【願玫瑰在君子的屍體上盛放】《誤上了黑幫老大的情婦，我只好躲在中環的職場胡混》- 第四季：玫瑰篇

今日稍後會出文

第一百五十四話：情歸何處



憑著電郵上重設密碼的指令，我們取得新密碼並成功用 KS 的身分登入了「君子博」，發覺這個極其神秘的網站，原來裡面的版面一點都不陌生。

除了介面那藍色有點不一樣之外，「君子博」的 Layout 根本跟我們平常用的 Facebook 有八成相似，同樣有「News Feed Page」讓用戶得悉其他「君子」的動態，只是 Facebook 上看慣十居其九的無聊資訊，驟眼看這裡卻是字字珠璣。

既然「君子博」是資本世界中的「神」互通消息的地方，出自「祂們」的口都是市場上和政壇上尚未發生、但將會發生的「預言」，對於極大部分的一般人來說，這一頁簡直就是「發達天書」！

「估唔到呢班喺金字塔頂尖嘅『君子』都咁得閒，自己圍內整個 Facebook 自己玩都有嘅？」Siri 笑道。

阿 Kim 解釋道：「你有無聽過一位前美國總統講過，『Being President is like being the groundskeeper in a cemetery: there are a lot of people under you, but none of them are listening』，意思係當你成為咗一個體制嘅最高領袖時，喺你下面嘅人都只會遷就你、奉承你，無一個人敢反你、亦都無一個人會同你講真心說話，所以我可以想像到喺金字塔頂尖嘅『君子』平時會有幾咁寂莫，而呢個『君子博』正正就係一處可以畀佢哋暢所欲言、同交朋結友嘅地方。」

阿 Kim 生於顯赫的韓國財閥家族，現在又是位高權重的 MD，對於這種「高處不勝寒」的感受，她亦肯定有很深刻的體會。

在我嘗試將眼前「News Feed Page」上一字千金的資訊不斷塞入腦袋之際，阿 Kim 已無情地按著「Inbox」的 Tag，屏幕便跳到 KS 在「君子博」的私人郵箱裡。

真是可恨，手機的操控權在阿 Kim 手上！

KS 的私人郵箱中，大部分都是不同會員聚會的請柬，不算是十分特別，唯有置頂的一封，Subject 用粗體寫著：「紳士禮 － 申請接納書」吸住了我們三人的眼球，阿 Kim 連忙打開來看。

信中短短的內容，闡述就 KS 之前提交報名參與「紳士禮」的申請，現在終於通過評估，並得到「中央君子委員會」的正式接納，申請者可在此函發出的十四天內進行確認參加，確認方法就是按信末的「Accept」鍵，逾期仍未確認的申請者均當作自願棄權。

阿 Kim 將屏幕往下一 scroll，我們很快便找到那個「Accept」鍵，但鍵下面還有一串數字正逐秒逐秒倒數著，再望真一點，這串數字顯然就是時計來，現在顯示只剩低五分鐘的時間。

