前言
點解要講英國？
。。。。。
點解唔講英國？
大不列顛及北愛爾蘭聯合王國，一個被唔少香港人視為祖國嘅國家，以高貴冷艷嘅貴族文化，高度發展嘅社會制度，以及高級難食既菜式聞名於世。英國對現代世界既影響力前無古人，超越古羅馬，後雖有來者，但嗰位後來者美國，都係源自英國一系。
不過一百年前，佢嘅疆土橫跨五大洋六大洲，佔全球土地23.84%，為世界五千年歷史之最（Sorry 成吉思汗）。從倫敦格林威治子午線到開普敦，再到孟買，再到吉隆坡，再到香港，再到悉尼，再到溫哥華，再到多倫多，再返番去格林威治，要用一次世界天氣報告，先行勻成個大英帝國，每一個時區都有米字旗飄揚。
太陽睇厭咗倫敦嘅英國國旗，於是轉一轉個地球儀去亞洲。頂！又係你英國！去美洲。頂！完啦好嗎！。去非洲。ok u win。
所謂日不落帝國，就係咁樣。
認真地講，認識英國既歷史對任何現代人都有好處，英國歷史可以話俾我哋聽，我哋依家生活緊既世界係點嚟。憲法、議會、資本主義，依啲現代社會必不可少既元素，都係由英國人發揚光大。知古鑑今，認識英國歷史係一個好開始。
相比其他國家嘅歷史，英國冇法國咁浪漫激情，亦冇德國咁起伏跌宕。上天冰冇賜與佢諸如拿破崙希特拉等明星人物，但眷顧佢一路平平穩穩，慢慢登上世界之巔。任你拿破崙同希特拉嘅故事有幾精彩，最尾嘅贏家都係企喺海峽遠方嘅一個小島上面。相較於英雄carry，英國嘅發展似係由一群平凡嘅人，經歷無數次試驗同失敗所達成，以致有學者認為英國歷史就係「2000 Years of Upper Class Idiots in Charge」。
究竟，依班白痴係點樣建立依個咁偉大嘅帝國呢？
Here goes.
岀來了
