【願玫瑰在君子的屍體上盛放】《誤上了黑幫老大的情婦，我只好躲在中環的職場胡混》- 第四季：玫瑰篇

仲努力緊，target聽日出文

加油

推

推

nice

第一百六十六話：自暴自棄的助手



一般咖啡有提神的作用，萬靈的咖啡卻令我越喝越累，在我數不清喝了多少杯之後，終於在房間的某一處昏睡過去。

不知睡了多久，陽光透過落地玻璃照得我臉上一陣暖意，我隔著眼皮都知道日已上了三竿，雖然如此，但我實在是太累所以不願起來，半夢半醒的又躺了好一會，直至被不知響了第幾次的 WhatsApp 訊號吵著，才懶洋洋地伸出手將放在旁邊的手機拿來一看。

未看之前只有三分醒，看罷便立刻彈了起身，還把伏在我胸膛熟睡的萬靈弄醒，她揉一揉惺忪的眼睛，迷糊地道：「幹嗎？有甚麼事？」

只見手機屏幕上顯示囤積起的幾十個訊息都是來自同一個 Group，這個 Group 叫「5Q1K 調查課」是由 Siri 開的，起初看見這 Group 名，第一感覺當然在想：「『5Q』都只係『1K』咁抵屌？」，之後當然才知道「5Q」是代表成員中五條「Queen」的男男、阿 Kim、Siri、Sandy、Elise 和一條「King」的我，主要用來 update 大家有關「創聖金庫」等「蹺蹊 (QK)」事情的調查進度，這 Group 的訊息往來一向甚為冷清，早在我 WhapsApp 的「聊天室」中沉了底，所以我都不以為意，今天竟忽然「發市」起來，原來是因為男男說有事要跟各位商量。

最要命，是男男竟然約大家在「四季酒店」的大堂集合！

我脫口罵了一句：「仆街啦，佢哋又會嚟呢度咁啱架？」

「你幹嗎那麼緊張，是誰要過來？」萬靈狡猾地笑了一下，追問：「是你女朋友、還是你老婆耶？」

「我呢啲人又邊會有女朋友架？」我自嘲了一句，再歎道：「不過嚟緊呢度嘅人仲大鑊，裡面有我老闆同同事，你知呢部𨋢一落到地下就對正個大堂，如果畀佢哋見到我仲著住噚日套衫，又喺酒店房度落嚟，一定瘀死！」

「哦，知道你昨天穿甚麼，原來是金小姐跟那個古董專家。」萬靈眼珠一轉，又問：「那她們約了你幾點？」

我望一望錶，答：「仲有十五分鐘左右啦。」

「那好辦，你乘這電梯到二樓 Grand Ballroom 那層，再用另外一邊的逃生樓梯回到地面，然後你就可以跑去旁邊的 IFC 買一套新的衣服，替換好你再趕回來赴約都可能只是遲到十數分鐘而已，那你的『好事』就可以不讓你公司的人知道！」萬靈神氣地笑道，她大概不知道其實我經常做的「好事」早已傳遍公司，但正所謂「寧畀人知、莫畀人見」，況且，從我剛才由心底裡表現出來的緊張，就發覺即使男男和阿 Kim 已不再將我放在心上，她們仍是我最大的死穴。

原來喝了一整晚的咖啡，心情是變好了，卻只是有舒緩的作用，並非可以將問題完全根治！

「辦法我已經告訴了你，現在輪到你欠我一個人情呢！」萬靈輕輕指一指我額頭笑道，可是當她看過自己的手機後，便忽然皺起眉頭來，急急罵道：「哎吔，原來我自己也有好幾十個未接來電，全都是榮焌亨打給我的！」