原來我們打開此信的一刻，竟然剛好是十四天限期內的最後五分鐘！

限期一到，這封有如「紳士禮」入場券的請柬便會變成廢紙！！

「你哋睇下！限期仲有唔夠五分鐘咋！」Siri 當堂驚慌失措，緊張的叫道：「咁點呀？撳唔撳呀？」

我提高聲線，即時反問：「撳？撳鬼撳馬咩！KS 又唔係度，accept 咗邊鬼個去呀？」

阿 Kim 一言不發的盯著屏幕，帶輕微抖震的拇指頭離「Accept」鍵不到半厘米的距離，介乎想按和未按之間。

隔了半晌，Siri 忽然指著我，嚷道：「喂！你咪 KS 囉！你可以用 KS 嘅身分去『拔道』教書，點解你唔可以用 KS 嘅身分去『紳士禮』呀？」

「你講咩話？你話卡西佢用 Karl 嘅身分教書？」阿 Kim 急急質問 Siri。

Siri 則催促著阿 Kim，道：「無時間啦，你撳咗先再同你解釋啦！」

我知道阿 Kim 心裡本來已是想按下去的，經 Siri 一說拇指頭還不立即壓在「Accept」鍵之上？

阿 Kim 按鍵後，那倒數時計便停頓下來，然後換成了一句：「確認成功！有關詳情會稍後發送到閣下的私人郵箱，敬請留意。」

阿 Kim 放低手機，問：「咩用 Karl 嘅身分呀？你哋可以講究竟發生啲咩事未？」

事情已發展到如此地步，我亦好應該對阿 Kim 坦白，便將我因「萬家傳愛基金會」的 Tender 而去巴結 Angie，接著為了讓她兒子可以繼續在「拔道」升學，就中了校長和校董的圈套，更糊裡糊塗用了 KS 的身分在「拔道」做代班主任，與及校董會和「靜思維學會」裡的所見所聞簡略地說了一遍。

「哈哈哈，卡西你唔係吓嘛？你竟然為咗基金會單 Tender 搞咗咁多嘢出嚟！？」阿 Kim 聽罷捧腹大笑，再道：「我一直以嚟都以為你只係『符碌』，實情原來你喺背後咁落力架？咁我都算係無升錯你喎！」

阿 Kim 這句既諷刺、又帶有讚賞的說話，我真不知如何反應。

但無論是甚麼原因都好，能夠令阿 Kim 開懷大笑，我應該感到慶幸和欣慰吧？

「咁講法，『靜思維』本來就係『四大黨鞭』之一嘅霍老創出嚟用嚟包裝『性修行』，『玫瑰』喺『拔道』搞『靜思維』．．．．」Siri 一邊推理，一邊問：「會唔會係一個『玫瑰』想用『靜思維』嘅渠道埋霍老身嘅跡象呢？你知『君子黨』高級會員從來都係佢哋嘅目標，呢個霍老仲係『四大黨鞭』嚟添？」

我搖頭歎道：「『玫瑰會』利用『靜思維』奪取校董會嘅主導權，但係佢哋混入『拔道』嘅真正目的係乜我真係估唔到，不過我都幾肯定唔會係你講咁樣，因為只有『覺知者』至可以有機會代表學校參加『國際靜思維協會』嘅『靈量大會』，『覺知者』嘅人選已經夠晒難搵架啦，去到進行『靜思維』嗰陣又會被催眠，真係埋得到身都唔知可以做到啲乜呀。」

這個時候，放在茶几的手機響了一聲，阿 Kim 拿起來，便見 KS 的私人郵箱中多了一個新訊息，打開來看，是有關來次「紳士禮」的詳情，包括將會在兩個月後於中歐斯洛伐克舉行。

我一看，好像觸動了甚麼似的，隨即拿出自己手機，翻查學校郵箱的記錄，發覺 Isabella 將會以「覺知者」身分參加的「靈量大會」之舉辦國家也是斯洛伐克，而舉行時間亦在「紳士禮」的期間內發生。

那麼，「靜協」的「靈量大會」，就是「紳士禮」中的「色」之考核！？

我將這事情說出來後，Siri 便大力地拍了我肩膊一下，再笑道：「所以去『紳士禮』仲唔非你莫屬？KS 都講到明『酒、色、財、氣』中以『色』最困難，未計你有超人一般嘅性能力，你亦係唯一一個曾經以清醒狀態親眼 witness 過成個『靜思維』過程嘅人，今鋪你實攞晒彩啦！」

Siri 忽然在阿 Kim 面前高談闊論著我的性能力，惹得我當堂一臉尷尬，心卻想到有親眼看過「靜思維」整個過程的人，除咗我之外，其實還有古校長罷了。

阿 Kim 見我面有難色，便一眼不眨的望著我，正色地道：「卡西，雖然我已經好努力咁學做一個雙性戀者，但係我明白到喺食女嚟講，女人始終都係無辦法可以同男人相題並論，而我亦都知道你喺呢方面嘅天賦，所以我懇求你，希望你除咗用你嘅能力，幫我將公司隻『玫瑰』抽出嚟之外，你仲要成為『紳士』，咁至可以借『騎士圓桌會議』嘅機會，接近『君子黨』嘅核心，因為唔係咁做，我哋係絕對查唔出 Karl 嘅死因同究竟係邊個害死佢．．．．」說到這裡，她還緊握我的手，再柔聲問：「你會幫我架呵？」

