[足球/穿越]重來一次的足球人生（8）

三十七、


「歡迎收睇2038世界盃亞洲區外圍賽第一輪、香港作客越南嘅賽事。」

「咁相信呢場好多香港球迷都會關注啦，因為係蕭智堯、余仁海、司徒俊緯同埋梁博豪呢四名外流球員首次入選大港腳陣容，而除咗梁博豪之外，其他三個今場都係正選出戰嘅。」

「我哋嚟睇睇雙方正選陣容先，預計越南係排出3-5-2陣式，門將譚林東，三個中堅張小寶、蔡光越、沈國漢，五個中場褚明海、阮黃麟、阮文康、黃登光、劉萬勝，雙箭頭范國勇、杜清忠。」



「阮文康目前係效力緊英超嘅水晶宮啦，相信球迷會比較熟悉，預計佢亦會係對港隊最大威脅嘅球員。今場佢繼續戴上隊長臂章同著上十號波衫，雖然平時喺球會都係踢右翼，但返到嚟國家隊，應該都係會踢返進攻中場，負責策動越南隊嘅進攻。」

「佢一共代表國家隊出戰過七十四場比賽，今次係第三次為越南參加世界盃外圍賽。上屆越南曾經有機會踢入決賽週，但可惜最終未能成事，阮文康無辦法帶領球隊創造歷史。賽前佢話自己已經將近三十歲，所以會將今屆當成係最後一次機會咁去踢。」

「香港呢邊，預計係排出一個菱形4-4-2，門將伍宏威，左閘簡子俊、兩個中堅韋特莊臣、羅俊烽、右閘李尚傑，防中司徒俊緯、左右中場陳泰來、柏真奴、進攻中場蕭智堯，雙箭頭由余仁海拍住隊長吳志鴻。」



「名單上算係比較大路啦，唯一個點就係因為呢個陣容係踢單防中啊，將泰仔安排咗去左路，畀只得十六歲嘅司徒俊緯一個人鎮守中路，所以算係比較大膽同冒險。越南整體呢，特別係兩條邊個機動性比較強，如果港隊壓得太前、或者係保護唔到條防線嘅話，就會好容易俾對方反擊威脅到。」

「鏡頭影住嘅係陳召禧，新任港隊主帥，咁今次都係佢首次帶領港隊踢正式比賽啦，一嚟就係世界盃外圍賽。佢之前主要都係教港青，幾個外流嘅年輕球員，都曾經係由佢執教，所以對佢哋幾個非常熟悉，足總主席韋卓奇先生都講過，話呢一點係佢決定任命陳召禧做教練嘅主要原因之一。」

能容納逾四萬人的美亭國家體育場內一片紅海，從香港遠道而來的作客球迷約有五百多人，在座位附近拉出代表客隊的白色打氣旗幟，上面寫有各球迷組織的名字。

他們早就習慣港隊在國際賽落敗，特別是在世界盃外圍賽，不過這次或許會不一樣。

第一次穿上港隊戰袍，雖然實際年齡已經三十幾歲，也在日職中感受過幾萬名球迷的吶喊聲，但此刻還身在球員通道，蕭智堯已緊張得雙腳不住微微顫抖。

「喂，搞咩啊你，硬撚晒軚咁，等陣咪發波瘟啊，傳好啲添啊你。」余仁海看著他，忍不住露出取笑道，並向隊伍後方的司徒俊緯看去。「司徒望落都無你咁驚青。」

「你都痴撚線，第一次代表港隊喎，緊張好正常啫。」

「緊張，係因為你對自己無信心。」余仁海笑著拍了拍蕭智堯的胸口。旁邊的吳志鴻將這一切看在眼內，但沒有插嘴。

雙方球員步入球場，當蕭智堯、余仁海及司徒俊緯在草地上列陣時，身穿白色球衣的香港球迷隨即興奮地搖旗吶喊，但當然，他們的叫聲幾乎全被主場的越南人遮蓋過去。

蕭智堯仍看向他們，輕輕地點了點頭，彷彿在說：我聽到了。

擲完硬幣，兩名隊長與彼此及四名執法球證握過手，雙方球員在各自的半場站好位置，若從鳥瞰角度來看，跟電視直播上的預計陣容無疑。

賽前越南準備了兩套計劃，分別對應香港三中堅或四後衛。今場對付港隊菱形4-4-2的重點，是用體力比較充沛的中場黃登光去不斷騷擾蕭智堯。他或許算不上十分適合的人選，但越南整體實力本來就較強，所以他只需要能向蕭智堯施加一點壓力，又或是消耗其體力便算是成功。

