德國，可以話係世界上最優秀既國家，亦都係好多巴打嚮往既國家之一。唔少巴打一講起德國歷史，就會講到依個國家係兩次世界大戰期間，周圍屈人機既事蹟。但係，較少人會留意德國係世界大戰前既歷史。咁德國係二十世紀前既歷史係點，佢係點樣成為最優秀國家呢？ 首先，請睇一睇幅地圖。
十七世紀歐洲地圖
圖中可以見到法國、西班牙西班牙、俄羅斯等已經成型。唯獨係德國，你係完全搵唔到佢個名。因為現今既德國，當時就係地圖中間亂到好似亂畫嗰部分。當時既德意志地區存在著成三百幾個小國，冇錯，係三百幾個，多到無人會記得佢地嗰名。但係，佢地有一個一定要記住既共同名稱，就係神聖羅馬帝國。
神聖羅馬帝國（Holy Roman Empire），簡稱神羅，又名德意志第一帝國，聽落好似皇天擊殺咁霸氣，但實際上都係一樣得個講字。所謂帝國，只不過係一堆德意志小國所構成既鬆散聯盟，改依個名只係想痴下羅馬帝國既金糠。神羅皇帝由某啲有選帝候（Prince -Elector）身份既邦國選出，嗰位只不過係一個虛名。依堆小國不時會互相打仗，甚至向皇帝宣戰，有時仲要要拉埋法國依啲大國，整場歐洲大戰。依個混亂局面持續咗五百年，直至德國統一先結束。而一切既起源，就係來自一個叫勃蘭登堡（Brandenburg）既小公國。
事緣十六世紀中業某一日，勃蘭登堡王室嫁咗個女去普魯士大公度，生咗個仔。之後嗰仔繼承大公爵位，但係個人有啲精神問題，處理唔到國家事務。於是普魯士貴族就搵咗佢表親，當時既勃蘭登堡大公代理政事。而依位勃蘭登堡大公嗰仔，就索性一次過繼承勃蘭登堡同埋普魯士，成立勃蘭登堡－普魯士，是為大家熟悉既普魯士王國既前身。
但留意番，由於普魯士公國依然係波蘭王國既封地，於是形成勃蘭登堡－普魯士大公一僕二主，同時侍奉神羅皇帝同波蘭國王既獨特情況。順帶一提，普魯士公國其實係東普魯士（Ducal Prussia），西普魯士（Royal Prussia）當時係直屬波蘭統治，勃蘭登堡同普魯士公國既領土之間俾波蘭隔住。依樣嘢解釋咗點解普魯士之後會係咁針對波蘭，目的就係要攞返西普魯士。
神羅版圖，粉藍色地區為勃蘭登堡及普魯士公國（東普魯士）
