【Sad War】《病港ＩＩ》（７１）

日日用番梘沖涼辟味

課金同連登差百幾篇都未完，仲有貨啩

利申免費仔

海底隧道幾時爛咗㗎？

好似話病者爆發時守咗一排之後炸鳩咗
先保得住港島

推

故事第幾章講好似冇話？好似最多係港鐵隧道時通去將軍澳時意外炸

好早期到港島嗰時喺病獵公會嗰到提及
應該係

引用下

唔係好記得啦

推

但係架貨車唔係係將軍澳咩？係咪唔可以成架揸去地鐵度運

我一同望出窗外，看冷灰灰的天空：「滿天仲未嚟？」

「神隱咗大半年突然間約我哋出嚟，真係夠哂突然。」

「咁表示佢有緊要事同我哋講。」

大約三日前，我和王達尼都收到滿天的信件，說想要今日跟我們會面。

於是乎，我出現在政府總部，恭候著他來臨。

「總統閣下。」政府秘書敲敲門，恭敬地說：「滿天已經係樓下安檢，準備上嚟。」

「帶佢去嚟安全室。」王達尼走到書櫃前，輕輕拉開幾本書。

「啷──」書櫃向右滑動，一道暗門展示眼前。

王達尼輸入密碼後，暗門隨即打開。

「乜鬼嘢嚟。」我頭一次見王達尼辦公室裡有暗門。

「安全室囉。」王達尼領路。

「但如果我無睇錯，你安全室嘅密碼係咪「12345678」？」

「我撳咁快你都睇到？」王達尼一怔。

「……」

穿過直長的走廊，是個美國復古風格的圓形大廳。

中間設有沙發和圓桌，盡頭處是條綠色的直立式滑梯管道。

「依條係……」我打量著滑梯管道。

「我嘅逃生管道。」王達尼得意地輕笑。

「通去邊？」

「要唔要試下？」看樣子王達尼不打算告訴我。

「唔洗。」

「試下無壞喎。」王達尼已經拍我背脊，強烈推薦我試試：「第時有咩事，你都識用依條梯走，哈哈哈哈。」

我半信半疑的坐在沙發上，不再瞧逃生管道半眼。

好快，滿天都前來到安全室中，而且手提著鋁製公事包。

「好耐無見。」王達尼簡單揚手問好。

我和滿天一個眼神和點頭便可，無需太多噓寒問暖。

很久不見，感覺滿天變得更蒼然。

「你話要喺一個機密嘅地方見。」王達尼攤開雙手，環望周圍：「依到啱唔啱你心水？」

「我入正題。」滿天沒意見，就是可以的意思。

「有嘢俾我哋？」我凝視鋁製公事包。

滿天把鋁製公事包放圓桌上，半蹲下來把它解開、打開、展示到我們眼前。

一瓶藥劑。

「……」我沉默不語。

「嗯？」王達尼愣住。

全場肅靜五、六秒，滿天才開腔：「已經過咗臨床前試驗，下步係搵臨床試驗對象。」

「你好似仲未講係咩嚟？」王達尼鎖緊眉頭，盯緊藥劑：「特殊病者藥劑定點……」

「係疫苗。」我語氣很平淡，但心頭顫得很。

王達尼愕然：「咩、咩話？講多次……」

滿天點頭：「嗯，疫苗，專治「笑毒」病毒嘅疫苗。」

王達尼按住心口，表情難以置信：「真定假，唔好講笑喎……」心中的喜悅感比中彩票還要強烈。

「佢唔會得閒到咁遠走過嚟同你講笑。」我上前握起那瓶藥瓶，凝視裡頭奇妙的液體：「依瓶嘢就係拯救世界嘅關鍵？」

王達尼掏出計算機，即時計算著什麼……

「暫時只係喺動物到試驗過，要過到人體試驗先係重點。」滿天站起身。

「哇……」王達尼按著發熱的腦額，整個人表現得坐立難安：「你一個人研發？仲有嗰個、嗰個咩咩大BOSS！？」

「主要係血禍，有佢能力先拆解到好多病理問題。」

我問：「佢係屬於預防定治癒性質？」