我在女神面前已經是「零」反抗能力，尤其當我被她一雙柔若無骨的手捉實時，她叫我去死，我也肯定會毫不猶豫地去照做。

唯一令我感到困惑的是，女神竟要我去幫她「食女」！？

起初我為了把錯誤萌生在男男身上的情愫「撥亂反正」，便索性將全副感情投放在阿 Kim 那邊，直至等到我倆的關係終於有著突破性發展時，誰料如今又變成一對定位畸形的合作夥伴。

為甚麼我的情路是如此的百轉千回呢？

突然，我手機響起打斷了我的思潮，拿起來接通後，來電者竟然是 Elise，問：「喂，卡西，乜你個電話響成咁嘅？你唔喺香港呀？」

我答：「喂 Elise，公司派咗我去成都開會嘛，你搵我咩事呀？」上次 Elise 在離開會議室時說過不會再插手「拔道」的事，她找我不為公事，想必就只為了和小卡西聚舊吧？在我這個情感無處可歸的時候打來，真是合時！

Elise 卻回應：「係關於古校長。」

（待續）

推呀
卡西要做君子啦

舊讀者留名, 上次睇完第一季就無追, 原來已經到左第4季

推。

Long time no see寫到呢度連我自己都覺得難以置信，多謝你繼續支持

唔係2, 4出文咩? 琴晚等左成晚都冇文

#572
作者可以考慮pin翻

入主線之前真係要重新睇多次先搞清楚講乜

第四季完咗喇，而家係4+1季，因為緊接連載嘅關係，只好諗一集寫一集就po一集，我希望可以維持一週最少po到一集啦

咁樣講係咪冇機會食呀kim喇

我只可以講，每個喺故事中出現嘅女角，卡西都係會有機會食嘅

卡西哥回我喇
你個故真係好好睇

好開心你覺得呢個故好睇，因為我都真係花咗好多心機去鋪排成個劇情，卡西嘅成都之旅即將結束，如無意外下一集可望七一前推出，謝謝

我都係由一星期五集追到一星期冇一集既忠心讀者黎架

好耐都冇試過脫褲睇故喇

最緊要食到kim

第一百五十五話：以真相作補償



知道自己會錯意後，便以不屑的語氣，反問：「古校長？你唔係同佢反咗面啦咩？同埋你咪話過唔再理學校啲嘢嘛？仲打嚟講佢做乜？」

「哎吔，我真係諗住唔理架啦，之不過幾日前，我忽然收到古校長一個好古怪嘅 Email．．．．我．．．．我猶豫咗好耐，始終都放唔低，至打嚟同你商量下咋。」Elise 歎道，聽得出這 Email 已困擾她一段時間了。

「佢個 Email 有咩講？」我追問。

「我而家 forward 畀你睇吓啦。」Elise 說罷，半晌之後，手中的手機便震了一震，我知道是 Elise 已把古校長的 Email 發過來，就將聽筒移離開耳朵，並按下 Speakerphone，讓我可以不掛線都能看到屏幕上的訊息。