「咁你點呀？理唔理佢呀？」我問。

「好煩耶！我只想睡覺！」古靈精怪的萬靈又換過嘴臉，摟著我，嫵媚笑道：「除非．．．．你現在就想還我人情呢？嘿嘿。」

要還萬靈的「人情」也不急於一時，我快速地穿回自己的衣服後，便照她的建議乘電梯到二樓，當電梯門在二樓打開，我第一時間衝出去，竟然就跟男男和 Elise 撞過正著！

「卡西？我哋唔係約喺樓下大堂等架咩？你上咗嚟做咩？」Elise 奇道。

我「咳」了兩聲掩飾尷尬之色，再硬著頭皮道：「係．．．．係呀．．．．我頭先嚟到嗰陣心急得滯，一見有𨋢到就衝咗入嚟上咗上面，跟住至醒起大堂喺地下，而家咪落返去囉．．．．」

Elise 打量我一番，又問：「咦，今日係禮拜六喎，做乜執得咁『四正』呀，著晒西裝咁嘅？」

我裝出理直氣壯的樣子，答：「我．．．．我話晒都係金融公司嘅高層，就算係禮拜六都好，我著住套西裝喺中環出現有咩問題呢？」

「唓，我關心下你問多句啫，駛唔駛咁寸嘴呀？」Elise 不屑地道。

我反問：「係呢，咁你哋又上咗嚟嘅？」

「我嚟到時 Elise 已經喺度，見時間尚早咪一齊上去二樓視察一下環境先囉。」男男道。

在我不斷想辦法脫身的時候，電梯轉眼就到達地面，門一打開，就見阿 Kim 和 Sandy 已坐在大堂的梳化上恭候著，卻未見 Siri 的身影。

Sandy 看到我們，就主動的站起身打招呼，似乎經過一晚之後，她不再生我的氣了，但她很快就發現我身上的不妥，便疑惑地問：「咦，卡西，你做乜著返噚日嗰套衫嘅？」

經 Sandy 這樣一問，男男和 Elise 便立即向我投來怪異的目光。

我的計劃，徹底失敗了！

沒戲可唱的我老羞成怒，索性發爛地道：「係呀係呀，我噚晚心情唔好，飲大咗兩杯，跟咗個 Friend 嚟咗呢度，頭先啱啱訓醒至睇返啲 WhatsApp，你哋就話要喺度集合咯，咁我仲邊有時間換衫喎？你哋鍾意點講就點講啦！」

Elise 拍一拍我肩膊，忍著笑的道：「卡內侍，其實大家都好清楚你份人係點架啦，你又駛乜咁怕羞、喺我哋面前咁見外喎？」

Elise 說罷，竟然連 Sandy 也點點頭，表示認同。

阿 Kim 則如舊一副漫不經心的表情，徐徐地道：「萬董事長之前同我通電話時講過，話佢會同基金會嘅理事長嚟香港行下，當時董事長仲有問我有咩酒店介紹，我就 recommend 咗呢度畀佢，唔知你噚晚 stay 喺度嘅時候，有無撞到董事長、又或者理事長呢？」

聰明的阿 Kim 已將我在這裡過夜和萬氏兄妹下榻的地方這兩回事聯想到一起，她這樣問得出口又故意強調「理事長」，肯定已知道我口中的「Friend」就是萬靈了。

阿 Kim 猜到是萬靈不是最嚇人，最嚇人的是男男竟然亳無反應！

一直以來，每次當男男撞破我的鬼混，她定必對我發怒。

但此時，只聽到男男淡淡然地道：「時候都唔早，我哋不如入正題啦。」

在我心內充斥著一陣茫然和頹然之際，已被催促在梳化上坐下來。

之後，又聽到男男道：「根據我哋喺呢段時間對丁筳嘅觀察，佢係一個性格極之孤僻嘅人，基本上無乜朋友，亦唔覺佢有社交圈子，平日都係返大學講課同做研究，生活單調到我直頭可以用非常枯燥嚟形容。」

