人皆陷入一片寂靜之中，男男這些問題，現在當然是沒有答案。

我首先打破沉默，向眾人道：「我哋都未行晒呢個石室，不如我哋再搜索下，睇下再有咩發現啦？」

大家都同意我的提議，我們便再拿著汽油燈繼續向前行，誰料我一轉身一邊踏出數步，一邊回首叮囑大家要小心之際，自己卻踢在一塊巨石之上跌倒，汽油燈更從手中飛脫出來，「噹啷」一聲打爛在地上，並在殘骸處生起了一堆小火。

Siri 連忙扶我起身，道：「哎吔，乜你叫人小心，自己反而咁唔小心架，睇路嘛！」

男男提著汽油燈，檢查那塊絆倒我的巨石，然後嚷道：「喂，你哋嚟睇吓！」

我站起來後，隨手拍一拍沾在褲子上的塵埃，便走到男男的身旁一望，才見那巨石原來是一塊石碑，上面刻著一段文字。

內容如下：

＊＊＊＊＊＊＊＊＊＊＊＊＊＊＊＊＊＊＊＊

天下本是天父上主皇上帝一大家，惟天王早違其衷，致舉國敗壞，神人共憤，天京將亡乃定數，不勝悲哉，吾立此庫作創聖之用，凡洪家子孫，恪守救世覺世醒世之道，宏揚愛民教民養民之德，奉三尺斬妖劍攘除奸凶，從此一片光明，天下共享太平，吾族世世代代，謹遵此訓。

＊＊＊＊＊＊＊＊＊＊＊＊＊＊＊＊＊＊＊＊


Sandy 看罷，連續點頭幾下，再道：「我應該估到，由『聖庫』運啲金嚟呢度係邊個嘅意思。」

（待續）

有文

推

就係因為無，所以至喺度自high

一出即買

好正
如果出密d 就好

家陣都係諗到邊寫到邊，劇情連貫性甚高，所以都仲係4+1季，直至另行通知

卡西 有冇男男示意圖

如果呢個故出書 一定會買

呢段好好睇

第七十七話安全帶效應咪係男男做封面囉，係講述龍雲海喪禮後，男男上卡西架波子，扣安全帶時嚇親卡西嘅經過

重溫隨意門👇🏼
https://iamkasai4.com/2019/10/09/%e7%ac%ac%e4%b8%83%e5%8d%81%e4%b8%83%e8%a9%b1%ef%bc%9a%e5%ae%89%e5%85%a8%e5%b8%b6%e6%95%88%e6%87%89/#more-819

唔係正面黎既

啱啱寫好新一集，不過仲要做校對，一陣晏少少出文

呢排出文多左喎

第一百五十九話：石碑上的祖訓



我大吃一驚，張大了嘴，道：「吓！我連呢堆字講乜都未睇得明喎，你竟然已經估到係邊個運啲金條嚟呢度收埋嘅？」

Sandy 點一點頭，再道：「洪秀全喺家鄉有個細佢九歲嘅族弟叫洪仁玕，兩個人同宗、同村、亦都係同事，因為佢哋都係屢次科舉落榜就走咗去教書，所以雖然血緣關係比較疏，但係佢哋嘅感情從小就已經好好，洪仁玕喺好多事上都睇洪秀全呢個族兄做頭，到 1843 年洪秀全自認係上帝嘅幼子、受上帝之命下凡斬妖同佢開始創立『拜上帝會』傳教嘅時候，最初嗰三個信徒就係李敬芳、馮雲山同埋呢個族弟。

之後，喺 1845 年至 1846 年間，洪秀全寫下《原道救世訓》、《原道覺世訓》、《原道醒世訓》等嘅文獻，『三訓』跟住編入《太平詔書》，對後來『太平天國』革命動員、組織人民推翻清朝統治起咗極其重要嘅作用。」