Email 的內容如下：

＊＊＊＊＊＊＊＊＊＊＊＊＊＊＊＊＊＊＊＊

胡太，我一直欠你一句「對不起」，因為我利用了你，但請相信我，我是沒有惡意的。

本來這句「對不起」我是想親口跟你說，但現在看來不能了，因為我很快就要離開這裡，而你將永遠也再不會見到我。

最後，我只有將「拔道」的秘密告訴你：

22.264005
114.158686
245.587468

＊＊＊＊＊＊＊＊＊＊＊＊＊＊＊＊＊＊＊＊


Siri 看過後，忍不住吐了一句：「最尾嗰啲數字係．．．．？」

「邊個喺度講嘢呀？乜仲有其他人喺度咩？」Elise 聽見不是我的聲音在說話，不禁慌張地問。

「Elise，你呢個係咩態度嚟呀？乜『高跟黨』嘅普通 Member 同執事咁講嘢架咩？」Siri 冷冷的責問。

「吓？乜原來係執事大人喺度呀？」Elise 驚呼著。

Siri 即時提高嗓子，嘲笑道：「嘿，執事同內侍一齊，駛唔駛要你批准呀？」

「唔敢唔敢，有執事大人喺度仲好啦！」Elise 連忙賠笑道，看來雖然 Siri 外表是個甜美可人的少女，但在「高跟黨」中地位超然只僅次於夫人，連甚有社會地位的名媛 Elise 亦對她又敬又畏已可見一斑。

另一邊廂，阿 Kim 則忽然指著 Notebook 的顯示屏，叫道：「你哋睇吓。」

Elise 這次已學乖了，即使聽到有第三把聲線亦不敢再多問，而我跟 Siri 就立刻朝著 Notebook 的位置望去，驟眼看顯示屏上是一張太平山頂的地圖，再看真一點，原來阿 Kim 將古校長 Email 中最尾那三組數字的頭兩組輸入到 Google Map 中，Drop Pin 就釘住了「拔道書院」旁的一塊空地。

「古校長 send 出嚟嗰啲數字，原來係地圖嘅座標嚟喎！」我脫口嚷道。

「地圖嘅座標？咁個位置喺邊呀？」Elise 急急追問。

我將地圖放大，細心觀察了一會，再道：「係『拔道』旁邊嘅一塊空地，依我所睇，呢個位置正正就係校園擴建工程嘅地盤範圍裡面！」

「三組數字，我哋只係輸入咗兩組，咁仲有一組係代表咩？」Siri 問。

「如果無估錯，應該係指海拔。」阿 Kim 吞一吞口水，再道：「睇返個地形，『拔道』個位係坐立喺大約高 300 米嘅山勢之上，以第三組數字 245 米嚟計，古校長講嗰個位，就差唔多係喺學校 60 米嘅地底，深度足足有成二十層樓呀！」

「吓！？『拔道』點會有個咁深嘅地牢呀？古．．．．古校長佢曾經出賣過我，佢今次慌唔係又畀個『氹』我踩啦！？」Elise 語帶質疑地道。

「我同古校長之前為咗調查『靜思維學會』嘅活動，曾經試過經通風管道潛入學校嘅地底，嗰度真係有一個規模好大嘅地牢，之不過，上次我哋只係去咗其中一小部分，古校長仲有提及過個地牢係佢曾祖父幫日軍興建，係用作囚禁俘虜嘅地方。」我頓了一頓，再沉聲道：「不過我相信古校長當時無將所有嘅事實講晒出嚟，所以佢今次放料，應該係因為佢已經達到咗佢嘅目的，喺臨離開之前，就將成個真相講出嚟，作為對被佢利用咗嘅你一種補償。」

「咁即係，成件事嘅真相，就會喺古校長留畀我嗰個座標嘅地牢入面？」Elise 顫抖的問。

「無錯！」我斬釘截鐵地答。

「吓！要我自己一個人去，我寧願永遠都唔知個真相呀！」Elise「哇哇」大叫，再失聲嚷道：「我唔理呀，你哋要陪埋我去呀！」

我怎會錯過這可以揭開「拔道」秘密之機會，本來也想跟 Elise 說會隨她一起去，阿 Kim 卻還比我搶先一步，對著手機朗聲道：「好！我哋會盡快返嚟香港，你預今晚就落去古校長講嗰個位置啦！」

「今．．．．今晚咁快？」Elise 反被阿 Kim 急進的氣勢嚇了一嚇。

「總之我哋一落機就通知你，你怕嘅話你就唔好嚟喇，係咁！」阿 Kim 說罷就立即掛線。

跟 Elise 的通話完畢後，我便好奇地問阿 Kim，道：「阿 Kim，『拔道』呢壇嘢係我搞出嚟，加上頭先你都有聽到，其實 Siri、Elise 同我都係屬於一個同『玫瑰會』對抗叫『高跟黨』嘅地下組織，照計你無必要同我哋去冒險架喎？」