「原來你姐姐咁架，唔怪之得會咁變態啦！」Elise 脫口啐道。

「最近，我哋終於發現到丁筳有啲唔尋常嘅舉動，就係佢好似搵緊一粒珍珠，每當佢一有時間就會四出走訪唔同嘅珠寶店搜尋，我問返嗰啲珠寶店嘅店員，原來丁筳屋企有一件巨型嘅古董擺設，上面鑲住嘅其中一粒珍珠整爛咗，所以佢就想買返一粒裝返上去，但係就搵嚟搵去都搵唔啱，我唔知佢心目中想搵嘅珍珠係點，不過如果連大部分嘅珠寶店都搵唔到嘅話，我相信佢想要嘅肯定係一粒好罕有、好特別嘅珍珠。」男男頓了一頓，又道：「而我今日約大家嚟到呢度，係因為我啱啱查到呢度二樓嘅 Grand Ballroom 一陣間會舉辦一場拍賣會，其中一樣拍賣品，就係一粒直徑達 40 毫米嘅超巨型天然白珍珠，如果我無估錯到，丁筳應該會出現，因為佢要去兢投呢粒佢心目中想要嘅珍珠！」

不知道這心態是否出於一種「因愛成恨」，我竟忽然「嘿」的冷笑了一聲，再質問男男：「你話如果你無估錯？咁如果你真係估錯咗，丁筳無出現到咁點算呀？」

男男沒有即時回答我，卻先望一望自己手機的屏幕，才不慌不忙地道：「估當然會有機會估錯，不過得咁短時間調查，我無辦法唔從目標人物嘅習慣去推測佢下一步嘅行動以作先一步嘅部署，不過好好彩，我啱啱收到 Siri 嘅匯報，佢話丁筳啱啱喺屋企出咗車，正向住『四季酒店』嘅方向駛去。」

原來 Siri 沒有來是因為她仍要貼身跟蹤著丁筳，並要不時向男男報告，看來她們之間已建立出很好的默契。

大概，男男已不再需要我這個助手了。

「丁筳已經嚟緊呢度啦喎，咁我哋要點做呀？」Elise 緊張的問。

「既然丁筳咁想要嗰粒珍珠，我哋就要攞呢粒珍珠嚟做餌，因為呢粒珍珠隨時可以變成一張入丁家大門嘅通行証，除非佢唔想修復返嗰件古董。」男男轉頭向著阿 Kim，問：「如果我哋一陣間同丁筳爭呢粒珍珠，資金方面你有無辦法？」

阿 Kim 隨即拿起手機打了一個電話，跟對方說了幾句之後，掛線便答：「我而家暫時可以調到 500 萬美金嘅流動資金嚟用住先，如果畀多少少時間我，應該可以再有多啲。」

阿 Kim 果然厲害，只是通了一個數十秒的電話，就有差不多 $4,000 萬的港幣可以動用。

男男點一點頭，再道：「跟住就要睇下由邊個負責一陣喺拍賣會度舉手，因為爭贏咗之後，呢個人就要利用呢粒珍珠嚟埋丁筳身架啦。」

丁筳是一個歷史學教授，又聽到男男形容她為人孤僻、生活極之枯燥，所以心想她肯定不可能會跟「美女」拉得上任何關係，雖然是這樣，我內心的「因愛成恨」卻已迅速發展成「自暴自棄」，竟衝口而出，賭氣地道：「哼，正所謂『異性相吸』，唔駛問都知負責舉手同埋丁筳身嘅，唔係我卡西仲有邊個呀？」

（待續）

好鐘意卡西咁小朋友既一面
唔可以成日比男男同Kim食住
希望卡西可以轉變成食返住呢兩個女人

感覺上今集卡西小氣咗咁多嘅

俾男男搞到痴咗
不過都難怪男男唔理卡西，係男男眼中卡西就係個淨係識用下半身諗嘢嘅人

男男而家係咪俾siri攻略咗

用左幾日時間追到live
希望劇情唔好超展開到要上孖2姐

推

有冇文呢

當上半身只帶畀你唔開心，唯有寄情下半身

第一百六十七話：珍珠爭奪戰



男男默沉了半晌，莞爾一笑，才道：「連你自己都咁講就最好啦，我知你不褸對女人都特別有辦法，其實喺我未問出口之前，你一直都係我心目中最理想嘅人選，呢個任務都肯定非你莫屬架啦。」