Siri 目光轉動，問：「咦，呢『三訓』咪喺石碑上嘅一句『恪守救世覺世醒世之道』入面有提過架？」

「無錯，除咗『三訓』之外，當年洪秀全感召嘅時候，仲搵咗一個著名嘅鐵匠幫佢哋鑄造咗兩把各長三尺嘅『斬妖劍』佩戴在身，正正就係另一句『奉三尺斬妖劍攘除奸凶』入面所提到，所以『三訓』同『斬妖劍』就代表咗洪秀全建立『太平天國』嘅初衷嘅象徵。」Sandy 頓了一頓，再道：「喺『拜上帝會』發展嘅初期，洪仁玕因為要照顧年紀老邁嘅母親，所以無一開始就跟隨洪秀全同馮雲山佢哋去廣西，直到 1850 年爆發『金田起義』，洪仁玕因為要逃避清朝嘅追捕，就喺基督徒嘅掩護下走落嚟香港，投靠瑞典傳教士韓山文，令佢有機會學習西方嘅文化。

之後，洪仁玕得悉洪秀全喺『天京』建立咗『太平天國』，而且國力蒸蒸日上，佢就千方百計想要上『天京』搵佢呢個族兄，但係中間經歷咗好多波折，幾經辛苦，一直去到 1858 年，洪仁玕至終於可以嚟到『天京』見到洪秀全，但當時不單只馮雲山已死，亦都發生咗『天京之變』，『太平天國』由盛轉衰，內訌不斷，雖然洪秀全仍然好欣賞洪仁玕具有西方嘅知識，除咗封佢為軍師，仲好支持佢所提出嘅《資政新篇》以推動『太平天國』進行大改革，希望藉此挽救『太平天國』，之不過天朝其他大臣就對洪仁玕未立寸功而獲封感到大為不滿，而洪仁玕雖然係軍師，實際上都只係有名無實，加上當時『太平天國』已經缺乏客觀條件可以畀佢推行《資政新篇》入面嘅主張，最終，一份關乎『太平天國』生死存亡嘅《資政新篇》，全部建議都無落實到，洪秀全話要認真改革，都係得個講字。

就係咁，『太平天國』一直腐敗落去，去到 1862 年，太平軍屢吃敗仗，湘軍重重包圍『天京』，苦苦死守咗兩年，喺糧食短缺嘅情況下，洪秀全以野草充飢後病逝，洪秀全死後『天京』就旋即淪陷，洪仁玕帶同幼天王出走，清兵窮追不捨終於喺江西被俘，最後，就喺南昌被沈葆楨凌遲處死，臨斷氣前仲講咗句：『我國雖消逝，他日必復生』。」

我想了一想，再問：「你將呢段歷史講出嚟嘅意思．．．．係想話洪仁玕就係嗰個將『聖庫』入面嘅金條運走嘅人？但係佢唔係一直喺『天京』做軍師架咩？」

Sandy 徐徐地道：「當中細節我固然仲未諗得通，但係我相信最開初喺洪秀全成立『拜上帝會』嘅時候，洪仁玕係被洪秀全想創造一個神聖同平等嘅新國度嘅理想所深深感動，所以當佢流落香港，佢一直都好想上『天京』同洪秀全共謀大事，以實踐昔日嘅『創聖宣言』。

而事實上，洪仁玕亦為此不斷努力裝備自己，從不同外藉傳教士身上學到好多具前瞻性嘅西方思想同哲學，從佢後來撰寫嘅《資政新篇》中涉及多個領域，例如喺政治上，佢提出以法治國、同直選政府官員等初步民主法制思想；喺經濟上，佢提倡發展工商業同保險事業；喺文化思想上，佢反對迷信同建議新式教育；喺外交上，佢主張自由往來、平等互利等等，呢啲內容，比起後來清廷嘅『洋務運動』同『戊戌維新』更加徹底同全面，係公認喺中國近代史上最早提出發展資本主義社會嘅行動綱領，就睇得出佢卓越嘅見識同崇高嘅視野。

就連佢嘅敵方曾國藩嘅重要幕僚趙烈文睇過後亦讚賞，話：『觀此一書，則賊中不為無人』。而有唔少嘅歷史學家都認為，如果當時清政府有正視到呢份《資政新篇》，相信可以挽救到腐朽嘅晚清朝廷。」

