仲有一個影響好似熱浪薯片咁，唔知算辣定唔辣。話說盎格魯－撒克遜人信奉日耳曼異教（Germanic Paganism），即係拜埋啲牛鬼蛇神，蕭生國師等。信耶穌既不列顛土著依鋪大鑊啦，佢哋既教會因為異教統治者既打壓，同羅馬教廷失去聯繫。去到五至六世紀，羅馬教廷成功將天主教打造為基督世界嘅主流派系，而塞爾特人既基督教就分開發展，變到好唔同。塞爾特基督教既特色之一，就係好鍾意封聖，據問單係威爾斯既一個小島，竟然有成二萬個聖字輩，實行樓下看更保叔，都被封做聖保叔。當時英格蘭嘅宗教格局，基本上就係異教再加上塞爾特基督教依個弱勢社群。
羅馬教廷本著冚家應該信教宗，順便信埋天主嘅精神，派出（堅）聖奧古斯丁（Saint Augustine）去英格蘭傳教。耶撚洗腦勁就係人都知㗎啦，天主教好快喺當地佔一席位，聖奧古斯丁喺英格蘭設立兩個教區（Diocese）：約克（York）同坎特伯雷（Canterbury）。兩者流傳至今，後者更係英國聖公會既「首都」教區，聖奧古斯丁因此俾譽為英國教會之父。成個傳教過程由601年聖奧古斯丁成功向肯特國王洗腦，去到686年最後一個異教徒日耳曼國王逝世結束，英格蘭從此就係天主教嘅地頭。教廷對英格蘭嘅影響力十分之大，教宗係宗教同政治嘅KOL，得罪教廷會令國王嘅認受性大減，而英格蘭嘅國王們認為，只有俾坎特伯雷大主教加冕嘅國王，先有資格統治國家。依個局面直到成千年後宗教改革先結束。
聖奧古斯丁向國王們洗進行傳銷
倫敦與坎特伯雷的距離
英國教會「首都」：坎特伯雷大教堂
686年，中國正值武則天當權嘅大唐盛世，而英國依邊啲蠻族先啱啱接受教化，仲處於混亂嘅七國時代，好難令人相信千年之後，依班不列顛「蠻夷」會吊打我大唐嘅子孫。放心，英格蘭即將大國崛起，但係崛起之前，佢仲要經歷兩次獄火焚身，方能浴火重生。曾經侵犯不列顛人嘅盎格魯－撒克遜人，將會親身感受俾人強姦嘅滋味。
本章完