我那樣說只是出於一時衝動，但原來男男根本也有這個意思，不禁令我感到奇怪，再想真一點，其實對女人有辦法的豈只得我一個，未計實力強得恐怖的 Siri，為了找出「川泓」中的「玫瑰」而投身雙性戀行列的阿 Kim 亦擁有豐富的溝女經驗，我剛才真的是大言不慚。

心水清的男男不可能不知道這些，仍偏偏選擇我的原因大概只有一個，就是要藉著丁筳來折磨我一番！

當 Sandy 知道我將要接近丁筳後，雖然清楚這是為了甚麼，卻顯出一臉難色，支支吾吾的問：「卡西，咁．．．．咁你會唔會．．．．同我姐姐上床架？」

「Sandy，我諗我有啲嘢真係要同你講清楚。」我將 Sandy 拉到一邊，再道：「成都嗰晚其實無論係邊一個同事出事，我都一定會訓晒身去救，幾多人嚟就要帶返幾多人走，呢個係我嘅原則，所以你唔駛因為咁而對我有啲咩特別嘅感激，此外，作為一個單身男士，我嘅私生活從來只需要向我自己負責，不過我可以同你講，我對我嘅對手唔會係無要求，而就算我嚟緊要接近你姐姐，都只係純粹為咗搵機會帶嗰個『鬱金香盒子』畀你婆婆睇架咋，你明唔明？」

我口裡雖這樣說，心裡則不屑地道：「Sandy 你咪咁天真啦，男男故意用你姐姐嚟整我架咋，你真係當我乜狗屎垃圾都會放入口咩？」

Sandy 聽罷，臉上稍為歡容一點，似乎未聽出我的潛台詞，便再問：「真嘅？」

「假一賠十！」我拍心口道，這句是 Sandy 曾用過來形容「真古董」的術語，此時用來哄她最適合不過。

跟 Sandy 說清楚後，走回大隊那邊時便立即問男男，道：「係呢，有無丁筳張相畀我睇下，等我有定心理準備先？」

男男清脆地笑了一聲，又道：「信唔過我幫你安排嘅任務咩？你攞到粒珍珠之後就有排你見啦，仲睇相嚟做乜？總之你而家首要係專心投嗰粒珍珠返嚟先啦！」

男男曾指派我去殯儀館的靈寢室伴著龍雲海的遺體，又借我身上馬則師弄成的傷勢安裝可監視我所見所聞的「第三隻眼」，我究竟憑甚麼可以再相信，她給我安排的任務不是以作弄我為本？

這次，男男竟連丁筳的相片也不願給我看，正所謂「有圖有真相」，肯定是她怕我看到「真相」後會立刻「縮沙」吧？

男男太狠毒了，可憐的我現在已經騎虎難下。

時候都差不多，我只好獨自前往二樓，這刻 Grand Ballroom 的門外已變得很熱鬧，當我朝著會場入口的方向走時，有幾位年輕亮麗、穿旗袍服的女職員主動跑過來替我登記，並分派一本場刊和一塊印有數字的白色長柄膠牌給我作出價之用，進場之後，又見裡面更人頭湧湧，處處衣香鬓影，能在「四季酒店」舉辦的拍賣會，在城中應該頗具來頭，今天亦似乎吸引了不少非富則貴的人士到場，兢投心目中所要的奇珍異品，難怪那些女職員對我那麼殷勤，肯定以為我也是他們的其中之一罷了。

我在後面較疏落的位置胡亂找個空位坐下，見拍賣會未開始，就翻著場刊打發時間，在最後一頁的最後一項終於找到我的目標，這粒巨大如乒乓球的天然白珍珠是上世紀在巴拿馬海灣發現，無論光澤和顏色方面都近乎完美，底價已高達 $50 萬美金，果然是壓軸出場的極品。