「既然洪仁玕係一個擁有咁高尚情操同理想嘅人，我諗一心想大幹一番事業嘅佢當去到『天京』之後，睇到『太平天國』呢個爛攤，應該會感到非常失望。」Siri 歎道。

Sandy 點頭「嗯」了一聲，又道：「『聖庫制度』本來旨在建立一個人人平等、無分彼此嘅體系，但係到『太平天國』嘅後期已經名存實亡，而洪秀全立國後亦都早就脫離民眾，避居『天王府』十年未出，佢為人亦都變得充滿戒心，外姓人一律不得擅自進入『天王府』，而『聖庫』入面嘅財富就自然畀佢用嚟打造佢嘅私人天堂，根據《江南春夢筆記》所記錄，洪秀全嘅妃嬪共 1,200 人，鑑於『天王府』中不設太監，府中所有事務均由所謂嘅『女官』負責，呢啲『女官』又有 1,200 人，所以『天王府』內嘅女人總人數就多達 2,400 人，全部都淨係服侍洪秀全一個。」

我脫口驚呼：「嘩！有成二千幾條女咁多？一個人點玩呀！？」

男男撇一撇嘴兒，嘲笑道：「畀卡西你實玩得晒啦！」

我「哼」了一聲，再道：「咁好明顯係洪仁玕嚟到『天京』睇到洪秀全走晒樣，已經唔係自己以前所認識嘅族兄嚟，亦都深知『太平天國』沒藥可救，如要繼續走『創聖』之路只能另起爐灶，咪利用佢自己係天王族弟嘅身分同洪秀全對佢嘅信任，自由出入『天王府』就暗中將『聖庫』入面嘅黃金逐啲逐啲運走，所以佢臨死前仲可以口響響咁講句『我國雖消逝，他日必復生』囉。」

Elise 忙道：「係呀係呀，咁亦都符合石碑上嗰句『吾立此庫作創聖之用』嘅意思呀！」

隔了半晌，阿 Kim 以疑惑的語氣，問：「之不過，我唔相信得洪仁玕一個人能夠做到咁多嘢，當時天朝上上下下又一片敗壞不堪，仲有咩人可以幫佢手呢？」

「呢個就係我最未諗得通嘅地方，因為要進行呢個秘密計劃，肯定要有信得過而又擁有相同理念嘅人去裡應外合至有可能成事。」Sandy 走到石碑前，指著「洪家子孫」四字，又道：「歷史書無記載洪仁玕有無結婚、或者有無後嗣，但係塊石碑刻得出嚟又放得喺度，我相信呢塊石碑係洪仁玕親手所立，目的係提醒幫佢手執行任務嘅人，時時刻刻都要緊記住佢嘅訓示，要引以為鑑『太平天國』嘅失敗，石碑最後更竪立喺呢個『創聖金庫』之中，係警惕佢嘅後人呢度嘅每一分每一毫，都要用喺『宏揚愛民教民養民之德』之上，所以，暫時我估負責喺『天京』接應洪仁玕運出嚟嘅黃金，應該會係佢嘅私生子或者義子，都會係姓洪嘅。」

Elise 聽罷，忽然吐出了一句「姓洪嘅？」，再吞一吞口水，沉聲道：「其實成件事解釋到呢個地步，大家都應該好清楚『拔道書院』起嚟係為咗掩飾呢個『創聖金庫』，同埋用嚟履行『傳教』同『教民』呢兩點祖訓，如果你話幫洪仁玕運金落嚟嘅人都係姓洪，我就有理由相信，『拔道』嘅創辦人孔拔才同孔道才兩兄弟本來應該就係姓『洪』，只係佢哋為咗掩人耳目，至改姓做讀音相近嘅『孔』，最重要係喺英文拼音上，『洪』同『孔』都係 Hung 一樣串法，你哋覺得會唔會係咁？」

