位於卡地夫（Cardiff）的羅埃林大帝銅像
平心而論，約翰的確遺傳咗佢老竇卓越嘅行政能力，佢一邊招兵買馬，一邊組織工程團隊，建立新式戰船同攻城武器，用咗一年就建立一支強大嘅遠征軍。之但係再打得嘅仆街，都係一個仆街。依個時候佢又搞搞震，粗暴干預坎特伯雷大主教嘅選舉，安插親信擔任。咁啱當時嘅教皇英諾森三世（Innocent III）係個強人，佢向英格蘭下達禁教令，表示不滿，但係約翰睬佢都有味。英諾森三世索性使出大絕－－開除教籍，或稱絕罰令（Excommunication）。
絕罰令簡單嚟講，就係踢你出教會。禁教令同絕罰令嘅分別，就好似警察被停職處分同革職嘅差別。被絕罰者雖然都係基督教徒，但係就同天主教會隔離，唔可以參加任何教會活動例如領聖體咁，得唔到教會嘅救贖，邊個同佢喺宗教上有接觸都會被絕罰，其實即係宗教上嘅杯葛。君主被絕罰，等同將佢同佢嘅子民隔開，人民會覺得係個天要收佢，破壞性極大。
絕。罰
歷史上有無數君主被下達絕罰令，下場都唔係幾好。好似當年神羅皇帝亨利四世被教皇絕罰之後，仲要親自由德國步行到羅馬，冒著風雪，著住破爛嘅衣服，喺教皇城堡門前等咗跪喺度三日三夜先令教皇收回成命，史稱嘉諾撒之行（Road to Canossa）。咁當然亦有唔少人當絕罰令冇到，最串嘴嘅有兩個，一個叫馬丁路德（冇金），另一個係約翰嘅子孫，遲啲會上場。
嘉諾撒之行
去到近代，由於梵蒂岡嘅影響力冇以前咁大，所以絕罰令嘅威力大大降低，而家絕罰令嘅對象，多數都係啲違反人權嘅茂利，或者自稱最接近神嘅男人等。
white princess 就出啦