滿天答：「疫苗係預防性手段，已經受病毒感染嘅人唔會有效。」

「藥效永久性？」

「佢唔係靈丹妙藥，係種活性減毒疫苗，只可以減輕病毒感染帶嚟嘅症狀，所以如果俾病者感染，依然一樣會受感染，只係可以拖延幾日先病變咁解。」滿天詳說藥劑效用。

王達尼打開圓桌下的小櫃子，拿出一瓶威士忌和三隻杯：「如果一直打呢？我意思係一直拖延住。」分別給我們倒半杯烈酒。

「注射者會持續拖慢病變情況，最怕係病原體存在唔同嘅株，咁疫苗就會無效。」滿天一口乾掉杯中的威士忌。

「好！」王達尼握實拳頭，心懷熱忱：「至少係人類嘅一大步，滿天你有咩需要話？」

儘管疫苗效用沒想像中大，但確確實實是個好開始。

「臨床試驗，即係活人試藥，話風險唔大就假，最壞情況試藥者會發生病變。」

「呢種時勢出得起錢就會有人試，就算係毒藥。」我說。

「唔使哂錢，搵罪犯試藥就得。」王達尼拍板。

合眾國的罪犯如同待用資源，有需要時就會用得上，無人權可言。

「滿天你嚟緊應該會留喺到？」王達尼續問。

「應該會留一段時間。」

「想住酒店定禮賓府？」

「醫院或者實驗室。」

「得，我會幫你搵試藥場地。」

「今日要講嘅就係咁多。」滿天說。

「我送你出去，你依家已經係合眾國一級保護要員，我會派幾個揸槍嘅全天候保護你。」

「你唔考慮整部升降機？每次咁上上落落都幾攰下。」滿天說。

「其實有嘅，但一般權限只係俾政務主任級嘅用，以後你講聲我會叫人開放俾你。」王達尼轉身面向我，指向逃生管道：「M，你真係唔試下？」

「點解你要係咁叫我試……」我有點猶豫。

「想同朋友分享快樂啊嘛。」

我停下來，轉身走向逃生管道內。

其空間大小，剛好足夠一個成年人進入。

「之後？」我想問問有什麼好快樂。

「你企定五秒就得嫁喇。」王達尼說。

我突然感到背部涼涼的，原來有水正從上方流落。

「咻──」話音剛落，垂直的滑梯管道閘口打開。

我瞬間消失於兩人面前，如同瑪利奧給滑梯管道吸入，整個人於滑梯管道中保持微微傾斜滑落，就像水上樂園那長長的水上滑梯，不同的是這條滑梯管道非常非常長，大約過了一分鐘，我仍然保持滑水狀態，不停向著下方滑落。

耳邊除了水流的沖刷聲，就沒有其他聲音，管道亦非常狹窄，讓人有點喘不過氣來。

滑了將近兩分鐘，我背部終於感覺到平坦，滑梯管道水平將我送向一片白光的出口處……

滑出逃生管道當下，大片的天空映入眼簾內，繼而墜落大海上。

「嘭──」

「咳咳、咳……」我游上水面，環望周圍。

那條逃生管道居然是通向維多利亞港……

果然是滿天

如果淨係可以拖延病情，其實都改變唔到啲乜嘢，睇嚟主要都係for 南征用，即使感染咗都唔使要即刻自殺，可以暫時打落去

你想像吓點揸落月台個畫面就知唔work

頂盡嚟計最多經地面車廠出入，但港島綫車廠喺柴灣，將軍澳綫車廠喺康城

滿天可唔可以用你嘅魅力吸引埋亂世中的病者皇天腦啊救世靠你喇

笑毒係病者嘅病源體？
我仲以為係樹鄉令人狂笑嗰啲孢子

應該係後者
呢段應該係想表達滿天佢哋終於可以踏出人類一小步
但正式對付病者病原體都係冇符

樓上去重睇喇
笑毒係余博研發嗰陣改嘅名

仲要成篇文寫得咁清楚講病變
點會無啦啦變咗係關孢子事
雖然樹鄉同孢子明顯仲有條伏線之後有機會解釋