看到名單時，杜德才便幾可肯定港隊陣式，他曾聽說過對手教練比較大膽，本還懷疑過陳召禧會否留有後手。

「啱先睇余仁海熱身，感覺上比我想像中要好。」杜德才與旁邊的助教說道，似乎已將思考及觀察重心放在港隊另一核心身上。

「好係指……」

「心理質素，」杜德才搖頭答道，並朝余仁海的方向甩了甩下巴。「一個十六歲嘅細路，第一次踢代表隊就係作客世界盃外圍賽，但你睇佢，完全無緊張，個樣仲好似食硬你咁。」

助教這時看向蕭智堯，只見他閉上眼在原地跳動，並不時調整呼吸，很明顯仍處於緊張之中。

「心理質素可以決定好多嘢，我哋呢啲鍾意賭馬嘅，會成日透過睇隻馬嘅步伐、眼神各樣嚟判斷佢當日狀態如何，人雖然更加複雜，但本質其實都係一樣。」杜德才續說道。「余仁海絕對係一隻難得嘅上等馬。」

「反而文康今日感覺上有啲拘緊。」助教輕輕地嘆了口氣。

杜德才沒有答話，因為他能看出，同時也明白，阮文康給予了自己太大壓力，而且除他本人之外，沒有人能將那個重擔卸下。

當然，適當的壓力能讓人成長，也能讓球員有更好表現。

球證吹響哨子，身穿紅色主場球衣的越南將球傳往後方，為這場世界盃外圍揭開序幕。觀眾席上無數面金星紅旗不斷地來回揮動，來自球迷的高歌與打氣聲，也在這球場內一遍又一遍地迴盪著。

“越南嘅進攻多從兩側發動，開波之後可以先等對方攻上嚟，尚傑同子俊喺我未畀手勢之前，唔好輕易過半場住，兩邊中場開頭都要返後幫手先，唔使急住撲上去。”

按陳召禧指示，港隊一開始並未急著壓上，越南也如他所料想般，試圖從兩側尋找突破缺口。

這支球隊在杜德才的帶領下，並未有踢什麼複雜的足球。雖然防守時重視紀律，但進攻時則以快速、靈活及多變作為武器，沒有固定的套路，更講求自由發揮及快速形成攻勢。

因此有時候這些不吝體力的球員，在面對一些較強的對手時，會出現「盲拳打死老師父」的效果－日本韓國跟伊朗也不例外。

「阮文康直線傳落去，禇明海跑到出嚟！壓住李尚傑落底傳中……不過呢球出得有少少貼門，門將伍宏威沒收晒。」

「見到啱先呢球李尚傑其實係無失位，但對方嘅左翼衛禇明海因為跑得比較快啊，加上阮文康呢球個力度都畀得啱啱好啦，所以即使係遲少少起步，都可以快過李尚傑拎到呢球波。」

「同埋越南隊一向都係唔驚同你跑嘅，以前好多港隊球員都話，同佢哋踢仲辛苦過平時練波專登練體能。一有直線畀出去，畀得唔靚或者係唔到都好啦，佢哋都一定會追到尾同你死過。」

越南不到兩分鐘便攻到港隊門前，雖然不算真正攻勢，但也是給予客隊一個下馬威。杜德才滿意地點點頭，拍手並大喊著激勵場上球員。

「繼續係咁踢啱啦！喺兩邊不斷消耗對手！」

杜德才話音剛落，餘光便看到對方門將竟短傳予左閘，他知道陳召禧作風勇敢，但沒想到港隊竟打算從後場開始組織，這在最近多次交手中都極少看見。

「壓上去！」聽到杜德才大叫，越南一眾球員才回過神來，但由於他們沒有及時作出壓迫，讓簡子俊得以轉身推進一小段距離。

「睇住防中司徒！同埋……」

這名越南教頭正想呼喚黃登光去切斷司徒俊緯與蕭智堯之間的連繫，但他很快便意識到，這兩人都不在中場附近。

那個讓他打算以全場人盯人來凍結的進攻中場，此刻竟站在中鋒位置。
___________________________________________________