我大力地點頭，道：「我覺得好有機會，而當時一齊創校嘅其餘六位校董，好可能就係洪仁玕喺香港時識落嘅有志之士。」

半晌，Elise 歎一口氣，再道：「真係估唔到我林家祖先原來同『太平天國』嘅洪仁玕係有咁嘅淵源！」

我伸一伸懶腰，又道：「咁睇嚟石碑上有需要拆解嘅句子都解晒啦。」

「未，我睇應該仲有一句。」男男說罷，便從腰間拿出一把長長的「螺絲批」，然後往石碑頭頂插去，我見狀完全不解男男此舉之原因，心想這塊石碑堅硬無比，區區「螺絲批」又怎可能會插得進去，但只聽見清脆的「軋吱」一聲，那「螺絲批」竟真的全枝都插了入石碑之中。

在我正訝異地看著眼前所見的事情之際，更令我震驚的情況隨即發生。

突然，整個石室傳來鋪天蓋地「格格格格」機關運作的聲音，不消一會，本應漆黑一片的四周就點起了數盞火光，照得整個石室當堂光亮了不少。

我雙眼睜得老大瞪著男男，顫聲問：「你．．．．你點知會有個咁嘅機關架？」

男男笑了一笑，道：「咁我見嗰句『奉三尺斬妖劍攘除奸凶』後面嘅『從此一片光明』好似有啲寓意咁，跟住我又留意到石碑頂有一條收口平滑嘅縫隙，就估呢個位可能本來就係插住把『斬妖劍』，咪試下篤把螺絲批入個窿度囉，點知真係可以啟動到裡面啲機關點著啲火把喎。」

男男真的擁有超乎想像的觀察力和異於常人的敏銳觸覺！

Elise 一邊檢查著那條縫隙，一邊不屑地道：「哼，而家石碑上得返個窿，把『斬妖劍』就唔見咗，十成十係古校長佢攞鬼走埋啦！」

「喂，嗰邊好似有啲嘢喺地度喎。」阿 Kim 忽然指向遠處的另一邊道。

離遠看還以為只是一塊磚頭，走到過去方發現是一個長方體，我連忙執起查看著，這長方體手感有點重量，用顏色深沉的黃銅鑄造，應該是具有相當歷史的古物，長方體的六個表面都被分成均等可活動的一格格，看來有點像一粒加大版的扭計骰，但我試著扭又扭不動，反而按入去另一面對應的一格會微微凸出來。

「唔好呀！」Sandy 喝停我，我即時住手望著她，她再解釋道：「呢個長方體似乎係一個充滿機關嘅盒嚟，如果無正確嘅拆解方法而胡亂咁開，郁咗入面啲機關好可能就會消毁裝喺裡面嘅嘢架。」

我點一點頭表示理解，然後繼續檢查這個盒子，每一面和每一格都似是一模一樣，唯獨其中一面的中間則鑲有一塊正方形的琥珀石，或者這是代表盒子正面的記認吧？

我再捧近一點細看，發覺金黃通透的琥珀中原來藏有一朵小花，臉色陡然一變，驚道：「玫瑰！？」

Siri 聽我一叫，便慌忙地將盒子搶到手中一看，再舒一口氣，沒好氣地笑道：「咪係花就嗌玫瑰至得架？呢朵係一朵好迷你嘅鬱金香嚟架！」

「哦，係咩？」我賠笑了幾下，摸一摸自己的頭，再奇道：「乜又會有個咁古怪嘅『鬱金香盒子』喺度嘅，你估係咪都係喺『聖庫』度運嚟嘅寶物嚟嗱？」

眾人搖搖頭皆沒法回答，唯有各自各在發現盒子的附近繼續搜索一下，可是片刻還未過，就聽到 Sandy「呀」的一下尖叫，我們立即撲向她那邊圍在一起，便見到地上果然再找到異樣，不過這次放在地上的，竟然是一具倒臥的軀體。

Elise 看到之後，臉色變得如死灰一樣，駭然道：「古．．．．古校長？」

（待續）

書展週，應下節嘛

仲有冇

寫緊啦話咗會一氣呵成嘛，目標係聽日出文

好睇支持

好正，繼續努力