我手握著阿 Kim 比底價高出十倍的彈藥，要投得應該不是問題吧？

席間的天花燈忽然昏暗起來，令所有人的焦點放在台上，拍賣官便將第一件拍賣物品的資料放到大屏幕，再道：「歡迎各位嚟到『浮士德拍賣會』，第一樣要拍賣嘅物品，係『愛馬仕』特製亮面火紅鱷魚皮 25 公分『Kelly Bag』一個，底價 7 萬美金，每口價 5 千美金，有無客人有興趣？」

當場內的所有人漸漸投入到競投氣氛之中，突然有一個人閃身坐到我旁邊，再輕輕拍了我一下。

我轉頭一望，原來是 Siri。

Siri 驚奇的道：「男男真係叫咗你嚟呀？」

我盡量保持和顏悅色，反問：「你唔係跟蹤緊丁筳架咩？」

「我任務只需要確定丁筳佢會嚟呢個拍賣會度啫，而家佢都嚟咗啦。」Siri 頓了一頓，再道：「加上要喺丁筳身上刮嘅料都刮得七七八八，既然你係男男揀嘅人選，咁下一步就輪到你接力，去對目標人物進行更深入嘅調查啦。」

甚麼「輪到你接力」？甚麼「更深入」？這通通聽起來都十分「銀」耳，我實在無法再按捺下去，便發爛地道：「我要痴埋個丁筳度，你一定好開心啦！」

「我點解要開心呀？」Siri 訝異地問。

「而家駛走咗我，你咪有機會乘虛而入同男男一齊囉！」我加強語氣，再氣沖沖地問：「究竟夫人派你嚟係幫我手，抑或係嚟撬我條女架？」

面對著滿肚怒火的我，Siri 卻淡淡然的笑了一下，再反問：「你叫得我做 Siri，我嘅出現當然係為咗幫你，既然我知道你對男男嘅心意，試問我又點會敢打佢嘅主意呢？之不過，你哋始終係兩兄妹嚟，你係咪都應該要去學識接受，男男有朝一日都會同第二個人一齊呢？」

Siri 冷靜的回應，更顯得我的無理取鬧，她亦說得一點也無錯，我和男男是親兄妹，如果我接受不了男男會跟別人一起的現實，那麼，最後我就會連這個妹妹也會失去掉。

而 Siri 無緣無故變成我的「出氣袋」，竟仍可心平氣和的跟我說出這個重點來，身為男人的我之胸襟和量度與她相比，真的是相形見絀！

「你親眼見到嘅未必係事實，你睇唔到嘅亦未必無發生，如果知道咗都係無補於事，唔知道可能會係另一種幸福。」Siri 擺出一副若有所思的樣子，又說了一堆似明非明的「金句」出來。

這時，剛聽到拍賣官朗聲叫道：「好啦，終於都嚟到拍賣會嘅尾聲，最後一樣壓軸出場嘅物品，係一粒嚟自巴拿馬海灣、直徑達 40 毫米嘅天然巨型白珍珠，底價 50 萬美金，每口價 5 萬美金，有無客人願意出價？」

隨著拍賣官敲響枱面上的鐘聲，這場珍珠爭奪戰便立即展開，我先按兵不動觀察著四周，發覺兢投的情況比想像中熱烈，席間掀起一輪此起彼落的舉牌過後，叫價短時間內已衝破 100 萬美金，拍賣官更將每口價提升至 10 萬美金。

之後，我見大部分陪跑的人都陸續停了手，大約只剩下五、六名兢爭者還在湧躍地舉牌，我實在想知道丁筳會是當中的哪一位，便舉起牌來，高聲的叫出我第一口價：「300 萬！」