而家先見到兩張陣型圖唔知點解崩崩地……
得閒自己再砌個Template先

文

假9

好撚正 一次更咁多

他們早就習慣港隊在國際賽落敗，特別是在世界盃外圍賽

希望場波節奏快啲唔好又寫幾個月

中間間場無其他二打六既回憶插入，直入場波，個節奏即刻覺得爽晒

有文睇！爽

港隊線好睇

係港隊

話說個故講主角reboot嚟多次想打攻中唔打閘

但寫咗幾年之後，而家都有閘位內切，咁老簫打返左閘，進攻內切扮奧燒咪可以why bot both

直接做葦人 攻個時入中路打攻中 防去返左閘會唔會仲勁

Push

唔知點解覺得老蕭好似克羅地亞個 perisic 攻中同左閘都得

三十八、


假九（False Nine）……

由於蕭智堯頂在最前方，負責一直貼身盯防他的黃登光，也被逼在己方防線附近遊走。

“原來係咁……”看到這一幕，杜德才已大概猜到陳召禧在打什麼主意。

「使唔使轉陣？」助教狀甚焦急地問道。

「唔使急住，睇定啲先。」杜德才伸出手，示意他先冷靜下來。

讓一個只有十六歲的孩子來執行這種戰術？而且蕭智堯之前應該沒有踢過同樣位置。

傳統足球之中，中鋒位置被稱為「九號」，「假九」的大概意思，是指該球員雖然在位置上是中鋒，但主要責任並非在前方衝擊防線，而是頻繁後撤，為隊友創造空間。

2009年5月2日，巴塞隆拿作客面對皇家馬德里的西甲國家打吡戰，主帥哥迪奧拿讓美斯出任「假九」。該場比賽，巴塞最終在班拿貝以6-2大勝死敵，皇馬後防被這突然其來的一著弄得措手不及，因為美斯會不斷回到中場附近要球，皇馬的中堅不斷被一個問題煩擾：要不要跟上去？

不跟上去，便會讓這名頂尖的盤球手在中前場自由持球轉身，肆意地向後衛衝擊；跟上去，防線便會出現空間，兩側的亨利和伊度奧即看準機會入楔，然後美斯、沙維、恩尼斯達都能送出直線。

皇馬的後防，可說在該場被戲弄得體無完膚。

「呢個位置一啲都唔易踢，近幾十年嚟，踢得好嘅球員，一隻手數得晒。」杜德才盤起雙手說道。「如果呢個教練只係想拙劣咁模仿，可能最終效果係適得其反。」

美斯並不是第一個踢「假九」的球員，但他可能是踢得最出色之人－因為他是美斯。

「司徒俊緯呢下假身非常靚！呃過咗阮文康，傳去前面……呢個時候蕭智堯返到嚟中圈前少少接波，對方嘅防中黃登光一直跟實佢，蕭智堯傳去右路畀柏真奴，睇下有無位去啦。」

「啱先留意到，港隊從左路開始組織嗰陣呢，蕭智堯企個位係比較似中鋒，而同時余仁海同吳志鴻兩個都係拉闊到有啲似翼鋒個位。會唔會陳Sir係安排佢今場踢『偽九號位』呢？」

為什麼陳召禧要這樣安排？現代足球踢「假九」的球員，要不就是速度不快、但身位與傳球能力較佳，可以在中路為兩側隊友策應，例如法明奴及哈利簡尼；還有就是「哥帥系」的球員，例如美斯、大衛施華甚至法比加斯，他們的共通點除了傳球精準以外，還有高超的球商，能夠在那個位置迷惑對手，製造進攻空間。

蕭智堯算嗎？杜德才並不這麼認為，但陳召禧這麼做，並不是單純地要讓他來製造空間，讓余仁海及吳志鴻從兩側插入－因為左腳的余仁海仍在左路、右腳的吳志鴻也在右路，讓他們向中路入楔的效果不佳。