「我唔理你哋私下係咩黨咩派，而家我眼中就只有『玫瑰會』同『君子黨』，任何同佢哋有關嘅線索我都唔會放過，古校長放出嚟呢個座標好可能可以解開『玫瑰會』點解要混入『拔道』之謎，話唔定會同 Karl 嘅死有關，我點會袖手旁觀？」阿 Kim 關掉面前的 Notebook，再發號施令，道：「我返房執嘢，你過去睇下 Sandy 起身未？我哋約半個鐘後喺 Lobby check out，跟住就即卡去機場睇下有咩機返香港！」

阿 Kim 果然是快人快語，又坐言起行，完全具備了成功人士的特質。

或者，這是因為阿 Kim 自小在家中接受她爺爺金陽的軍訓有關。

我去拍 Sandy 的房門時才把她弄醒，幸好她不是一個太「姿整」的人，半個小時後總算可以在酒店大堂跟我們集合出發去機場。

全靠阿 Kim 在航空公司中擁有最高級別的 Diamond Plus 會藉，我們四人終於可以趕上下一班最快起飛前往香港的航班，只可惜那班機的空位有限，阿 Kim 自己坐商務艙，我跟 Siri 和 Sandy 則要坐在經濟艙的機尾。

身為 VP 的我，這回真的是蝕了給公司，不過跟 Sandy 同坐卻令我想到，她主修歷史和考古應該會對我們尋幽探秘有幫助，所以，我便順道邀請她跟我們今晚一起去探險。

Sandy 竟然不多問一句，就一口答應我！

其實在登機時我已感到 Sandy 今天有點不對勁，往日在我面前呆滯木訥，今天對我的態度有著一百八十度轉變，除了不時用幽幽的眼神望實我之外，坐下時，她上半身猶如小綿羊般向我靠去，從手臂傳來被她胸前軟肉頂著的感覺，才發現這位我一直都沒有留意的女下屬，原來她的身材亦頗有「斤両」，難怪我的結拜兄長田伯通昨晚看中了她。

對於我的邀請，雖然以 Sandy 熱愛考古的程度，她的加入本是在我意料之內，但她連要去的地方也未知便答應，難道她真的不怕危險嗎？

誰料 Sandy 嫣然一笑，竟再以柔情似水的語氣，答道：「危險？比起你噚晚冒住生命危險都要入去田總間房將我救走，今晚無論去邊又算係啲乜嘢喎，總之你去到邊，我都跟住去邊架啦，嘻嘻。」

昨晚 Sandy 雖然爛醉如泥倒在梳化上，但原來她仍是有知覺的，所以便全程聽著我為了要帶「她」離開而跟田總鬥酒，還有最後我那句說出來連田總也被深深打動的「真情告白」！

坐在我旁邊的 Siri 當然留意到這狀況，更趁著 Sandy 去洗手間的時候，一邊笑得淚水直流，一邊挖苦我道：「嘿嘿，卡內侍你真係勁，又一條女衰喺你手上！」

這回我真的是百辭莫辯，而我又怎跟 Sandy 解釋其實一切都是因為我以為當時的「她」是阿 Kim 之原故呢？

飛機降落在香港已差不多是晚上六時，阿 Kim 一早吩咐了司機在機場守候並將大家的行李先送回公司，我們便可立即乘坐另一輛七人車出發前往「拔道書院」。

車程中，我聯絡上 Elise，當她知道會共有幾夥人一塊兒行動時，膽量都壯大起來，心情亦隨即放鬆了不少，還叮囑我們一定要在學校門口等她來到才一起進去。

我們好像一班在萬聖節要去鬼屋探險的頑童一樣。

（待續）

5p

卡西恨左好耐啦

難得坐一次坐機尾，咁都唔揾個同事甜下

要留返d精力一對四