眾人聽到白珍珠的叫價忽然飆升了超過一倍，引起場內一陣譁然。

果然，兢投的節奏便立刻放慢下來，在拍賣官倒數到「第二次」時，遠在坐前排的一個黑影舉起牌，一把女聲字字鏗鏘的叫道：「310 萬！」

我知道，這個舉牌的黑影，就是丁筳。

因為這把嘹亮的聲線，不用來講課實在是太浪費了，剛好配合身為大學教授的丁筳所擁有。

這個時候，我的手機響了一下，是阿 Kim 在我們的 WhatsApp Group 中發出一條訊息，寫著：「可動用資金現提升到 1,000 萬美金，Good Luck！」

有了女神的額外資金和祝福，我真是名符其實的如有「神」助！

一直處於上風的我，瞬間更是氣勢如虹，我要在三口價之內，將這粒白珍珠變成囊中物！

「400 萬！」我爽快的舉牌叫道，反正錢又不是我的，我的豪氣卻惹來場內不少人報以仰慕目光，慷他人之慨的感覺真是痛快得很！

「4．．．．410 萬！」丁筳的這口叫價語氣已充滿著猶豫，我離遠都可看到她舉高的牌在顫抖著。

每次我將叫價大幅度提高，到丁筳承接時都只是輕微加上每口價下限的 $10 萬美金，任何人都可以看得出，她的資金應該已到了「彈盡糧絕」的地步。

從來拍賣都是以強凌弱的遊戲，看來不用第三口價，我下一口價就已經可以將丁筳收拾！

「500 萬！」我懶洋洋的舉起牌道。

我不知道丁筳實際上還有多少「彈藥」，這口價我很可能是叫貴了，但 500 萬都只是阿 Kim 說好可動用資金的一半而已，能贏得有霸氣一點，錢多花一點也是值得的！

這粒白珍珠能夠拍賣到比底價高出十倍的價錢，拍賣官似乎亦感到滿意，隨即巡例的叫著：「500 萬第一次、500 萬第二次、500 萬第．．．．」

未等拍賣官說完，突然，我身後傳來一把男聲，叫道：「2,000 萬！」

「嘩！」場內的所有人無一不驚呼起來。

我連忙回頭一望，我要知道是誰叫出這口天價！

叫價者就正正坐在我後面，看到我擰了過來，便送我一個皮笑肉不笑的笑容，再冷冷地道：「其實呢粒嘢我無用架，不過頭先我上去搵我女朋友時畀佢趕走咗，跟住落到嚟就見到你好似好想要呢粒嘢咁，既然你攞咗我要嘅嘢，我侷住都要攞返你要嘅嘢啦！」

拍賣是一個以強凌弱的遊戲，$2,000 萬美金比起我可以用的「彈藥」足足多了一倍，我完全沒有招架之力。

很快，拍賣官就數完三次，並用木鎚敲枱面一下，叫道：「成交！」

「蝦，望望下，呢粒嘢成個乒乓波咁，我就拎返去用嚟玩『Beer Pong』先，嘿嘿。」叫價者又笑道。

這個用 $2,000 萬美金買了一粒「乒乓球」來玩「Beer Pong」的人，正是榮焌亨！

（待續）

推, 有文了﹗

Manning係咪又要出動

係酒吧side bet先50萬港紙 宜家買粒冇用既野都去到20M美金

喺酒吧side bet時榮焌亨都未同卡西結怨，萬靈當時只係用卡西嚟激亨少，50萬玩鋪Beer Pong當助下興啫，到第二日亨少知道自己帽已戴，畀條女趕走咗喺酒店樓下就見返個經手人（要知道條女自己都未食），喺怒不可遏嘅情況下，佢火遮眼咁一心要報卡西嘅送帽之仇，即場喺卡西手上搶走嘅雖然唔係佢玩開但係始終都係珍品一件，以往大劉不時喺拍賣會上買珠寶首飾動輒上數億，屬首富家族成員嘅亨少以2千萬美金買咗呢粒超巨型嘅完美珍珠都唔係太誇啫

其實點解要寫佢鐘意自己個妹